OTÀN GBẸZAN TỌN

Mí Ganjẹ Jehovah Go bo Mọ Dona Susu Yí

Dile eyin didọ gbọn Malcolm Allen dali

Gbẹninọ vẹawu, podọ gbẹ̀watọ ma nọ sìn gbẹ̀dán. Amọ́, Jehovah nọ dona mẹhe nọ ganjẹ ewọ go kakati nido yin nuyọnẹn yetọn titi go lẹ. Nuhe yẹn po asi ṣie po tindo numimọ etọn to gbẹzan pekọnọ mítọn mẹ niyẹn. Mì gbọ mí ni pìntàn mítọn vude na mì.

OTỌ́ ṣie dukosọ hẹ onọ̀ ṣie to 1919 to plidopọ agbegbe tọn he Biblu Plọntọ lẹ basi de ji to Cedar Point, Ohio, États-Unis. Owhe enẹ dopolọ mẹ wẹ yé wlealọ te. N’yin jiji to 1922, podọ to owhe awe godo, nọvisunnu ṣie Paul yin jiji. Asi ṣie Grace yin jiji to 1930. Mẹjitọ etọn lẹ, Roy po Ruth Howell po yin pinplọn whẹ́n taidi Biblu Plọntọ, podọ mẹjitọ daho etọn lẹ lọsu yin Biblu Plọntọ bosọ yin họntọn Mẹmẹsunnu Charles Taze Russell tọn.

N’dukosọ hẹ Grace to 1947, podọ mí wlealọ to 16 juillet 1949. Whẹpo mí do wlealọ, mí tindo hodọdopọ nujọnu tọn de gando sọgodo mítọn go. Mí basi dide nado tindo mahẹ to sinsẹ̀nzọn whenu-gigọ́ tọn mẹ podọ mí magbe ma nado jivi. To 1^er octobre 1950, mí bẹ azọ́n gbehosọnalitọ whepoponu tọn jẹeji dopọ. Enẹgodo to 1952, mí yin oylọ-basina nado bẹ azọ́n nugopọntọ lẹdo tọn jẹeji.

AZỌ́N NUGOPỌNTỌ LẸDO TỌN PO AZỌ́NPLỌNMẸ GILIADI TỌN PO

Mí mọdọ mí tindo nuhudo azọ́nplọnmẹ susu tọn nado hẹn azọ́ndenamẹ yọyọ ehe di. Dile n’to nuplọn sọn mẹmẹsunnu numimọnọ lẹ dè, n’sọ dín alọgọ na Grace lọsu. N’dọnsẹpọ mẹmẹsunnu Marvin Holien, mẹhe yin họntọn whẹndo mítọn tọn sọn ojlẹ dindẹn die bo ko sẹ̀n taidi nugopọntọ lẹdo tọn pọ́n bosọ tindo numimọ. N’dọna ẹn dọmọ: “Grace yin jọja bo masọ tindo numimọ. Be a yọ́n mẹmẹyọnnu de he sọgan plọnazọ́n ẹn dogọ na ojlẹ de ya?” Ewọ gblọn dọmọ: “Mọwẹ, n’lẹndọ mẹmẹyọnnu Edna Winkle he yin gbehosọnalitọ numimọnọ de sọgan gọalọna ẹn.” To nukọn mẹ, Grace wá dọ gando Edna go dọmọ: “E gọalọna mi nado nọ voawu to gbẹtọ lẹ nukọn, e yọ́n lehe yè nọ duto mẹhe nọ hẹnalọdotena hodọdopọ lẹ ji do ganji, podọ e plọn mi nado nọ dotoaina whétọ lẹ po sọwhiwhe po nado sọgan yọ́n nuhe e jẹ dọ ma gblọn. Nuhe sin nuhudo n’tindo pẹpẹ lọ niyẹn!”

