Ibuot 31

“Ẹsan̄a Ẹkpere Abasi, Ndien Enye Ayasan̄a Ekpere Mbufo”

1-3. (a) Nso ke nnyịn ikeme ndikpep nto obot owo ke ndise nte ete ye eka ẹnamde n̄kpọ ye nsekeyen mmọ? (b) Nso ndammana edinam esida itie ke ini owo amade nnyịn, ndien nso akpan mbụme ke nnyịn ikeme ndibụp idem nnyịn?

 MME ete ye eka ẹsima ndikụt obufa nsekeyen mmọ atuakde inua imam. Mmọ ẹsiwak ndisịk iso mmọ n̄kpere iso nsekeyen, ẹtịn̄ ikọ ima ima ẹnyụn̄ ẹnen̄ede ẹtuak inua imam. Mmọ ẹsinen̄ede ẹyom ndikụt nte nsekeyen oro etienede atuak inua imam. Ndien ke mîbịghike, oro esitịbe—mfụk nsekeyen oro ọtọn̄ọ nditịghede, n̄kpọkinua atara, ndien enye atuak inua imam ediye ediye. Ke ata n̄wọrọnda usụn̄, inua imam oro edi idiọn̄ọ ima, ntọn̄ọ ima oro nsekeyen owụtde ete ye eka esie oro ẹmade enye.

² Inua imam nsekeyen oro eti nnyịn akpan n̄kpọ aban̄a obot owo. Ndammana n̄kpọ oro nnyịn isinamde ke ini owo amade nnyịn esidi ndima owo oro n̄ko. Nte obot nnyịn etiede edi oro. (Psalm 22:9) Nte nnyịn ikọride, ntre ke ukeme nnyịn ndima ima ọkọri. Eyedi afo emeti nte ete ye eka fo, mme iman, m̀mê mme ufan ẹkewụtde fi ima ke ini afo ekedide eyenọwọn̄. Ufiop ufiop ntụk ama edemede ke esịt fo, ọkọri, onyụn̄ onụk fi ndinam n̄kpọ. Afo ama ama mmọ n̄ko ke usiene. Nte mbiet n̄kpọ oro ke etịbe ke itie ebuana fo ye Jehovah Abasi?

³ Bible ọdọhọ ete: “Nnyịn ima ima, koro Enye ekebemde iso ama nnyịn.” (1 John 4:19) Ke Ikpehe 1 esịm 3 ke n̄wed emi, ẹma ẹti fi nte ke Jehovah Abasi ada odudu, unenikpe, ye ọniọn̄ esie anam n̄kpọ ke ima ima usụn̄ ke ufọn fo. Ndien ke Ikpehe 4, afo ama okụt nte ke enye owụt ubonowo ima esie nnennen nnennen—onyụn̄ owụt fi ima oro ọkpọkpọ—ke mme n̄wọrọnda usụn̄. Ke emi mbụme edemede. Ke usụn̄ kiet, enye edi ata akpan mbụme oro afo ekemede ndibụp idemfo: ‘Didie ke ami ndinam n̄kpọ mban̄a ima Jehovah?’

 Se Ndima Abasi Ọwọrọde

4. Ke ewe usụn̄ ke ẹtịmede mme owo ẹban̄a se ndima Abasi ọwọrọde?

⁴ Jehovah, kpa Anditọn̄ọ ima etịm ọfiọk ke ima enen̄ede enyene odudu ndision̄o nti edu oro mbon efen ẹnyenede n̄wụt. Ntre kpa ye n̄kaiso nsọn̄ibuot ubonowo oro mînamke akpanikọ, enye osụk enyenyene mbuọtidem nte ke ndusụk owo ẹyenam n̄kpọ ẹban̄a ima esie. Ndien, ke akpanikọ, ediwak miliọn owo ẹnam oro. Edi, ke mfụhọ, ido ukpono idiọk ererimbot emi etetịmede mme owo aban̄a se ndima Abasi ọwọrọde. Ata ediwak owo ẹdọhọ ke mmimọ imama Abasi, edi etie nte mmọ ẹkere ke utọ ima oro edi se ẹtịn̄de ke inua kpọt. Ima oro ẹnyenede ẹnọ Abasi ekeme nditọn̄ọ ntre, kpa nte ima oro nsekeyen enyenede ọnọ ete ye eka ekemede nditọn̄ọ ye inua imam. Nte ededi, ye mbon oro ẹkọride ẹwọrọ owo, ima esịne n̄kpọ akan oro.

