Devan aplea adlea sevokache mhunnge Abrahamache sonsthik ektthaim korun, ek raxttr kelem ani tankam zaite kaide dile. Tea raxttrak, Devan “Izrael” mhunn nanv dilem. Khori bhokti korta ani Devache kaide manun cholta toslem tem ekuch raxttr aslem. (Stotram 147:19, 20) Taka lagon, her raxttranchea sogllea lokanim, Izraela udhexim besanvam mellon gheunk zatalim.​—Utpoti 22:18 vachat.

 Izraelkarank, Devan aple sakxi mhunnon vinchun kaddle. Devache kaide pallʼlear lokank boreak poddta, hem tanchea adlea itihasa thaun kollon ieta. (Dusri Somurt 4:6) Taka lagun, Izraelkaram udhexim, her lokanim khorea Devachi vollokh gheunk zatali.​—Izaias 43:10, 12 vachat.

 Kaim kall sorun gelea uprant, Izraelkaranim Devachi maniatai hogddaili, dekhun tea raxttrak nakarun, Devan, tanche bodlek, Kristi sobha ghoddun haddli. (Matev 21:43; 23:37, 38) Atam, Izraelkaranche bodlek, khore Kristanv, Jehovache Sakxi zaun asat.​—Itihas 15:14, 17 vachat.

 Sogllea raxttranchea lokank bori khobor porgottunk ani xis korunk, Jezun aplea pattlavdarank songottit kele. (Matev 10:7, 11; 24:14; 28:19, 20) Hea kallache sompadnek, porgottnechem kam, atam chodd promannan vaddot gelam. Itihasant poilech pavtt, sogllea raxttrantlea lakhʼanim lokank, khori bhokti korunk Jehovan ekvottit keleat. (Prokasovnni 7:9, 10) Khore Kristanv songottit zalʼlean tankam eka-mekak urbha ani adar diunk mellta. Sonvsarbhor tanchea sobhamnim, Bible-achi, ekech torechi xinkounn gheunk tankam khuxi bhogta.​—Hebrevank 10:24, 25 vachat.

 1870 vorsak thaun, Bible xinkpeanchea eka lhan zomean, Bible-ant lipon aslolim sotam portun sodun kaddpachem kam suru kelem. Jezun porgottnechem kam korunk, Kristi sobha ghoddun haddli mhunn te zannam asle, tea khatir razvottkechi khobor sonvsarbhor porgottunk tannim suru kelem. 1931 vorsak, Jehovache Sakxi mhunn tannim nanv apnnailem.​—Itihas 1:8; 2:1, 4; 5:42 vachat.

 Poilea xekddeant ek sanchalan manddal aslem, je Jezuk sobhecho Fuddari mhunn mandun ghetalem. Tachea udhexim zaitea raxttranchea Kristi sobhank faido zalo. (Itihas 16:4, 5) Toslench, onnubhov aslolea vhoddilanchem ek sanchalan manddal aiz-ui asa, jem sonvsarbhor Jehovachea Sakxeank boreak poddta. Jehovachea Sakxeanchim xaka-khatim, sumar 600 odik bhasamnim Bible xinkunk adar kortat toslim pustokam, onuvad korpachem, chhapʼpachem ani vanttpachem kam kortat. Tea khateancho poramos hem sanchalan manddal korta. Taka lagun, sonvsarbhor 100,000 sobhank, hem sanchalan manddal Devachea Utrantlean urbha diun, vatt dakhounk xokta. Dor ek sobhent, iukt zalʼle munis, vhoddil vo samball korpi mhunn vavurtat. He munis mogan Devachea hinddachi kallji ghetat.​—1 Pedru 5:2, 3 vachat.

 Devachea Rajeachi bori khobor porgottunk ani xis korunk Jehovache Sakxi songottit asat. Apostlam bhaxen, ami-i ghora-ghoranim porgottnechem kam kortat. (Itihas 20:20) Sot zannam zaunk sodtat toslea khaltea monachea lokank, Bible-achi xinkounn diunk ami Jehovache Sakxi toiar asanv. Jehovache Sakxi, fokot ek songotton nhoi, punn ek mogall Bapui aslolo ghorabo. Ami sogllim bhav-bhoinnam, eka-mekachi kallji ghetat. (2 Tesalonikekarank 1:3) Jehovacho lok, Devak manvota tem korunk ani dusreank adar diunk songottit asat, dekhun prithumecher tancho ghorabo soglleam poros khuxalkaiecho.​—Stotram 33:12; Itihas 20:35 vachat.