NUKPINKPLƆN 55
Nɔ Nɔgodona Agun Towe
Lɛdó ayihɔ́n kpé, gbɛtɔ́ livi susu wɛ nɔ yí ayǎjɛ dó sɛ̀n Jehovah to agun fɔtɔ́n susu lɛ mɛ. Yé nɔ nyɔ́ kpinkpɛn nukplɔ́nmɛ kpó anaɖemɛ xe yé nɔ mɔyi lɛ kpó tɔn, kpóɖɔ yé nɔ yí zohunhun dó nɔgodona agun lɔ to alixo voovo lɛ mɛ. Be numɔtolanmɛ ɖokpólɔ́ wɛ hyɛ lɔsu nɔ ɖó gandó agun towe go ya?
1. Alixo tɛlɛ mɛ wɛ a sɔgǎn nɔ yí hwenu kpó xúhlɔn towe kpó zán nadó nɔgodona agun lɔ te?
Mǐmɛkpó wɛ sɔgǎn gɔalɔ to agun lɔ mɛ. Ði akpajlɛ̌, be mɛxomɛ kavǐ maɖogánnɔ ɖélɛ to agun towe mɛ ya? Be a sɔgǎn gɔalɔ nadó nɔ zé yé yì okpli lɛ ya? Kavǐ be a sɔgǎn gɔ́alɔna yé nadó wà nudélɛ, tayiɖi nadó xwleaxi kavǐ wà xwégbè-zɔ́n lɛ ná yé ya? (Xya Jakɔbu 1:27.) Mǐ sɔgǎn sɔ́ zé mǐɖe jo nadó hɛn Kplitɛnxɔ Axɔluɖuta tɔn mǐtɔn dó wiweji kpóɖɔ nadó kpénukúndego. Mɛɖé ma nɔ hɛn mǐ kpó xúhlɔn kpó nadó wà onǔ enɛlɛ. Owǎnyi mǐtɔn ná Jixwéyɛxwe kpó mɛmɛsunnu mǐtɔn lɛ kpó wɛ nɔ hwàn mǐ nadó “zé [mǐɖe] jo sɔ́n ojlǒ mɛ wá.”—Salmu lɛ 110:3.
Wɛnlatɔ xe ko yí baptɛm lɛ sɔgǎn gɔ́alɔna agun lɔ to alixo ɖevo lɛ mɛ. Mɛmɛsunnu gbigbɔnɔ xe kpégan lɛ sɔgǎn sɛ̀n tayiɖi devizɔnwatɔ lizɔnyizɔnwiwa tɔn, kpóɖɔ tayiɖi mɛxo agun tɔn lɛ to nukɔn mɛ. Mɛmɛsunnu kpó mɛmɛnyɔnu lɛ kpó sɔgǎn yí zohunhun dó nɔgodona azɔ̌n yɛxwexoɖiɖɔ tɔn lɔ, gbɔn gbexosɔnalitɔ bibasí dali. Kpóɖɔ Kunnuɖetɔ́ ɖélɛ sɔgǎn gɔalɔ nadó gbá nɔtɛn sinsɛ̀n-bibasí tɔn lɛ kavǐ sɛtɛn yì lɛdó ɖé mɛ fie agun ɖé ɖó hudó alɔgɔ tɔn te to adà ɖélɛ mɛ.
