MWAKORO 4
Aroni Kamanenaan te Mwane
“A bane ni kamatoaki naano n te kabowi.”
Ti bane ni kainnanoa te mwane ibukini karekeani baika a kainnanoaki n ara utu. (Taeka N Rabakau 30:8) Ni koauana, “te mane [bon] te bwai ni kamaiu naba.” (Te Minita 7:12, BG) Tao e bae ni kangaanga aroni maroroakinan te mwane ngkai taanga ngkami, ma tai kariaia te mwane bwa e na karekei kangaanga i nanon tekatekami n taanga imwin te mare. (I-Ebeto 4:32) A riai taanga n onimakinia i marenaia ao ni kaai n ibuobuoki ni babairea aron aia kabanemwane.
1 BABAIRE RAOI
TE BAE E TAEKINAKI N TE BAIBARA: “Antai iroumi ae kani katea te taua, ae e na aki tekateka moa ni warebwaia te kabanemwane n noria bwa iai katiaana irouna ke akea?” (Ruka 14:28) E rangi ni kakawaki bwa kam na kaai ni babairea aroni kamanenaan ami mwane. (Amota 3:3) Iangoa te bae kam kainnanoia ni kabooa ao mwaitira ae kam kona ni kabanea iai. (Taeka N Rabakau 31:16) Ti aki nanona bwa ko riai ni karekea te bwai teuana ibukina bwa iai ami mwane ibukini kabooana. Kataia rarawa nakon te taarau. Tii kabanea am mwane ane iroum.
TE BAE KO KONA NI KARAOIA:
-
Ngkana iai rakan ami mwane ni banen te namwakaina, kaai n iangoia bwa tera ae kam na karaoia iai
-
Ngkana e raka ami kabanemwane ao karaoa raoi ami babaire ibukini kauarerekeana. N te katoto, kam riai ni kuukana kanami n oneani mwin are kam na amwarake n te kirabu
2 BWAINA TE KOAUA AO TE IANGORAOI NI KAMANENAAN TE MWANE
TE BAE E TAEKINAKI N TE BAIBARA: “Ti karaoi tabera n te aro ae eti raoi, tiaki tii i matan Iehova, ma i mataia naba aomata.” (2 I-Korinto 8:21) Bwaina te koaua nakoni buum ni kaineti ma mwaitin am karekemwane ao am kabanemwane.
Katoatai ni maroro ma buum ngkana ko karaoi am babaire aika kakawaki ibukin ami kataumwane. (Taeka N Rabakau 13:10) E na ibuobuoki te mamaroro ni kaineti ma te mwane ibukini kateimatoaan te rau n tekatekam taanga imwin te mare. Iangoa am karekemwane bwa bon tiaki tii am mwane ma ibukia am utu naba.
TE BAE KO KONA NI KARAOIA:
-
Uaia ni boraoi n iango n te mwaiti are kam na kabanea n aki manga maroroakinna ma temanna
-
Tai tataningaa rikin te kangaanga ni kaineti ma te mwane ma waekoa ni maroroakinna
Ko Bae Naba n Tangira
TITIRAKI AIKA KAEKAAKI MAN TE BAIBARA
Kangaanga ma te Mwane ao te Taarau—E Kona n Ibuobuoki te Baibara?
E aki kona te mwane ni kabooa te kukurei, ma iai aua booto n reirei man te Baibara aika kona ni buokiko ni kaineti ma am mwane.
