Ponografi ahyɛ wiadze yi mu mã. * Yehu bi wɔ eguadzi ho dawurbɔ mu, ndwom mu, magazine ahorow mu, sene ahorow mu, nna TV do. Bi so dzi akotsen wɔ video game ahorow mu, fon do, wɛbsaet ahorow do, nna sohyial media do. Ponografi ebu do, na nyimpa pii agye ato mu. Ndɛ wɔ mbea pii no, nkorɔfo a wɔhwɛ ponografi no rodɔɔ sõ sen mfe bi a wɔabɛsen kɔ no koraa.​—Hwɛ adakaba a wɔato dzin “ Ponografi Ho Nkontaabu.”

Mbrɛ ponografi tse no resesa. Ɔbemfo Gail Dines kyerɛɛw dɛ: “Ndɛ mfonyin a wɔyɛ no, sɛ edze toto nkan dze no ho a, ndɛ dze no yɛ hũ, na ebu do ma obiara tum hwɛ bi.”

Ihu dza ɔrokɔ do no dɛn? Ponografi yɛ biribi a asɛm biara nnyi ho, biribi a ɔyɛ hũ, anaa ɔnnyɛ iyi mu biara? Jesus kãa dɛ: “Dua pa ɔsow aba pa; na dua a ɔaprɔw dze, ɔsow aba bɔn.” (Matthew 7:​17) Ebɛn aba na ponografi sow? Sɛ yebenya dɛm asɛmbisa yi ho mbuae a, ɔsɛ dɛ yesusu nsɛmbisa bi a ɔfa ponografi ho.

DZA ENYIMDZEFO KÃ: Nhwehwɛmufo binom dze ponografi no hwɛ toto cocaine a n’ano yɛ dzen paa no nom ho. Cocaine tum dze obi yɛ akowaa, na dɛmara na ponografi so tse.

Brian * yɛ obi a nna ɔtaa hwɛ ponografi wɔ Intanɛt do ma ɔkaa no hɔ. Ɔkãa dɛ: “Nna biribiara nntum mma minngyaa hwɛ. Nna munntum nnhyɛ moho do koraa. Nna moho wosow na me tsir paa me. Mobɔɔ mbɔdzen dɛ mibegyaa hwɛ, naaso mfe bi ekyir no nna munntum nngyaa hwɛ.”

Hɔn a wɔhwɛ ponografi no, ɔyɛ a wɔtaa hwɛ no wɔ nsumaa mu. Nkorɔfo a wɔtse dɛm no dze nsɛm sie afofor na wɔnnkã nokwar so. Ntsi ɔnnyɛ nwanwa dɛ hɔn mu pii ayɛ ankonam na ɔyɛ so a nna hɔn enyi ewu. Nkyii so adwendwen tum hyɛ hɔn do na ɔyɛ so a nna hɔn bo efuw. Binom so mpo wɔ hɔ a wɔtse nka dɛ wonku hɔn ho. Serge yɛ obi a nna dabiara ɔtwe ponografi gu no mobal fon do. Ɔkãa dɛ: “Nna metse nka dɛ moho yɛ mbɔbɔr na mfaso biara nnyi mo do. Nna me tsibowa haw me na metse nka dɛ mayɛ ankonam. Nna m’enyiwa ewu ara ma nna musuro dɛ mobɔhwehwɛ mboa.”

Sɛ obi n’enyi kɔbɔ ponografi do mpo a, obotum edzi no ewu. Dr. Judith Reisman yɛ obi a ɔtaa yɛ nhwehwɛmu fa ponografi ho, na odzii dase wɔ U.S. mbrahyɛ bagua no enyim na ɔkãa dɛ: “Ponografi ho mfonyin tum ka obi n’adwen mu, na ɔwɔ hɔ ara a otum ba ne tsirmu prɛko pɛ. Ɔyɛ dzen dɛ obi no werɛ befir, na ɔtɔfabi a oyi fi ne tsirmu a ɔnnyɛ yie .” Susan edzi mfe 19, na ɔyɛ obi a ɔkɔ Intanɛt do kɔhwɛ ponografi. Ɔkãa n’asɛm dɛ: “Mfonyin no aka m’adwen mu. Otum ba me tsirmu prɛko pɛr. Ɔyɛ me dɛ orimmfi m’adwen mu da.”

