TSIR 25

Mibesi Dɛn Egyaa Ahobɔ?

“Mehyɛɛ ase dɛ mobɔgor me banyin ho ma moho asen no, nna medzi mfe awɔtwe. Ekyir yi, mubohun dɛ Nyankopɔn mmpɛ ndzeyɛɛ a ɔtse dɛm. Aber biara a menntum annhyɛ moho do na mebɛyɛ adze a ɔtse dɛm no, ɔma meyɛ basaa. Ɔyɛ a mibisa moho dɛ: ‘Obesi dɛn na Nyankopɔn apɛ m’asɛm?’”​—Luiz.

SƐ IDU wo mbabunber mu a, nda ho akɔndɔ a inya no ano botum ayɛ dzen papaapa. Dɛm ntsi, annhwɛ a, obotum abɛyɛ wo su dɛ ebɔgor w’ase anaa wo banyin ho ma woho aasen. Wɔfrɛ adzeyɛ yi ahobɔ. * Nyimpa pii ka dɛ iyidze asɛm biara nnyi ho. Wɔka dɛ, “iyi yɛ adze a ɔnnhaw obiara.” Naaso, siantsir bi ntsi wɔ hɔ a ɔwɔ dɛ etwe woho fi adzeyɛ a ɔtse dɛm ho. Ɔsomafo Paul kaa dɛ: ‘Dɛm ntsi hom nkum wiadze akɔndɔ a ɔwɔ hom mfafakuwa mu no wɔ akɔndɔ-nhyɛdo ho.’ (Colossaefo 3:5) Sɛ egor w’ase anaa wo banyin ho ma woho sen a, orunntum nkum akɔndɔ-nhyɛdo a ɔredzɛw wɔ wo mu no. Mbom, ɔbɛka mu gya. Iyi da nkyɛn a, susu nsɛm a odzidzi do yi ho:

● Sɛ ayɛ obi no su dɛ ɔbɔgor n’ase anaa ne banyin ho ma noho aasen a, ɔma onya pɛsɛankonya su. Dɛ nhwɛdo no, sɛ obi rogor n’ase anaa ne banyin ho ma noho aasen a, ɔdze n’adwen si n’akɔndɔ a obenya no wɔ ne nyimpadua mu no nkotsee do.

● Obi a ɔgor n’ase anaa ne banyin ho ma noho sen no, obu hɔn a ɔsor hɔn bɔbea no dɛ wɔtse dɛ biribi a wɔdze dwedwe hɔn nda ho akɔndɔ ano.

● Sɛ obi dze noho hyɛ adzeyɛ a ɔtse dɛm mu ma ɔbɛyɛ pɛsɛankonya a, obotum ayɛ dzen ama no dɛ ɔnye n’awar mu hokafo benya nda mu nkitahodzi ma noho abaa no.

Dɛ nkyɛ ebɔgor w’ase anaa wo banyin ho ma woho aasen no, bɔ mbɔdzen dɛ ebɛhyɛ woho do wɔ w’akɔndɔ ho. (1 Thessalonicafo 4:​4, 5) Mbrɛ ɔbɛyɛ a ibotum ayɛ dɛm no, Bible no dze afotu ma dɛ mma nnkɔ mbea ahorow bi a obotum ama eenya nda ho akɔndɔ. (Mbɛbusɛm 5:​8, 9) Naaso, sɛ abɛyɛ wo su dɛ egor w’ase anaa wo banyin ho ma woho sen ma dɛm ntsi innhu dza enyɛ so ɛ? Bi mpo a abɔ mbɔdzen dɛ ibegyaa naaso nntum. Bi a ibenya adwen bi dɛ iyidze ɔayɛ kaw, ma dɛm ntsi ɔnnyɛ adze a ibotum ayɛ dza Nyankopɔn hwehwɛ fi wo hɔ no. Adwen a ɔtse dɛm bi na banyimba bi a wɔfrɛ no Pedro nyae. Ɔkaa dɛ: “Sɛ misi m’adwen pi dɛ merennyɛ bio na mesan kɛyɛ a, ɔma meyɛ basaa. Dza meka ara nye dɛ Nyankopɔn remmfa mo bɔn nkyɛ me da. Dɛm ntsi, nna munntum mmbɔ mpaa.”

Sɛ dɛm na etse nka a, nna ɔnodze hyɛ woho dzen. Tsebea a ewɔ mu no nngyee nsamu koraa. Mbabun pii a mpanyimfo ka ho edzi adzeyɛ a ɔtse dɛm do konyim. Ɔwo so botum ayɛ dɛm!

