Ibuot 30

Un̄wam Ndikan Ndịk Nnyịn

NTE esidi mmemmem n̄kpọ ọnọ fi ndinam n̄kpọ Jehovah?— Akwa Andikpep ikọdọhọke ke edidi mmemmem n̄kpọ ndinam. Ke okoneyo oro mbemiso ẹkewotde Jesus, enye ama ọdọhọ mme apostle esie ete: “Edieke ererimbot asuade mbufo, mbufo ẹmefiọk ẹte, enye ama ebem iso asua Mi, ndien edisua mbufo.”—John 15:18.

Peter ama anam inua ete ke imọ idikpọn̄ke Jesus tutu amama, edi Jesus ama ọdọhọ ke Peter ayakan̄ imọ utịm ikata ke okoneyo oro. Ndien emi edi kpa se Peter akanamde! (Matthew 26:31-35, 69-75) Didie ke utọ n̄kpọ oro ekekeme nditịbe?— Enye eketịbe koro Peter okokopde ndịk, ndien ntre ke ekedi ye mme apostle eken.

Ndi afo ọmọfiọk ntak emi mme apostle ẹkekopde ndịk?— Mmọ ẹma ẹkpu ndinam ata akpan n̄kpọ. Ndikpep mban̄a emi ekeme ndin̄wam nnyịn ndinam n̄kpọ Jehovah, inamke n̄kpọ m̀mê nso ke owo ekededi ekeme ndidọhọ m̀mê ndinam nnyịn. Akpa kan̄a, oyom nnyịn idụn̄ọde se iketịbede ke akpatre okoneyo oro Jesus okodude ye mme apostle esie.

Akpa, mmọ ẹma ẹdia usọrọ Passover ọtọkiet. Emi ekedi san̄asan̄a udia emi ẹkesinịmde kpukpru isua man eti ikọt Abasi aban̄a edinyan̄a oro ẹkenyan̄ade mmọ ẹsio ke ufụn ke Egypt. Ekem Jesus ama ọtọn̄ọ san̄asan̄a udia efen ye mmọ. Nnyịn iyeneme iban̄a emi ke ibuotikọ oro odude ke iso inyụn̄ inam an̄wan̄a nte udia oro an̄wamde nnyịn nditi Jesus. Ke ẹma ẹkedia udia oro ẹkụre ye ke ama ọkọnọ mme apostle esie mme ikọ nsịnudọn̄, Jesus ama ada mmọ ọwọrọ aka in̄wan̄ Gethsemane. Emi edi itie emi mmọ ẹsimade ndika ediwak ini.

 Ke ẹsịmde in̄wan̄ oro Jesus adian̄ade ọkpọn̄ mbon eken man ọbọn̄ akam. Enye n̄ko ọdọhọ Peter, James, ye John ete ẹbọn̄ akam. Edi mmọ ẹde idap. Jesus aka ndibọn̄ akam ke idemesie utịm ikata, ndien enye ama afiak edi utịm ikata onyụn̄ okụt Peter ye mbon eken nte ẹdede idap! (Matthew 26:36-47) Nte afo ọmọfiọk ntak emi mmọ ẹkpetabade idap ẹbọn̄ akam?— Yak itịn̄ iban̄a emi.

Judas Iscariot ama adia usọrọ Passover ye Jesus ye mme apostle eken ke ntọn̄ọ ntọn̄ọ mbubịteyo oro. Afo emekeme nditi nte ke Judas ama akabade edi inọ. Idahaemi enye edidi owo mbia. Enye ọfiọk ebiet emi Jesus esiwakde ndisobo ọtọkiet ye mme apostle esie ke in̄wan̄ Gethsemane. Ntre Judas ada mbonekọn̄ aka do man ẹmụm Jesus. Ke ini mmọ ẹsịmde, Jesus obụp mmọ ete: “Mbufo ẹyom anie?”

