¿PIACHE WANEE WAYUU TALATAKA AAʼIN WANEEPIA? Müle shia, ¿jamüsü talataka paaʼin? ¿Shiache sutuma püpüshi, piʼyataain, shiataapa sutuma tü punoujakalü anain? Eesüjaʼa talateerüle paaʼin paashin kettaapa putuma tü koleejiaakat, püntapa sünain wanee aʼyatawaa eekai anain maʼin jee piyaʼlajapa wanee kemion jeketü.

Watta naalii wayuu talatakana aaʼin nasaʼwatüle wanee kasa naʼyataaka maʼin achiirua otta eepa namaʼana wanee kasa keeʼireeka maʼin naaʼin. ¿Kakaliasüche talatüin naaʼin sutuma tia? Nnojotsü kakaliain tia talataakat otta eesü mojule neʼe naaʼin mapa.

Shiimainre talatüin naaʼin wanee wayuu, anasü naaʼin waneepia, keeʼireeshaatasü naaʼin katüinjatüin noʼu jee nnojotsü keeʼireein naaʼin sülatüin nuulia tü talataakalü aaʼin.

Sutuma eein süpüla kakaliain talatüin naaʼin wanee wayuu, watüjaa aaʼu nnojoluin talatüin naaʼin sutuma tü kasa eekat nümaʼana, shia talataka atuma naaʼin tü kasa naaʼinrakat. «Talateerü taaʼin eepa tamaʼana tüü, taaʼinrapa tüü», nümüle wanee wayuu, nükamaʼajüin tü naaʼinrajatkat süpüla talatüinjatüin naaʼin.

Waʼwanaajireʼera tü talataakalü aaʼin sümaa nukuwaʼipa wanee wayuu eekai nnojolin ayuulin. Jamüshijaʼa wanee wayuu süpüla nnojoluin ayuulin nia, anainjatü niküin otta aainjainjachi ejercicio. Akaataajaʼa süpüla talatüinjatüin naaʼin wanee wayuu, aainjainjachi kasa anasü, niʼitaainjatü tia suluʼu nukuwaʼipa.

¿Kasa waaʼinrajatka süpüla woʼunuin suluʼu tü wopu süpülajatkat talatüin waaʼin? Mayaapejeʼe eein waneirua kasa choʼujaʼaleeka maʼin wamüin, choʼujaasüya maʼin wamüin tü wachuntajatkat anülia jooluʼu:

• TALATÜINJATÜ WAAʼIN SÜMAA TÜ EEKAT WAMAʼANA JEE ASÜLAJÜLIINJANA WAYA

• NNOJOLIN AYUULIN WAYA OTTA RESILIENCIA

• ALINJATÜ WAPÜLA WAYUU

• MOTUINJATÜ WAAʼIN SAAINJALA WAYUU WAMÜIN

• WATÜJAAINJATÜ AAʼU KASAPÜLAJANAIN NUKUMAJAKA WAYA MALEIWA

• TÜ KASA ANASÜ WAʼATAPAJAKAT

Anuu sünüiki wanee karaloʼuta kojutuka maʼin sümüin wayuu sutuma anain maʼin sünüiki: «Talatüsü maʼin naaʼin na nnojoliikana kaainjalain suluʼu tü wopu kaluʼukat naya» (Salmo 119:1). Joʼu wekirajaai süchiki tia wopukot.