MBALI 3
Ana Nduni Jwampaka Atulongolele Chenene?
“Atumisye lilanguka lyawo, soni usyesyene wawo. Yindu yeleyi pajika yinongolele.”—SALIMO 43:3.
Patukusaka kumanyilila kakamulicisye masengo ka cindu casambano tukusaŵalangaga malamusi gakutyocela kwa juŵapangenye. M’yoyosoni, ana Mkupanganya jwetu nganaŵa jwakuŵajilwa kutusalila yampaka tutende kuti tuŵe ŵakusangalala?
Ana tukusamanyilila catuli kuti kwana Mkupanganya?
Namatetule pa majiganyo, George Zinsmeister, jwaŵajiganyaga pa koleji ja ku Massachusetts, akusakulupilila Mlungu. Jwalakwe ŵajanjile ciwusyoci mwakutagulila yampaka ŵandu wosope ayiwone ni meso pakuya lilamusi line lya sayansi. Jwalakwe ŵasalaga yakusayikolanga ŵasayansi kuti “lilamusi lyaŵili pa majiganyo gakwamba mkamulano wawukusapagwaga pasikati pa moto ni macili gawukusakoposya motowo [thermodynamics]. Wosope tukusayiwona yakuyicisya ya lilamusili. Yindu yetaŵe cenene mpela nyumba, nganiyipagwa jika. M’cilambo cosope mwana yindu yejinji yepanganyice cenene, ya umi ni yangali umi, yakuwoneka ni yangawoneka. Gosopega gali maumboni gakulosya kuti kwana Mkupanganya jwalunda mnope, soni jwamacili.
Yaka yejinji yipiteyo, Mwenye Daudi ŵasasile kuti: “Yakwinani yikusajenesya lumbili lwa Mlungu, soni liwunde likusalosya masengo ga makono gakwe.” (Salimo 19:1 [19:2, TNK]) Jwamalumboju ŵasasilesoni kuti, “Masengo gawo gali gamajinji, wawo Yehofa! Gosopego ŵagapangenye mwalunda. Cilambo capasi cigumbele ni yindu yaŵapangenye.”—Salimo 104:24. a
Ana ligongo cici Mlungu ŵatupanganyisye?
Yakupanganyikwa yikusalosya cinonyelo ca Mlungu. Mpela Mtati jwacinonyelo, akusasaka kuti tusangalaleje ni umi, soni yindu yambone yosope yaŵatupanganyicisye.—Salimo 92:4 [92:5, TNK].
Ana yakuti Mlungu ŵatupanganyisye “m’ciwanicisyo cakwe” yikusagopolela cici?—Genesis 1:26, 27.
Yikugopolela kuti ŵatupanganyisye ni ndamo syakulandana ni sya jwalakwe, mpela cinonyelo, lunda, cilungamo, soni kuti tuganisyeje. Patukukuya ndamo syelesi, tukusamsangalasya. (Miyambo 23:15) Mpela nangolo jwalijose, Mlungu akusasaka kuti ŵanace ŵakwe aŵe ŵalunda, ŵaganisya cenene, kuti akomboleje kuŵecetana, soni asangalaleje ni unasi wambone. Jwalakwe ŵatupelesoni ukoto wakusagula.
Ana lisosa lya Mlungu kwa ŵandu lili lyatuli?
Mlungu akusasaka kuti tukamulicisye masengo lunda lwetu pakamucisya ŵane, soni kuti tuŵeje ŵakamulana mpela liŵasa.—Mika 4:3.
Ana Mkupanganya jwetu mpaka atukamucisye catuli?
Mpela mwakusatendela mtati jwambone pakwalongola, soni kwakamucisya ŵanace ŵakwe, nombe najo Mkupanganya jwetu akusatenda yeleyi. Ana yisyene jwalakwe akusatenda yeleyi?
a Kuti apikane yejinji yakuti kwana Mlungu, aŵalanje buku jakuti Is There a Creator Who Cares About You? Jakuwandisya ŵa Mboni sya Yehofa.
