Wainma wayuu maʼletsekana ouktaka juyawai sutuma alatiraa jamü otta sutuma ayuulii. Mayaapejeʼe eein mma eere wainmain washinnuu, wainmaleʼeya na wayuu maʼletsekana sainküin mmakat. Saashin tü Wiwüliakat, eetüjülia «na wayuu müliakana» yaa saaʼu tü Mmakat. (Paashajeʼera Juan 12:8.)

Süpüla anainjatüin wayuu süpüshuaʼa, choʼujaasü wanee aluwataaya eekai lotuin sukuwaʼipa otta eekai sajaʼlajeʼerüin tü atkawaakat sainküinjee mmakat, süka jamüin, shiain maʼletsein atuma wayuu maaʼulu yaa. Niʼitaajeerü Maleiwa wanee aluwataaya eekai müin aka saaʼin tia yaa saaʼu mmakat. (Paashajeʼera Daniel 2:44.)

Aneekünüshi Jesukürisüto nutuma Maleiwa süpüla nuluwataainjachin saaʼu wayuu süpüshuaʼa (Salmo 2:4-8). Nükaaliinjeena Jesuu na maʼletsekana, najaʼlajeʼereena na aluwataalii müliakana atuma wayuu jee na kaainjaraliikana. (Paashajeʼera Salmo 72:8, 12-14.)

Nuluwataapa Jesuu saaʼu tü Mmakat, eejeerü nutuma tü anaakat jee nnojoleerü mmoluin wayuu. Soʼu tia, talatashaateerü maʼin wayuu süka kepieerüin shia, aneerüin maʼin shiʼyataain otta jouleerüin eküülü. (Paashajeʼera Isaías 9:6, 7; 65:21-23.)