Kúnnuɖetɔ́ Jehovah tɔn lɛ nɔ ɖó wǔ zɔ nú toxóɖiɖɔ, ɖó hwɛjijɔ sinsɛn tɔn ɖěɖee jinjɔn nǔ e Biblu kplɔ́n mɛ lɛ é jí lɛ é wu. Mǐ nɔ dó cɔcɔ nú acɛkpikpa lɛ ɖɔ lě wɛ nǔ ɖó na nyí gbɔn ǎ, mǐ ka nɔ lɛ́ sɔ́ wema nú toxóɖɔgbɛ́ta lɛ, alǒ mɛ e sɔ́ alɔ bo na ɖu gǎn lɛ é ǎ; mɔ̌ jɛn mǐ ma ka nɔ lɛ́ sɔ́ alɔ bo na ɖu gǎn, alǒ ɖ’alɔ ɖò acɛkpikpa ɖyɔɖyɔ-núwiwa ɖebǔ mɛ ǎ é nɛ. Mǐ ɖi nǔ ɖɔ Biblu na hwɛjijɔ jɔ hwɛjijɔ e è na xwedó ɖò ali enɛ nu lɛ é.

•   Mǐ nɔ xwedó kpɔ́ndéwú Jezu tɔn ɖó éyɛ gbɛ́ ɖɔ emi kún na nɔ tɛn ɖé mɛ ɖò toxóɖiɖɔ linu ó. (Jaan 6:15) É kplɔ́n ahwanvu tɔn lɛ ɖɔ “ye [ni ma] nyí gbɛ̀ ɔ tɔn [ó],” bo ɖexlɛ́ nyi wɛn ɖɔ ye kún ɖó na ɖó nu ɖò toxóɖiɖɔ sín nǔ lɛ mɛ ó.—Jaan 17:14, 16; 18:36; Maki 12:13-17.

•   Mǐ ɖò gbeji nú Axɔ́suɖuto Mawu tɔn e wu Jezu ɖɔ xó elɔ dó é: “È na jla axɔ́suɖuɖu Mawu tɔn sín Wɛnɖagbe gbɔn gbɛ̀ ɔ bǐ mɛ.” (Matie 24:14) Ðó mǐ nyí afɔsɔ́ɖótetɔ́ Axɔ́suɖuto Mawu tɔn tɔn ɖěɖee è zɔ́n azɔ̌ ɖɔ mǐ ni jla ɖɔ é na wá lɛ é wutu ɔ, mǐ nɔ ɖó wǔ zɔ nú toxóɖiɖɔ sín nǔwiwa tò lɛ bǐ tɔn, kaka jɛ tò mǐɖesunɔ tɔn tɔn lɛ jí.—2 Kɔlɛntinu lɛ 5:20; Efɛzinu lɛ 6:20.

•   Wǔ ɖiɖó zɔ mǐtɔn nɔ zɔ́n bɔ mǐ nɔ kpéwú bo nɔ ɖɔ xó nú mɛ e nɔ ɖó nu ɖò toxóɖiɖɔ mɛ lɛ é bǐ faa dó wɛnɖagbe Axɔ́suɖuto Mawu tɔn tɔn wu. Mǐ nɔ tɛ́n kpɔ́n bo nɔ xlɛ́ ɖò xó kpo nǔwalɔ mǐtɔn lɛ kpo mɛ ɖɔ mǐ ganjɛ Axɔ́suɖuto Mawu tɔn wu ɖɔ é wɛ na ɖeɖɛ tagba gbɛ̀ ɔ tɔn lɛ.—Ðɛhan 56:12.

•   Ðó mǐ nɔ nyi alɔ nú kínklán e ɖè ɖò toxóɖiɖɔ linu lɛ é wutu ɔ, mǐ nyí kplékplé nɔví lɛ tɔn ee ɖò bǔ gbɔn gbɛ̀ ɔ bǐ mɛ é ɖé. (Kolosinu lɛ 3:14; 1 Piyɛ́ɛ 2:17) Amɔ̌, sinsɛn ɖěɖee nɔ dó ta toxóɖiɖɔ mɛ lɛ é nɔ dɔn kínklán wá sinsɛnví yetɔn lɛ mɛ.—1 Kɔlɛntinu lɛ 1:10.

