BAIBULO JIKUSACHENGA UMI WA ŴANDU

ANA mayi jwine juŵasimene ni yakusawusya kutandila ali mwanache jwamanyilile chamtuli kuti umi wakwe ukwete chakulinga? Ana chichi chachamtendekasisye mundu jwine juŵaliji jwakwimuchila boma kuti aŵe jwakulalichila jwamtendele? Aŵalanje nganisi kuti amanyilile kwanga kwa yiwusyo yeleyi.

“Nasachililaga kupata ŵandu ŵakuti anonyeleje soni kuti alimbikasyeje.”​—INNA LEZHNINA

CHAKA CHAKUPAGWA:1981

CHILAMBO CHAKUTYOCHELA: RUSSIA

MBILI JANGU: NASIMENE NI YAKUSAWUSYA YEJINJI NDILI MWANACHE

KALA KANGU: Napagwile jwangapikana. Achinangolo ŵangu ŵaliji ŵangapikanasoni. Naliji jwakusangalala kwa yaka 6 yandanda ya umi wangu. Nambo kaneko ulombela wa achinangolo ŵangu wamasile. Atamose kuti naliji jwachinandipile, nambope namanyilile kuti achinangoloŵa ulombela wawo umasile mwamti yeleyi yandechele maŵanga mumtima mwangu. Ulombelawu uli umasile, baba ni alumbuŵangu ŵakulungwa ŵajile kukutama ku Troitsk, nambo mama ŵangu ni une twapite kukutama ku Chelya­binsk. Pali papite ndaŵi mama ŵangu ŵalombelesoni. Nambo baba ŵangu ŵasambanoŵa ŵaliji ŵakolelwa mnope, mwamti ŵatamilaga kwaputa mayi soni une.

Mu 1993, alumbuŵangu ŵakulungwa ŵajasiche pangosi ja mesi. Wosope m’liŵasa lyetu chatukamwile mnope chanasa ligongo lya ngosiji. Mama ŵangu ŵatandite kolelwa mwamti nombenawo ŵandagasyaga mpela muŵatendelaga baba ŵakusimana ŵala. Natandite kusosasosa umi wambone soni nasachililaga kupata ŵandu ŵampaka anomnyeleje yisyesyene. Myoyo najawulaga kumachalichi gakulekanganalekangana kuti ngapate ŵandu ŵakulimbikasya, nambo pangali atamose jumo juŵalimbikasyaga.

BAIBULO JACHENJILE UMI WANGU: Panakwete yaka 13 mjangu jwamkalasi mwetu juŵaliji jwa Mboni sya Yehofa ŵasalilaga ngani sya m’Baibulo. Nasangalele kulijiganya ya ŵandu ŵa m’Baibulo mpela Nowa soni Yobu, ŵaŵamtumichile Mlungu atamose kuti ŵasimanaga ni yakusawusya. Mkanipapite ndaŵi natandite kulijiganya Baibulo ni ŵa Mboni sya Yehofa soni kusimanikwa kumisongano jawo.

Kulijiganya Baibulo kwambugwile meso mwamti kwangamuchisye kuti manyilile yisyesyene yejinji. Yangwayiye soni yasangalasye mnope kumanyilila kuti Mlungu akwete lina. (Masalimo 83:18) Nasangalale kumanyilila kuti yajasasile Baibulo kuti yichitendekwa ‘m’masiku gambesi’ yili yisyesyene. (2 Timoteo 3:​1-5) Nasangalelesoni panalijiganyisye yakuti kuchiŵa kwimuka kwa ŵandu ŵaŵawile. Yeleyi yandendekasisye kusimichisya kuti chinjawonasoni alumbuŵangu ŵala.​—Yohane 5:​28, 29.

Nambope, ngaŵa kuti wosope ŵasangalele ni yindu yambone yanapatileyi. Mama ŵangu soni baba ŵakusimana ŵala ŵaŵenganaga mnope ni Mboni sya Yehofa. Jemanjaji ŵalinjile kunganganichisya kuti ndeche kulijiganya Baibulo. Nambo nayinonyelaga mnope yanalijiganyaga mwamti nganingunda kuti nayileche.