5. Didie ke Bible anam se ndima Abasi edide an̄wan̄a, ndien ntak emi se ima ọwọrọde ekpenemde nnyịn esịt?

⁵ Jehovah anam an̄wan̄a se ndima imọ ọwọrọde. Ikọ esie ọdọhọ ete: “Ndima Abasi edi emi, ete, nnyịn inịm mbet Esie.” Ke ntem, ẹnyene ndida edinam n̄wụt ima oro ẹnyenede ẹnọ Abasi. Edi akpanikọ, ediwak owo imaha nsụkibuot. Edi ufan̄ikọ oro adian inem inem do ete: “Ndien mbet Esie ibiakke owo idem.” (1 John 5:3) Ẹnọ mbet ye edumbet Jehovah ke ufọn nnyịn, idịghe man efịk nnyịn. (Isaiah 48:17, 18) Ikọ Abasi ọyọhọ ye mme edumbet oro ẹn̄wamde nnyịn nditịm nsan̄a n̄kpere enye. Didie ke edi ntre? Ẹyak nnyịn idụn̄ọde ikpehe ita oro ẹban̄ade itie ebuana nnyịn ye Abasi. Emi abuana nneme, utuakibuot, ye ndikpebe enye.

Ndineme Nneme ye Jehovah

6-8. (a) Ke nso usụn̄ ke nnyịn ikeme ndikpan̄ utọn̄ nnọ Jehovah? (b) Didie ke nnyịn ikeme ndinam N̄wed Abasi enyene uwem ke ini ikotde enye?

⁶ Ibuot 1 ọkọtọn̄ọ ye mbụme emi, “Nte emekeme ndikere nte imọ ikpenyenede nneme ye Abasi?” Nnyịn ima ikụt ite ke emi idịghe ikpîkpu ekikere. Moses ke idemesie ama enyene  utọ nneme oro. Nso kaban̄a nnyịn? Idahaemi, Jehovah idọn̄ke mme angel esie ẹdineme nneme ye mme owo. Edi Jehovah enyene mfọnn̄kan usụn̄ oro enye adade eneme nneme ye nnyịn mfịn. Didie ke nnyịn ikeme ndikpan̄ utọn̄ nnọ Jehovah?

⁷ Sia ‘ẹkedade odudu spirit Abasi ẹwet kpukpru N̄wed Abasi,’ nnyịn ikpan̄ utọn̄ inọ Jehovah ebe ke ndikot Ikọ esie, kpa Bible. (2 Timothy 3:16) Ntem, andiwet psalm ama esịn udọn̄ ọnọ mme asan̄autom Jehovah ndikot Ikọ Abasi “ke uwemeyo ye ke okoneyo.” (Psalm 1:1, 2) Ndinam ntre oyom nnyịn inen̄ede isịn ukeme. Edi ofụri utọ ukeme oro itakke-tak. Nte nnyịn ikokụtde ke Ibuot 18, Bible etie nte ọsọn̄urua leta oro Ete nnyịn eke heaven ọnọde ẹsọk nnyịn. Ke ntre ndikot enye ikpenyeneke ndidi n̄kpọ oro efekde-fek owo. Ana nnyịn inam N̄wed Abasi enyene uwem ke ini nnyịn ikotde enye. Didie ke nnyịn ikeme ndinam oro?

