Olo bulà kọ a tavàlà ge naa nu ea lelà?— Gbele tõ̀ò gbò bulà naà vó. Kpá Káí kọ́ nèi kọ aẹ̀ aa deè tàvàlà ló enè kà nvín ãa págbálà ea bée kọlà Jòsáíà ge naà nu ea lelà. Sõò ẹlẹ beè ié gi gbò lé kóò ea beè nvèèbá nèe. Naa é kpáá nó nu ea kil ló Jòsáíà nè pá a gbò kóò bọ̀ọ̀vẹ̀.

Tẹ̀ Jòsáíà beè kọ̀là Ámòn, eaẹ̀ bèè méné Júdà. Ámòn beè ié kà pọ́lọ́ dùm, vaá aẹ̀ olòó nè fã̀ gbò ń nuù náàmàbá. Tṍó e tè Jòsáíà ú, Jòsáíà beè gboó dú méné Júdà. Sõò ẹlẹ beè toolá kóló aatáà gbáá! É kọ olo bulà kọ ẹlẹ beè dú pọ́lọ́ belí a tẹ̀?— Ẽ́èe, náè belíe!

Bã̀àna tṍó e ẹlẹ beè di kà ãa, Jòsáíà beè gbĩ́ gè gbàntṍ ló Jìhóvà. Boo béè vó, aẹ̀ gboó sà ge bã̀à kóò áá gbò e bà vulè Jìhóvà. vaá baala beè nvèèbá nè Jòsáíà kọ á naà nu ea lelà. Bà mée ní eaẹ̀ bèè pá kóò é Jòsáíà ẹ?

Zèfànáíà be bèè enè kà a kóò. Zèfànáíà be bèè enè neǹ kọ́ bùlà Bàrì ea  géè ãane pá Júdà, kọọ̀ pọ́lọ́ nu é náaa vá ló, be à gá náa bà nè fã̀ gbò ń nuù náàmàbá. Jòsáíà beè gbàntṍ ló Zèfànáíà vaá à gboó nè fã̀ Jìhóvà, níì gbò ń nuù nààmàbá nì.

Jèrèmáíà be bèè dõò na kà kóò Jòsáíà. Jòsáíà nè ẹ̀ẹ̀ be bèè sĩ́ gbò, e baẹ̀ tõ̀òa kuló ène vaá gbá bọọ. Baala beè duá kà lé kóò iná kĩée tṍó e Jòsáíà ú, Jèrèmáíà beè emí enè kà kele sọ́l bã̀àgã̀ kĩlma ló bée ú Jòsáíà tọ́àẹ̀ é ló naa. Jèrèmáíà nè Jòsáíà beè siè kpóó ló ene nyòòmà ge naa nu ea lelà nè ge gbàntṍ ló Jìhóvà.

Éé ní olo gé láá nó lọl ló nu dòòmàbá Jòsáíà ẹ?— Bã̀àna tṍó e Jòsáíà beè didí kà pá nvín, ẹlẹ beè gbĩ́ gè naa nu ea lelà. Ẹlẹ beè nyímà kọ à dì bíi kọ á bãàè kóò gbò e bà vulè Jìhóvà. Mòn kọ ò saẹ̀ gbò kóò e bà vulè Jìhóvà, e bà é láá nvèèbá nè ni kọ ó naa nu ea lelà!