 Sísí ɖiɖó nú acɛkpikpa lɛ. Mǐ nɔ ɖó nu ɖò toxóɖiɖɔ mɛ ǎ có mǐ ka nɔ ɖó sísí nú gǎn ɖěɖee ɖò acɛkpikpa e glɔ́ mǐ ɖè lɛ é mɛ lɛ é. Enɛ xò nǔ dó akpa ɖokpo ɔ mɛ xá gbeɖiɖe Biblu tɔn elɔ: “Mi nú mɛ lɛ bǐ ni nɔ hwíhwɛ́ yeɖée dó acɛkpikpa ɖaxó lɛ glɔ́.” (Hlɔmanu lɛ 13:1) Mǐ nɔ nyi sɛ́n lɛ, nɔ sú takwɛ lɛ, bo nɔ wà nǔ ɖó kpɔ́ xá acɛkpikpa ɔ nú ganjininɔ toví tɔn lɛ tɔn e sín kan xò wɛ é ɖè é. Mǐ nɔ ɖ’alɔ ɖò gǎn ɖebǔ e mɛ lɛ nɔ dó bo na flí acɛkpikpa ɔ xwè lɛ é mɛ ǎ, é nyɔ́ wà ɔ, mǐ nɔ xwedó wěɖexámɛ Biblu tɔn e ɖɔ ɖɔ mǐ ni nɔ xoɖɛ nú “axɔ́su lɛ kpodo mɛ e sín alɔ mɛ acɛkpikpa ɖè lɛ bǐ kpan” é, taji ɔ, hwenu e ye ɖò gbeta ɖěɖee sixu wà nǔ dó vivo mɛ ninɔ bo sɛn Mawu wu lɛ é kɔn wá wɛ é.—1 Timɔtée 2:1, 2.

 Mǐ nɔ lɛ́ ɖó sísí nú acɛ e mɛ ɖevo lɛ ɖó bo na wá gbeta yeɖesunɔ tɔn lɛ kɔn ɖò toxóɖiɖɔ linu é. Ði kpɔ́ndéwú ɔ, mǐ nɔ d’avaja gǎn sísɔ́ lɛ mɛ, alǒ gbò kpò nyi ali jí nú mɛ ɖěɖee wá gbeta ɔ kɔn bá sɔ́ gǎn lɛ é ǎ.

 Dìn wɛ mǐ bɛ́ wǔ ɖiɖó zɔ à? Eǒ. Mɛsɛ́dó lɛ kpo Klisanwun xwè kanweko nukɔntɔn ɔ tɔn lɛ kpo wà nǔ ɖokpo ɔ nú acɛkpikpa lɛ. Wema Beyond Good Intentions ɖɔ: “Klisanwun bǐbɛ̌mɛ tɔn lɛ tuùn ɖɔ sísí ɖiɖó nú acɛkpatɔ́ lɛ ɖò dandan có, ye ka nɔ ɖ’alɔ ɖò toxóɖiɖɔ sín nǔ lɛ mɛ ǎ.” Mɔ̌ ɖokpo ɔ, wema On the Road to Civilization ɖɔ ɖɔ Klisanwun bǐbɛ̌mɛ tɔn lɛ, “kún nɔ tɛn ɖé mɛ ɖò toxóɖiɖɔ linu ó.”

 Wǔ ɖiɖó zɔ mǐtɔn ɖò toxóɖiɖɔ linu nɔ wà nǔɖe dó ayijayǐ tò tɔn wu wɛ à? Eǒ. Toví ɖěɖee nɔ xò fífá kpo wanyiyi kpo sín kan lɛ é wɛ mǐ nyí bɔ ado ɖebǔ nɔ hu acɛkpatɔ́ lɛ dó mǐ wu ǎ. Mǐ ni lin tamɛ dó gbeɖiɖó Académie nationale des sciences Ukraine tɔn 2001 tɔn lɛ ɖokpo jí. Gbeɖiɖó ɔ ɖɔ dó wǔ ɖiɖó zɔ mǐtɔn ɖò toxóɖiɖɔ linu wu ɖɔ: “Égbé ɔ, mɛɖé lɛ sixu gbɛ́ wǎn nú afɔ enɛ e Kúnnuɖetɔ́ Jehovah tɔn lɛ nɔ ɖè é; hwɛjijɔ taji e wu acɛkpikpa Nazi kpo Communiste kpo tɔn dóhwɛ ye é ɖokpo nɛ.” É ɖò mɔ̌ có, ɖò acɛkpikpa Union Soviétique tɔn glɔ́ ɔ, Kúnnuɖetɔ́ lɛ tlɛ “kpò ɖò toví e nɔ xwedó sɛ́n lɛ é nyí wɛ. Ye nɔ nɔ gbeji bo nɔ sɔ́ yeɖée dó savɔ̌ dó w’azɔ̌ ɖò gle e mɛ gegě kpédó lɛ é kpo azɔ̌xwé lɛ kpo mɛ, ye ka dóya ɖebǔ nú acɛkpikpa Communiste tɔn ǎ.” Gbeɖiɖó ɔ wá sú ta na bo ɖɔ ɖɔ égbé ɖesu ɔ, nǔ e Kúnnuɖetɔ́ Jehovah tɔn lɛ ɖi nǔ na lɛ é kpo aca yetɔn lɛ kpo “kún nɔ wà nǔ dó ayijayǐ kpo bǔninɔ kpo tò ɖebǔ tɔn wǔ ó.”