Mbrɛ Ibesi Enya Tsebea A Ewɔ Mu No Ho Adwen Pa

Dɛ mbrɛ yeehu no, hɔn a abɛyɛ hɔn su dɛ wɔgor hɔn ase anaa hɔn banyin ho ma hɔnho sen no, wɔtaa tse nka dɛ wɔmmfata. Nokwasɛm nye dɛ, sɛ ema ‘wo werɛ how dɛ mbrɛ Nyankopɔn pɛ’ a, ibotum enya ɔpɛ pa dɛ ibegyaa yɛ. (2 Corinthfo 7:​11) Naaso, sɛ idzi awerɛhow ma ɔtra do a, hwee rimmfi mu mmba. Obotum ama w’abaw mu eebu araa ma w’ahoɔdzen aasa.​—Mbɛbusɛm 24:10.

Ntsi, bɔ mbɔdzen dɛ ibenya tsebea a ewɔ mu no ho adwen pa. Ɔyɛ efifidze dɛ ebɔgor w’ase anaa wo banyin ho ma woho aasen. Obotum ama aayɛ ‘akowaa ama akɔndɔ nye enyigyedze ahorow.’ Afei so, ɔremma nnya suban pa. (Titus 3:3) Naaso, sɛ egor w’ase anaa wo banyin ho ma woho sen a, ɔnnyɛ bɔn a no mu yɛ dur tse dɛ ndwamanyɛ. (Jude 7) Ntsi, sɛ abɛyɛ wo su dɛ egor w’ase anaa wo banyin ho ma woho sen a, mma nnka dɛ ayɛ bɔn a worunntum mmfa nkyɛ wo. Adze tsitsir a ɔwɔ dɛ eyɛ nye dɛ ibenya ahohyɛdo na aakɔ do ako etsia su a ɔtse dɛm!

Sɛ isi wo bo dɛ erennyɛ bio na esan kɛyɛ a, ɔbɛma w’abaw mu ebu. Sɛ ɔba no dɛm a, ma asɛm a ɔwɔ Mbɛbusɛm 24:16 no ntsena w’adwen mu. Hɔ ka dɛ: ‘Ɔtseneneenyi hwe ase mpɛn esuon, na ɔsoɛr bio: na emumuyɛfo dze, mbusu butuw hɔn.’ Sɛ biribi a ɔtse dɛm to wo a, ɔnnkyerɛ dɛ eyɛ ɔdzebɔnyɛnyi. Ntsi, mma mmpa abaw. Susu dza ɔmaa ekɛyɛɛ bio no ho, na yɛ dza ibotum biara dɛ erennsan nnkɛyɛ bio.

Gye ber dwendwen ɔdɔ na ehumbɔbɔr a Nyankopɔn wɔ no ho. Ɔdwontofo David ne mberɛwyɛ bi maa ɔyɛɛ bɔn mber bi mu. Ɔkaa dɛ: “Dɛ mbrɛ egya ne yamu hyehye no wɔ ne mba ho no, dɛmara so na Ewuradze ne yamu hyehye no wɔ hɔn a wosuro no ho. Na onyim hɛn bɔbea; ɔkaa dɛ yɛyɛ huntuma.” (Ndwom 103:13, 14) Nokwasɛm nye dɛ, Jehovah nyim dɛ yɛyɛ mberɛw na ɔayɛ krado dɛ ɔdze hɛn bɔn ‘bɛkyɛ’ hɛn. (Ndwom 86:5) Naaso, ɔpɛ dɛ yɛyer hɛnho dɛ yɛbɛyɛ dza ɔtsen. Ntsi, ebɛnadze na ibotum ayɛ dze eyi dɛm suban yi akwa?

Susu ndzɛmba a edze gyegye w’enyi no ho yie. Aso ehwɛ video, TV do dwumadzi, anaa ekɔ wɛbsaet ahorow a okenyan nda ho akɔndɔ? Ɔdwontofo no serɛɛ Nyankopɔn wɔ mpaabɔ mu dɛ: “Dan m’enyiwa fi egyangyandze no hwɛ ho.” *​—Ndwom 119:37.

Bɔ mbɔdzen fa w’adwen si biribi a ɔbɛma abɛn Nyankopɔn do. Hɛn nua Christiannyi bi a wɔfrɛ no William dze afotu maa dɛ: “Kenkan Bible no ne fa bi ansaana aakɛda. Adze a otwa tun a ɔwɔ dɛ edwendwen ho ana aakɛda no, ɔwɔ dɛ ɔyɛ biribi a ɔbɛma abɛn Nyankopɔn.”​—Philippifo 4:8.

