Sining karon lang, ang mga opisyal sang Dej Prison Hospital sa Dej, Romania, naghatag sa mga Saksi ni Jehova sang isa ka certificate of appreciation sa ila ginhimo nga pagtudlo sa Biblia sa sini nga ospital. Base sa certificate, gusto gid ipahibalo sang mga opisyal nga “ginarespeto kag ginapasalamatan gid nila ang ginhimo nga pagtudlo” sang mga kauturan sa sulod sang sobra 18 ka tuig.

Sanday Brother Ruben Mátyás kag Vasile Purdea ang nagbaton sang certificate bilang mga representante sang mga Saksi nga nagaboluntaryo sa pagbantala sa Dej Prison Hospital. Parte sa ila ginahimo didto, si Ruben nagsiling: “Ang kalabanan nga makilala namon wala pa gid makapakig-istorya sa mga Saksi ni Jehova. Madamo sila sang mga pamangkot kag kanami gid sang amon mga pag-istoryahanay.” Si Vasile nagsiling man: “Halimbawa, sang nagligad nga mga binulan, may nakilala kami nga isa ka lalaki nga may malala nga balatian kag na-depress. Pagkatapos namon mabinagbinag ang leksion 02 sang Magkabuhi sing Wala Katapusan! nga brosyur, nagbag-o gid ang iya batasan. Ginpangabay namon ang isa ka brother nga padayunon ang pag-Bible study sa iya kon magbalik na sia sa prisuhan sa Târgu Jiu.”

Wala labot sa Dej Prison Hospital, may ara pa gid 42 ka prisuhan sa bilog nga Romania sa diin may ginahiwat man nga mga miting kag mga Bible study. Madamo nga priso ang nangin interesado gid sa mensahe sang Biblia parte sa paglaum. Halimbawa, nakilala sang mga sister nga nagabisita sa Mioveni Penitentiary ang isa ka babayi nga gin-abandonar sang iya mga ginikanan sang bata pa sia. Nakahimo sia sang malain kag ilegal nga mga butang pero subong, ginhinulsulan gid niya ang iya mga nahimo sang una. Ginsugiran sia sang aton mga sister sang halimbawa sang mga tawo sa Biblia nga nagbag-o sang ila kabuhi paagi sa bulig sang Dios kag ginpatawad Niya sila. Ginpasalig nila sia paagi sa pagbasa sa iya sang ginsulat ni David sa Salmo 27:10: “Bisan pa bayaan ako sang akon amay kag sang akon iloy, si Jehova magasapupo sa akon.” Naghibi ang babayi kag nagsiling sia nga gusto niya matun-an kon ano pa gid ang mga ginatudlo sang Biblia.

Si Brother Marius Marian nangin priso man sang una sa Baia Mare Prison. Sang ara sia didto, nagsugod sia sa pagtuon sa Biblia kag naghimo sia sang mga pagbag-o sa iya kabuhi. Nabawtismuhan si Marius wala madugay pagkatapos sia ginpagua sa prisuhan. Subong, ginasugid na niya ang mga kamatuoran sa Biblia sa mga priso kon diin man sia napriso sang una. Nagsiling si Marius: “Kabalo ’ko nga kinahanglan gid sini nga mga tawo ang bulig. Nalipay gid ’ko nga makabalik diri kag mabuligan sila nga makatuon parte kay Jehova.”

Naapresyar gid naton ang kakugi sang aton mga kauturan sa Romania kag sa iban pa nga mga lugar nga nagasugid sang maayong balita sa mga napriso. Nagapamatuod ini nga ang kabubut-on ni Jehova padayon nga nagakatuman paagi sa pagbantala sa ‘tanan nga sahi sang tawo para makadangat sila sa sibu nga ihibalo tuhoy sa kamatuoran.’—1 Timoteo 2:4.