Ang aton Manunuga mas maalam sangsa aton. Mahigugmaon sia nga Amay nga nagaulikid sa aton. Dugang pa, wala niya gintuyo nga mangin independiente kita sa iya. (Jeremias 10:23) Pareho sang bata nga nagakinahanglan sang panuytoy sang iya mga ginikanan, tanan kita nagakinahanglan man sang panuytoy sang Dios. (Isaias 48:17, 18) Ang mga prinsipio sa Biblia regalo sang Dios nga nagatuytoy sa aton.​—Basaha ang 2 Timoteo 3:16.

Ang mga kasuguan kag prinsipio ni Jehova nagatudlo sa aton sang pinakamaayo nga paagi sang pagkabuhi karon kag nagapakita sa aton kon paano matigayon ang dayon nga mga pagpakamaayo sa palaabuton. Bangod ang Dios ang nagtuga sa aton, dapat lang nga sundon naton sing kinabubut-on ang iya panuytoy.​—Basaha ang Salmo 19:7, 11; Bugna 4:11.

Ang mga prinsipio sa Biblia amo ang sadsaran nga kamatuoran. Ang mga kasuguan naman mahimo gamiton sa espesipiko nga mga kahimtangan. (Deuteronomio 22:8) Dapat naton gamiton ang aton ikasarang sa paghunahuna kon paano maaplikar ang isa ka prinsipio sa isa ka kahimtangan. (Hulubaton 2:10-12) Halimbawa, ginatudlo sang Biblia nga ang kabuhi regalo sang Dios. Ina nga prinsipio nagatuytoy sa aton sa aton ulubrahan, sa puluy-an, kag samtang nagabiyahe. Nagabulig ini sa aton nga maghalong.​—Basaha ang Binuhatan 17:28.

Si Jesus nagsiling parte sa duha ka pinakaimportante nga prinsipio. Ang una nagapakita sang katuyuan  kon ngaa gintuga ang tawo—agod kilalahon ang Dios, higugmaon sia, kag alagaron sia sing matutom. Dapat naton binagbinagon ang una nga prinsipio kon nagahimo kita sing mga desisyon. (Hulubaton 3:6) Ang mga nagasunod sa sini nga prinsipio mangin abyan sang Dios, makatigayon sing matuod nga kalipay kag kabuhi nga wala sing katapusan.​—Basaha ang Mateo 22:36-38.

Ang ikaduha nga prinsipio makatuytoy sa aton agod mangin maayo ang aton kaangtanan sa iban. (1 Corinto 13:4-7) Kon ginaaplikar naton ining ikaduha nga prinsipio, ginailog naton ang pagpakig-angot sang Dios sa mga tawo.​—Basaha ang Mateo 7:12; 22:39, 40.

Ang mga prinsipio sa Biblia nagatudlo sa mga pamilya kon paano sila mahiusa sang gugma. (Colosas 3:12-14) Nagaamlig man ang Pulong sang Dios sa mga pamilya paagi sa pagtudlo sa ila sang isa pa ka prinsipio—ang pag-asawahay dapat mangin permanente.​—Basaha ang Genesis 2:24.

Ang pagsunod sa mga panudlo sang Biblia makabulig sa aton sa materyal kag emosyonal. Halimbawa, masami nga nagustuhan ang mga trabahador nga bunayag kag mapisan kay ginasunod nila ang mga prinsipio sa Biblia. (Hulubaton 10:4, 26; Hebreo 13:18) Ang Pulong sang Dios nagatudlo man sa aton nga mangin kontento sa mga butang nga kinahanglanon kag pabaloran ang aton kaangtanan sa Dios labaw sa materyal nga mga butang.​—Basaha ang Mateo 6:24, 25, 33; 1 Timoteo 6:8-10.

Ang pag-aplikar sa mga prinsipio sa Biblia makaamlig sa aton panglawas. (Hulubaton 14:30; 22:24, 25) Halimbawa, ang pagsunod sa kasuguan sang Dios batok sa pagpahubog nagaamlig sa aton sa makamamatay nga mga balatian kag mga aksidente. (Hulubaton 23:20) Ginatugutan kita ni Jehova nga mag-inom sing de-alkohol nga ilimnon pero dapat haganhagan lang. (Salmo 104:15; 1 Corinto 6:10) Ang mga prinsipio sa Biblia nagabulig sa aton paagi sa pagtudlo sa aton nga bantayan indi lang ang aton mga ginahimo kundi pati man ang aton mga ginahunahuna. (Salmo 119:97-100) Pero, ginasunod sang mga Cristiano ang mga talaksan sang Dios indi lang bangod nagabenepisyo sila, kundi luyag gid nila padunggan si Jehova.​—Basaha ang Mateo 5:14-16.