O UCUI ira na parofita ena gauna makawa? Na ivakamacala ni Vosa ena Vakadewa ni Vuravura Vou ni 2013, e volai kina na ibalebale ni parofita: “Vakatakilai vua na inaki ni Kalou. Ra vosa ena vuku ni Kalou, ra tukuna na veika se bera ni yaco, ivakavuvuli nei Jiova, nona ivakaro, kei na nona lewa.” Eda sega ni tukuna na veika se bera ni yaco, ia eda vosa ena vuku ni Kalou nida kacivaka nona Vosa.—Maciu 24:14.

E dua dina na itavi dokai meda tukuni Jiova na noda Kalou da qai vakavulica na nona inaki me baleti keda! Eda cakacaka vata tale ga kei na “agilosi ni vuka voli e macawa.” (Vkta. 14:6) Ia ena dau basika na ituvaki dredre eda na raica kina vakamamada na itavi dokai qori. Na ituvaki cava soti? Na oca, yalolailai, se da nanuma ni sega na beteda. Era sotava tale ga qori na parofita yalodina ena gauna makawa, ia era sega vakadua ni soro. E vukei ira o Jiova mera vakayacora vinaka nodra ilesilesi. Meda raica mada eso na ivakaraitaki da qai dikeva na sala eda rawa ni ucui ira kina.

Ena so na gauna eda sega ni lako rawa ena cakacaka vakavunau nida oca ena itavi eda qarava e veisiga. Ena vinakati meda vakacegu; o Jisu mada ga e dau vakacegu kei ratou na nona yapositolo. (Mari. 6:31) Ia vakasamataki Isikeli ni tiko e Papiloni kei na nona itavi vei ira na Isireli era kau vakavesu mai Jerusalemi. A tukuna vua na Kalou ena dua na gauna me taura e dua na biriki qai ceuta kina na koro o Jerusalemi. Oti qori me qai viribaita vakaivakatakarakara na koro ni davoca na yasana imawi me 390 na siga, me davo tale ga ena yasana imatau me 40 na siga. E tukuna o Jiova vei Isikeli: “Raica! Au na vesuki iko ena dali mo kua ni vuki ena yasamu  adua, me oti mada na siga ni nomu viribai.” (Isik. 4:1-8) Na ka e tukuni qori vei Isikeli e rairai vakavuna mera kauai kina na Isireli era tu vakavesu. E cakava qori o Isikeli me sivia e dua na yabaki, ia sa veivakaocai dina. Ena cakava rawa vakacava na parofita qo na nona ilesilesi?

E kila o Isikeli na vuna e talai kina me parofita. Ni talai koya na Kalou, e kaya vua: “Era rogoca se sega [na Isireli], era na kila ga ni maliwai ira tiko e dua na parofita.” (Isik. 2:5) E sega vakadua ni guilecava o Isikeli na inaki e talai kina. E yalorawarawa ni matanataka na kena viribaiti o Jerusalemi. E vakaraitaka o Isikeli ni dua dina na parofita. E vakasavui vua kei ira nona itokani era vesu tu na itukutuku qo: “Sa ravuti na koro!” Era qai kila ena gauna qori na Isireli ni maliwai ira e dua na parofita.—Isik. 33:21, 33.

Nikua, eda veivakasalataki ni sa voleka ni vakarusai vakadua na vuravura i Setani. Eda na rairai oca, ia eda solia noda igu kece meda vunautaka na Vosa ni Kalou, veisikovi lesu, kei na vuli iVolatabu. Ni sa vakayacori na parofisai me baleta na icavacava ni vuravura qo, eda lomavakacegu ni ‘vakatakilai vei keda na inaki ni Kalou.’

Eda gumatua ena vunau ni tokoni keda na yalo i Jiova. Ia eda dau yalolailai ena so na gauna nira sega ni ciqoma na itukutuku vinaka na lewenivanua. Ena yaga vakacava vei keda na ivakaraitaki i Jeremaia? E vakasewasewani, e vosabeci, e vakalialiai ni kacivaka na itukutuku ni Kalou vei ira na Isireli. Dua na gauna e tukuna o koya: “Au na sega ni cavuti koya, au na sega tale ni vosa ena yacana.” E tamata ga vakataki keda o Jeremaia. Na cava e sega kina ni soro ni vunau? E tukuna tale: “Ia e lomaqu, na nona vosa e vaka na bukawaqa e sogo tu ena suiqu, au sega ni kinoca rawa, au sega ni tarova rawa.”—Jere. 20:7-9.

Eda dau yalolailai tale ga nikua nira sega ni rogoca na itukutuku vinaka na lewenivanua. Ia eda na valuta na yalolailai ke da vakasamataka vakatitobu na inaki ni itukutuku eda kacivaka. Na itukutuku qori e vaka ‘na bukawaqa e sogo tu e suida.’ Ena caudre tiko ga e lomada na bukawaqa qori ke da vakamatauna meda wilika e veisiga na iVolatabu.

