“A bon akoia aomata taani Kakoaua ao au kamea naba. N te taina ngke e teitei Elaine i rarikin te kaa ni boki, ao e a angania naba au kamea bitiketi tabeua. Man te tai anne, a aki toki ni katikitikai au kamea nakon te kaa ni boki ngkana ti uakaan ma ngaiia, ibukin aia bitiketi.

“A teimatoa kamea ni karerekea aia bitiketi ao I ongongora ngai n aia maroro taani Kakoaua n te tai ae uarereke. Ma e ngae n anne, I bon aki kani karenaai ma ngaiia. Ai 70 tabun ririki ao I aki koaua raoi n aia reirei taani Kakoaua. I a tia ngkoa n un irouia kaain te Aro ae te Boretetanti ao I iangoia bwa e raoiroi riki ae I reiakina te Baibara i bon irou.

“N te tai aei, I a noriia taani Kakoaua riki tabeman ma aia kaa ni boki n taabo riki tabeua ni bon te kaawa naba aei. A bon akoi naba. A aki toki ni kaekai au titiraki man te Baibara ike I a onimakinia riki iai.

“N te taina ao e a titirakinai Elaine ni kangai, ‘Ko kakoauaa ae maan boni bwaintangira mairoun te Atua?’ I taku, ‘Eng eti anne!’ E a wareka naba Elaine Itaia 11:6-9. Mai ikanne are I a kan reirei naba n te Baibara, ma I teimatoa n rawa ni butimwaei aia boki.

“Ni boong ake imwina, I a rangi ni kan ongora riki n aia maroro Elaine ma buuna ae Brent. A tuangai bwa N na wareka Mataio nakoni Mwakuri bwa I aonga n ataa ae nanonaki n te riki bwa te Kristian ni koaua. I boni karaoa anne. Imwina riki, I a kan reirei n te Baibara ma Brent ao Elaine. Te tai aei bon nukan 2016.

“I ingainga nakon au reirei n te Baibara ni katoa wiki ao nakoni bobotaki naba n te Tabo n Taromauri. I boni kakabwaiaaki ao I kukurei naba ngkai I a reiakina ana reirei ni koaua te Baibara. Teuana tabun te ririki imwina, I a riki bwa te tia Kakoaua ae bwabetitoaki. Ai 79 au ririki ngkai, ao I rangi ni kakaitau ngkai I a kunea te Aro ae koaua. E boni kakabwaiaai Iehova ngkai e buokai bwa N na riki bwa kaain ana utu ae katobibia te aonnaba.”