Yẹn po Grace po sẹ̀n to lẹdo awe mẹ to ayimatẹn Iowa tọn mẹ, gọna apadewhe ayimatẹn Minnesota po Dakota du Sud po tọn. Enẹgodo, mí yin azọ́ndena nado yì sẹ̀n to lẹdo sọha 1 New York tọn mẹ, ehe bẹ tòdaho Brooklyn po Queens po tọn lẹ hẹn. Mí ma sọgan wọn gbede dọ to ojlẹ lọ mẹ, mí mọdọ mí ma tindo numimọ sọmọ nado hẹn azọ́ndenamẹ enẹ di.  Lẹdo he mí dlapọn bẹ agun Brooklyn Heights tọn hẹn, ehe nọ basi opli to Plitẹnhọ Ahọluduta tọn he tin to owhé Bẹtẹli tọn gbè podọ hagbẹ whẹndo Bẹtẹli tọn numimọnọ susu wẹ tin to agun lọ mẹ. To whenue n’na hodidọ sinsẹ̀nzọn tọn tintan to agun enẹ mẹ, Mẹmẹsunnu Nathan Knorr dọnsẹpọ mi bo dọna mi dọmọ: “Malcolm, a na mí ayinamẹ delẹ he ji mí dona wazọ́n do, podọ ayinamẹ lọ lẹ sọgbe. Ma wọn blo, eyin a ma na mí ayinamẹ dagbe lẹ nado gọalọna mí, be a ma yọ́n-na-yizan sọmọ na titobasinanu lọ. Zindonukọn to azọ́n dagbe wiwà mẹ.” To opli lọ godo, n’dọho lọ na Grace. Enẹgodo, mí yì ohọ̀ he yè na mí mẹ to Bẹtẹli. Na mí jẹflumẹ wutu, mí viavi.

To osun delẹ godo, mí mọ wekanhlanmẹ de yí, he to oylọ-basina mí nado yì klasi 24tọ Wehọmẹ Giliadi tọn, podọ wehọmẹvi lẹ na mọ gbedewema yí to février 1955. Whẹpo mí do yì wehọmẹ lọ, yé dọna mí dọ azọ́nplọnmẹ he mí na mọyi lọ ma yin nado wá lẹzun mẹdehlan dandan gba. Kakatimọ, e na hẹn mí pegan nado tindo kọdetọn dagbe dogọ to azọ́n nugopọntọ tọn mítọn mẹ. Ayajẹnu wẹ e yin nado yì wehọmẹ lọ, podọ e sọ gọalọna mí nado wleawuna whiwhẹ.

To whenue mí dotana nupinplọn mítọn, mí yin azọ́ndena nado yì sẹ̀n taidi nugopọntọ agbegbe tọn. Agbegbe he mí nọ dlapọn bẹ ayimatẹn Indiana, Michigan, po Ohio po tọn hẹn. Enẹgodo, nupaṣamẹ wẹ e yin na mí to décembre 1955 nado mọ wekanhlanmẹ de yí sọn Mẹmẹsunnu Knorr dè he dọmọ: “Dọ hójọhó na mi bo ma whlá nude do mi blo. Eyin e na jlo we nado wá Bẹtẹli bo gbọṣi fi . . . kavi nado nọ Bẹtẹli na ojlẹ de bo wá yin didohlan tògodo, dike ma yọnẹn. Eyin e ka sọ yindọ azọ́n nugopọntọ agbegbe tọn po lẹdo tọn po wẹ jlo we, bo dọna mi.” Mí na gblọndo dọ homẹ mítọn na hùn nado kẹalọyi azọ́ndenamẹ depope he yin didena mí. To afọdopolọji, mí yin oylọ-basina nado wá Bẹtẹli!

OJLẸ AYAJẸ TỌN LẸ TO BẸTẸLI

To ojlẹ ayajẹ tọn he n’yizan to Bẹtẹli enẹlẹ mẹ, n’nọ yin azọ́ndena nado na hodidọ to agun lẹ mẹ podọ to plidopọ voovo lẹ ji to États-Unis. N’plọnazọ́n sunnu jọja susu lẹ bo gọalọna yé, podọ to nukọn mẹ yé wá penugo nado penukundo azọngban susu lẹ go to titobasinanu Jehovah tọn mẹ. To godo mẹ, n’wazọ́n hẹ Mẹmẹsunnu Knorr taidi wekantọ etọn to azọ́nwatẹn he nọ deanana azọ́n yẹwhehodidọ lẹdo aihọn pé tọn.

