Awie blematsɛ Hiob he akɛ mɔ ni “kpá ko bɛ ehe ni eja.” (Hiob 1:1) Atsɛ Lot akɛ “jalɔ.” (2 Petro 2:8) Ni awie David hu he akɛ “efee nɔ ni sa” Nyɔŋmɔ hiɛ. (1 Maŋtsɛmɛi 14:8) Shi hã wɔpɛi mɛi ni Biblia lɛ wie amɛhe nɛɛ ashihilɛ mli wɔkwɛ. Wɔbaana akɛ (1) amɛtɔ̃, (2) wɔbaanyɛ wɔkase nibii babaoo kɛjɛ amɛnɔkwɛmɔnɔ lɛ mli, kɛ (3) adesai ni yeee emuu lɛ baanyɛ asa Nyɔŋmɔ hiɛ lɛɛlɛŋ.

Hiob kɛ shihilɛi ni jaraa ni eko nyiɛ eko sɛɛ kpe. Ená susumɔ ni ejaaa, ni emu sane naa akɛ ehiɛ ehemɔkɛyeli lɛ mli jio ehiɛɛɛ mli jio lɛ, Nyɔŋmɔ susuuu ehe. (Hiob 9:20-22) Hiob nu he akɛ eji jalɔ aahu akɛ, mɛi krokomɛi susu akɛ eebu ehe jalɔ po fe Nyɔŋmɔ.—Hiob 32:1, 2; 35:1, 2.

Lot shashao shi be ni ehe bahia ni ekpɛ eyiŋ yɛ sane ko ni mli kã shi faŋŋ lɛ he lɛ. Sodom kɛ Gomorabii lɛ ajeŋba ni ekpɔtɔ lɛ hã ehao waa, ni  ‘epiŋ esusuma ni ja lɛ’ po yɛ amɛjeŋba lɛ hewɔ. (2 Petro 2:8) Nyɔŋmɔ hã ale eyiŋ ni eto akɛ ebaakpãtã nakai maji lɛ ahiɛ lɛ, ni ehã Lot hegbɛ koni anyɛ abaa lɛ kɛ eweku lɛ yi. Ekolɛ obaasusu akɛ Lot ji mɔ klɛŋklɛŋ ni baashi, akɛni ehao lɛ hewɔ. Shi yɛ nɔ najiaŋ ni ekɛ oyaiyeli baashi lɛ, elilaa shi. Ehe bahia po ni bɔfoi ni atsu ni amɛbajie Lot kɛ eweku lɛ amɔmɔ Lot kɛ eŋa kɛ ebii lɛ aniji ashi kɛshi maŋ lɛ mli kɛya he ko ni yɔɔ shweshweeshwe.—1 Mose 19:15, 16.

Be ko lɛ David nyɛɛɛ ehe nɔ eyaye, ni ekɛ nuu kroko ŋa fite gbala. Naakpɛɛ sane ji akɛ, David hã agbe yoo lɛ wu lɛ bɔ ni afee ni ekɛtsimɔ nɔ ni efee lɛ nɔ. (2 Samuel yitso 11) Biblia lɛ kɛɔ akɛ, sane ni David ye lɛ “eŋɔɔɔ Yehowa naa.”—2 Samuel 11:27.

Hiob, Lot, kɛ David fɛɛ tɔ̃, ni ekomɛi po yɛ hiɛdɔɔ waa. Shi taakɛ wɔbaana lɛ, amɛjɛ tsui muu fɛɛ mli amɛbo Nyɔŋmɔ toi. Amɛjɛ amɛsuɔmɔ mli amɛshwa amɛhe, ni amɛfee tsakemɔi ni sa. No hewɔ lɛ, Nyɔŋmɔ kpɛlɛ amɛnɔ, ni atsɛ amɛ yɛ Biblia mli akɛ hii anɔkwafoi.

Akɛni wɔyeee emuu hewɔ lɛ, wɔbaanyɛ wɔtɔ̃ bei komɛi. (Romabii 3:23) Shi kɛ́ ebalɛ nakai lɛ, esa akɛ wɔkpɛlɛ wɔtɔ̃mɔ lɛ nɔ, ni wɔbɔ mɔdɛŋ wɔfee tsakemɔi.