2. Nawɛ mǐ sɔgǎn yí nutindó mǐtɔn lɛ dó nɔgodona agun lɔ gbɔn?
Mǐ sɔgǎn “nɔ yí nuxɔakwɛ́ [mǐtɔn] lɛ dó gbògbéna Jehovah.” (Xóhwinhwɛ́n lɛ 3:9) Mǐ nɔ yí ayǎjɛ dó basí nunina akwɛ́ tɔn gɔna nutindó mǐtɔn ɖevo lɛ tɔn nadó nɔgodona agun mǐtɔn kpó azɔ̌n yɛxwexoɖiɖɔ lɛdó ayihɔ́n kpé tɔn lɔ kpó. (Xya 2 Kɔlintinu lɛ 9:7.) Nunina mǐtɔn lɛ sɔ́ nɔ nyí yiyizan nadó nɔgodona azɔ̌n kɔgbɔ tɔn. Mɛsusu wɛ nɔ saba “ɖé nuɖé dóvo” nadó basí nunina ɖé. (Xya 1 Kɔlintinu lɛ 16:2.) Mǐ sɔgǎn nɔ basí nunina lɛ dó akpótin nunina tɔn xe to nɔtɛn sinsɛ̀n-bibasí tɔn mǐtɔn lɛ mɛ kavǐ to nɔtɛn Intɛnɛt tɔn donate.jw.org jí. Lɛblanulɔkɛyi ɖé wɛ é nyí ná mǐ nadó yí nutindó agbasa tɔn mǐtɔn lɛ dó basí nunina nadó dó owǎnyi mǐtɔn ná Jehovah xya.
DINDONANǓ DÓGƆ́
Gbadokpɔ́nna alixo ɖélɛ xe mɛ a sɔgǎn nɔgodona agun lɔ te.
3. Nɔ yí nutindó towe lɛ dó nɔgodona agun lɔ
Jehovah kpó Jesu kpó nɔ yiwǎnna nunamɛtɔ xomɛhunnɔ lɛ. Ði akpajlɛ̌, Jesu kpà nǎwe asuciɔsi wamɔnɔ xe dóvivɛnu nadó basí nunina ɖé. Xya Luku 21:1-4, enɛgodo ɖɔxodó kanbyɔ́ exelɛ jí:
-
Be nunina ɖaxo wɛ mǐ ɖóná basí nadó hɛn xomɛhun Jehovah ya?
-
Nukún tɛ́wɛ Jehovah kpó Jesu kpó nɔ yí dó kpɔ́n nunina ahunɖokpó tɔn mǐtɔn lɛ?
Nadó mɔ lěxe nunina mǐtɔn lɛ nɔ nyí yiyizan ɖó, xò VIDEO lɔ. Enɛgodo ɖɔxodó kanbyɔ́ xe bɔdego jí.
-
Nawɛ alixo xe mɛ nunina mǐtɔn lɛ nɔ nyí yiyizan te nɔ hɛn ale wá ná agun lɛ lɛdó ayihɔ́n kpé gbɔn?
4. Mǐ sɔgǎn zé mǐɖe jo nadó gɔalɔ
To xóxóhwenu, sinsɛ̀n-basítɔ Jehovah tɔn lɛ nɔ yí zohunhun dó wazɔ́n nadó kpénukúndó nɔtɛn sinsɛ̀n-bibasí tɔn yětɔn lɛ go. Amɔ́, exe nɔ bɛ́ nususu hɛn húgǎn nunina akwɛ́ tɔn lɛ bibasí kpoun. Xya 2 Otànnǔgbó lɛ 34:9-11, enɛgodo ɖɔxodó kanbyɔ́ exe jí:
-
Nawɛ Islaelivi lɛkpó nɔ gɔalɔ nadó kpénukúndó oxɔ̀ Jehovah tɔn kavǐ nɔtɛn sinsɛ̀n-bibasí tɔn lɛ go gbɔn?
Nadó mɔ lěxe Kunnuɖetɔ́ Jehovah tɔn lɛ nɔ xodó akpajlɛ̌ Biblu tɔn xóxóhwenu tɔn enɛ ɖó, xò VIDEO lɔ. Enɛgodo ɖɔxodó kanbyɔ́ xe bɔdego lɛ jí.
-
Naegbɔ̌n é dó nyí nǔjɔnǔ nadó hɛn Kplitɛnxɔ Axɔluɖuta tɔn mǐtɔn lɛ dó wiweji kpóɖɔ dó ninɔmɛ ɖagbe mɛ?
-
Alixo tɛlɛ mɛ wɛ a sɔgǎn gɔalɔ te?
5. Mɛmɛsunnu lɛ emi, mì dóvivɛnu ná azɔngban lɛ dógɔ́
Owě-wíwé lɛ ná tuli sunnu Klistiani lɛ nadó nɔ zé yeɖe jo bo wà nǔxe go yé kpé lɛkpó nadó nɔgodona agun lɔ. Nadó mɔ akpajlɛ̌ ɖokpó, xò VIDEO lɔ. Enɛgodo ɖɔxodó kanbyɔ́ xe bɔdego jí.
