Nea Onyankopɔn Aka Afa Mogya Ho No, Migye Toom

Dɔkota Bi Ka N’asɛm

NÁ ME ne adɔkotafo bi ahyiam wɔ dan bi mu wɔ ayaresabea. Ná obi awu ama mapaapae no ahu nea ekum no, enti na merekyerɛkyerɛ mu akyerɛ wɔn. Nea owui no, na ɔwɔ kansa [anaa kokoram] koankorɔ bi. Meka kyerɛɛ wɔn sɛ, “Yebetumi aka sɛ, ade paa a ekum ɔyarefo yi ne sɛ, wɔmaa no mogya bebree, na ɛno ma onyaa hemolysis, [kyerɛ sɛ, ne mogya mu nkwammoaa kɔkɔɔ no sɛee] na ɛsan sɛee n’asaabo.”

Dɔkota baako a ɔyɛ ɔbenfo sɔre de abufuw teaa me sɛ, “Worepɛ akyerɛ sɛ mogya a yɛde maa no no, ɛnyɛ ɛno na anka ɛsɛ sɛ yɛde ma no anaa?” Ɛnna mekaa sɛ, “Ɛnyɛ saa na mereka.” Afei mede nea wawu no asaabo ho mfoni too afiri so kyerɛɛ wɔn, ɛnna meka kaa ho sɛ, “Yɛhwɛ mfoni yi a, yehu sɛ nkwammoaa kɔkɔɔ a ɛwɔ asaabo no mu no pii awuwu, na ɛno nti yebetumi aka sɛ n’asaabo no gyaee adwuma yɛ.” * Ɛhɔ tɛm dinn, na ehu nti, m’anom ntasu nyinaa yowee. Ɛwom sɛ na minni suahu pii wɔ dɔkota adwuma no mu te sɛ ɔbenfo no, nanso mansesa m’ano.

Bere a saa asɛm yi sii no, na menyɛ Yehowa Danseni. Wɔwoo me afe 1943 wɔ Japan atifi fam kuro bi a wɔfrɛ hɔ Sendai. Ná me papa yɛ dɔkota a ɔyɛ nhwehwɛmu hu nea ɛde yare ba, sɛnea yare te, ne nsunsuanso a ɛde ba, na na ɔsan sa adwenemyare. Enti me nso, meyɛe sɛ mɛkɔ adɔkotafo sukuu. Afe 1970 no, mewaree ababaa bi a wɔfrɛ no Masuko. Saa bere no, na makɔ adɔkotafo sukuu no mfe mmienu.

Misuaa Nea Ɛde Yare Ba, Sɛnea Yare Te, Ne Ɛho Nsunsuanso

Bere a merekɔ sukuu no, Masuko na na ɔyɛ adwuma de hwɛ abusua no. Ná m’ani gye dɔkota adwuma ho kɛse. Sɛ mehwɛ sɛnea nipadua no te a, na ɛyɛ me nwonwa paa! Nanso amma me tirim da sɛ Ɔbɔadeɛ bi wɔ hɔ. Ná ɛyɛ me sɛ nhwehwɛmu a adɔkotafo yɛ betumi ama m’ani agye wɔ asetena mu. Enti bere a mebɛyɛɛ dɔkota no, metoaa m’adesua so kosuaa nea ɛde yare ba, sɛnea yare te, ne nsunsuanso a ɛde ba.

Bere a merepaapae nnipa a kansa akum wɔn no, me tirim fii ase yɛɛ me naa wɔ mogya a wɔde ma nkurɔfo no ho. Sɛ kansa tumi obi paa a, ɛyɛ a mogya tu no, na etumi ma ne mogya so tew. Aduru a wɔde sa kansa no nso ma mogya no so tew bi ka ho, enti ɛyɛ a adɔkotafo taa ma wɔn mogya. Nanso mihui sɛ, ɛbɛyɛ sɛ mogya a wɔde ma wɔn no ma kansa no trɛw mmom. Ne nyinaa mu no, ɛnnɛ abɛda adi sɛ, sɛ wɔma obi mogya a, etumi ma ahoɔden a ne nipadua de ko tia yare no so tew, na etumi ma ne kansa no san ba, na ɛma kansa no tumi kum no ntɛm. *

Asɛm a merefi m’asɛm yi ase mekae no, esii afe 1975. Ɔbenfo a ɔteaa me no, na wakwadare mogya mu ayaresa mu, na ɔno na ɔhwɛɛ ɔyarefo a owui no. Enti ɛnyɛ nwonwa sɛ ne bo fuwii bere a mekaa sɛ mogya a wɔde maa ɔyarefo no na ekum no no. Nanso metoaa m’asɛm no so, na nkakrankakra ne bo dwoe.