Nambope yaliji yakusawusya kuyipilila yindu yaŵatendaga ŵamwiŵasa mwangu. Chakusawusya chine chaliji chiwa cha mlumbugwangu jwanondi jwanajawulaga najo kumisongano ja Mboni sya Yehofa. Jwalakwe jwawilesoni pangosi ja mesi. Nambope ŵamboni sya Yehofa ŵalimbikasisye mnope pandaŵi jakusawusaji. Kusala yisyene jemanjaji aŵele ali mkunonyela yisyesyene soni kulimbikasya, yindu yele nayisoŵaga kwa ndaŵi jelewu paumi wangu. Yeleyi yangamuchisye kumanyilila kuti jeleji jili dini jisyesyene. Kaneko mu 1996 nabatisidwe ni kuŵa jwamboni sya Yehofa.

UMBONE WAMBATILE: Napatile jwamlume jwambone lina lyakwe Dmitry soni apano pamasile yaka 6 tuli paulombela. Wosope tukutumichila pa ofesi ja Mboni sya Yehofa ku St. Petersburg. Pali papite ndaŵi, achinangolo ŵangu ŵatandite kuchimbichisya yindu yangusakulupilila.

Ndili jwakusangalala mnope ligongo lyakummanyilila Yehofa. Kumtumichila jwalakwe kungamuchisye kumanyilila chakulinga chisyesyene cha umi wangu.

“Nakwete yiwusyo yejinji yanasakaga ndili mbatile kwanga kwakwe.”​—RAUDEL RODRÍGUEZ RODRÍGUEZ

CHAKA CHAKUPAGWA: 1959

CHILAMBO CHAKUTYOCHELA: CUBA

MBILI JANGU: NALIJI JWAKWIMUCHILA BOMA

KALA KANGU: Napagwile m’chilambo cha Cuba mumsinda wa Havana. Ku dela janakulile, ŵandu ngananonyelanaga soni ŵatamilaga kutenda yachiwawa. Panakulaga unesoni nanonyelaga maseŵela ga ndewu.

Nakombolaga chenene kusukulu mwamti achinangolo ŵangu ŵalimbikasisye kuti njawule ku yunifesite. Panaliji kweleko natandite kuganisya kuti yindu yandale m’chilambo chetu ngayikwenda chenene mwamti yikusosekwa kuchenga. Myoyo naganisisye yakwimuchila boma. Une ni mjangu jwa mkalasi mwemtu twamkamwile jwapolisi jwine ni chakulinga chakuti tumsumule wuti. Patwalimbanaga najo, jwapolisijo jwawulele mnope mumtwe. Une ni mjanguju ŵatutaŵile nikutuŵika mundende mwamti ŵatusalile kuti chatuwulaje mwakutugombela ni wuti. Mumtimamu nadandawulaga mnope kuti chimbwe ndili jwachinandipile, ndili ni yaka 20 basi.

Panaliji mundende nalinjililaga yachingatendeje pameso pa asilikali ŵakungombela. Nganisakaga kuti ngawonecheje kuti ngwete woga. Nambope pandaŵi jijiji nalagaga ni yiwusyo yejinji mumtima mwangu. Naliwusyaga kuti, ‘Ligongo chichi pachilambopa pagumbele ni yindu yangali chilungamo? Ana umi ni uwuwupe basi?’

BAIBULO JACHENJILE UMI WANGU: Pali papite ndaŵi, ŵatusalile kuti ngatuwulagasoni, mmalomwakwe chitutame mundende kwa yaka 30. Jaliji ndaŵi jeleji pele nasimene ni ŵamboni sya Yehofa ŵaŵaliji mundendemo ligongo lya yindu yakusakulupilila. Natesile chidwi ni kulimba mtima kwa ŵamboniŵa soni kutama kwawo mwamtendele ni ŵane. Atamose kuti ŵaleŵele pakwataŵa, nambope jemanjaji nganawonekaga ŵakutumbila.

