ADZESUA 36
Dzi Nokwar Wɔ Biribiara Mu
Obiara pɛ anyɛnkofo a wodzi nokwar. Dɛmara na Jehovah so pɛ dɛ n’anyɛnkofo nyina dzi nokwar. Naaso osiandɛ yɛtse wiadze a nkorɔfo piinara nndzi nokwar mu ntsi, nnyɛ aber nyinara na ibenya anyɛnkofo a wodzi nokwar. Sɛ dɛm a, nna ɔno ma yembisa dɛ, sɛ yedzi nokwar wɔ biribiara mu a, ebɛn mfaso na yenya?
1. Ebɛnadze ntsi na ohia paa dɛ yedzi nokwar?
Sɛ yedzi afofor nokwar a, ɔkyerɛ dɛ yɛdɔ Jehovah na yebu no. Ɔwodze, susu asɛm yi ho: Jehovah nyim biribiara a yɛdwendwen ho, na n’enyi tua biribiara a yɛyɛ no. (Hebrewfo 4:13) Sɛ yedzi nokwar a ohu, na ɔno ma n’enyi gye. N’Asɛm ka dɛ: ‘Na nkontompɔnyi no yɛ ekyiwadze ma Jehovah, na mbom ɔnye atseneneefo dzi etsirmsɛm.’—Mbɛbusɛm 3:32.
2. Ndzɛmba a yebotum ayɛ dze akyerɛ dɛ yedzi nokwar wɔ hɛn asetsena mu no bi nye dɛn?
Jehovah pɛ dɛ obiara ‘ka nokwar kyerɛ ne nyɛnko.’ (Zechariah 8:16, 17) Iyi hwehwɛ dɛ yɛbɛyɛ dɛn? Dza ɔwɔ mu nye dɛ, sɛ yɛnye hɛn ebusuafo, hɛn edwumamufo, hɛn nuanom Christianfo, anaa aban mpanyimfo rekasa a, ɔnnsɛ dɛ yedzi akɔhwi anaa yɛdaadaa hɔn. Hɔn a wodzi nokwar no nnwia adze anaa wonnsisi afofor. (Kenkan Mbɛbusɛm 24:28 na Ephesusfo 4:28.) Afei so, wotua hɔn tow ahorow nyina. (Romefo 13:5-7) Sɛ yɛyɛ dɛm ndzɛmba yi nye ndzɛmba afofor a, nna yɛrekyerɛ dɛ ‘yedzi nokwar wɔ adze nyina mu.’—Titus 2:10.
3. Sɛ yedzi nokwar a, ebɛn mfaso na yenya?
Sɛ afofor nyim hɛn dɛ yɛyɛ nyimpa a yedzi nokwar a, ɔma wɔgye hɛn dzi. Sɛ yɛyɛ dɛm a, yɛma obiara n’ahom ka noho wɔ asafo no mu, tse dɛ ebusua bi a ɔdɔ wɔ mu. Ɔma yenya tsibowa pa. Sɛ yedzi nokwar a, ɔhyɛ hɛn Agyenkwa Nyankopɔn nkyerɛkyerɛ no enyimnyam, na ɔma nkorɔfo nya ɔpɛ dɛ wɔbɔsom Jehovah.—Titus 2:10.
PƐNSAPƐNSA MU KƆ EKYIR
Ma yɛnhwɛ mfaso a ibotum enya efi wo nokwardzi mu nye mbrɛ Jehovah tse nka wɔ wo nokwardzi ho. Afei so, yebohu ndzɛmba a ibotum ayɛ dze akyerɛ dɛ idzi nokwar wɔ w’asetsena mu.
4. Sɛ yedzi nokwar a, Jehovah n’enyi gye
Ma yɛnkenkan Ndwom 44:21 na Malachi 3:16, na yensusu nsɛmbisa yi ho:
-
Nyansa nnyi mu dɛ yebenya adwen dɛ yebotum dze nokwasɛm bi esie. Ehwɛ a, ebɛnadze ntsi a?