NOKWASƐM NYE DƐ: Ponografi dze nyimpa yɛ akowaa na odzi hɔn a onya hɔn no ewu.​—2 Peter 2:​19.

DZA ENYIMDZEFO KÃ: “Ponografi tum sɛɛ awar, na ɔtsetsew ebusua ntamu.”​—The Porn Trap, nwoma a Wendy na Larry Maltz kyerɛwee.

Ponografi tum sɛɛ awar na ebusua, osiandɛ

• Ɔmma awarfo nngye hɔnho nndzi, ɔsɛɛ nda mu nkitahodzi, na ɔma ɔdɔ yew fi awar no mu.​—Mbɛbusɛm 2:​12-17.

• Ɔma obi yɛ pɛsɛankonya, ɔtwe noho fi afofor ho, na dza no hokafo bɛyɛ biara nnyɛ no fɛw.​—Ephesusfo 5:​28, 29.

• Ɔma obi dwen banyin na basia nda ho.​—2 Peter 2:​14.

• Hɔn a wɔhwɛ no tum hyɛ hɔn ahokafo ma wɔyɛ nda mu ndzeyɛɛ a ɔmmfata.​—Ephesusfo 5:​3, 4.

• Ɔma obi sɛɛ awar wɔ n’akoma mu anaa ɔbɔ edwaman dze sɛɛ awar.​—Matthew 5:​28.

Bible no kã kyerɛ awarfo dɛ onnyi dɛ wotwa hɔn hokafo “nkontompɔ.” (Malachi 2:​16) Sɛ obi sɛɛ awar a, dza ɔkyerɛ nye dɛ oetwa n’awar mu hokafo nkontompɔ. Iyi botum ama hɔn awar no ayɛ basaa na akɛfa awar mu ntsetsewmu anaa awargu aba. Sɛ ɔba no dɛm a, obotum ahaw mbofra a wɔwɔ ebusua no mu no.

Sɛ mbofra so hwɛ ponografi a, otum haw hɔn. Brian a yeedzi kan aka noho asɛm no kãa dɛ: “Aber a midzii mfe du no, da kor bi nna miridzi agor na mukohun me papa ne ponografi magazine bi. Nna muwia moho hwɛ no nkakrankakra, naaso nna minnyim siantsir a m’enyiwa gye ho dɛm no. Ofitsi aber a mehyɛɛ ase hwɛɛ ponografi no, ɔsɛɛ mo suban araa ma medze nyinii.” Nhwehwɛmu bi a wɔayɛ ama ada edzi dɛ, mbofra a worinyin no, sɛ wɔhwɛ ponografi a otum ma wonya nda ho akɔndɔ ntsɛm. Obotum ama wɔdze hɔnho aahyɛ ndwamanbra mu, na ɔma wɔto afofor mbɔndar. Nkyii so adze biara a ɔbɛba hɔn adwen mu no ebɔhwɛ no na wɔreyɛ. Ponografi tum ka obi n’adwen so.

ASƐM NO NYE YI: Ponografi tum sɛɛ adɔfo ntamu, na otum ma obi dzi awerɛhow.​—Mbɛbusɛm 6:​27.

NYANKOPƆN N’ASƐM KÃ DƐ: “Dɛm ntsi hom mma . . . akɔndɔ a ɔwɔ hom mfafakuwa mu nnwu; ndwamansɛm, efifidze, akɔndɔ nhyɛdo, akɔndɔ bɔn nye enyiber a no so yɛ abosonsɔr.”​—Colossaefo 3:5, Baebor.

