NYƐYAA NƆ NYƐBUA!
Mɛni Hewɔ Pɔlitis Kɛ Mligbalamɔ Baa Mɛi Ateŋ Waa Nɛkɛ?—Mɛni Biblia Lɛ Kɛɔ Yɛ He?
Pɔlitis egbála mɛi ateŋ yɛ ma ji pii anɔ yɛ je lɛŋ fɛɛ. Niiamlitaomɔ ko ni kuu ko ni atsɛɔ lɛ Pew Research Center lɛ fee yɛ maji 19 anɔ yɛ afi 2022 lɛ tsɔɔ mli akɛ, “mɛi 100 mlijaa 65 kɛɛ, pɔlitis kɛ mligbalamɔi loo béi ni naa wawai eba mɛi ni fiɔ paati srɔtoi asɛɛ yɛ amɛmaŋ lɛ mli lɛ ateŋ.”
Ani oyɔse akɛ pɔlitis ehã mɛi amli egbála waa yɛ he ni oyɔɔ lɛ? Mɛni hewɔ eba lɛ nakai? Ani abaanyɛ aná naa tsabaa? Susumɔ nɔ ni Biblia lɛ kɛɔ yɛ he lɛ he okwɛ.
Subaŋi komɛi ni kɛ mligbalamɔi baa
Biblia lɛ gba efɔ̃ shi akɛ yɛ wɔbe nɛɛ, ni atsɛɔ lɛ “naagbee gbii lɛ” amli lɛ, mɛi babaoo baajie sui ni hãŋ anyɛ afee ekome lɛ kpo.
“Naagbee gbii lɛ amli lɛ, bei krɛdɛi ni mli shihilɛ wa baaba. Ejaakɛ gbɔmɛi baatsɔmɔ hesuɔlɔi, . . . mɛi ni anyɛɛɛ akɛ amɛ afee kpaŋmɔ.”—2 Timoteo 3:1-3.
Eyɛ mli akɛ mɛi babaoo bɔɔ mɔdɛŋ amɛtsuɔ nii waa koni nɔyelii anyɛ atsu amɛshishibii ahiamɔ nii ahe nii moŋ nɛ, shi amɛyeee omanye. Mɛi ni esoro amɛsusumɔi yɛ mɛi krokomɛi anɔ he lɛ nyɛɛɛ amɛfee ekome kɛtsu naagbai ahe nii. Nɔ ni jɛɔ mli kɛbaa lɛ maa nɔ ni Biblia lɛ wie jeeŋmɔ lɛ nɔ mi.
“Gbɔmɔ yeɔ gbɔmɔ nɔ kɛyeɔ lɛ awui.”—Jajelɔ 8:9.
Kɛ̃lɛ, Biblia hãa wɔnaa naagba nɛɛ naa tsabaa, no ji, nɔyeli ko ni ehiɛnyiɛlɔ lɛ loo mɔ ni yeɔ nɔ lɛ baanyɛ ajie naagbai fɛɛ ni hãa adesai naa nɔ ŋmɛnɛ lɛ kɛje shihilɛ mli.
Hiɛnyiɛlɔ ni sa ni eshishibii lɛ asane kã etsui nɔ
Biblia lɛ hãa wɔnaa hiɛnyiɛlɔ ko ni sa jogbaŋŋ ni yɔɔ nyɛmɔ ni ekɛbaatsu naagbai nɛɛ fɛɛ ahe nii.
“Jalɔi baafa yɛ egbii lɛ amli, ni toiŋjɔlɛ baahi he fɛɛ he.”—Lala 72:7.
“Jeŋmaji lɛ fɛɛ baasɔmɔ lɛ.”—Lala 72:11.
Yesu ji hiɛnyiɛlɔ ni sa jogbaŋŋ nɛɛ, ejaakɛ mɛi asane kã etsui nɔ waa ni esumɔɔ ni eye ebua amɛ, titri lɛ, mɛi ni akɛ amɛ yeko jogbaŋŋ lɛ.
“Ebaajie ohiafo ni bolɔɔ kɛhã yelikɛbuamɔ lɛ, kɛ mɔ ni nii yɔɔ mɔbɔ lɛ, kɛ mɔ fɛɛ mɔ ni bɛ yelikɛbualɔ lɛ. Ebaana mɔ ni bɛ yelikɛbualɔ lɛ kɛ ohiafo lɛ mɔbɔ, ebaahere ohiafoi lɛ ayiwala. Ebaajie amɛ kɛje nɔnyɛɛ kɛ yiwalɛ mli.”—Lala 72:12-14.
Kasemɔ Nyɔŋmɔ Maŋtsɛyeli lɛ, ni Yesu ji ehiɛnyiɛlɔ loo enɔyelɔ lɛ, he saji krokomɛi. Kwɛmɔ vidio ni yɔɔ shishigbɛ nɛɛ, ni okane sane ni nyiɛ sɛɛ lɛ koni ole bɔ ni obaafee oná Nyɔŋmɔ Maŋtsɛyeli lɛ he sɛɛ, ní ofi sɛɛ.
Kwɛmɔ vidio ni ji Mɛni Ji Nyɔŋmɔ Maŋtsɛyeli Lɛ?
Kanemɔ sane ni ji “Nyɔŋmɔ Maŋtsɛyeli Lɛ—Nɔyeli Ni Juu Kɛ Fɔ̃ Bɛ Mli” lɛ.
Ekolɛ Obaasumɔ Enɛ Hu
SANEBIMƆI NI BIBLIA LƐ EHÃ HETOO
Mɛni Ji “Naagbee Gbii Lɛ” Ahe Okadi Lɛ?
Biblia lɛ gba nibii babaoo ni baaya nɔ yɛ be kome too mli ni baafee naagbee gbii lɛ he okadi.
BIBLIA TSƆƆMƆI NI HE HIAA WAA
Nyɔŋmɔ Maŋtsɛyeli Lɛ Bɔi Nɔyeli Yɛ Afi 1914 Mli
Nɔ ni fe afii 2,500 ni eho nɛ lɛ, Nyɔŋmɔ hã maŋtsɛ ko ni yɔɔ hewalɛ waa la lamɔ ko ni ji gbalɛ, ni eeba mli bianɛ.
BUU-MƆƆ
Namɔ Ji Nyɔŋmɔ Maŋtsɛyeli Lɛ Nɔ Maŋtsɛ?
Biblia ŋmalɔi srɔtoi ŋmala nibii ni baahã wɔna mɔ ni baafee Nyɔŋmɔ Maŋtsɛyeli lɛ nɔ Maŋtsɛ. Yɛ yinɔsane mli fɛɛ lɛ, mɔ kome pɛ ni nibii ni aŋmala lɛ kɔɔ ehe.
