NIKASEMƆ 60
Yaa Nɔ Ofee Nibii Ni Baahã Okɛ Yehowa Teŋ Naanyobɔɔ Lɛ Mli Awa
Kɛjɛ be ni oje nikasemɔ lɛ shishi kɛbashi bianɛ lɛ, okase Yehowa he nii pii. Nibii ni okase lɛ ehã oná suɔmɔ ni mli wa waa ohã lɛ, ni no hewɔ lɛ, ekolɛ ojɔɔ ohe nɔ ohã lɛ ni ohã abaptisi bo. Kɛ́ ofeko nakai po lɛ, ekolɛ oojwɛŋ he, ni etsɛŋ obaafee nakai. Shi yɛ obaptisimɔ lɛ sɛɛ po lɛ, obaanyɛ oya nɔ ofee nibii ni baahã okɛ Yehowa teŋ naanyobɔɔ lɛ mli awa. Obaanyɛ ofee enɛ kɛya naanɔ. Te ooofee tɛŋŋ ofee nakai?
1. Mɛni hewɔ esa akɛ oya nɔ ofee nibii ni baahã okɛ Yehowa teŋ naanyobɔɔ lɛ mli awa lɛ?
Esa akɛ wɔbɔ mɔdɛŋ waa ni wɔya nɔ wɔfee nibii ni baahã wɔ kɛ Yehowa teŋ naanyobɔɔ lɛ mli awa. Mɛni hewɔ? Koni wɔkatsi wɔhe “kɛje Nyɔŋmɔ hiɛkãalɔ lɛ he.” (Hebribii 3:12) Mɛni baawa wɔ ni wɔya nɔ wɔye Yehowa anɔkwa? Wɔbaanyɛ wɔya nɔ wɔtsu shiɛmɔ nitsumɔ lɛ waa, ni wɔtao gbɛi krokomɛi ni wɔbaanyɛ wɔtsɔ nɔ wɔsɔmɔ wɔ-Nyɔŋmɔ lɛ jogbaŋŋ fe bɔ ni wɔfeɔ bianɛ lɛ. (Kanemɔ Filipibii 3:16.) Yehowa sɔɔmɔ lɛ ji shihilɛ ni nɔ bɛ!—Lala 84:10.
2. Mɛɛ nibii krokomɛi hu esa akɛ oya nɔ ofee?
Eyɛ mli akɛ Biblia lɛ ni akɛ bo kaseɔ lɛ miiba naagbee moŋ, shi obaaya nɔ ofee nibii ni hãa anaa akɛ Kristofonyo ji bo lɛ. Biblia lɛ kɛɔ wɔ akɛ, esa akɛ ‘wɔwo gbɔmɔ hee’ lɛ. (Efesobii 4:23, 24) Be ni oyaa nɔ okaseɔ Nyɔŋmɔ Wiemɔ lɛ, ni oyaa asafoŋ kpeei lɛ, obaakase nibii hei yɛ Yehowa kɛ esui lɛ ahe. Susumɔ gbɛi krokomɛi ni obaanyɛ otsɔ nɔ okase Yehowa jogbaŋŋ yɛ oshihilɛ mli lɛ he. Yaa nɔ ofee tsakemɔi ni he hiaa ni baahã Yehowa aná miishɛɛ.
3. Mɛɛ gbɛ nɔ Yehowa baawa bo ni oya nɔ ofee nibii ni baahã okɛ lɛ teŋ naanyobɔɔ lɛ mli awa?
Biblia lɛ kɛɔ akɛ: “Nyɔŋmɔ . . . diɛŋtsɛ . . . baagbe nyɛtsɔsemɔ lɛ naa. Ebaahã nyɛhe awa, ebaawaje nyɛ, ebaahã nyɛnaji amɔmɔ shi jogbaŋŋ.” (1 Petro 5:10) Wɔ fɛɛ wɔkɛ kai ni baanyɛ ahã wɔfee efɔŋ kpeɔ. Shi Yehowa hãa wɔ nibii ni he hiaa ni baahã wɔye kai nɛɛ anɔ. (Lala 139:23, 24) Ewo shi akɛ, ebaahã oshwe akɛ obaaye lɛ anɔkwa, ni akɛ ebaahã bo hewalɛ ni onyɛ ofee nakai.—Kanemɔ Filipibii 2:13.
