SANG 16 anyos ako ginpilit ako sang mga rebelde nga mag-entra sa ila. Ginahatagan nila ako sing droga kag alkohol, kag sa masami high ako kon nagainaway. Madamo ako sing naentrahan nga inaway kag tuman sa akon kapintas. Pero ginhinulsulan ko gid ini tanan.

Isa ka bes, may tigulang nga lalaki nga Saksi nga nagbantala sa amon barracks. Ang kalabanan nahadlok kag naakig sa amon nga mga rebelde, pero sia nangita gid sing paagi para mabuligan kami sa espirituwal. Sang gin-agda niya ako sa miting, nagkadto ako. Wala ako sing madumduman sa miting, pero indi ko malipatan ang mainit nga pag-abiabi sa akon.

Sang nagalapuyot ang inaway, wala na ako sing kontak sa mga Saksi. Isa ka bes, napilasan ako sing malubha gani gindala ako sa lugar nga kontrolado sang mga rebelde agod magpaayo. Antes matapos ang inaway, nakapalagyo ako kag nakalab-ot sa lugar nga kontrolado sang gobierno kag napaidalom sa isa ka programa nga nagabulig sa mga rebelde nga magbag-o.

Kinahanglan ko gid ang espirituwal nga bulig. Nagtambong ako sa mga miting sang Pentecostal, pero gintawag ako sang ila mga miembro nga Satanas. Gani ginpangita ko ang mga Saksi ni Jehova. Sang nakita ko sila, nagtuon ako kag nagtambong sa mga miting. Sang gintu-ad ko ang kalautan nga akon nahimo, ginbasa sang mga utod ang makapalugpay nga pinamulong ni Jesus: “Ang mga tawo nga mapagros wala nagakinahanglan sang manugbulong, kundi ang mga nagamasakit. . . . Nagkari ako sa pagtawag, indi sa matarong nga mga tawo, kundi sa mga makasasala.”—Mat. 9:12, 13.

Natandog gid ako sa sina nga pinamulong! Ginhatag ko ang akon sundang sa brother nga nagatuon sa akon sa Biblia, kag nagsiling: “Ginatigana ko ini para sa mga mabalos sa akon.  Pero bangod nahibaluan ko na nga ginahigugma ako ni Jehova kag ni Jesus, indi ko na ini kinahanglan.”

Gintudluan ako sang mga utod sa pagbasa kag pagsulat. Sang ulihi, nabawtismuhan ako kag nangin regular payunir. Subong, kon mapanaksihan ko gani ang mga rebelde sang una, nagasiling sila nga ginarespeto nila ako kay gintadlong ko ang akon kabuhi. Gintun-an ko pa gani sa Biblia ang opisyal sang amon platoon sadto.

Sang rebelde pa ako, may tatlo ako ka bata nga lalaki. Luyag ko gid sila buligan sa espirituwal sang natun-an ko ang kamatuoran. Nalipay ako kay duha sa ila ang nagbaton! Ang isa sa akon anak nga lalaki di-bawtismado na nga manugbantala kag ang subang auxiliary payunir.