Ka wo haw no ho asɛm kyerɛ obi. Enyiwu botum ama aayɛ dzen ama wo dɛ ebɛka ho asɛm akyerɛ obi a egye no dzi. Naaso, sɛ eka ho asɛm a, ɔbɔboa wo ma eeyi dɛm suban yi akwa! Dɛm na hɛn nua Christiannyi bi a wɔfrɛ no David yɛe. Ɔkaa dɛ: “Mekaa tsebea a mowɔ mu no ho asɛm kyerɛɛ me papa. Mo werɛ nnkefir dza ɔkae no ara da. Ɔtseew n’enyim na ɔkaa kyerɛɛ me dɛ, ‘Ɔyɛ me dɛw dɛ etum aka iyi ho asɛm akyerɛ me.’ Nna onyim dɛ ɔnnda famu dɛ mebɛka ho asɛm akyerɛ no. Nna nkuranhyɛsɛm a morohwehwɛ ara nye no, na iyi boaa me ma misii mo bo dɛ mennkɛyɛ bio.

“Me papa dze Bible mu nsɛm bi boaa me ma muhun dɛ mennyɛ abofra bɔn. Afei so, ɔnye me kenkaan kyerɛwnsɛm ahorow bi so a ɔmaa muhun enyibersɛm a ɔwɔ adzeyɛ a ɔtse dɛm mu. Ɔhyɛɛ me nkuran dɛ memfa afotu a ɔdze ama me no nyɛ edwuma, na ekyir yi ɔbɛsan nye me abɔ ho nkɔmbɔ. Ɔdze kaa ho dɛ, sɛ meyɛ bio a, onnyi dɛ mema m’abaw mu bu. Mbom, mombɔ mbɔdzen ara nhyɛ moho do ber tsentsen kakra nka ho mbrɛ ɔbɛyɛ a merennsan nyɛ bio.” David wiee n’asɛm no dɛn? Ɔkaa dɛ: “Me haw a mekaa ho asɛm kyerɛɛ obi nye mbrɛ nyimpa no sii boaa me no, ɔmaa mutumii dzii ɔhaw no do.” *

ASƐNTSIR A ODZI HƆ

Sɛ enye obi a ɔnnyɛ wo kun anaa wo yer nya nda mu nkitahodzi a, ɔyɛ enyibersɛm. Hwɛ siantsir a ɔtse dɛm.

[Ase Hɔ Nsɛm]

KYERƐWSƐM TSITSIR

“Guan mberantsɛber mu akɔndɔ, na enye hɔn a wofi akoma a no mu tsew mu frɛ Ewuradze ndzi tsenenee, gyedzi, ɔdɔ, nye asomdwe ekyir.”​—2 Timothy 2:​22.

NYANSAHYƐ

Bɔ mpaa ansaana nda ho akɔndɔ a enya no ayɛ kɛse. Serɛ Jehovah Nyankopɔn dɛ ɔmma wo “tum no ne kɛseyɛ a ɔtra do” ama eetum ako etsia nsɔhwɛ.​—2 Corinthfo 4:7.

ANA INYIM . . . ?

Obi a ɔyɛ mberɛw no, ɔma nda ho akɔndɔ a onya no hyɛ no do. Naaso, ɔgye akokodur ana ɔbarimba anaa ɔbaa aada ahohyɛdo edzi ber mpo a obiara nnyi hɔ no.

DZA ƆSƐ DƐ MEYƐ!

Sɛ meyɛ iyinom a, mubotum dze m’adwen esi ndzɛmba a no ho tsew do ․․․․․

Dɛ nkyɛ mibegyaa moho no, mebɛyɛ ․․․․․

Dza mebɛpɛ dɛ mibisa m’awofo wɔ asɛm yi ho nye ․․․․․

EDWEN HO DƐN?

● Ebɛnadze ntsi na no ho hia dɛ mema ɔtsena m’adwen mu dɛ Jehovah ayɛ krado dɛ ɔdze bɔn bɛkyɛ?​—Ndwom 86:5.

● Nyankopɔn na ɔdze nda ho nkatse hyɛɛ hɛn mu. Ɔka kyerɛ wo dɛ nya ahohyɛdo, osiandɛ ɔwɔ wo mu ahotodo dɛ ibotum ayɛ dɛm.

[Asɛm a wɔafa aka]

Ofitsi ber a midzii ɔhaw yi do konyim no, metum enya tsibowa pa wɔ Jehovah n’enyim. Iyi yɛ adze a meremmfa nnsesa biribiara da!—Sarah

[Mfonyin]

Sɛ irutu mbirika na ebɔ famu a, ɔno nnkyerɛ dɛ ɔwɔ dɛ esan w’ekyir kɛhyɛ ase bio. Dɛmara so na sɛ isi w’adwen pi dɛ erenngor woho ma woho nnsen, na esan kɛyɛ bio a, ɔnnkyerɛ dɛ mbɔdzen a abɔ dɛ ibegyaa no ayɛ kwa