Yare Ne Owu Nni Hɔ Bio

Asɛm yi sii no, ankyɛ koraa na aberewa bi a ɔyɛ Yehowa Danseni baa me yere hɔ. Ɔne me yere nkɔmmɔ mu no, ɔbɔɔ edin “Yehowa,” ɛnna me yere bisaa no sɛ ɛkyerɛ sɛn. Maame no ka kyerɛɛ no sɛ, “Yehowa yɛ nokware Nyankopɔn no din.” Ná Masuko akan Bible fi ne mmofraase, nanso ne Bible no, na wɔde “AWURADE” na ahyɛ Onyankopɔn din no ananmu. Afei de, na wabehu sɛ Onyankopɔn yɛ obi a ɔwɔ din!

Ɛhɔ ara na Masuko ne aberewa no fii ase suaa Bible. Bere a mifi ayaresabea hɔ beduu fie bɛyɛ anadwo 1:00 no, me yere de anigye ka kyerɛɛ me sɛ, “Bible se yare ne owu befi hɔ!” Miyii no ano sɛ, “Anka ɛbɛyɛ dɛ oo!” Ɛnna ɔsan kaa sɛ, “Ɛrenkyɛ, wiase foforo no bɛba, enti mempɛ sɛ wobɛsɛe wo bere.” Nea ɔkae no, na ɛyɛ me sɛ ɔpɛ sɛ migyae dɔkota adwuma no, enti me bo fuw maa yɛn ntam yɛɛ basaa.

Nanso me yere aba mu ammu. Da biara, na ɔsrɛ Onyankopɔn sɛ ɔmmoa no na onnya kyerɛwnsɛm a ɛfata a obetumi de akyerɛ me. Asɛm a ɛwɔ Ɔsɛnkafo 2:22, 23 paa na ɛkaa me koma. Ɛhɔ ka sɛ: “Adwumaden a onipa yɛ nyinaa, ne adwuma a ne koma piapia no ma obiri ne mogya ani yɛ wɔ wiase no, ɛdɛn koraa na obenya afi mu? . . . Sɛ edu anadwo mpo a, ne koma nnye n’ahome. Eyi nso yɛ ahuhude.” Ná wei fa me ho, efisɛ awia ne anadwo nyinaa, na mikum me ho yɛ dɔkota adwuma no, nanso na menhyɛ da nni anigye saa.

Kwasida anɔpa bi wɔ July 1975 mu no, na me yere kɔ Yehowa Adansefo Ahenni Asa so. Prɛko pɛ na meyɛɛ m’adwene sɛ me nso mɛkɔ bi. Bere a me yere huu m’anim no, ne ho dwiriw no paa. Sɛnea Yehowa Adansefo no maa me akwaaba no, na ɛyɛ fɛ kwa. Efi saa da no, Kwasida biara, na mekɔ adesua. Bɛyɛ bosome akyi, Yehowa Danseni bi fii ase ne me suaa Bible. Bere a Yehowa Adansefo dii kan baa me yere hɔ no, abosome mmiɛnsa akyi na ɔbɔɔ asu.

Migyee Nea Onyankopɔn Aka Afa Mogya Ho No Toom

Ankyɛ na misuaa wɔ Bible mu sɛ, ɛsɛ sɛ Kristofo ‘twe wɔn ho fi mogya ho.’ (Asomafo Nnwuma 15:28, 29; Genesis 9:4) Mogya a wɔde ma nkurɔfo no, me ara mpo na ɛnsen me tirim dedaw, enti anyɛ den amma me sɛ megye nea Onyankopɔn aka afa mogya ho no atom. * Mekaa no me tirim sɛ, ‘Sɛ Ɔbɔadeɛ bi wɔ hɔ, na sei na ɔreka a, ɛnde na ɛyɛ nokware.’

Mesan sua fii Bible mu sɛ, Adam bɔne nti na nnipa yare na yewu. (Romafo 5:12) Saa bere no, na mereyɛ nhwehwɛmu wɔ ntini mu yare bi a wɔfrɛ no arteriosclerosis ho. Sɛ yɛrenyin a, yɛn ntini yɛ den, na emu yɛ ketewa. Ɛba saa a, etumi kɔfa komayare ba, ɛmma mogya nni aforosian yiye wɔ adwene no mu, na etumi ma obi nya asaabo mu yare nso. Wudwen ho a, wutumi hu sɛ ampa, bɔne a wɔde woo yɛn na akɔfa wei nyinaa aba. Efi saa bere no, anigye a na mewɔ wɔ dɔkota adwuma mu no fii ase kɔɔ fam. Nea ɛwom ara ne sɛ, Yehowa Nyankopɔn nko ara na obetumi ayi yare ne owu afi hɔ!