KASEMƆ PII OFATA HE
Obaana nibii ni obaanyɛ oya nɔ ofee koni okɛ Yehowa teŋ naanyobɔɔ lɛ mli awa, kɛ bɔ ni Yehowa baajɔɔ bo hu.
4. Yaa nɔ okɛ o-Naanyo ni fe fɛɛ lɛ agba sane
Sɔlemɔ kɛ Biblia lɛ kasemɔ ewa bo ni obatsɔ Yehowa naanyo. Mɛɛ gbɛ nɔ nifeemɔi nɛɛ baanyɛ awa bo koni okɛ Yehowa teŋ naanyobɔɔ lɛ mli awa?
Nyɛkanea Lala 62:8 lɛ, ni nyɛsusua sanebimɔ nɛɛ he:
-
Te ooofee tɛŋŋ osɔle jogbaŋŋ fe bɔ ni ofeɔ bianɛ lɛ, koni naanyobɔɔ ni yɔɔ okɛ Yehowa teŋ lɛ mli awa?
Nyɛkanea Lala 1:2 lɛ, ni nyɛsusua sanebimɔ nɛɛ he:
-
Te ooofee tɛŋŋ okane Biblia lɛ jogbaŋŋ fe bɔ ni ofeɔ bianɛ lɛ, koni naanyobɔɔ ni yɔɔ okɛ Yehowa teŋ lɛ mli awa?
Te ooofee tɛŋŋ oná Biblia lɛ ni bo diɛŋtsɛ okaseɔ lɛ he sɛɛ jogbaŋŋ? Bɔ ni afee ni ona enɛ he ŋaawoi komɛi lɛ, jiemɔ VIDIO lɛ, ni nyɛsusua sanebimɔi ni nyiɛ sɛɛ nɛɛ ahe.
-
Mɛɛ ŋaawoi ni atsĩ tã yɛ vidio lɛ mli obaanyɛ okɛtsu nii?
-
Mɛɛ saji komɛi obaasumɔ ni okase?
5. Okɛ mumɔŋ otii amamɔ ohiɛ
Kɛ́ okɛ otii mamɔ ohiɛ yɛ Yehowa sɔɔmɔ lɛ mli lɛ, no baahã oya nɔ osɔmɔ lɛ jogbaŋŋ. Jiemɔ VIDIO lɛ, ni nyɛsusua sanebimɔ ni nyiɛ sɛɛ nɛɛ he.
-
Mɛɛ gbɛ nɔ Cameron ná mumɔŋ otii ni ekɛmamɔ ehiɛ lɛ he sɛɛ?
Jeee mɔ fɛɛ mɔ baanyɛ afã kɛya maŋ kroko nɔ eyashiɛ. Shi wɔteŋ mɔ fɛɛ mɔ baanyɛ ekɛ otii ni ebaanyɛ eshɛ he amamɔ ehiɛ. Nyɛkanea Abɛi 21:5 lɛ, ni no sɛɛ lɛ nyɛsusua otii ni obaasumɔ ni okɛmamɔ ohiɛ yɛ . . .
-
asafo lɛ mli lɛ he.
-
shiɛmɔ nitsumɔ lɛ mli lɛ he.
Mɛɛ gbɛ nɔ ŋaawoo ni yɔɔ ŋmalɛ lɛ mli lɛ baanyɛ awa bo ni oshɛ otii ni okɛmamɔ ohiɛ lɛ ahe?
Otii ni obaanyɛ okɛmamɔ ohiɛ
-
Sɔlemɔ jogbaŋŋ fe bɔ ni ofeɔ bianɛ lɛ.
