Ibuot 24

Kûdede Ukabade Udi Inọ!

NTE akanam owo ekededi eyịp n̄kpọ fo?— Eketie fi didie ke idem?— Owo ekededi emi ekeyịpde enye ekedi inọ, ndien owo ndomokiet imaha inọ. Afo ekere ke owo esisan̄a didie akabade edi inọ? Ndi ẹkeman enye nte inọ?—

Nnyịn imekpekpep nte ke mme owo ẹdada idiọkn̄kpọ ẹmana. Ntre kpukpru nnyịn idi mme anana mfọnmma. Edi owo ndomokiet imanake nte inọ. Inọ ekeme ndito eti ubon. Ete ye eka ye nditọeka esie ẹkeme ndidi mme anam akpanikọ. Edi udọn̄ owo ndinyene mme utọ n̄kpọ nte okụk ye se okụk ekemede ndidep ekeme ndinam enye akabade edi inọ.

Afo ọkpọdọhọ ke anie ekedi akpa inọ?— Yak ikere iban̄a emi. Akwa Andikpep ama ọfiọk owo oro ke ini enye okodude ke heaven. Inọ oro ekedi angel. Edi didie ke angel oro akakabade edi inọ ke ini Abasi akanamde kpukpru mme angel ẹdi mfọnmma?— Ọfọn, nte nnyịn ikekpepde ke Ibuot 8 ke n̄wed emi, enye okoyom n̄kpọ oro mîkenyeneke enye. Nte afo emeti se n̄kpọ oro ekedide?—

Ke Abasi ama okobot akpa eren ye n̄wan, angel oro ama oyom mmọ ẹtuak ibuot ẹnọ imọ. Enye ikenyeneke unen ndibọ utuakibuot mmọ. Utuakibuot mmọ ekenyene Abasi. Edi enye ama eyịp utuakibuot oro! Ke ndinam Adam ye Eve ẹtuak ibuot ẹnọ enye, angel oro ama akabade edi inọ. Enye ama akabade edi Satan kpa Devil.

Nso isinam owo akabade edi inọ?— Udọn̄ ndinyene n̄kpọ oro mînyeneke enye. Udọn̄ emi ekeme ndisọn̄ tutu enye akam ekeme  ndinam nti owo ẹnam ndiọi n̄kpọ. Ndusụk ini, mme inọ isikabakede esịt inam eti n̄kpọ tutu amama. Kiet ke otu mmọ ekedi apostle Jesus. Enyịn̄ esie ekedi Judas Iscariot.

Judas ama ọfiọk ke ifọnke ndiyịp inọ koro ẹma ẹkpep enye Ibet Abasi toto ke ini oro enye ekedide ekpri eyenọwọn̄. Enye ama akam ọfiọk ete ke Abasi ini kiet ko ama etie ke heaven ọdọhọ ikọt esie ete: “Kûyịp inọ.” (Exodus 20:15) Ke ini Judas ọkọkọride okpon, enye ama osobo ye Akwa Andikpep onyụn̄ akabade edi kiet ke otu mbet esie. Nte ini akakade, Jesus ama akam emek Judas ete edi kiet ke otu mme apostle imọ 12.

Jesus ye mme apostle esie ẹma ẹsika isan̄ ọtọkiet. Mmọ ẹma ẹsidia udia ọtọkiet. Ndien ẹkesidọn̄ kpukpru okụk oro otu emi ekenyenede ke ekebe. Jesus ama ọdọhọ Judas ese aban̄a ekebe oro. Nte ededi, okụk oro ikedịghe okụk Judas. Edi nte afo ọmọfiọk se Judas akanamde ke ekpri ini ebede?—

Judas ama ọtọn̄ọ ndisio okụk ke ekebe oro ke ini mîkpanaha enye osio. Enye ama esisio okụk oro ke ini mbon eken mîkesehe, ndien enye ama esikam oyom mme usụn̄ ndision̄o ediwak okụk. Enye ama ọtọn̄ọ ndikere mban̄a okụk kpukpru ini. Yak ise se idiọk udọn̄ emi akadade okosụn̄ọ ke n̄kpọ nte usen ifan̄ mbemiso ẹkewotde Akwa Andikpep.

Mary, eyeneka Lazarus emi ekedide ufan Jesus, ama ada ata eti aran ọduọk Jesus ke ukot. Edi Judas ama okụni. Nte afo ọmọfiọk ntak?— Enye ọkọdọhọ ke akpakana ẹnyam aran oro ẹda okụk ẹnọ mme ubuene. Edi enye ekenen̄ede oyom okụk awak ke ekebe oro man enye ekeme ndiyịp.—John 12:1-6.

Jesus ama ọdọhọ Judas ete okûfịna Mary, emi ọkọfọnde ido etieti. Judas ikenemke esịt ke ini Jesus eketịn̄de emi, ntre enye ama aka ebịne ikpọ oku, emi ẹkedide mme asua Jesus. Mmọ ẹma ẹyom  ndimụm Jesus, edi mmọ ẹkeyom ndinam emi ke okoneyo mbak mme owo ẹdikụt mmọ.

Judas ama ọdọhọ mme oku ete: ‘Nyetịn̄ nte mbufo edisan̄ade ẹmụm Jesus edieke mbufo ẹnọde mi okụk. Okụk ifan̄ ke mbufo ẹdinọ mi?’

