LEKSIÓN 12
Pablo sovríno ipyʼaguasu vaʼekue
Koʼág̃a ñañeʼẽmíta peteĩ mitãrusu osalva vaʼekuére itiópe ani hag̃ua omano. Pe mitãrusu ningo apóstol Pablo sovríno. Ndajaikuaáiramo jepe héra, jaʼekuaa hese ipyʼaguasueterei hague. ¿Reikuaasépa mbaʼépa ojapo raʼe?...
Upérõ Pablo oĩ kárselpe Jerusalénpe. Ojegueraha kuri chupe préso oikuaauka haguére la héntepe mávapa Jesús. Péro oĩ una partída kuimbaʼe iñañáva ha ojukaséva Páblope. Upearã heʼi hikuái: “Jajeruréta pe komandántepe omanda hag̃ua umi soldádope togueru Páblope trivunálpe, ha japeskáta hese tape kóstare. Péicha Pablo ohasávo jajukáta chupe”.
Pablo sovríno omombeʼu pe komandántepe mbaʼépa ojapose umi kuimbaʼe
Un día ojegueraha mboyve Páblope Cesaréape, isovríno ohendu la ojaposéva hikuái. ¿Mbaʼépa ojapóta? Oho kárselpe ha omombeʼu itiópe la oikóva. Upepete Pablo heʼi chupe tomombeʼu pe komandántepe upe ohendu vaʼekue. ¿Ndépa ere ifásil hague Pablo sovrínope oñeʼẽ pe komandántepe?... Nahániri, pe komandánte ningo peteĩ kuimbaʼe omanda guasúva. Péro Pablo sovríno ipyʼaguasu ha oñeʼẽ chupe.
Upepete pe komandánte oikuaáma mbaʼépa ikatu ojapo. Omondo Páblope Cesaréape upe pyharépe ha hendive oho 500 soldádo oñangareko hag̃ua hese. ¿Ojehúpa álgo Páblope tapére?... Nahániri, umi kuimbaʼe aña ndojapói hese mbaʼevete. Nosẽi chupekuéra la ojaposéva.
¿Mbaʼépa nemboʼe ko istória?... Nde ikatuha avei ndepyʼaguasu Pablo sovrínoicha. Tekotevẽ ñandepyʼaguasu ñañeʼẽ hag̃ua Jehováre ñande rapichakuérape. ¿Ndepyʼaguasútapa avei reñeʼẽ hag̃ua Jehováre?... Rejapóramo upéicha ikatu resalva nde rapichakuérape.