-
Kanemɔ Biblia muu lɛ fɛɛ.
-
Okɛ osafoŋbii lɛ abɔ ni ole amɛ fɛɛ jogbaŋŋ.
-
Okɛ mɔ ko aje Biblia mli nikasemɔ shishi ni nyɛtsa nɔ.
-
Sɔɔmɔ akɛ gbɛgbalɔi awalɔ loo daa gbɛgbalɔ.
-
Kɛ́ nyɛmi nuu ji bo lɛ, bɔɔ mɔdɛŋ ni obatsɔ asafoŋ sɔɔlɔ.
6. Oyi aná wala kɛya naanɔ!
Nyɛkanea Lala 22:26 lɛ, ni nyɛsusua sanebimɔ nɛɛ he:
-
Mɛni obaanyɛ ofee koni oná miishɛɛ bianɛ kɛ naanɔ wala hu wɔsɛɛ?
EMLI OTI
Yaa nɔ ofee nibii ni baahã okɛ Yehowa teŋ naanyobɔɔ lɛ mli awa, ni okɛ mumɔŋ otii hu amamɔ ohiɛ. Kɛkɛ lɛ, obaaná miishɛɛ bianɛ kɛ naanɔ wala hu wɔsɛɛ!
Mɛni Okase?
-
Mɛni hewɔ obaanyɛ ohe oye waa akɛ Yehowa baawa bo koni oya nɔ oye lɛ anɔkwa lɛ?
-
Mɛɛ nibii obaanyɛ ofee koni okɛ Yehowa teŋ naanyobɔɔ lɛ mli awa?
-
Mɛɛ gbɛ nɔ kɛ́ okɛ mumɔŋ otii mamɔ ohiɛ lɛ no baanyɛ ewa bo koni okɛ Yehowa teŋ naanyobɔɔ lɛ mli awa?
EHE SAJI KROKOMƐI
Te nɔ ni he hiaa Yehowa waa, ni wɔbaafee nɔ ko srɔto shi kome kɛtsɔɔ akɛ wɔjáa lɛ, aloo ni wɔbaaye lɛ anɔkwa yɛ wɔwala gbii ni eshwɛ lɛ fɛɛ amli?
Yehowa tsulɔ anɔkwafo po miishɛɛ baanyɛ atã. Obaana nɔ ni obaanyɛ ofee ni oná miishɛɛ ekoŋŋ kɛ́ omiishɛɛ tã.
Te ooofee tɛŋŋ okɛ mumɔŋ otii amamɔ ohiɛ ni oshɛ he?
“Jiemɔ o-Bɔlɔ lɛ Yi Kɛtsɔ Mumɔŋ Otii Ni Okɛaamamɔ Ohiɛ lɛ Nɔ” (Buu-Mɔɔ, July 15, 2004)
Mɛni hewɔ ehe hiaa ni obatsɔ Kristofonyo ni eda yɛ mumɔŋ lɛ, ni te ooofee tɛŋŋ oshɛ he?
“Nyɛfoaŋ Kɛyaa Dalɛ Mli—‘Yehowa Gbi Wulu Lɛ Ebɛŋkɛ’” (Buu-Mɔɔ, May 15, 2009)
Ekolɛ Obaasumɔ Enɛ Hu
SAJI NI MƐI FƆƆ BIMƆ
Mɛni Ji Biblia Mli Nikasemɔ Ni Yehowa Odasefoi Kɛ Mɛi Feɔ Lɛ?
Yehowa Odasefoi kɛ mɛi kaseɔ Biblia lɛ tamɔ aagba sane, ni amɛheee nɔ ko; obaanyɛ okɛ Biblia shishitsɔɔmɔi lɛ ateŋ eko fɛɛ eko akase nii lɛ. Obaanyɛ ofɔ̃ oweku muu lɛ fɛɛ loo onanemɛi nine koni amɛfata ohe kɛkase nii lɛ.