N’mọ ayajẹ susu to whenue n’to sinsẹ̀n to Azọ́nwatẹn Sinsẹ̀nzọn tọn. To finẹ, n’wazọ́n hẹ T. J. (Bud) Sullivan. Ewọ yin nugopọntọ azọ́nwatẹn enẹ tọn na owhe susu lẹ. Ṣigba, n’sọ plọn nususu sọn mẹdevo lẹ dè. Dopo to yé mẹ wẹ Fred Rusk, mẹhe yin dide nado plọnazọ́n mi. N’flindọ n’kanse e to gbèdopo dọ, “Fred, naegbọn a do nọ basi vọjlado lẹ to wekanhlanmẹ he n’kàn delẹ mẹ?” E konu bo dọ nuhe hẹn mi  lẹnnupọn ehe dọ, “Malcolm, eyin a dọ nude to whenue a to hodọna mẹde, hogbe towe he bọdego lẹ sọgan basi zẹẹmẹ nuhe a dọ tọn, ṣigba eyin a kàn nude, titengbe eyin nuhe a kàn lọ na tọ́n sọn Bẹtẹli, e dona họnwun bo sọgbe dile e sọgan yọnbasi do.” Enẹgodo, e dọhona mi po homẹdagbe po dọmọ: “Ma dibu blo, a to dagbe wà, to madẹnmẹ a na yọ́n azọ́n ganji.”

To owhe he mí yizan to Bẹtẹli lẹ gblamẹ, Grace mọ azọ́ndenamẹ voovo lẹ yí, taidi nukunpipedo wiwejininọ adọtẹn lẹ tọn go. E yiwanna azọ́n lọ taun. Kakajẹ din, eyin mí dukosọ hẹ delẹ to sunnu jọja he tin to Bẹtẹli to ojlẹ enẹ mẹ lẹ mẹ, yé nọ dọna Grace po nukiko yẹsẹ po dọ, “Mì plọn mi lehe yè nọ tẹ́ akanma do ganji, podọ n’jlo na dọna mì dọ onọ̀ ṣie yiwanna azọ́n he mì plọn mi.” Grace sọ duvivi azọ́nwiwa to azọ́nwatẹn he nọ penukundo linlinnamẹwe, wekanhlanmẹ po nuyidokanji lẹ po go tọn. Nukunpipedo azọ́ndenamẹ voovo enẹlẹ go gọalọna ẹn nado mọnukunnujẹemẹ dọ, mahopọnna nudepope he mí to wiwà kavi fidepope he mí to sinsẹ̀n te to titobasinanu Jehovah tọn mẹ, lẹblanulọkẹyi po dona de po wẹ e yin. E gbẹ́ nọ tindo numọtolanmẹ enẹ todin.

DIỌDO HE MÍ BASI LẸ

To owhe 1970 lẹ gblamẹ, mí mọdọ mẹjitọ mítọn he ko poyọnho lẹ tindo nuhudo nukunpedomẹgo tọn dogọ. To nukọn mẹ, mí pannukọn nudide sinsinyẹn de. Mí ma jlo na tọ́n sọn Bẹtẹli, podọ mí ma jlo na jo mẹhe po mí po to devizọnwa na Jehovah lẹ do, yèdọ mẹhe mí yiwanna taun lẹ. Etomọṣo, n’mọdọ azọngban ṣie wẹ nado penukundo mẹjitọ mítọn lẹ go. Enẹwutu, to ojlẹ de godo, mí tọ́n sọn Bẹtẹli po todido lọ po dọ eyin ninọmẹ mítọn wá diọ, mí sọgan lẹkọwa.