Bere a mifii ase suaa Bible no, abosome nson akyi, wɔ March 1976 no, migyaee nhwehwɛmu a na mereyɛ wɔ ayaresabea a ɛwɔ suapɔn hɔ no. Ná ɛyɛ me sɛ merennya dɔkota adwuma nyɛ bio, nanso minyaa adwuma wɔ ayaresabea foforo. Mebɔɔ asu May 1976. Misii gyinae sɛ, ade a eye paa a metumi ayɛ wɔ m’abrabɔ mu ne sɛ mede me bere nyinaa bɛka Onyankopɔn Ahenni no ho asɛmpa anaa mɛyɛ ɔkwampaefo. Enti mifii akwampae adwuma no ase July 1977.

Migyinaa Nea Onyankopɔn Aka Afa Mogya Ho No Akyi

Ná wohia nnipa pii ama wɔaka asɛmpa no wɔ asafo bi mu wɔ Chiba Mantam mu, enti November afe 1979 no, me ne Masuko tu kɔɔ hɔ. Ɛhɔ no, minyaa adwuma wɔ ayaresabea bi, na na wɔma kwan ma mede me bere kakraa bi yɛ adwuma. Da a edi kan a mekɔɔ adwuma no, adɔkotafo a wɔyɛ oprehyɛn no bi betwaa me ho hyiae. Wobisaa me mpɛn pii sɛ, “Woayɛ Yehowa Danseni yi, sɛ wɔde ɔyarefo bi ba ha na ehia sɛ yɛma no mogya a, wobɛyɛ no dɛn?”

Mede obu kyerɛkyerɛɛ mu sɛ, nea Onyankopɔn aka afa mogya ho no, ɛno na mede bɛyɛ adwuma. Mekyerɛɛ mu sɛ, akwan bebree wɔ hɔ a yebetumi afa so aboa ayarefo a wonni mogya a enhia sɛ yɛma wɔn mogya ankasa, enti sɛ ɛho behia a, mɛyɛ nea metumi biara de aboa ɔyarefo no. Nkɔmmɔ no kɔɔ so bɛyɛ dɔnhwerew baako, ɛnna afei nea ɔda adɔkotafo a wɔyɛ oprehyɛn ano no kaa sɛ, “Mate ase. Nanso sɛ wɔde ɔyarefo bi a ne mogya akɔ fam paa ba a, yɛn ara yɛbɛyɛ ne ho adwuma.” Ná nkurɔfo nim saa ɔpanyin yi sɛ n’asɛm yɛ den, nanso efi bere a yedii saa nkɔmmɔ no, yɛboom yɛɛ adwuma kama. Nea me som nti migye di nso, wamfa ho asɛm anhaw me.

Bere a Emu Yɛ Den Mpo, Mede Nea Onyankopɔn Aka Afa Mogya Ho No Yɛɛ Adwuma

Bere a yɛresom wɔ Chiba no, na Yehowa Adansefo resi wɔn adwumayɛbea ti foforo wɔ Japan kurow a wɔfrɛ no Ebina. Ná me ne me yere de kar twa kwan kɔ hɔ nnawɔtwe biara kɔhwɛ Adansefo a wɔatu wɔn ho ama resi saa dan a wɔsan frɛ no Betel no. Abosome kakra akyi, wɔfrɛɛ me ne me yere sɛ yɛmmɛtena Ebina Betel hɔ, na yɛmfa yɛn bere nyinaa nyɛ adwuma wɔ hɔ. Enti March 1981 no, yetu kɔtenaa adan a atuhoamafo a wɔboro 500 te mu no bi mu. Anɔpa biara, na mekɔboa ma wosiesie aguare ne agyananbea a ɛwɔ baabi a wɔresi dan no, na edu awia a, na mahwɛ wɔn a wɔyare no.