Mme oku ẹma ẹbọrọ ete: ‘Nnyịn iyọnọ fi mbak silver 30.’—Matthew 26:14-16.

Judas ama ọbọ okụk oro. Eketie nte n̄kpọ eke enye akanyamde Akwa Andikpep ọnọ mme owo oro! Nte afo emekeme ndikere nte owo ekededi akpanamde utọ idiọkn̄kpọ oro?— Ke mfụhọ, oro edi utọ n̄kpọ oro esitịbede ke ini owo akabarede edi inọ onyụn̄ eyịpde okụk. Enye esima okụk akan nte amade mbon en̄wen m̀mê akan nte amade Abasi.

Afo emekeme ndidọhọ, ‘Tutu amama ndimaha n̄kpọ ekededi n̄kan nte mmade Jehovah Abasi.’ Ọfọn afo ndikere ntre. Ekeme ndidi Judas ama ekere ntre ke ini Jesus ekemekde enye nte apostle. Ekeme ndidi mbon en̄wen emi ẹkekabarede ẹdi inọ ẹma ẹkere ntre n̄ko. Yak itịn̄ iban̄a ndusụk mmọ.

Kiet ekedi asan̄autom Abasi emi ekekerede  Achan, emi okodude uwem anyan ini mbemiso Akwa Andikpep akamanade. Achan ama okụt ediye ọfọn̄idem, esan̄ o-gold, ye mbak silver. Idịghe enye ekenyene mmọ. Bible ọdọhọ ke Jehovah ekenyene mmọ koro ẹkebọ mmọ ẹto mme asua ikọt Abasi. Edi Achan ama enen̄ede oyom mmọ tutu enye eyịp mmọ.—Joshua 6:19; 7:11, 20-22.

Uwụtn̄kpọ efen edi emi. Anyan ini ko, Jehovah ama emek David ndidi edidem Israel. Usen kiet, David ama ọtọn̄ọ ndise ediye an̄wan oro Bath-sheba. Enye ama owụk enyịn ese Bath-sheba onyụn̄ ekere ndimen enye nnyọn̄ ufọk man odụn̄ ye imọ. Nte ededi, enye ekedi n̄wan Uriah. Nso ke David akpakanam?—

David ekpeketre ndikere mban̄a edida  Bath-sheba nnyene. Edi enye iketreke. Ntre David ama ada enye ọnyọn̄ ufọk. Ndien ekem enye ama anam ẹwot Uriah. Ntak emi David akanamde utọ ndiọi n̄kpọ emi?— Koro enye ama aka iso oyom n̄wan owo en̄wen.—2 Samuel 11:2-27.

Jehovah akayak David odu uwem koro enye ama atua n̄kpọfiọk. Edi tọn̄ọ ke ini oro ka iso, David ama enyene ediwak mfịna. Eyen esie Absalom ama oyom ndida itie David nte edidem. Ntre ke ini mme owo ẹkedide ndikụt David, Absalom ama esifat onyụn̄ etịm mmọ inua. Bible ọdọhọ ete: ‘Absalom onyụn̄ eyịp esịt nditọ Israel.’ Enye ama anam mme owo oro ẹyom enye edi edidem utu ke David.—2 Samuel 15:1-12.

Nte akanam afo emenen̄ede oyom n̄kpọ, ukem nte Achan, David, ye Absalom ẹkeyomde?— Edieke n̄kpọ oro enyenede owo efen, ndimen enye ke mûbọhọ unyịme edi uyịpinọ. Nte afo emeti se akpa inọ oro, Satan, okoyomde?— Enye okoyom mme owo ẹtuak ibuot ẹnọ imọ utu ke ndituak nnọ Abasi. Ntre Satan ekeyịp inọ ke ini enye akanamde Adam ye Eve ẹkop uyo esie.

Ke ini owo enyenede n̄kpọ, enye enyene unen ndisiak owo emi ekemede ndida n̄kpọ oro nnam n̄kpọ. Ke uwụtn̄kpọ, afo emekeme ndika ndibre mbre ye nditọwọn̄ en̄wen ke ufọk mmọ. Nte ọkpọfọn ndimen n̄kpọ do nnyọn̄ ufọk mbufo?— Ikpọfọnke ibọhọke ete m̀mê eka mmọ ọdọhọ ke afo emekeme ndimen. Edieke afo emende n̄kpọ ọnyọn̄ ufọk ye unana ndiben̄e mmọ, oro edi uyịpinọ.

Ntak emi idomo ekemede ndisịm fi ndiyịp inọ?— Koro afo oyom n̄kpọ oro mînyeneke fi. Idem ọkpọkọm owo efen ikwe fi ke ini emende enye, anie okụt?— Jehovah Abasi. Ndien ana nnyịn iti nte ke Abasi asasua uyịpinọ. Ntre ima oro afo enyenede ọnọ Abasi ye mbọhọidụn̄ fo ayan̄wam fi okûdede uyịp inọ.

Bible etịn̄ in̄wan̄-in̄wan̄ nte ke ifọnke ndiyịp inọ. Mbọk kot Mark 10:17-19; Rome 13:9; ye Ephesus 4:28.

[Ndise ke page 129]

Ntak emi Judas ekeyịpde inọ?

[Mme ndise ke page 130]

Nso ndiọi n̄kpọ ke Achan ye David ẹkere?

[Ndise ke page 130]

Ke nso usụn̄ ke Absalom ekedi inọ?