Kúnnuɖenú xlɛ́ ɖɔ Jezu huzu Vɔsanúxwlémawutɔ́ Ðaxó hwenu e é bló baptɛm ɖò xwè 29 H.M. tɔn é. Kúnnuɖenú tɛ ka wɛ? Hwenu e Jezu bló baptɛm é ɔ, é xlɛ́ ɖɔ emi ɖò gbesisɔmɛ, bo na sɔ́ gbɛ̀ emitɔn dó savɔ̌ ɖò vɔsakpe nǔjlɛdonǔwu tɔn e nɔte nú ‘jlǒ’ Mawu tɔn é jí. (Ga. 1:4; Ebl. 10:5-10) Ðó vɔsakpe nǔjlɛdonǔwu tɔn enɛ tíìn bɛ́sín baptɛm Jezu tɔn hwenu ɖidó wutu ɔ, tɛmpli ɖaxó gbigbɔ tɔn e nɔte nú tuto e è bló nú sinsɛn-biblo mímɛ́ Jehovah tɔn b’ɛ jinjɔn gbɛxixɔ ɔ jí é lɔ ɖó na tíìn bɛ́sín hwenɛnu. Vɔsakpe ɔ nyí nǔ taji ɖé ɖò tɛmpli gbigbɔ tɔn enɛ mɛ.—Mat. 3:16, 17; Ebl. 5:4-6.

Ðó tɛmpli ɖaxó gbigbɔ tɔn ɔ tíìn dìn wutu ɔ, è ɖó hudo vɔsanúxwlémawutɔ́ ɖaxó ɖé tɔn bɔ é na w’azɔ̌ ɖ’emɛ. Enɛ wu ɔ, Jehovah sɔ́ “[gbigbɔ mímɛ́] sín hlɔnhlɔn” dó ɖè Jezu. (Mɛ. 10:37, 38; Mak. 1:9-11) Amɔ̌, nɛ̌ mǐ ka sixu kúdeji ɖɔ è sɔ́ Jezu b’ɛ nyí Vɔsanúxwlémawutɔ́ Ðaxó jɛ nukɔn nú kú tɔn kpo fínfɔ́n sín kú tɔn kpo gbɔn? Hwenu e mǐ ɖò kpɔ́ndéwú Aalɔ́ɔn kpo mɛ e bɔ dó wǔtu tɔn bo wà vɔsanúxwlémawutɔ́ ɖaxó sín azɔ̌ ɖò Mɔyizisɛ́n ɔ glɔ́ lɛ é kpo tɔn gbéjé kpɔ́n wɛ é ɔ, mǐ mɔ hwɛjijɔ e ɖu ɖò mɛ jí é ɖé.

Lee Sɛ́n ɔ byɔ gbɔn é ɔ, vɔsanúxwlémawutɔ́ ɖaxó ɔ kɛɖɛ jɛn sixu byɔ Goxɔ ɔ, alǒ, tɛmpli e wá jɛ tɛn tɔn mɛ é sín Tɛn Mímɛ́ Bǐ ɔ mɛ. È sɔ́ xɔmɛgbovɔ ɖé dó gbò fí enɛ kpo Tɛn Mímɛ́ ɔ kpo mɛ. Hwɛ Súnsún Sín Kɔ nú Mɛ Zán Ðaxó Ɔ gbè kɛɖɛ jɛn vɔsanúxwlémawutɔ́ ɖaxó ɔ nɔ yì xɔmɛgbovɔ ɔ gudo. (Ebl. 9:1-3, 6, 7) È tò sɔ́ Aalɔ́ɔn kpo mɛ e bɔ dó wǔtu tɔn lɛ é kpo vɔsanúxwlémawutɔ́ ɖaxó hwɛ̌ cobɔ ye ‘gbɔn xɔmɛgbovɔ e è dó gbò goxɔ ɔ mɛ na ɔ gblamɛ’; mɔ̌ jɛn è ɖó na tó sɔ́ Jezu lɔ b’ɛ na nyí Vɔsanúxwlémawutɔ́ Ðaxó tɛmpli ɖaxó gbigbɔ tɔn Jehovah tɔn tɔn hwɛ̌ cobɔ é na kú, bɔ enɛ gudo ɔ, é ‘gbɔn xɔmɛgbovɔ ɔ gblamɛ, é wɛ nyí agbaza tɔn’ bo yì jixwé. (Ebl. 10:20) Hwɛjijɔ enɛ wu wɛ mɛsɛ́dó Pɔlu ɖɔ ɖɔ Jezu wá “bo nyí vɔsanúxwlémawutɔ́ ɖaxó” bɔ enɛ gudo ɔ, ‘é byɔ Tɛn mímɛ́ e gbɛtɔ́ lɛ ma bló ǎ é mɛ,’ enɛ wɛ nyí ‘jixwé ɖesu.’—Ebl. 9:11, 24.