Ayarefo a mehwɛɛ wɔn no, na baako ne Ilma Iszlaub. Ofi Australia bɛyɛɛ asɛmpatrɛw adwuma wɔ Japan afe 1949. Ná kansa wɔ ne mogya mu. Adɔkotafo a wɔrehwɛ no no ka kyerɛɛ no sɛ abosome kakraa bi ntam obewu. Wɔyɛɛ sɛ wɔbɛma Ilma mogya na ama watena ase akyɛ kakra, nanso wampene, na ɔkaa sɛ ɔpɛ sɛ ɔde ne nna a aka no tena Betel kosi sɛ obewu. Saa bere no, na nnuru bi te sɛ erythropoietin a ɛma obi nya mogya mu nkwammoaa kɔkɔɔ pii no mmae. Enti ɛtɔ da a, na ne mogya so tew ara ma etumi kodu gram 3 anaa 4 pɛ! (Ne papa mu no, ɛsɛ sɛ ɛyɛ 12 kosi 15.) Nanso meyɛɛ nea metumi biara de hwɛɛ no yare. Onyankopɔn Asɛm mu gyidi a na Ilma wɔ no, wamma no anhinhim da kosii sɛ owui January 1988. Bere a adɔkotafo no kaa sɛ obewu no, ɔtenaa ase bɛyɛ mfe nson kaa ho ansa na ɔrewu!

Mfe pii a atwam no, wɔn a wɔatu wɔn ho ama reyɛ adwuma wɔ Yehowa Adansefo adwumayɛbea ti a ɛwɔ Japan no bebree ayɛ oprehyɛn. Adɔkotafo a ɛwɔ ayaresabea a ɛbɛn yɛn no yɛɛ ade paa. Wɔyɛɛ oprehyɛn no a wɔamma ayarefo no mogya. Mpɛn pii no, wɔto nsa frɛ me ma mekɔ oprehyɛn dan mu hɔ kɔhwɛ sɛnea wɔyɛ oprehyɛn no, na ebi wɔ hɔ a meboa wɔn. Adɔkotafo a wɔpene so sa Yehowa Adansefo yare a wɔmfa mogya nka ho no, m’ani sɔ wɔn paa. Adwuma a me ne wɔn yɛ no ama manya hokwan pii aka me gyidi ho asɛm akyerɛ wɔn. Nnansa yi ara, dɔkota baako abɔ asu abɛyɛ Yehowa Danseni.

Anikasɛm ne sɛ, mmɔden a adɔkotafo abɔ sɛ wɔbɛsa Yehowa Adansefo yare a wɔmma wɔn mogya no aboa paa wɔ ayaresa mu. Oprehyɛn a wɔyɛ a wɔmfa mogya nka ho no ama ada adi sɛ, mfaso wɔ so paa sɛ wɔremma obi mogya wɔ ayaresa mu. Nhwehwɛmu ama wɔahu sɛ, ayarefo a wɔyɛ wɔn oprehyɛn a wɔmma wɔn mogya no, ɛyɛ a wɔn ho tɔ wɔn ntɛm, na wɔntaa nnya ɔhaw bebree.

Meda So Resua Ade Afi Dɔkota a Waben Sen Obiara No Hɔ

Mebɔ mmɔden sɛ mehu nneɛma foforo a aba wɔ dɔkota adwuma no mu. Nanso, meda so ara sua ade fi Yehowa hɔ. Ɔno ne Dɔkotani a waben sen obiara. Ɛnyɛ nea etua aniwa na ɔhwɛ, na mmom ɔhwɛ nipa mũ no nyinaa. (1 Samuel 16:7) Sɛ merehwɛ ɔyarefo a, mebɔ mmɔden sɛ meremfa m’adwene nsi ne yare no nko ara so. Mmom midwen nipa mũ no ho. Ɛno ma mitumi hwɛ ɔyarefo no yiye.

Meda so ara yɛ adwuma wɔ Betel. Ade baako a ɛda so ara ma m’ani gye paa ne sɛ mɛboa nkurɔfo ama wɔasua Yehowa ho ade na wɔahu nea waka afa mogya ho no. Me mpaebɔ ne sɛ Yehowa Nyankopɔn a ɔyɛ Dɔkota Kɛse no beyi yare nyinaa ne owu afi hɔ nnansa yi ara.—Yasushi Aizawa Anom Asɛm.

[Ase hɔ nsɛm]

[Asɛm a wɔafa aka]

“Mekyerɛɛ mu sɛ, akwan bebree wɔ hɔ a yebetumi afa so aboa ayarefo a wonni mogya a enhia sɛ yɛma wɔn mogya ankasa, enti sɛ ɛho behia a, mɛyɛ nea metumi biara de aboa ɔyarefo no”

[Asɛm a wɔafa aka]

“Oprehyɛn a wɔyɛ a wɔmfa mogya nka ho no ama ada adi sɛ, mfaso wɔ so paa sɛ wɔremma obi mogya wɔ ayaresa mu”

[Mfoni]

Soro: Mede Bible rema ɔkasa

Nifa: Me ne me yere Masuko mfoni a yetwaa no nnansa yi ara