Nokwasɛm nye dɛ, Jehovah * Nyankopɔn kyir ponografi. Nnyɛ dɛ ɔmmpɛ dɛ ɔtse banyin na basia nda ho asɛm. Ɔyɛ ɔno na ɔbɔɔ nda ho akwaa no, na siantsir a ɔbɔe nye dɛ ɔbɛma awarfo no enyi agye na wɔaatwe abɛn hɔnho. Nkyii so iyi bɔboa hɔn ma woeetum awo mba.​—James 1:​17.

Ebɛnadze ntsi na yebotum akã dɛ Jehovah kyir ponografi koraa? Siantsir a ɔtse dɛm no, ma yensusu no mu kakra ho nhwɛ.

• Onyim dɛ ponografi botum asɛɛ hɛn abrabɔ.​—Ephesusfo 4:​17-​19.

• Ɔdɔ hɛn, na ɔpɛ dɛ ɔbɔ hɛnho ban amma ɔhaw biara annto hɛn.​—Isaiah 48:17, 18.

• Jehovah pɛ dɛ ɔbɔ awarfo nye mbusua ho ban.​—Matthew 19:​4-6.

• Ɔpɛ dɛ hɛn abrabɔ ho tsew, na ɔmmpɛ dɛ yɛyɛ ndzɛmba a ɔbɛhaw afofor.​—1 Thessalonicafo 4:​3-6.

• Akwaa a Nyankopɔn dze ama hɛn a yetum dze wo mba no, ɔpɛ dɛ yɛdze dzi dwuma yie.​—Hebrewfo 13:4.

• Jehovah nyim dɛ ponografi botum asɛɛ hɛn adwen wɔ nda ho, ɔbɛma yaayɛ pɛsɛankonyafo, na ɔbɛma yeenya Satan n’adwen wɔ nda ho.​—Genesis 6:2; Jude 6, 7.

ASƐM NO NYE YI: Ponografi sɛɛ anyɛnkofa a ɔda nyimpa na Nyankopɔn ntamu no.​—Romefo 1:​24.

Naaso hɔn a wɔpɛ dɛ wɔtwe hɔnho fi ponografi ho no, Jehovah hu hɔn mbɔbɔr paa. Bible no kã dɛ: “Ayamuhyehye na adom ahyɛ Ewuradze mã, ɔfa ebufuw nyaa, na no mbɔbɔrhu sõ. Na onyim hɛn bɔbea; ɔkaa dɛ yɛyɛ huntuma.” (Ndwom 103:​8, 14) Ɔpɛ dɛ ahobrɛadzefo ba ne nkyɛn na ‘wonya ehumbɔbɔr na adom a ɔboa hɛn ber a ohia mu.’​—Hebrewfo 4:​16; hwɛ adakaba a wɔato dzin “ Ibotum Atwe Woho Efi Ponografi Ho.”

Nyimpa pii ama Nyankopɔn aboa hɔn. Mboa a Nyankopɔn dze ma no, ehwɛ a, ɔbɔ edwuma? Nyimpa binom tumii gyaa suban bɔn a nna wɔwɔ no, na hyɛ dza Bible no kaa faa hɔnho no nsew: “Wɔatsew hom ho, . . . woebu hom bem wɔ Ewuradze Jesus Christ dzin mu, na hɛn Nyankopɔn sunsum no mu.” (1 Corinthfo 6:​11) Nyimpa a wɔtse dɛm no botum akã Paul n’asɛm yi bi dɛ: “Mutum adze nyina yɛ wɔ nyia ɔhyɛ me dzen no mu.”​—Philippifo 4:​13.

Susan tumii gyaa ponografi hwɛ, na ɔbɔ n’amandzɛɛ dɛ: “Jehovah nkotsee na obotum aboa wo ma aatwe woho. Sɛ ema ɔboa wo, na egye n’akwankyerɛ to mu a, woho bɛtsew wɔ n’enyim. Ɔremma wo nsa nnsi famu da.”