-
To video lɔ mɛ, nawɛ Ryan dóvivɛnu nadó gɔ́alɔna agun lɔ to gǐgɔ́ mɛ gbɔn?
Biblu ɖɔ nubyɔ́tomɛsi xe kɔ̀n mɛmɛsunnu lɛ ɖóná jɛ nadó kpégan tayiɖi devizɔnwatɔ lizɔnyizɔnwiwa tɔn kpóɖɔ tayiɖi mɛxo lɛ. Xya 1 Timoti 3:1-13, enɛgodo ɖɔxodó kanbyɔ́ exelɛ jí:
-
Etɛlɛ wɛ yè nɔ ɖonukún sɔ́n mɛmɛsunnu xe to vivɛnudó nadó kpégan tayiɖi devizɔnwatɔ lizɔnyizɔnwiwa tɔn kavǐ mɛxo lɛ sí?
-
Etɛ́wɛ yè nɔ ɖonukún sɔ́n hwɛndo yětɔn lɛ sí?—Kpɔ́n wěfɔ 4 kpó 11 kpó.
-
Enyí mɛmɛsunnu lɛ dóvivɛnu nadó jɛ nubyɔ́tomɛsi exelɛ kɔ̀n, ale tɛlɛ wɛ é nɔ hɛnwa ná mɛlɛkpó to agun lɔ mɛ?
MƐÐÉ SƆGǍN KANSE ÐƆ: “Fie wɛ Kunnuɖetɔ́ Jehovah tɔn lɛ nɔ hɛn akwɛ́ sɔ́n nadó wà azɔ̌n yětɔn lɛ?”
-
Etɛ́wɛ a ná gblɔn?
BLADÓKPƆ́
Jehovah nɔ nyɔ́ kpinkpɛn etɔn tawun, enyí mǐ yí hwenu mǐtɔn, xúhlɔn kpó nutindó mǐtɔn lɛ kpó dó nɔgodona agun lɔ.
Dogbakpɔ́n
-
Nawɛ mǐ sɔgǎn nɔ yí hwenu kpó xúhlɔn mǐtɔn kpó zán dó agun lɔ tamɛ gbɔn?
-
Nawɛ mǐ sɔgǎn nɔ yí nutindó agbasa tɔn mǐtɔn lɛ dó nɔgodona agun lɔ gbɔn?
-
Alixo tɛlɛ mɛ wɛ é ná jlo we nadó gɔ́alɔna agun lɔ te?
KPƆ́N NUÐƆNAMƐ ÐEVO LƐ
Gbadokpɔ́nna nuxewutu Jixwéyɛxwe masɔ nɔ byɔ́ madó-ao sɔ́n sinsɛ̀n-basítɔ etɔn lɛ sí ba.
“Etɛ́wɛ Biblu Ðɔ Gandó Madó-Ao Nina Go?” (Xósɔ́ Intɛnɛt jí tɔn)
To Biblu mɛ, azɔngban ɖélɛ nyí ɖiɖena sunnu xe yí baptɛm lɛ. Bɔ enyí e wá byɔ́ dɔ yɔnnu xe yí baptɛm ɖé ni kpénukúndó azɔngban enɛlɛ go lo?
“Tito Tatɔ́-Nyínyí Tɔn to Agun Mɛ” (Atɔ̀xɔ̀-Nuxixɔ́ lɔ Tɔn, février 2021 tɔn)
Kpɔ́n mɛmɛsunnu adɔgbotɔ ɖélɛ xe basí avɔ́sínsan susu nadó bɛ́ owě lɛ yì ná sinsɛ̀n- basítɔ hatɔ yětɔn lɛ.
Gbɔnvona sinsɛ̀n xe kpò lɛ, be a nyɔ́ fie mǐ nɔ mɔ akwɛ́ te nadó wà azɔ̌n mǐtɔn lɛ ya?
“Fie Wɛ Kunnuɖetɔ́ Jehovah Tɔn lɛ Nɔ Mɔ Akwɛ́ te Nadó Wà Azɔ̌n Yětɔn Lɛ?” (Xósɔ́ Intɛnɛt jí tɔn)