Mɛɛ gbɛ nɔ Hiob, Lot, kɛ David tsɔ amɛfee tsakemɔi? Hiob ji anɔkwafo yɛ etsui mli. Be ni Nyɔŋmɔ kɛ Hiob susu nii ahe sɛɛ lɛ, Hiob jaje  esusumɔ ni ejaaa lɛ, ni eshwa ehe yɛ nibii ni ewie lɛ he. (Hiob 42:6) Lot na Sodom kɛ Gomorabii lɛ akɛ amɛjeŋba ekpɔtɔ, ni nakai pɛpɛɛpɛ ji bɔ ni Nyɔŋmɔ hu na amɛ. Hiɛdɔɔ ni Lot kɛyatsuuu saji ahe nii lɛ ji naagba lɛ. Yɛ naagbee lɛ, ejo foi kɛshi maŋ ni Nyɔŋmɔ kpãtã hiɛ lɛ mli, ni eye ehe. Efooo esɛɛ ekwɛɛɛ nibii ni eshi lɛ, taakɛ Nyɔŋmɔ fã amɛ lɛ. Eyɛ mli akɛ David tɔ̃ tɔ̃mɔ ni yɔɔ hiɛdɔɔ yɛ Nyɔŋmɔ mla mli ni eku lɛ hewɔ moŋ, shi etsake etsui, ni ekpa Nyɔŋmɔ fai koni ena lɛ mɔbɔ, ni ekɛ no tsɔɔ nɔ tuuntu ni yɔɔ etsui mli.—Lala 51.

Bɔ ni Nyɔŋmɔ kpɛlɛ hii nɛɛ anɔ lɛ hãa wɔnaa faŋŋ akɛ, ekpaaa babaoo gbɛ kɛjɛɛɛ adesai ni yeee emuu lɛ adɛŋ. Nyɔŋmɔ le “wɔsu kɛ wɔbaŋ, ekaiɔ akɛ sũ kɛkɛ ji wɔ.” (Lala 103:14) Belɛ, kɛ́ Nyɔŋmɔ le akɛ wɔbaanyɛ wɔtɔ̃ bei komɛi lɛ, mɛni etaoɔ ni wɔfee?

Ŋaa ni David wo ebi Solomon lɛ hãa wɔnaa nɔ ni esa akɛ wɔfee koni wɔsa Nyɔŋmɔ hiɛ. Ekɛɛ lɛ akɛ, ‘Ni bo, mibi Solomon, lé otsɛ Nyɔŋmɔ lɛ, ní osɔmɔ lɛ kɛ otsui muu lɛ fɛɛ.’ (1 Kronika 28:9) Mɛni ji tsui muu fɛɛ? Eji tsui ni sumɔɔ Nyɔŋmɔ, ni be fɛɛ be lɛ efee klalo akɛ ebaafee Nyɔŋmɔ suɔmɔnaa nii. Ejeee tsui ni eye emuu, moŋ lɛ eji tsui ni shweɔ be fɛɛ be akɛ ebaasɔmɔ Nyɔŋmɔ kɛ anɔkwayeli, ni ekpɛlɛ ni ajaje lɛ. Akɛni hii nɛɛ sumɔɔ Nyɔŋmɔ, ni amɛmiisumɔ hu ni amɛbo lɛ toi hewɔ lɛ, Nyɔŋmɔ na Hiob akɛ mɔ ko ni “kpá ko bɛ ehe,” ena Lot akɛ “jalɔ,” ni ena David hu akɛ mɔ ni ‘fee nɔ ni sa Nyɔŋmɔ hiɛ sɔŋŋ.’ Eyɛ mli akɛ amɛtɔ̃ moŋ, kɛ̃lɛ, amɛnyɛ amɛsa Nyɔŋmɔ hiɛ.

No hewɔ lɛ, kɛ́ susumɔi gbohii ba wɔjwɛŋmɔ mli ní jeee wɔsuɔmɔ naa, loo ekolɛ wɔwie nɔ ko ni esaaa, loo wɔfee nibii komɛi ni sɛɛ mli lɛ wɔna akɛ ejaaa lɛ, esa akɛ wɔkase nɔ ko kɛjɛ Hiob, Lot kɛ David nɔkwɛmɔnɔ lɛ mli. Nyɔŋmɔ le akɛ wɔnyɛŋ wɔfee nɔ ni ja be fɛɛ be yɛ be ni wɔyɔɔ mli nɛɛ mli, akɛni wɔyeee emuu lɛ hewɔ. Shi eekpa gbɛ akɛ wɔbaasumɔ lɛ, ni wɔbɔ mɔdɛŋ akɛ wɔbaabo lɛ toi. Kɛ́ wɔjɛ wɔtsui muu fɛɛ mli wɔfee nakai lɛ, wɔbaanyɛ wɔná nɔmimaa akɛ wɔbaanyɛ wɔsa Nyɔŋmɔ hiɛ.