⁸ Kụt mme mbụk Bible oro ke enyịn ikike nte afo okotde mmọ. Domo ndikụt mme owo oro ẹtịn̄de ẹban̄a ke Bible nte mme ata owo. Domo ndidiọn̄ọ ifiọk eyouwem, mme idaha, ye mme uduak mmọ. Ekem, nen̄ede kere ban̄a se afo okotde, bụp idemfo mme utọ mbụme nte: ‘Nso ke mbụk emi ekpep mi aban̄a Jehovah? Ewe edu esie ke ami n̄kụt? Ewe edumbet ke Jehovah oyom ami n̄kpep, ndien didie ke n̄keme ndida enye nnam n̄kpọ ke uwem mi?’ Kot, tie kere, nnyụn̄ da sịn ke edinam—ke anamde ntre, Ikọ Abasi eyenyene uwem ọnọ fi.—Psalm 77:12; James 1:23-25.

9. Anie edi “asan̄autom emi anamde akpanikọ, onyụn̄ enyenede ọniọn̄,” ndien ntak emi edide akpan n̄kpọ nnyịn nditịm n̄kpan̄ utọn̄ nnọ “asan̄autom” emi?

⁹ Jehovah etịn̄ ikọ n̄ko ọnọ nnyịn ebe ke “asan̄autom emi anamde akpanikọ, onyụn̄ enyenede ọniọn̄.” Nte Jesus ekebemde iso etịn̄, ẹmek otu mme Christian oro ẹyetde aran ndinọ “udia [eke spirit] ke edikem ini” ke mme akpatre usen emi ẹyọhọde ye afanikọn̄ mi. (Matthew 24:45-47) Ke ini nnyịn ikotde n̄wed oro ẹsiode ndin̄wam nnyịn inyene nnennen  ifiọk Bible ye ke ini nnyịn idụkde mme mbono esop Christian ye ikpọ mbono, nnyịn idia udia eke spirit oro otu asan̄autom emi ọnọde. Sia enye edide ofụn Christ, owụt ọniọn̄ nnyịn ndinam mme ikọ Jesus emi: “Ẹtịn̄ enyịn ẹkpeme ndien adan̄a nte mbufo ẹkopde [“ẹkpan̄de utọn̄,” NW].” (Sịghisịghi ubọkn̄wed edi eke nnyịn; Luke 8:18) Nnyịn inọ ọyọhọ n̄kpan̄utọn̄ sia nnyịn ifiọkde ke otu asan̄autom emi edi usụn̄ oro Jehovah adade eneme nneme ye nnyịn.

10-12. (a) Ntak emi akam edide utịbe utịbe enọ oro otode Jehovah? (b) Didie ke nnyịn ikeme ndibọn̄ akam ke usụn̄ oro enemde Jehovah esịt, ndien ntak emi nnyịn ikpenyenede mbuọtidem nte ke enye ada akam nnyịn ke akpan n̄kpọ?

¹⁰ Edi nso kaban̄a edineme nneme ye Abasi? Nte nnyịn imekeme nditịn̄ ikọ nnọ Jehovah? Oro edi ekikere emi enyenede uten̄e. Edieke afo okpoyomde ndikosobo ye ata ọkpọsọn̄ andikara ke obio mbufo man etịn̄ mme ọkpọkpọ mfịna fo ọnọ enye, nte afo emekere ke enye ekpenyene ifet ọnọ fi? Ke ndusụk idaha, ndidomo ndikụt enye ekeme ndikama n̄kpọndịk! Ke eyo Esther ye Mordecai, owo oro akakade ebịne edidem Persia ye unana enye ndibọ ikot nto edidem ekenyene ndikpa. (Esther 4:10, 11) Ke emi kere ban̄a ndika mbịne Ọbọn̄ Andikara ofụri ekondo, oro edide ke ẹmende ẹdomo ye idem ata n̄kpọsọn̄ owo, mmọ “ebiet n̄kukun̄kpọyọriyọ.” (Isaiah 40:22) Nte nnyịn ikpayak ọkpọsọn̄ ndịk ọbiọn̄ọ nnyịn ndisan̄a n̄kpere enye? Baba-o!