Nado penukundo whẹndo ṣie go to akuẹzinzan-liho, n’nọ wazọ́n na azọ́nwhé he nọ gọalọna gbẹtọ lẹ to nujijọ ajiji whenu, ehe nọ biọ dọ ma gbọn whégbè whégbè nado basi zẹẹmẹ nuhe azọ́nwhé lọ nọ wà lẹ tọn na gbẹtọ lẹ. N’gbẹ́ nọ flin nuhe ogán de dọna mi to whenue e to azọ́nplọn mi dọmọ: “Azọ́n ehe nọ biọ dọ yè ni dla gbẹtọ lẹ pọ́n to whèjai lẹ. Ojlẹ enẹ mẹ wẹ yè sọgan nọ mọ yé te. Nuhe yin nujọnu hugan wẹ nado nọ yì dla gbẹtọ lẹ pọ́n to whèjai lẹpo.” N’gblọn dọ, “N’yọnẹn dọ mì tindo numimọ azọ́n lọ tọn wẹ zọ́n bọ mì do dọmọ, podọ n’yọ́n pinpẹn nuhe mì dọ tọn. Amọ́ n’sọ tindo azọngban delẹ to gbigbọ-liho ehe n’ma nọ dovọ́na gbede podọ n’ma jlo na wàmọ. N’na nọ yì dla gbẹtọ lẹ pọ́n to whèjai delẹ, amọ́ to whèjai mardi po jeudi po tọn lẹ n’dona nọ yì opli titengbe delẹ.” Jehovah dona mi nugbonugbo na n’ma nọ gọ̀n opli lẹ na agbasazọ́n wutu.

Alọ mítọn mẹ wẹ onọ̀ ṣie kú do to owhé mẹgopinpọn tọn gbè to juillet 1987. Ogán mẹgopọntọ lẹ tọn dọna Grace dọmọ: “Nawe, mì wá yì whégbè bo gbọjẹ. Mẹlẹpo wẹ yọnẹn dọ mì nọ tin tofi to whelẹponu nado gọalọna asu-nọ̀ mìtọn. Homẹ mìtọn ni hùn, na mì ni deji dọ mì ko wà nuhe go mì pé lẹpo.”

To décembre 1987, mí doalọwemẹ nado wà sinsẹ̀nzọn whladopo dogọ to Bẹtẹli, fie mí yiwanna. Ṣigba to azán vude godo, doto lẹ mọdọ Grace tindo kansẹẹ  adọ̀vi tọn. To whenue yé wazọ́n mẹzizẹ tọn na ẹn bọ e gọ̀ jẹ gángán godo, yé dọ dọ ewọ masọ tindo kansẹẹ ba. Ṣigba, to ojlẹ enẹ mẹ, mí mọ wekanhlanmẹ de yí sọn Bẹtẹli he biọ to mí si nado zindonukọn to lizọnyizọn lọ mẹ to agun mítọn mẹ. Mí magbe nado zindonukọn to azọ́n Ahọluduta lọ tọn mẹ.

To nukọn mẹ, n’mọ agbasazọ́n de to Texas. Mí mọdọ ninọmẹ aimẹ tọn hùnmiyọ́n to finẹ bo na wà dagbe na mí, podọ e sọ yin domọ. To Texas fi, mí ko yí nudi owhe 25 zan to mẹmẹsunnu po mẹmẹyọnnu mẹtọnhopọntọ lẹ po ṣẹnṣẹn, podọ mí ko lẹzun họntọn vivẹ́.

