LESONI 6
Na Cava na iNuinui me Baleti Ira na Mate?
1. Na cava na itukutuku vinaka me baleti ira na mate?
Ni yaco yani o Jisu e Pecani volekati Jerusalemi, sa oti e va na siga na mate i Lasarusa na nona itokani. A lako o Jisu ena ibulubulu rau qai tomani koya na ganei Lasarusa, o Meri kei Marica. Sega ni dede era gole yani e dua na ilala levu. Vakasamataka mada na nodrau marau o Marica kei Meri ni sa vakaturi Lasarusa o Jisu.—Wilika Joni 11:21-24, 38-44.
Sa kila rawa tu o Marica na itukutuku vinaka me baleti ira na mate. A kila ni o Jiova ena vakaturi ira na mate mera bula tale e vuravura.—Wilika Jope 14:14, 15.
2. Na cava na kedra ituvaki na mate?
E tukuna na Kalou vei Atama: “Ni o kuvuniqele ga, o na suka mo kuvuniqele tale.”—Vakatekivu 3:19
Eda buli na tamata mai na kuvu ni qele. (Vakatekivu 2:7; 3:19) E sega ni tiko vei keda e dua na ka tawarairai, e sega tale ga ni bula tiko e dua na ka ena gauna eda mate kina. Sa cegu na yavala ni noda mona ena gauna qori, sa oti tale ga na ka eda vakananuma. Nira sega ni vakila e dua na ka o ira na mate, a sega kina ni talanoataka o Lasarusa e dua na ka a yaco ena gauna a mate kina.—Wilika Same 146:4; Dauvunau 9:5, 6, 10.
Vakacava ena vakararawataki ira na tamata na Kalou ena bukawaqa nira mate? Ni tukuna na iVolatabu nira sega ni vakila e dua na ka o ira na mate, e macala vakasigalevu ni lasu na ivakavuvuli ni kama mai eli qai beci kina na Kalou. E vakasisila vua na vakasama nira na vakararawataki ena bukawaqa na tamata.—Wilika Jeremaia 7:31.
Sarava na vidio Na Cava na Kedra iTuvaki na Mate?
3. E rawa nira vosa vei keda na mate?
Era sega ni rawa ni vosa se rogo na mate. (Same 115:17) Ia e tiko eso na agilosi ca, era rawa ni vosa vei ira na tamata ra qai lasutaka ni o ira na sa mate. (2 Pita 2:4) E vakarota o Jiova meda kua ni saga meda veivosaki kei ira na mate.—Wilika Vakarua 18:10, 11.
4. O cei ena vakaturi?
E levu vei ira na milioni vakacaca era mate tu ena ibulubulu era na vakaturi mera bula e vuravura. Era na vakaturi mada ga eso era sega ni kila na Kalou kei na so tale ga na dau caka ca.—Wilika Luke 23:43; Cakacaka 24:15.
Ena soli na gauna vei ira na vakaturi mera vulica na ka dina me baleta na Kalou, ra qai vakaraitaka na nodra vakabauti Jisu ena nodra talairawarawa vua. (Vakatakila 20:11-13) O ira era vakaturi ra qai cakava na ka vinaka era na marautaka na bula tawamudu e vuravura.—Wilika Joni 5:28, 29.
5. Na cava e vakaraitaka na veivakaturi me baleti Jiova?
E rawa na inuinui ni veivakaturi ena nona tala mai na Kalou na Luvena me mate ena vukuda. Na veivakaturi e ivakaraitaki ni loloma i Jiova kei na nona loloma soli wale. O cei sara mada o via sotava ena gauna era na vakaturi kina na mate?—Wilika Joni 3:16; Roma 6:23.
