Ang ginrebisar nga Bag-ong Kalibutan nga Badbad sang Balaan nga Kasulatan ginpagua sa Czeck kag Slovak nga mga lenguahe sang Septiembre 7, 2019. Ini nga mga Biblia ginpagua ni Brother Stephen Lett, nga miembro sang Nagadumala nga Hubon, sa isa ka special meeting nga ginhiwat sa Ostrava, Czech Republic. Ini nga special meeting gin-stream sa sobra 200 ka lokasyon sa Czech Republic kag Slovakia, nga may kabilugan nga nagtambong nga 25,284.

Ini nga mga Biblia resulta sang sobra apat ka tuig nga pagpangabudlay sang tagsatagsa ka translation team. Ining ginrebisar nga mga translation mas mahapos basahon. Ang isa ka miembro sang Slovak translation team nagsiling: “Madamo ang manamian magbasa sini nga Biblia kay makawiwili ini. Ang mga tinaga nga gingamit diri mas mahapos intiendihon kag natural, gani daw indi mo pag-untatan ang pagbasa.”

May sobra sa 15,000 ka Saksi ni Jehova sa Czech Republic kag sobra 11,000 sa Slovakia nga magabenepisyo gid sa sini nga mga Biblia. Ang isa ka miembro sang Czeck translation team nagsiling: “Ang ginrebisar nga Bag-ong Kalibutan nga Badbad nagapokus gid sa pagpagua sang kahulugan sang orihinal nga teksto, gani naggamit ini sing mas malip-ot nga mga sentence kag moderno nga lenguahe. Mas mahapos ini maintiendihan indi lamang sang madugay na nga mga Saksi kundi pati man sang mga pamatan-on nga bag-uhan sa kamatuoran.”

Ang kompleto nga Bag-ong Kalibutan nga Badbad sang Balaan nga Kasulatan ukon ang pila ka bahin sini na-translate na sa 184 ka lenguahe, pati ang 29 ka kompleto nga rebisyon base sa 2013 nga edisyon. Ginapangamuyo naton nga makabulig ini nga mga Biblia para mas malab-ot sang kamatuoran ang tagipusuon sang mga nagabasa sini.—Lucas 24:32.