Ŵamboniŵa ŵanjiganyisye kuti Mlungu akwete chakulinga ni ŵandu wosope. Jemanjaji ŵanjiganyisye kutyochela m’Baibulo kuti Mlungu chachichenga chilambochi nikuŵa paladaiso mwele muchiŵa muli mwangali yachiwawa soni yindu yangali chilungamo. Ŵanjiganyisyesoni kuti chilambo chapasichi chichigumbala ni ŵandu ŵambone, ŵele chachikola upile wakutama ni umi wamlama kwangamala.​—Masalimo 37:29.

Nasangalalaga kulijiganya ni ŵamboniŵa nambope ndamo syangu syaliji syakulekangana mnope ni sya jemanjaji. Nayiwonaga kuti nganimba ngombwele kutama ngajinjilila nawo yandale kapena kwamba kutama ngawuchisya ŵane pakundendela yachipongwe. Myoyo naganisisye yakuti mbalanje Baibulo pajika. Panamalisisye kujiŵalanga ni panamanyilile kuti ŵamboni sya Yehofa ni ŵelepewo ŵakusatenda yindu mpela Aklistu ŵa mu yaka 100 yandanda.

Kulijiganya Baibulo kwangamuchisye kumanyilila kuti papali yindu yejinji yanasosekwaga kuchenga paumi wangu. Mwachisyasyo, nasosekwaga kuchenga kaŵechete gangu ligongo pandanda nanonyelaga kutukana. Nasosekwagasoni kuleka kukwemba soona. Nasosekwagasoni kuleka kwinjilila nawo yandale. Yaliji yakusawusya kuleka yindu yeleyi, nambope Yehofa ŵangamuchisye mwamti nakombwele kuyileka.

Chindu chakusawusya mnope chanasosekwaga kuchenga chaliji kuwukamula mtima ŵane pandumbilikasisye. Mpaka lelo, ngusajipopelelape ngani jeleji. Malemba gane ga m’Baibulo gaŵele gali mkungamuchisya mnope, mpela lilemba lya Misyungu 16:​32, lyalikusati, “Mundu jwangatumbila chitemape akusampunda mundu jwamachili mnope, mundu jwakusawusimana mtima akusapunda msilikali jwakusumula msinda.”

Mu 1991, nabatisidwe ni kuŵa jwamboni sya Yehofa. Nabatisidwile mu libeseni lyekulungwa lya mesi lyalyaliji mundendemo. Mu chaka chakuyichisya, akayidi ŵanewe ŵatukopwesye mundende ni kututumisya ku Spain ligongo lyakuti kweleko kwaliji kwana ŵachinasi ŵetu. Panagambile kwika ku Spain, ndaŵi jijojo natandite kusimanikwa pa misongano ja Mboni sya Yehofa. Ŵamboni sya Yehofa kweleko ŵambochele chenene mpela kuti twamanyigene kalakala soni ŵangamuchisye kuti syoŵelele umi wa ku Spain.

UMBONE WAMBATILE: Apano ndili mundu jwakusangalala soni ngumtumichila Mlungu yimpepe ni liŵasa lyangu. Nambosoni ngusakamulichisya masengo ndaŵi jangu jejinji pakwakamuchisya Candu Cane kulijiganya Baibulo. Pangukumbuchila kuti panaliji mnyamata ngapochele chilango chakuwulajidwa ligongo lya ndamo syangu, ngusamyamichila Yehofa pakungamuchisya kuchenga ndamo syangu. Ngusasangalala ligongo lyakuti ndili chiŵela umi soni kuti ngwembecheya umi wangamala msogolo. Ngwembecheya ndaŵi jele chilambochi chichiŵa Paladaiso mwamti chilungamo chichiŵa palipose soni “ngasipapagwa chiwa.”​—Chiwunukuko 21:​3, 4.

[Maloŵe Gagombelechesya pa peji 19]

“Yangwayiye soni yasangalasye mnope kumanyilila kuti Mlungu akwete lina”

[Chiwulili pa peji 20]

Une ni ŵamkwangu tukusasangalala kwalalichila ŵandu ŵangapikana pakamulichisya masengo mabuku ga m’chiŵecheto chamakono