Era dau veilecayaki eso na lotu vaKarisito ni soli vei ira na ilesilesi era sega ni matau kina. De va tale ga qori na rai ni parofita o Osea! E vakaroti koya o Jiova: “Lai vakawatitaka e dua na yalewa saqamua me so kina na luvemu ni sala.” (Osea 1:2) Vakasamataka mada ke tukuna vei iko na Kalou mo vakawatitaka e dua na saqamua! Na cava o na cakava? A ciqoma o Osea na ilesilesi qori. E vakawatitaki Komera, e dua kina na luvena tagane. Oti vakalailai, e rua tale na luvena, dua na yalewa dua na tagane. E macala ni rau luvenisala na gone qori. Sa tukuna oti o Jiova vei Osea ni na “cicimuri ira na dau domoni koya” na yalewa ena vakawatitaka. Dikeva na matavosa, “ira na dau domoni koya.” Oti ena qai lesuvi Osea tale. Vakacava ke o iko o Osea? O na ciqomi koya tale me watimu? Qori sara ga na ka e tukuna o Jiova vei Osea! E mani voli Komera tale ena dua na isau levu.—Osea 2:7; 3:1-5.

Ena rairai veinanuyaka o Osea se na yaga vakacava na nona ilesilesi. Ni muria na ka e tukuni vua, eda kila kina na levu ni rarawa i Jiova nira talaidredre na Isireli. Io, era qai lesuvi Jiova tale eso na Isireli era yalomalumalumu.

Nikua, e sega ni tukuna na Kalou meda “vakawatitaka e dua na yalewa saqamua.” Ia e yaga dina na yalorawarawa i Osea me ciqoma qori. Ena sala cava? Dua meda dau yalorawarawa ni vunautaka na itukutuku vinaka ni Matanitu ni Kalou e ‘matanalevu kei na veivale,’ ke dredre mada ga ena so na gauna. (Caka. 20:20) De  dua ena dredre mo vakaitavi ena so tale na iwalewale ni vunau. Era kaya e levu na vuli iVolatabu nira marautaka na vuli, ia era na sega ga ni vunau e veivale. Toso na gauna, levu era sa vunau tale ga e veivale. Vakacava dua na ka o vulica eke?

Na cava tale eda rawa ni vulica vei Osea ni ciqoma na ilesilesi dredre qori? A rawa ni vakaiulubale me kua ni cakava na drama vakaivakatakarakara me baleti watina. Ke sega na ivola i Osea, eda na sega ni kila na dredre ni nona ilesilesi. Eda na rairai sotava tale ga qori ena ituvaki eda kila ni rawa nida tukuni Jiova kina. A sotava qori o Anna, e dua na goneyalewa e vuli tiko ena sekeneri mai Merika. E kerea nodra qasenivuli mera vola e dua na ulutaga era taleitaka, me veiuqeti tale ga na ka era vola. E rawa sara ga ni vakawalena o Anna na gauna qori me kua kina ni vunau e koronivuli. Ia e kila ni solia o Jiova na gauna qori me vunau kina. Ni kila na ka e rawa ni yaco, e masu vei Jiova qai gu na lomana me vunau e koronivuli. E vola e dua na ulutaga “Bula Vakaidewadewa: Dikeva na kena ivakadinadina.”

Ni wilika o Anna nona italanoa ena kalasi, e veitaravitaka vua na taro e dua na goneyalewa e vakabauta na bula vakaidewadewa. E kila vinaka o Anna na ka me tukuna. E kurabui o nona qasenivuli, mani solia vei Anna na icocovi ni veiuqeti duadua na nona italanoa. Sa qai veitalanoa vinaka tale o Anna kei na goneyalewa e taro. Na cava e vakila o Anna ni vakayagataka vinaka na gauna qori me tukuni Jiova kina e koronivuli? E kaya: “Qo au sa doudou niu vunautaka na itukutuku vinaka.”

Eda sega ni tautauvata sara kei ira na parofita, ia nida vakatotomuria na nodra yalorawarawa ni soli ira na parofita me vakataki Isikeli, Jeremaia kei Osea! Na yalo ni veiqaravi. Nida vakatotomuria tale ga nikua na ivakarau ni yalo qori, ena vuavuaivinaka noda cakava na loma i Jiova! Era tu tale eso na parofita makawa e vakasakiti dina nodra ivakaraitaki. Ena nomudou sokalou vakavuvale se nomu vuli vakataki iko, vakacava mo wilika qai vakasamataka vakatitobu na sala o rawa ni muria kina nodra ivakaraitaki?