-
Sɛ yɛka nokwar wɔ aber mpo a ɔyɛ dzen dɛ yɛbɛyɛ dɛm a, ehwɛ a Jehovah tse nka dɛn?
Sɛ mbofra ka nokwar a, wɔma hɔn awofo enyi gye. Sɛ yɛka nokwar a, yɛma Jehovah n’enyi gye
5. Dzi nokwar aber nyina
Nyimpa pii wɔ adwen dɛ nnyɛ aber nyina na yebotum aka nokwar. Naaso, ɔwodze ma yɛnhwɛ VIDEO yi, na yebohu siantsir a ɔsɛ dɛ yedzi nokwar aber nyina.
Ma yɛnkenkan Titus 2:10, na yensusu kwan a yebotum afa do edzi nokwar . . .
-
wɔ hɛn ebusua mu.
-
aber a yɛwɔ edwuma mu anaa skuul.
-
wɔ tsebea afofor mu.
6. Sɛ yedzi nokwar a, ɔboa hɛn
Sɛ yedzi nokwar a, obotum ama hɛnho akyer hɛn. Naaso ewiei koraa no, yebohu dɛ ɔno nye adze papa a ɔsɛ dɛ yɛyɛ. Ma yɛnkenkan Ndwom 34:12-16, na yensusu asɛmbisa yi ho:
-
Sɛ idzi nokwar wɔ w’abrabɔ mu a, osi dɛn boa woara?
-
A. Sɛ kunnom na yernom dzi nokwar a, ɔma hɔn awar sɔ
-
B. Sɛ edwumayɛfo dzi nokwar a, ɔma hɔn edwumawuranom gye hɔn dzi
-
D. Sɛ amamfo dzi nokwar a, ɔma aban etumfo pɛ hɔn asɛm
BINOM KA DƐ: “Sɛ idzi akɔhwi nketsenketse bi a, ɔnnyɛ hwee.”
-
Ebɛnadze ntsi na egye dzi dɛ Jehovah kyir akɔhwi biara?
DZA ESUA
Jehovah pɛ dɛ n’anyɛnkofo dzi nokwar wɔ hɔn kasaa na hɔn ndzeyɛɛ mu.
Mbobɔdo
-
Ndzɛmba a yebotum ayɛ dze akyerɛ dɛ yedzi nokwar no bi nye dɛn?
-
Ebɛnadze ntsi na ɔnnsɛ dɛ yenya adwen dɛ yebotum dze nokwasɛm bi esie?
-
Ebɛnadze ntsi na epɛ dɛ idzi nokwar aber nyina?
HWEHWƐ PII KA HO
Awofo besi dɛn aboa hɔn mba ma woeedzi nokwar?
Ebɛnadze ntsi na ɔyɛ papa dɛ yedzi hɛn bɔhyɛ do?
Sɛ wɔmmfa tow a yetua no nndzi dwuma papa biara mpo a, ebɛnadze ntsi na ɔsɛ dɛ yɛkɔ do tua? Kenkan asɛm yi, na ibohu siantsir no.
“Tow Ahorow—Aso Ɔsɛ Dɛ Itua?” (Ɔweɔn-Aban, September 1, 2011)
Ebɛnadze na ɔmaa owura bi a nna osisi nkorɔfo no sesaa n’abrabɔ bɛyɛɛ obi a odzi nokwar?
“Mubohun Dɛ Jehovah Yɛ Mbɔbɔrhufo Na Ɔdze Bɔn Kyɛ” (Ɔweɔn-Aban, May 1, 2015)
Bi A W'enyi Bɛgye Iyi So Ho
NSƐM A WƆTAA BISA
Ebɛnadze Nye Bible Adzesua A Jehovah Adasefo Nye Nkorɔfo Yɛ No?
Wɔ dɛm Bible adzesua a Jehovah Adasefo nye nkorɔfo yɛ yi mu no, ibotum dze Bible nkyerɛase biara a ewɔ no esũa adze. Ibotum afrɛ w’ebusuafo anaa w’anyɛnkofo binom mpo ma wɔaabɛka woho ma hom eesũa.
