N’whẹ́n to tòho pẹvi Warialda tọn mẹ, he tin to Nouvelle-Galles du Sud. Gletòho de wẹ, he mẹ mẹlẹ nọ yìn lẹngbọ po oyìn lẹ po te bosọ nọ do jinukun po omá lẹ po. Lẹdo lọ mẹ́sin podọ danuwiwa ma nọ saba jọ to finẹ.

Na yẹn wẹ yin tintan to ovi ao he mẹjitọ ṣie lẹ ji lẹ mẹ wutu, owhe 13 wẹ n’do bo jẹ azọ́nwa ji nado gọalọ to nuhudo whẹndo lọ tọn lẹ mẹ. Na n’ma plọnwe yinukọn sọmọ to wehọmẹ wutu, glezọ́n wẹ n’nọ wà. Whenue n’do owhe 15, n’jẹ azọ́nwa ji to opá he mẹ yè nọ penukundo osọ́ lẹ go te lẹ mẹ.

Azọ́nwiwa to opá enẹlẹ mẹ do ale po awusinyẹnnamẹnu etọn lẹ po. Jẹnukọn whẹ́, n’duvivi azọ́n lọ tọn taun bosọ yiwanna filọ. To zánmẹ lẹ, n’nọ sinai pannukọn nake-miyọ́n de to gbonu bo nọ to osun po sunvi he to agahomẹ lẹ po pọ́n, bọ jẹhọn flẹ́flẹ́ he to yìnyìn nọ hẹn owán ogbé-mú he to yakẹ lẹ tọn gbàpe. N’flindọ n’nọ lẹn to dee mẹ dọ Mẹde janwẹ na ko dá onú whanpẹnọ ehelẹ. Amọ́, n’sọ pehẹ nuyiwadomẹji ylankan delẹ to opá lọ lẹ mẹ. Mẹhe ṣẹnṣẹn n’te lẹ nọ saba zan hogbe agbàagba lẹ, bo nọ nù siga taun. E ma dẹn bọ yẹnsu wá peve to aṣa gblezọn enẹlẹ mẹ.

Whenue n’do owhe 18, n’sẹtẹn yì tòdaho Sydney tọn mẹ. N’tẹnpọn nado biọ awhànzọ́n mẹ, amọ́ yè ma kẹalọyi mi na n’ma yì wehọmẹ sọmọ wutu. N’wá mọ azọ́n de bo gbọṣi Sydney na owhe dopo. Ojlẹ enẹlẹ mẹ wẹ n’dukosọna Kunnudetọ Jehovah tọn lẹ te whla tintan. Yé basi oylọna mi, bọ n’yigbe nado wá opli yetọn de tẹnmẹ, podọ tlolo wẹ e họnwun na mi dọ nuplọnmẹ yetọn lẹ yin nugbo.

Amọ́ azán de majẹ, gàn de majẹ, n’basi dide nado gọyì gbétatò de mẹ. Enẹwutu, n’yì Goondiwindi, to Queensland. N’mọ azọ́n de to finẹ, bosọ wlealọ, amọ́ e blawu dọ n’wá gọjẹ ahànnu ji.

Yẹn po asi e po tindo ovi awe. Whenue n’ji visunnu ṣie lẹ godo, wẹ nuhe n’yí ogbẹ̀ ṣie do to wiwà jẹ ahunmẹduna mi ji sinsinyẹn. Nuhe n’nọ sè dai to opli Kunnudetọ lẹ tọn ji to Sydney lẹ gọjẹ ayiha mẹ wá na mi ji, bọ n’basi dide nado yí nude wà.

N’dín vọkan Atọ̀họ̀-Nuhihọ́ lọ Tọn hoho de mọ, he mẹ adlẹsi wekantẹn alahọ Kunnudetọ Jehovah tọn lẹ tọn Australie tọn tin te. N’kanwehlan yé dọ yé ni gọalọna mi. Taidi kọdetọn de, yé do Kunnudetọ he jọmẹ bo nọ do owanyi hia de hlan mi. To ojlẹ vude godo, e jẹ Biblu plọn mi ji.

Dile n’to Biblu plọn, n’mọdọ e biọ dọ n’ma diọ nususu to gbẹzan ṣie mẹ. Wefọ Biblu tọn he yinuwado ji e sisosiso wẹ 2 Kọlintinu lẹ 7:1. Wefọ enẹ na mí tuli nado “klọ́ míde wé sọn hẹnflu agbasalan tọn … lẹpo mẹ.”