¹¹ Jehovah ọnọ ata in̄wan̄-in̄wan̄, mmemmem usụn̄ ndisan̄a n̄kpere enye—akam. Ata ekpri eyen akam ekeme ndibọn̄ akam nnọ Jehovah ke mbuọtidem, anamde ntre ke enyịn̄ Jesus. (John 14:6; Mme Hebrew 11:6) Edi, akam n̄ko an̄wam nnyịn ikeme ndin̄wan̄a uwak ekikere ye mme ntụk nnyịn nnọ Abasi—idem ye mbon oro ẹkamade ubiak oro nnyịn mîkemeke nditetịn̄. (Rome 8:26) Ufọn idụhe ndidomo ndida udọn udọn, ndinem ikọ m̀mê nnyan akam nnem Jehovah esịt. (Matthew 6:7, 8) Ke n̄kan̄ eken, Jehovah inịmke uniọn̄ ini m̀mê ibat ini oro nnyịn ikemede nditịn̄ ikọ ye enye. Ikọ esie akam esịn udọn̄ ọnọ nnyịn ete ‘ikûdop ndibọn̄ akam.’—1 Thessalonica 5:17.

 ¹² Ti ete ke Jehovah ikpọn̄ ke ẹkot ‘Andikop akam,’ ndien enye esikpan̄ utọn̄ ye ata esịtmbọm. (Psalm 65:2) Nte enye n̄kukụre esiyọyọ akam mme anam-akpanikọ asan̄autom esie? Baba, mmọ ẹsinen̄ede ẹnọ enye inemesịt. Ikọ esie emen mme utọ akam oro odomo ye incense, oro ke ini ẹfọpde esinamde inem inem ufuọn̄ ọdọk enyọn̄. (Psalm 141:2; Ediyarade 5:8; 8:4) Nte idịghe n̄kpọ nsịnudọn̄ ndifiọk nte ke mme akam ofụri esịt nnyịn ẹsidọk kpasụk ntre ẹnyụn̄ ẹnem Ọbọn̄ Andikara esịt? Ntre edieke afo oyomde ndisan̄a n̄kpere Jehovah, bọn̄ akam ke nsụhọdeidem nọ enye ediwak ini, kpukpru usen. N̄wan̄a esịt fo nọ enye; kûdịp n̄kpọ ndomokiet. (Psalm 62:8) Buana mme mfịna fo, idatesịt fo, ekọm fo, ye itoro fo ye Ete fo eke heaven. Nte utịp, itie ebuana fo ye enye eyetetịm ọkọri.

Ndituak Ibuot nnọ Jehovah

13, 14. Nso ke ndituak ibuot nnọ Jehovah ọwọrọ, ndien ntak emi odotde nnyịn ndinam ntre?

¹³ Ke ini nnyịn inemede nneme ye Jehovah Abasi, nnyịn ikpan̄ke utọn̄ inyụn̄ itịn̄ ikọ nte nnyịn ikpanamde ye ufan m̀mê iman. Nnyịn inen̄ede ituak ibuot inọ Jehovah, inọde enye ntotụn̄ọ ukpono oro enye etịmde odot. Utuakibuot akpanikọ akara ofụri uwem nnyịn. Enye edi usụn̄ oro nnyịn idade iwụt ima ofụri ukpọn̄ ye ukpono oro nnyịn inyenede inọ Jehovah, ndien enye omụm kpukpru mme anam-akpanikọ edibotn̄kpọ Jehovah, edide eke heaven m̀mê eke isọn̄, adian ọtọkiet. Ke n̄kukụt, apostle John ama okop angel atan̄ade ewụhọ emi: “Ẹtuak ibuot ẹnọ Enye emi okobotde enyọn̄ ye isọn̄ ye inyan̄ ye idịm mmọn̄.”—Ediyarade 14:7.