NUHE MÍ PLỌN LẸ

To owhe lẹ gblamẹ, doto lẹ mọ kansẹẹ adọ̀vi po vẹ́go po tọn na Grace, podọ to agọe, yé sọ mọ kansẹẹ anọ́ tọn na ẹn. E ma nọ wule gando nuhahun he e to pipehẹ to gbẹzan etọn mẹ go gbede, ṣigba e nọ litaina tito tatọ́-yinyin tọn bosọ nọ kọngbedopọ hẹ mi. Mẹdevo lẹ nọ kanse e dọ, “Etẹwẹ gọalọna hiẹ po asu towe po nado tindo kọdetọn dagbe to alọwle mìtọn mẹ podọ nado tindo ayajẹ?” E nọ na whẹwhinwhẹ́n ẹnẹ ehelẹ: “Mí yin họntọn vivẹ́ lẹ. Mí nọ dọhodopọ egbesọegbesọ. Mí yiwanna nado nọ yí whenu zan hẹ ode awetọ to azán lẹpo gbè. Podọ, eyin mí hẹn homẹgble ode awetọ, mí nọ didẹ nuhahun lọ whẹpo do nọ yì mlọnai to vivọnu azán lọ tọn.” Nugbo wẹ dọ mí nọ ṣinuwa do ode awetọ to whedelẹnu, ṣigba mí nọ jona míde bosọ nọ wọnji e go, podọ mọwiwà gọalọna mí taun.

To whlepọn he mí pehẹ lẹpo whenu, mí plọn onú dagbe ehelẹ:

(1) Nọ ganjẹ Jehovah go to whepoponu bo nọ kẹalọyi nuhe ewọ na dotẹnmẹ nado jọ lẹ. Ma nọ ganjẹ nukunnumọjẹnumẹ towe titi go gbede blo.—Howh. 3:5, 6; Jel. 17:7.

(2) Nọ ganjẹ Ohó Jehovah tọn go nado mọ anademẹ to ninọmẹ lẹpo mẹ. Dandannu wẹ e yin nado nọ setonuna Jehovah bo nọ yìn osẹ́n etọn lẹ. Mí dona de nado setonu kavi lala.—Lom. 6:16; Heb. 4:12.

(3) Onú dopo wẹ yin nujọnu hugan to gbẹ̀mẹ, enẹ wẹ nado tindo haṣinṣan dagbe de hẹ Jehovah. Nọ ze Ahọluduta lọ do otẹn tintan mẹ bo ma nọ doafọna agbasanu lẹ blo.—Howh. 28:20; Yẹwh. 7:1; Mat. 6:33, 34.

(4) Nọ hodẹ̀ nado tindo kọdetọn dagbe podọ nado yin zohunhunnọ to sinsẹ̀nzọn Jehovah tọn mẹ dile e yọnbasi do. Nọ na ayidonugo nuhe a sọgan wà lẹ, e ma yin nuhe a ma sọgan wà lẹ.—Mat. 22:37; 2 Tim. 4:2.

(5) Yọnẹn dọ titobasinanu devo de ma tin he tindo godonọnamẹ po nukundagbe Jehovah tọn po.—Joh. 6:68.

Yẹn po Grace po sẹ̀n Jehovah na nuhe hugan owhe 75, podọ taidi asu po asi po mí ko sẹ̀n ewọ na nudi owhe 65. Mí tindo ayajẹ susu to owhe ehelẹ gblamẹ dile mí to sinsẹ̀nzọnwa hlan Jehovah to pọmẹ. Todido po odẹ̀ mítọn po wẹ yindọ mẹmẹsunnu po mẹmẹyọnnu mítọn lẹ lọsu po ni ganjẹ Jehovah go bo duvivi ale he mọwiwà nọ hẹnwa tọn.

[Yẹdide lẹ to weda 18]

Sọn amiyọn mẹ: Nathan Knorr, Malcolm Allen, Fred Rusk, Lyle Reusch, Andrew Wagner

[Nudọnamẹ tangan lẹ to weda 18]

“Eyin a ma na mí ayinamẹ dagbe lẹ nado gọalọna mí, be a ma yọ́n-na-yizan sọmọ na titobasinanu lọ. Zindonukọn to azọ́n dagbe wiwà mẹ”

[Yẹdide lẹ to weda 19]

Aga: Fern po George Couch po gọna yẹn po Grace po to Giliadi, to 1954

[Yẹdide lẹ to weda 19]

Odò: N’to azọ́nwa to Azọ́nwatẹn Sinsẹ̀nzọn tọn, to 1956

[Nudọnamẹ tangan lẹ to weda 20]

“Nọ ganjẹ Jehovah go to whepoponu bo nọ kẹalọyi nuhe ewọ na dotẹnmẹ nado jọ lẹ”