Mbonekọn̄ ẹbọrọ ẹte: “Jesus.” Jesus ikopke ndịk, ntre enye ọbọrọ ete: “Ami ndi enye.” Mbonekọn̄ ẹkop n̄kpaidem etieti ẹban̄a uko Jesus tutu mmọ ẹfiak edem ẹkeduọn̄ọ ke isọn̄. Ekem Jesus ọdọhọ ete: ‘Edieke edide Ami ke mbufo ẹyom, ẹyak mme apostle Mi ẹnyọn̄ọ.’—John 18:1-9.

Ke ini mbonekọn̄ ẹmụmde Jesus ẹnyụn̄ ẹbọpde enye ubọk, mme apostle ẹkop ndịk ẹnyụn̄ ẹfen̄e. Edi Peter ye John ẹyom ndifiọk se itịbede, ntre mmọ ẹtiene nsannsan. Ke akpatre, ẹda Jesus ẹkesịm ufọk Caiaphas, kpa akwa oku. Sia akwa oku ọfiọkde John, ekpeme inuaotop ayak enye ye Peter ẹbe ẹdụk okụre oro.

Mme oku ẹma ẹsosop idem ọtọkiet ke ufọk Caiaphas man ẹkpe ikpe. Mmọ ẹyom ndinam ẹwot Jesus. Ntre mmọ ẹda mme ntiense ẹdi man ẹdisu nsu ẹdian enye. Mme owo ẹtọ Jesus ita ẹnyụn̄ ẹsiak enye ufia. Peter odu do ke adan̄aemi kpukpru emi etịbede.

Ofụn an̄wan kiet, kpa andikpeme inuaotop emi akayakde Peter ye John ẹbe ẹdụk, ọfiọk Peter. Enye ọdọhọ ete: “Afo nde okodu ye  Jesus!” Edi Peter akan̄ ete ke imọ ifiọkke Jesus. Ke esisịt ini ebede, n̄wan efen ọdiọn̄ọ Peter onyụn̄ ọdọhọ mbon oro ẹdade ẹkpere enye ete: “Owo emi nde okodu ye Jesus.” Peter afiak akan̄ ete ke imọ ifiọkke enye. Esisịt ini ke oro ebede, otu owo ẹkụt Peter ẹnyụn̄ ẹdọhọ enye ẹte: “Ke akpanikọ afo edi owo kiet ke otu mmọ.” Peter akan̄ ọyọhọ ikata, ọdọhọde ete: “Ndiọn̄ọke owo emi!” Peter akam ọn̄wọn̄ọ ete ke imọ itịn̄ akpanikọ, ndien Jesus ọwọn̄ọde enyịn ese enye.—Matthew 26:57-75; Luke 22:54-62; John 18:15-27.

Nte afo ọmọfiọk ntak emi Peter okosude nsu?— Ih, koro enye okokopde ndịk. Edi ntak emi enye okokopde ndịk? Nso ke enye okokpu ndinam man enye enyene uko? Kere ban̄a emi. Nso ke Jesus akanam man enyene uko?— Enye ọkọbọn̄ akam ọnọ Abasi, ndien Abasi ama an̄wam enye ndinyene uko. Ndien ti, Jesus ọkọdọhọ Peter ikata ete ọbọn̄ akam onyụn̄ ekpeme. Edi nso iketịbe?—

Ini kiet kiet, Peter ama ede idap. Enye ikọbọn̄ke akam, ikonyụn̄ idụhe ke ukpeme. Ntre enye okodu ke ndueidem ke ini ẹkemụmde Jesus. Nte ikpe oro akakade iso, ke ini ẹkemiade Jesus ẹnyụn̄  ẹdiomide ndiwot enye, Peter ama okop ndịk. Edi, nso ke Jesus ọkọdọhọ mme apostle esie ẹdori enyịn ẹban̄a ke n̄kpọ nte hour ifan̄ mbemiso?— Jesus ọkọdọhọ mme apostle esie ete ke ererimbot ayasua mmọ kpa nte asuade imọ.

