Mga pito na ka dekada ang mga Saksi ni Jehova sa Dominican Republic. Sa sini nga mga tion, maayo gid nga reputasyon ang ila nahimo. Sa masami, ginapalapitan sang mga tawo ang mga manugbantala para mangayo sing literatura, kag kinaandan na nga nagasiling ang mga tawo: “Nanamian ako sa inyo relihion” ukon “Ginasunod n’yo gid ang ginasiling sang Biblia.”

Binagbinaga ang natabo sang ginpatindog ang Kingdom Hall sa lote nga gindonar sang isa ka brother. Sang iparehistro na sang brother ang lote, nadiskobrehan niya nga may iban nga tawo nga nagparehistro sang iya lote, kag gin-akusar sia nga nagapang-agaw sang duta. Gani, ginhusay ini sa korte. Mabudlay ang kaso kay may ginauyatan man nga mga dokumento ang tawo nga nagapamatuod nga sia ang tag-iya sang lote.

Ginpamangkot sang huwes ang abogado kon sin-o ang iya kliyente. Sang ginpaathag sang abogado nga ginatiglawas niya ang asosasyon nga ginagamit sang mga Saksi ni Jehova, ang huwes nagsiling: “Kon amo sina, wala sing rason nga duhaduhaan ang inyo pangangkon. Kilala ko ang mga Saksi ni Jehova, kag nahibaluan ko nga bunayag sila nga mga tawo. Wala nila ginatunto ang iban para lang makuha ang mga butang nga indi ila.”

Sang ginpresentar ang mga ebidensia sa korte, nahibaluan nga indi matuod ang mga dokumento sang tawo, gani nagdesisyon ang huwes pabor sa mga Saksi. “Indi na ini bag-o,” siling sang abogado nga Saksi. “Sa mga korte sa bilog nga pungsod, kon mahinambitan ang mga Saksi ni Jehova, may pagtahod gid ang mga tawo.”

Tion lang ang makasugid kon daw ano pa kadamo ang interesado nga mga tawo nga makatuon sing kamatuoran  sa Biblia kag mangin sumilimba sang matuod nga Dios. Gani, ginahimo ang tanan nga paagi para malab-ot ini nga mga tawo. Halimbawa sang 2013, ang mga Saksi ni Jehova sa Dominican Republic naghinguyang sing sobra 11 milyones ka oras sa pagbantala, kag 71,922 ang ila nahiwatan sing pagtuon sa Biblia. Makapalig-on man nga 9,776 ang nagpayunir. Sang Agosto sina man nga tuig, 35,331 ka manugbantala ang nakigbahin sa ministeryo. Dugang pa, may posibilidad gid sa pag-uswag bangod 127,716 ang nagtambong sa Memoryal.

Daku na ang pag-uswag sa pagbantala kag paghimo sing disipulo nga hilikuton sa Dominican Republic sugod sang Domingo, Abril 1945, sang nag-abot sanday Lennart kag Virginia Johnson kag nagbantala sing maayong balita sang Ginharian. Ginapakabahandi gid sang mga Saksi ni Jehova sa Dominican Republic ang ila bugana nga espirituwal nga palanublion. Ginaapresyar nila ang mga sakripisyo sang mga nauna nga matuod nga sumilimba. Pero labaw sa tanan, ginapabaloran nila karon ang pribilehiyo nga natigayon nila nga ‘magpanaksi sing maid-id tuhoy sa Ginharian sang Dios.’ (Binu. 28:23) Ginapaabot gid nila ang tion nga ang tanan sa sini nga isla lakip ang ila mga masigkasumilimba sa bug-os nga kalibutan magabuylog sa pag-amba: “Si Jehova nangin Hari! Magkalipay ang duta. Magkasadya ang madamo nga isla.”—Sal. 97:1.