E vinakata o Jiova mera dina ena nodra bubului ni vakamau na vakawati. A kaya ni vauci rau vata na imatai ni tagane kei na yalewa: “O tagane, ena kabiti watina, erau na lewe dua ga.” A tokaruataka na vosa ya o Jisu ena dua na gauna e muri qai kuria: “Na ka sa vauca vata na Kalou me kua ni tawasea na tamata.” (Vakatekivu 2:24; Maciu 19:3-6) Ena nodrau rai o Jiova kei Jisu, na vakawati e dodonu me tawamudu qai tini ena mate. (1 Korinica 7:39) Sega gona ni dodonu me raici vakamamada na veisere, ni ka dokai na vakawati. O Jiova e cata na veisere e sega na kena yavu vakaivolatabu.—Malakai 2:15, 16.

 Cava ga na yavu vakaivolatabu ni veisere? E cata o Jiova na veibutakoci kei na veiyacovi tawadodonu. (Vakatekivu 39:9; 2 Samuela 11:26, 27; Same 51:4) E vakavotui na nona vakasisilataka na veiyacovi tawadodonu ena nona vakatara me yavu ni veisere. (Me baleta na veika e okati ena veiyacovi tawadodonu, raica na Wase e 9, parakaravu 7.) E solia o Jiova na dodonu vua na isa ni vakawati e sega ni cala me lewa se na tiko vata ga kei watina se me rau sere. (Maciu 19:9) Ke vakatulewataka me rau sere, na ka e cakava ya ena sega ni cati koya kina o Jiova. Ia na ivavakoso vaKarisito ena sega ni uqeta e dua me veisere. Ena so na ituvaki, na isa ni vakawati e sega ni cala ena vakatulewataka me tiko vata ga kei watina e cala, vakauasivi ke veivutuni dina. Io, mera vakatulewa yadua sara ga o ira e tiko na yavu vakaivolatabu ni nodra veisere ra qai tu vakarau ni sotava na vinaka se ca ni ka era vakatulewataka.—Kalatia 6:5.

Ena so tale na ituvaki ca sara, era vakatulewataka na lotu vaKarisito mera veisere se veibiu, dina ga ni sega ni kena yavu na veiyacovi tawadodonu. Ke va qori, e kaya na iVolatabu ni o koya e biubiu “me kua ga ni vakawati, ke sega me lesu ga vei watina.” (1 Korinica 7:11) Sega ni rawa ni lai vakawati tale na lotu vaKarisito e biubiu. (Maciu 5:32) Meda raica mada eso na ituvaki duatani sara era nanuma kina eso ni rawa kina na veibiu.

Nakita o tama me kua ni veiqaravi. Kena ibalebale e dravudravua na vuvale se sega na ka me ratou bula kina e veisiga na lewenivuvale ni sega ni via veiqaravi o tama, dina ga ni rawa ni cakava. E kaya na iVolatabu: “Ke dua e sega ni qaravi . . . ira na lewe ni nona vuvale, e sa cakitaka na vakabauta, ena ca sara o koya, e vinaka cake e dua e sega ni vakabauta.” (1 Timoci 5:8) Ke sega ni via veisau o tama, ena vakatau vei tina ke via vakalawataka na nodrau veibiu me taqomaki kina kei iratou na luvena. Ia mera vakasamataka vinaka sara na qase ni ivavakoso na nona beitaki e dua na lotu vaKarisito ni sega ni via qarava nona vuvale. E rawa sara ga ni vakasivoi kina mai na ivavakoso.

iTovo kaukaua ena ivakatagedegede e ca sara. E rairai rivarivabitaki na nona bula o koya e vakawati e vakalolomataki koya o kena isa ena ivalavala voravora. Ke lotu vaKarisito o koya e voravora na nona ivalavala, mera vaqaqa vinaka na qase ni ivavakoso na dina ni ka e yaco tiko. Na cudru kei na ivalavala voravora erau yavu ni veivakasivoi.—Kalatia 5:19-21.

Leqataki sara ga na bula vakayalo. E sega ni vinakata e dua na isa ni vakawati me vakaitavi o watina ena ka e vauca na nona sokalou, se vakasaurarataki koya me cakava e dua na ka e beci kina na ivakaro ni Kalou. Ena ituvaki va qori, o koya e vakaleqai ena vakatulewataka ke sala duadua ga ni nona “talairawarawa ga vua na Kalou ni iliuliu, sega vua na tamata” na nona vakalawataka na veibiu.—Cakacaka 5:29.

Ena ituvaki kece e veivosakitaki mai cake, sega ni dodonu me dua e vakasaurarataka na isa ni vakawati e sega ni cala me veibiu se tiko ga kei watina. De ra na veivakasalataki na qase ni ivavakoso se so tale na lotu vaKarisito matua vakayalo, ia era sega ni kila na veika e yaco dina tiko vei rau na veiwatini. O Jiova ga e kila. Na yalewa se tagane lotu vaKarisito e vakatubutaka nona leqa me rawa kina ni veibiu, e sega ni doka na ituvatuva ni vakawati. Mani vakacava na kena via vunitaki, o Jiova e kila na vuna e via veibiu kina e dua. Io, “e luvawale qai laurai levu na ka kece e matai koya eda na saumitaro vua.” (Iperiu 4:13) Ke sega ni veisau na ituvaki rerevaki sara e sotava tiko na lotu vaKarisito qai vakadeitaka o koya ni sa iotioti ga ni ka me caka na veibiu, me kua ni dua e vakalewai koya. Ia me nanuma tiko ga nida na “tu kece ena mata ni idabedabe ni veilewai ni Kalou.”​—Roma 14:10-12.