Idahaemi yak ikere iban̄a n̄kpọ oro ekemede nditịbe nnọ nnyịn oro etiede nte se iketịbede inọ Peter. Yak idọhọ ke afo odu ke ubet ukpepn̄kpọ ke ini mbon eken ẹtọn̄ọde nditịn̄ ndiọi ikọ mban̄a mme owo oro mîsikọmke ọfọn̄ etakubom m̀mê mbon oro mîsidiaha usọrọ Christmas. Ndien nso edieke owo ọwọn̄ọrede enyịn ese fi onyụn̄ obụp ete: “Nte edi akpanikọ  nte ke mbufo isikọmke ọfọn̄ etakubom?” Mîdịghe mbon en̄wen ẹdọhọ: “Nnyịn imokop ke mbufo isidiaha Christmas!” Nte afo oyokop ndịk nditịn̄ akpanikọ?— Nte afo oyosu nsu, nte Peter okosude?—

Ke oro ebede, Peter ama enen̄ede atua n̄kpọfiọk ke ndikakan̄ Jesus. Ke ini enye ọkọfiọkde se imọ ikanamde, enye ama ọwọrọ an̄wa akatua. Ih, enye ama afiak etiene Jesus. (Luke 22:32) Idahaemi kere ban̄a emi. Nso ikeme ndin̄wam nnyịn itre ndikop ndịk tutu nnyịn isu nsu nte Peter?— Ti ete ke Peter ikọbọn̄ke akam ikonyụn̄ idụhe ke ukpeme. Ntre, afo ọkpọdọhọ ke oyom nnyịn inam nso man idi anditiene Akwa Andikpep?—

Enen̄ede oyom nnyịn ibọn̄ akam inọ Jehovah iben̄e un̄wam. Ke ini Jesus ọkọbọn̄de akam, nte afo ọmọfiọk se Abasi akanamde ọnọ enye?— Enye ama ọnọ angel ọkọsọn̄ọ enye idem. (Luke 22:43) Nte mme angel Abasi ẹkeme ndin̄wam nnyịn?— Bible ọdọhọ ete: “Angel Jehovah ana akan mmọ eke ẹbakde enye okụk, onyụn̄ anyan̄a mmọ.” (Psalm 34:7) Edi man ibọ un̄wam Abasi, oyom nnyịn inam se ikande ndibọn̄ akam mben̄e enye. Nte afo ọmọfiọk n̄kpọ efen oro oyomde nnyịn inam?— Jesus ama ọdọhọ mme anditiene enye ete ẹdu ke ukpeme. Afo ọkpọdọhọ ke didie ke nnyịn ikeme ndinam oro?—

Oyom nnyịn inen̄ede ikpan̄ utọn̄ ke se ẹtịn̄de ke mme mbono esop Christian nnyịn inyụn̄ inọ ntịn̄enyịn ke se nnyịn ikotde ito Bible. Edi oyom nnyịn n̄ko ibọn̄ akam inọ Jehovah kpukpru ini inyụn̄ iben̄e enye an̄wam nnyịn ndinam n̄kpọ esie. Edieke nnyịn inamde emi, ẹyen̄wam nnyịn ndikan ndịk. Ndien nnyịn iyadat esịt ke ini nnyịn inyenede ifet nditịn̄ nnọ mbon efen mban̄a Akwa Andikpep ye Ete esie.

Mme itien̄wed Abasi emi ẹkeme ndin̄wam nnyịn ikûdede iyak ndịk owo akpan nnyịn ndinam se inende: Mme N̄ke 29:25; Jeremiah 26:12-15, 20-24; ye John 12:42, 43.

[Ndise ke page 159]

Ntak emi okoyomde Peter, James, ye John ẹdu ke ukpeme?

[Ndise ke page 160]

Ntak emi Peter ekenen̄erede okop ndịk tutu enye akan̄ ete ke imọ ifiọkke Jesus?

[Ndise ke page 160]

Didie ke afo ekeme ndidu ke idaha oro ebietde eke Peter?