Oñeporandúva jepi

Génesis 6:3-pe heʼi: “Ndahejamoʼãi yvyporakuéra oikove opa ára g̃uarã. Haʼekuéra omanovaʼerã voínte. Koʼa guive oikovéta 120 áño pevénte”. Heʼípa Jehová koʼápe yvypóra oikovetaha 120 áñonte? Omombeʼúpa Noépe opredikataha 120 áño pukukue?

Nahániri.

Oiko mboyve pe Dilúvio oĩvaʼekue heta yvypóra oikovéva hetaiterei áño. Noé voi orekóma 600 áño oúrõ guare pe ama guasu ha omano orekópe 950 áño (Gén. 7:6; 9:29). Avei oĩ umi onasevaʼekue pe Dilúvio rire ha mombyry ohasa 120 áño, pór ehémplo, Arpaksad omano 438 áñope ha Selah katu 433-pe (Gén. 11:10-15). Péro Moisés tiémpope umi hénte ohupyty 70 térã 80 áñontema (Sal. 90:10). Jahechávo koʼã mbaʼe, ñantende Génesis 6:3 ndeʼiriha yvypóra oikovetaha 120 áño pevénte.

Upéicharõ, heʼípa Ñandejára Noépe oikuaauka hag̃ua umi héntepe outaha pe ama guasu 120 añohápe? Nahániri. Jehová oñeʼẽ jave Noépe la Biblia heʼi porã voi upeichaha. Pór ehémplo pe versíkulo 13-pe jajuhu: ‘Ñandejára heʼi Noépe: “Haʼéma ahunditaha yvypóra, haʼekuéra omyenyhẽ yvy teko añágui”’. Heta áño upe rire, ojejapopa rire pe árka ‘Ñandejára heʼi Noépe: “Eike pe árkape nde rogaygua maymáva ndive”’ (Gén. 6:13; 7:1). Ha jajuhúta avei ambue versíkulo heʼihápe Ñandejára oñemongeta hague hendive  ha heʼi chupe hetave mbaʼe (Gén. 8:15; 9:1, 8, 17).

Génesis 6:3 katu noñeʼẽi Noére ha ndeʼíri Jehová oñeʼẽha upérõ hendive. Ko téystope Jehová omombeʼúnte mbaʼépa ojapóta (embojoja Génesis 8:21-re). La Bíbliape oñemombeʼu Ñandejára ojapo mboyve yvyporakuérape oñeʼẽma hague, péro ndahaʼéi peteĩ yvypórandi. Mbaʼérepa? Upérõ Jehová neʼĩra gueteri ojapo Adánpe (Gén. 1:6, 9, 14, 20, 24).

Ñantende upéicharõ Génesis 6:3-pe oñemombeʼuha Jehová, pe Hués Ijojahaʼỹva, odesidíma hague ohunditaha entéro umi hénte aña oikovaʼekue upérõ. Ha upearã ohaʼarõta 120 áño. Péro Jehová nomombeʼúi gueteri Noépe mbaʼépa ojapóta. Mbaʼérepa Ñandejára heʼi ohaʼarõtaha 120 áño? Mbaʼérepa ndoguerúima upérõ pe ama guasu?

Apóstol Pedro omombeʼu: ‘Yma Noé tiémpope Ñandejára ipyʼaporã rupi ohaʼarõ ojejapo aja pe árka. Ha ipype mbovymi, óchonte, ojesalvavaʼekue pe ýgui’ (1 Ped. 3:20, BNP). Jahechaháicha Jehová heʼi ohaʼarõtaha 120 áño oĩ rupi heta mbaʼe oikovaʼerã gueteri. Ñandejára heʼi rire Génesis 6:3-pe oĩva, ohasa 20 áño ha upépe ae Noé oñepyrũ ifamília (Gén. 5:32; 7:6). Noé ha hembireko oreko mbohapy kuimbaʼe, koʼãva okakuaa ha omenda avei, ha upépe oĩma ‘ocho’ tapicha ifamíliape. Haʼekuéra mbovýramo jepe oñepyrũ ojapo pe árka tuichaitéva ha oiméne heta ombaʼapo hese hikuái. Ñandejára oheja rupi ohasa 120 áño oiko koʼã mbaʼe ha pe árka rupive ocho tapicha iñeʼẽrendúva “ojesalvavaʼekue pe ýgui”.

La Bíbliape ndeʼíri mbaʼe áñopepa Jehová omombeʼu Noépe arakaʼépa oguerúta pe ama guasu. Péro ñapensáramo mboy tiémpopa ohasa itaʼyrakuéra okakuaa ha omenda hag̃ua, oiméne ohasa 40 térã 50 áño rupi og̃uahẽ hag̃ua pe Dilúvio. Ñande jaikuaánte Jehová heʼi hague Noépe: “Haʼéma chejupe ajukapataha opaite tekove oĩva guive yvy apére”. Ha omombeʼu porã chupe tekotevẽha ojapo pe árka ha oike pype haʼe ha ifamília ojesalva hag̃ua (Gén. 6:13-18, ÑÑB). Ohaʼarõ aja og̃uahẽ pe ára Noé ojapo heta mbaʼe porã. Oñehaʼãmbaite oiko Ñandejára oipotaháicha ha ‘omyasãi hustísia’. Upearã omomarandu hapichakuérape peteĩ mbaʼe iñimportantetereíva: Jehová ohundipáta entéro umi hénte aña oikóva upe tiémpope. Noé ndoikuaáiramo jepe arakaʼetépa oikóta upéva, oguerovia oñekumplitaha katuete ha ñande jaikuaa upeichaite oiko hague (2 Ped. 2:5, ÑÑB).