¹⁴ Ntak emi nnyịn ikpatuakde ibuot inọ Jehovah? Kere ban̄a mme edu oro nnyịn ima ikeneneme iban̄a, utọ nte edisana idaha, odudu, mfaraidem, unenikpe, uko, ọniọn̄, nsụhọdeidem, ima, esịtmbọm, nsọn̄ọnda, ye mfọnido. Nnyịn imokụt ite ke Jehovah enyene n̄kon̄n̄kan idaha ke kpukpru nti edu. Ke ini nnyịn idomode nditan̄ kpukpru edu esie ndian ọtọkiet, nnyịn imokụt ite ke enye enen̄ede okpon akan Owo oro odotde ẹma. Ubọn̄ esie asan̄a ye uten̄e, enye okon̄ akan nnyịn  ke usụn̄ oro mînyeneke mbiet. (Isaiah 55:9) Ye unana eyịghe, Jehovah edi Andikara nnyịn oro enyenede unen, ndien enye odot ndibọ utuakibuot nnyịn. Edi, didie ke nnyịn ikpatuak ibuot inọ Jehovah?

15. Didie ke nnyịn ikeme ndituak ibuot nnọ Jehovah “ke spirit ye ke akpanikọ,” ndien nso ifet ke mme mbono esop Christian ẹberede ẹnọ nnyịn?

¹⁵ Jesus ọkọdọhọ ete: “Abasi edi spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.” (John 4:24) Oro ọwọrọ ndituak ibuot nnọ Jehovah ye esịt oro ọyọhọde ye mbuọtidem ye ima, emi spirit esie ọnọde ndausụn̄. Enye n̄ko ọwọrọ ndituak ibuot nte ekemde ye akpanikọ, kpa nnennen ifiọk oro ẹkụtde ke Ikọ Abasi. Nnyịn imenyene ọsọn̄urua ifet ndituak ibuot nnọ Jehovah “ke spirit ye ke akpanikọ” ini ekededi oro nnyịn isopde idem ye ekemmọ mme andituak ibuot. (Mme Hebrew 10:24, 25) Ke ini  nnyịn ikwọde itoro inọ Jehovah, ibuanade ke akam oro ẹbọn̄de ẹnọ enye, ye ke ini ikpan̄de utọn̄ inyụn̄ itienede ibuana ke ndineme Ikọ esie, nnyịn ida edisana utuakibuot iwụt ima oro inyenede inọ enye.

16. Nso idi kiet ke otu n̄kponn̄kan ewụhọ oro ẹnọde mme Christian akpanikọ, ndien ntak emi obiomode nnyịn ke idem ndinam enye?

¹⁶ Nnyịn ituak ibuot inọ Jehovah n̄ko ke ini nnyịn itịn̄de inọ mbon efen iban̄a enye, itorode enye an̄wan̄wa. (Mme Hebrew 13:15) Ke akpanikọ, ndikwọrọ eti mbụk Obio Ubọn̄ Jehovah edi kiet ke otu n̄kponn̄kan ewụhọ oro ẹnọde mme Christian akpanikọ. (Matthew 24:14) Nnyịn inam emi ye ọkpọsọn̄ udọn̄ koro nnyịn imade Jehovah. Ke ini ikerede iban̄a usụn̄ oro “abasi eyo emi,” Satan kpa Devil, “[anamde] ikike mmọ eke mînịmke ke akpanikọ ekịm,” osude idiọk nsu adian Jehovah, nte inen̄ekede idọn̄ nnyịn ndinam utom nte Mme Ntiense Abasi, man iwụt ke utọ idiọk edidọk oro idịghe akpanikọ? (2 Corinth 4:4; Isaiah 43:10-12) Ndien ke ini nnyịn ikerede iban̄a mme utịbe utịbe edu Jehovah, nte itịmke idọn̄ nnyịn nditịn̄ nnọ mbon en̄wen mban̄a enye? Ke akpanikọ, idụhe ifet efen oro okponde akan nnyịn ndin̄wam mbon en̄wen ndifiọk nnyụn̄ mma Ete nnyịn eke heaven kpa nte nnyịn imade.

