Be ò gé zọ Gbò Neǹ Ditõ̀ò Jìhóvà noá nu, òó láá pììgà ge olòó tení boo gbò nu ge nòá béà kálá dọ̀ buù tṍó gè nò. Kọbé ò láá ié kà pọ̀b kà bélè lọl mm̀ nònùá, à dú lé kọ ó naa nagé naa vó bé ò kálá sí nònù. À ólò palàge dú lé tṍó e túù kà lé nòònù ge nónù naa má bẹẹ lóó nu.

Sà tṍó nè kiẽ́e eé tõo nónu. Mó tṍó ní eo é láá palàge dĩine ló váá bugi togó leevè e? É kọọ̀ kà bòm dee besĩ́ à kálá dọ̀ tṍó eo é daaà togó o tóm deeá sẹ̀ bílá dee tṍó e gbò pá nvín ni dáaẹ́? Kalìbèè à gá náa nóo íè begè dẽè tṍó ge noomá nu, noo ńkem̀ tṍó eo é láá noomá nu, váà ò piigà boo kọọ̀ tọ́ọ̀ nu á gá lọẹ̀ẹ̀ ni. Gbĩ́ kiẽ́e kòvà á gé, váá ò tú kọ̀láá nu ea é láá tãagẽ́ ni ea dì belí ge iilá o Lédiò, tẹ̀lẹ̀víshòn, nè o fóòn lọl boo. Ge tã̀àgã ló Bàrì besĩ́ ò kálá dààà togó o nònù gé náa kọọ̀ kọ̀láá kà tã̀àgã̀ bùlà eo beè ié deeá á kil kẽ, naa ní eo é láá dĩine ló vaá bug togó boo moǹ bel Bàrì.—Fílipaì 4:6, 7.

Nvèè kpíi ló kiẽ́e eo gé nó, vaá ò kpóógá dee ló gè lóbel tẹlẹ dẽe. Bé ò kálá dààà togó, zẹ́ẹ́ gbĩ́ gè íe bug ea kil ló nu e bà gé lóbel kilma ló. Bugi togó boo togó bel kpáá, bugi togó boo bé e buù kà ńkem̀ togó bel gbáá ló ńpọ̀b kà togó bel naa, vaá lọ́ló kẽ ẹ̀b gbò tã́ànu nè gbò bíb ea baatẽ́ gbò kà ea di m. Bugi buù kpò bel, vaá ò ne ààla bíb e baẹ̀ emí ã́. Ẹ̀b vaá ò bugi gbò ketõ̀ò Kpá Káí e bà kólí, bugi togó boo bé e gbò ketõ̀ò Kpá Káíá nveè sãa kúm nu eo gé nóá naa. (Tóm 17:11) Tṍó eo ni nyímá ààla bíb vá, nìì nà nú kè kẽ àbèè ò nveè nu kùùmà dẽe ea é náa kọ ó kẽ̀èa boo a ààla gbẹá nònù. Tṍóá sõò, òó láá gbóó dàlà bá boo gbẹá nònù beà léémá ni, vaá ò gbóó nè ńkpulu dẽè ààla belí bé eo ólò ló bel naa. Tení domá ló gè bugi togó boo gbò kele kele íb togó bel ea dú gè nó gbẹá nònù buù sèa.

Tení dú ló gè nó kele kele togó bel e bàé nó nú boo gbẹá nònù buù sè, òó kpáá bõonè ló ãa ãa nyìmànu sẹlẹ́ mm̀ o “kpó gyọ́” eo ólò bõonè ló nyìmà nù Kpá Káí sẹlẹ.—Máátìù 13:51, 52.

• Mókà nòònù ní e olo é ólòó noo nèà o báẹ́, nyòòmà ge kpoogá dee ló gè sí nònù ẽ?

• Òó láá kpoogá dẽé ló naa vàẹ kọ bé ò láá aalá bel gbẹá nònù ẽ?