N’basi dide nado doalọtena azọ̀-nùnù po ahàn sinsinyẹn ṣiṣizan po. E ma bọawuna mi paali nado basi diọdo ehelẹ, na n’ko doalọ to aṣa enẹlẹ mẹ na owhe susu. Amọ́, n’wá magbe nado zan gbẹzan he nọ hẹn homẹ Jiwheyẹwhe tọn hùn. Nuhe gọalọna mi hugan wẹ ayinamẹ Lomunu lẹ 12:2 tọn yíyí-do-yizan mẹ, he dọ: “Mì hodo titonu ehe ba blo, ṣigba mì yin adàdiọna gbọn ayiha mìtọn didiọ dali.” N’wá mọnukunnujẹemẹ dọ eyin e na pà mi nado jo aṣa ylankan ṣie lẹ do, n’dona diọ aliho nulẹnpọn tọn ṣie bo nọ pọ́n aṣa enẹlẹ hlan dile Jiwheyẹwhe nọ wà do—yèdọ taidi awugblenu lẹ. Po alọgọ Jehovah tọn po, n’penugo bo doalọtena azọ̀-nùnù po ahàn sinsinyẹn ṣiṣizan po.

Amọ́, nudevo he sọ wá kàn dẹpẹ biọ taun wẹ hogbe agbàagba lẹ jijodo. N’yọ́n ayinamẹ he Biblu na to Efesunu lẹ 4:29 mẹ dọ: “Mì dike ohó gbigble de tọ́njẹgbonu sọn onù mìtọn mẹ blo.” Etomọṣo, e gbẹ́ vẹawuna mi to bẹjẹeji nado nọ zan hogbe he sọgbe lẹ. Ayihamẹlinlẹnpọn do nuhe Isaia 40:26 dọ lẹ ji wẹ wá gọalọna mi. Wefọ lọ dọho gando agahomẹ po sunwhlẹvu lẹ po go dọmọ: “Mì ze nukun mìtọn lẹ daga hlan olọn bo pọ́n. Mẹnu wẹ dá onú ehelẹ? Mẹhe nọ hẹn awhànpa yetọn jẹgbonu wá to sọha mẹ lọ wẹ; E nọ yí oyín yetọn do ylọ dopodopo yetọn. Na huhlọn daho he gbloada etọn po huhlọn jiawu etọn po wutu, dopo tata to yé mẹ ma nọ whè.” N’wá dọna dee dọ, eyin Jiwheyẹwhe do huhlọn nado dá wẹkẹ gblagada ehe, bọ e nọ yọ́npọ́n na mi taun, ayihaawe ma tin dọ e na na mi huhlọn nado diọ aliho gbẹninọ tọn ṣie bo hẹn homẹ etọn hùn. N’hodẹ̀ taun bosọ dovivẹnu gli, bọ vudevude n’penugo nado nọ dava dee eyin n’ja hodọ gbé.

Whenue n’to azọ́nwa to opá osọ́ lẹ tọn mẹ, n’ma nọ do dotẹnmẹ nado dọho hẹ mẹsusu sọmọ, na omẹ nẹmu de ma nọ nọ̀ opá enẹlẹ mẹ. Etomọṣo, azọ́nplọnmẹ he n’mọyi to opli Kunnudetọ Jehovah tọn lẹ tọn ji ko gọalọna mi nado yọ́n hodọna mẹlẹ. To ale he azọ́nplọnmẹ enẹ ko hẹnwa na mi lẹ mẹ, dopo wẹ yindọ e zọ́n bọ n’penugo nado nọ dọhona mẹdevo lẹ gando wẹndagbe Ahọluduta Jiwheyẹwhe tọn go.—Matiu 6:9, 10; 24:14.

E ko yì owhe susu din he n’to sinsẹ̀n taidi mẹho agun tọn. N’mọdọ lẹblanulọkẹyi de wẹ e yin na mi nado nọ wà nuhe go n’pé lẹpo nado gọalọna yisenọ hatọ ṣie lẹ. Amọ́, dona daho hugan he n’ko mọyi wẹ nado to Jehovah sẹ̀n to kọndopọ mẹ hẹ asi nugbonọ podọ owanyinọ ṣie gọna ovi vivẹ́ mítọn lẹ.

N’nọ dopẹna Jehovah, na dotẹnmẹ he e na mi nado yin pinplọn gbọn ewọ dali, yèdọ yẹn mẹhe ma sèwé sọmọ de. (Isaia 54:13) Na nugbo tọn, n’mọ nugbo-yinyin nuhe Howhinwhẹn lẹ 10:22 dọ tọn hezeheze, dọ: “Dona Jehovah tọn wẹ nọ hẹnmẹ wàdọkun.” Todido yẹn po whẹndo ṣie po tọn wẹ nado to nususu plọn dogọ gando Jehovah go bosọ sẹ̀n ẹn kakadoi.