Vogbingbɔn ɖě ɖò hwenu e è ɖó akɔjijɛ yɔyɔ̌ ɔ ayǐ é kpo hwenu e é bɛ́ azɔ̌ é kpo tɛntin ǎ. Aniwu? Hwenu e Jezu lɛkɔ yì jixwé bo xwlé gbɛ̀ maɖóblɔ̌ tɔn Mawu dó ta mǐtɔn mɛ é ɔ, afɔ we ɖò afɔ atɔn e è na ɖè cobo na ɖó akɔjijɛ yɔyɔ̌ ɔ ayǐ, alǒ é na sɔgbe ɖò sɛ́n lixo é wɛ é ɖè nɛ. Afɔɖiɖe enɛ lɛ ɖokpo ɔ jɛn lɛ́ hun nǔ sín akɔjijɛ yɔyɔ̌ ɔ nu, alǒ ye jɛn lɛ́ zɔ́n bɔ é bɛ́ azɔ̌. Afɔɖiɖe tɛ lɛ ka wɛ?

Nukɔntɔn ɔ, Jezu yì Jehovah nukɔn; wegɔ́ ɔ, é xwlé lee vɔsisa tɔn xɔ akwɛ gbɔn é Jehovah; atɔngɔ́ ɔ, Jehovah yí gbè nú lee hun Jezu tɔn e kɔn nyi ayǐ é xɔ akwɛ gbɔn é é. Afɔ enɛ lɛ wɛ è tò ɖè hwɛ̌ cobɔ akɔjijɛ yɔyɔ̌ ɔ bɛ́ azɔ̌.

Biblu ɖɔ hwenu e Jehovah yí gbè nú lee vɔsisa Jezu tɔn xɔ akwɛ gbɔn é é nú mǐ pɛ́pɛ́pɛ́ ǎ. Enɛ wu ɔ, mǐ sixu ɖɔ tawun ɖɔ hwe lě nu wɛ è ɖó akɔjijɛ yɔyɔ̌ ɔ ayǐ, bɔ é lɛ́ bɛ́ azɔ̌ ǎ. É ɖò mɔ̌ có, mǐ tuùn ɖɔ azǎn wǒ wɛ Pantekotu kpò, bɔ Jezu yì jixwé. (Mɛ. 1:3) Ðò hweɖenu ɖò azǎn enɛ lɛ vlamɛ ɔ, é xwlé lee vɔsisa tɔn xɔ akwɛ gbɔn é Jehovah, bɔ Jehovah yí gbè na. (Ebl. 9:12) Kúnnuɖenú enɛ tɔn jɛ wě gannaganna ɖò Pantekotu sín azǎn gbè. (Mɛ. 2:1-4, 32, 33) É ɖò wɛn ɖɔ akɔjijɛ yɔyɔ̌ ɔ, è ko ɖó ayǐ, b’ɛ bɛ́ azɔ̌.

Bo na dó sɛ̀ sin xwè na ɔ, ee Jehovah yí gbè nú lee hun Jezu tɔn e kɔn nyi ayǐ é xɔ akwɛ gbɔn é gudo é wɛ è ɖó akɔjijɛ yɔyɔ̌ ɔ ayǐ, bɔ é lɛ́ bɛ́ azɔ̌. É bɛ́ azɔ̌ bɔ Jezu nyí Vɔsanúxwlémawutɔ́ Ðaxó kpo Ðɛ̌mɛnu kpo na.—Ebl. 7:25; 8:1-3, 6; 9:13-15.