YEMBOE 5
Samuel oyapo avei Jehová jei vae
Michi güive Samuel oiko jare oparavɨkɨ tabernáculope. Arakaete tabernáculope gente reta ojo omboete Jehová. ¿Reipotapa reikuaa maerapa Samuel oiko jókope? Yaikuaa jesegua vaerä ñanemiarita ichɨre Ana jee vae.
Jeta ma oasa Ana mbaetɨi imembɨ, ërei oipota yae güɨnoi. Jáeramo oyerure jare omoñera Jehová omborɨ vaerä jare oyapo ñererökuavee jei reve: “Remee yave cheve metei membɨ, tamee ndeve guarä toiko jare toparavɨkɨ tabernáculope”. Jehová oendu Ana iyerure, jaeramo ipuere güɨnoi imembɨ. Kuae michia ombojee Samuel. Mboapɨ ani irundɨ añoma güɨnoi yave, Ana güɨraja tabernáculo oyeokuai vaerä Tumpape, jökorai ombopo iñererökuavee.
Tabernáculope sacerdote tenondegua Elí jee vae. Güɨnoi mókoi taɨ, oparavɨkɨvi jókope sacerdote reta rami. Tabernáculope gente reta ojo omboete Jehová, jáeramo jókope oï vae reta oyapotako jupi vae. Ërei Samuel oecha Elí taɨ reta oyapo jeta mbae ikaviä vae. ¿Oyapora Samuel mbae ikavimbae Elí taɨ reta rami?... Mbaetɨ, Samuel oyapo avei Jehová jei vae, tu reta omboe rami.
¿Mbaepako ipuere oyapo Elí jeko kaviä taɨ reta ramo?... Ipuereko ombosɨmbi, ani oekɨ iparavɨkɨgüi. Ërei Elí mbaetɨ oyapo jökorai. Jehová iyarasɨ yae ikotɨ reta jáeramo oiporaraukata chupe reta.
Samuel jei Elípe Jehová jei vae
Metei pı̵̈tu, Samuel okema oï yave oendu kia oenɨi. “¡Samuel!”, jei. Jae osɨi ojo Elí oïape, ërei Elí jei chupe: “Che mbaetɨ ko roenɨi”. Mókoiyema oasa körai. Elí jei Samuelpe: “Nereenɨiye yave, ere chupe: ‘Nemiari Jehová, echako che ayeapɨsaka aï’”. Samuel oyapo jökorai yave, Jehová jei chupe: “Ere Elípe che aiporaraukata iñemuña retape, mbaeyoa jae oyapo vaere”. ¿Yavaira Samuel omombeu vaerä Elípe Jehová jei vae? ¿Mbaepa nde rere?... Yavai yaeko. Jare Samuel okɨɨye omombeu chupe. Ërei oyapo Jehová jei vae jáeramo omombeu Elípe. Tumpa jei vae oyembopo: Jaɨkue rupi, Elí jare taɨ reta opa omano.
Yandepuere yayemboe Samuel oyapo vaere. Yepetëi oecha ïru reta oyapo ikavimbae, ërei jae oyapo Jehová oipota vae. ¿Nde reyapotara jökorai? ¿Reyapotara Jehová jei vae Samuel rami? Reyapo yave jökorai, Jehová oyerovia yaetako jaenungavi nderu jare ndesɨ.
