O DAU rarawa beka se galili?— O dau vaqaqa se e bau dua e lomani iko?— E so na gone era vaqaqa oqori. Ia e yalataka na Kalou: “Ka’u na sega ni guilecavi iko.” (Aisea 49:15) Eda sega li ni marautaka oya?— Io, e lomani keda dina na Kalou o Jiova!

E kaya e dua e vola na iVolatabu: “Ni sa laivi au na tamaqu kei na tinaqu, ena qai keveti au cake ko Jiova.” (Same 27:10) E veivakacegui dina oya, se vakaevei?— Io, e tukuna vei keda o Jiova: “Kakua ni ko rere; ni’u sa tiko vata kei iko . . . ka’u na vukei iko.”​—Aisea 41:10.

Ia, so na gauna e dau vakalaiva o Jiova me vakaleqai keda o Setani. E dau vakatarai Setani me vakatavolei ira Nona tamata. Ni rui kaukaua nona vakararawataki Jisu o Setani, e kacivaka sara ga vei Jiova o Jisu: “Noqu Kalou, noqu Kalou, ko sa biuti au e na vuku ni cava?” (Maciu 27:46) Dina ga ni rarawa o Jisu, e kila tiko ni lomani koya o Jiova. (Joni 10:17) E kila tale ga o Jisu ni Kalou e dau vakatarai Setani me vakatovolei ira qai vakararawataki ira na tamata ni Kalou. Ena vakamacalataki ena dua tale na wase na vuna e vakatarai Setani kina na Kalou me cakava na veika oya.

Eda dau rere ena so na gauna nida se gonelalai. Me kena ivakaraitaki, o sa bau yali ena dua na gauna?— O rere beka?— E levu na gone era na rere ena gauna oya. A talanoataka na Qasenivuli Levu na kena yali e dua na ka. E sega ni nona yali e dua na gone. E yali e dua na sipi.

O rawa ni vakatauvatani kei na dua na sipi. Ena sala cava? Era  sega ni lelevu sara se kaukaua na sipi. E gadrevi mera qaravi ra qai taqomaki. O koya e dau qaravi ira na sipi e vakatokai me ivakatawanisipi.

E talanoataka o Jisu e dua na ivakatawanisipi e duanadrau na nona sipi. E mani yali e dua na sipi. De a vinakata me raica na sipi oya na cava e tiko ena yasa kadua ni delana. Sega ni dede sa yawaki ira na vo ni sipi. O rawa ni vakasamataka nona lomaleqa na sipi oya ni gauna e raivuki kina era sa yali na kena vo?—

Na cava ena cakava na ivakatawanisipi ni yali e dua nona sipi? Ena kaya beka ni sa bale sara ga vua na sipi oya qai sega ni via kauaitaka? Se ena maroroi ira tiko na 99 na sipi me lai vakasaqara na dua na sipi oya? E dodonu beka na nona sasagataka vaka oya e dua ga na sipi?— Ke o iko na sipi e yali oya, o na vinakata me vakasaqarai iko na ivakatawanisipi?—

E lomani ira kece na nona sipi na ivakatawa, okati kina na sipi e yali oya. Oya na vuna e vakasaqara kina na sipi e yali. Vakasamataka mada na nona marau na sipi oya ni raica na ivakatawa ni sa lako tiko yani! E kaya o Jisu ni marau tale ga na ivakatawa ni sa kunea na nona sipi. E marautaka  vakalevu cake mai vei ira na 99 era sega ni yali. O cei e vakataki koya na ivakatawa oya e talanoataka o Jisu? O cei e kauaitaki keda me vaka nona kauaitaka na ivakatawa na nona sipi?— E kaya o Jisu ni vaka kina o Tamana mai lomalagi. E Tamana o Jiova.

Na Kalou o Jiova e nodra iVakatawa Levu na nona tamata. E lomani ira kece na qaravi koya, okati kina o ira na lalai me vakataki iko. E sega ni vinakata meda mavoa se vakarusai. E veivakacegui na noda kila ni vaka sara ga oya na nona kauaitaki keda na Kalou!​—Maciu 18:12-14.

O vakabauta dina sara ga na Kalou o Jiova?— O vakabauta ni bula dina tiko o koya?— Eda sega ni raici Jiova rawa. E yalo o koya. Eda sega ni raica rawa na yagona. Ia e bula dina tiko o koya, e raici keda tiko mai. E kila na gauna eda gadreva kina na veivuke. E rawa nida vosa vua nida masu, me vaka ga nida vosa vua e dua ena vuravura oqo. E vinakata o Jiova meda masu vua.

 O koya gona ni o rarawa se galili, na cava e dodonu mo cakava?— Vosa vei Jiova. Ni o toro volekati koya, ena vakacegui iko qai vukei iko tale ga. Nanuma tiko ni lomani iko o Jiova, ena gauna mada ga o galili kina. Daru raica mada na nodaru iVolatabu. E tukuna vei keda na Same 23, tikina e 1: “A noqui vakatawa ko Jiova; ena sega na ka me yali vei au. Sa vakadavori au e na vanua veico drokadroka: sa tuberi au e na bati ni uciwai sa drodro malua.”

Raica mada na ka e kuria o koya e volavola oqo ena tikina e 4: “Kevaka ka’u sa lako e loma ni buca ni yaloyalo ni mate, ka’u na sega ni rerevaka na ca: ni kemuni sa tiko vata kei au; ena vakacegui au na nomuni titoko kei na nomuni matanakilagi.” Oqori na ka eda na vakila ke noda Kalou o Jiova. Eda na vakacegu nida sotava na rarawa. O vakila oqori?—

Me vaka nona qarauna na nona sipi na ivakatawa, e qarauni ira vinaka sara na nona tamata o Jiova. E vakaraitaka vei ira na sala e dodonu mera muria, ra qai muria ena marau. Ke ra mani vakila tiko na tiko yavavala, era na sega ga ni rere. Dau vakayagataka na ivakatawa na nona ititoko kei na nona matanakilagi me taqomaki ira kina nona sipi mai vei ira na manumanu era via vakamavoataki ira. E vakaraitaka na iVolatabu ni a taqomaka o Tevita na nona sipi  mai na laione kei na pera. (1 Samuela 17:34-36) Era kila na tamata ni Kalou ni na taqomaki ira tale ga o Jiova. Era lomavakacegu baleta ni tiko kei ira na Kalou.

O Jiova e lomani ira dina na nona sipi, qai tuberi ira vakamalua. E kaya na iVolatabu: ‘Ena liutaki ira na nona sipi me vaka na ivakatawa. Ena keveti ira na luve ni sipi.’​—Aisea 40:11.

O sega li ni marautaka ni vaka sara ga oya o Jiova?— O vinakata mo dua na nona sipi?— O ira na sipi era rogoca na domona na nodra ivakatawa. Era kabiti koya. O dau vakarorogo vei Jiova?— O dau kabiti koya?— Ke vaka kina e sega ni dodonu mo rere. Ena tiko vata kei iko o Jiova.