17. Nso ke utuakibuot nnyịn nnọ Jehovah abuana, ndien ntak emi anade nnyịn isọn̄ọ ida ituak ibuot inọ enye?

¹⁷ Utuakibuot oro nnyịn inọde Jehovah esịne n̄kpọ akan oro. Enye otụk ofụri ikpehe uwem nnyịn. (Colossae 3:23) Edieke nnyịn inen̄erede ida Jehovah nte Ọbọn̄ Andikara nnyịn, do, nnyịn iyodomo ndinam uduak esie ke kpukpru n̄kpọ—ke uwem ubon nnyịn, ke itieutom nnyịn, ke nte inamde n̄kpọ ye mbon en̄wen, ye ke ini nduọkodudu nnyịn. Nnyịn iyodomo ndisọn̄ọ nda nnam n̄kpọ Jehovah “ke ofụri esịt.” (1 Chronicles 28:9) Utọ utuakibuot oro iyakke owo anam n̄kpọ ye ubak esịt m̀mê odu uwem esịt iba—kpa uwem mbubịk oro owo anamde nte inam n̄kpọ Jehovah ke adan̄aemi edịbede anam ikpọ idiọkn̄kpọ. Nsọn̄ọnda iyakke owo ekeme ndidu utọ uwem mbubịk oro; ima ananam utọ uwem oro odoro owo ndidien. Uten̄e Abasi ayan̄wam n̄ko. Bible abuan utọ uten̄e  oro ye nnyịn ndika iso nnyene n̄kpet n̄kpet itie ebuana ye Jehovah.—Psalm 25:14.

Ndikpebe Jehovah

18, 19. Ntak emi owụtde ifiọk ndikere nte ke mme anana-mfọnmma owo ẹkeme ndikpebe Jehovah Abasi?

¹⁸ Ikpehe kiet kiet ke n̄wed emi etre ye ibuot oro owụtde nte ikpakabarede idi “mme andikpebe Abasi, nte ndima nditọ.” (Ephesus 5:1) Edi akpan n̄kpọ nditi nte ke okposụkedi nnyịn idide mme anana-mfọnmma owo, nnyịn imekeme ndinen̄ede n̄kpebe mfọnmma usụn̄ oro Jehovah adade odudu, unenikpe, ọniọn̄, ye ima esie anam n̄kpọ. Nnyịn isan̄a didie ifiọk ke nnyịn imekeme ndinen̄ede n̄kpebe Ata Ọkpọsọn̄? Ti ete ke se enyịn̄ Jehovah ọwọrọde ekpep nnyịn nte ke enye anam idemesie akabade edi se ededi oro enye emekde man osu mme uduak esie. Nte enende, utọ ukeme oro odoro nnyịn uten̄e, edi nte oro owụt ke nnyịn ikemeke-keme ndikpebe enye? Baba.

¹⁹ Ẹkenam nnyịn ke mbiet Abasi. (Genesis 1:26) Ke ntem, mme owo itiehe nte mme edibotn̄kpọ eken ke isọn̄. Idịghe sụk ntụk, nsenubon, m̀mê mme n̄kpọ oro ẹkande nnyịn ẹkụk ẹnụk nnyịn ndinam n̄kpọ. Jehovah ọnọ nnyịn ọsọn̄urua enọ—ifụre edimek. Kpa ye mme mmeme ye unana mfọnmma nnyịn, nnyịn imenyene ifụre ndimek se nnyịn ididide. Nte afo omoyom ndidi ima ima, enyene-ọniọn̄, ye edinen owo emi adade odudu anam n̄kpọ ke usụn̄ oro enende? Ye un̄wam spirit Jehovah, afo emekeme ndikabade ndi utọ owo oro! Kere nti n̄kpọ oro afo edinamde ke ama akakabade edi oro.

20. Nso eti n̄kpọ ke nnyịn inam ke ini nnyịn ikpebede Jehovah?

²⁰ Afo ayanam Ete fo eke heaven adat esịt. (Mme N̄ke 27:11) Afo emekeme ndikam ‘nnem Jehovah esịt ke kpukpru usụn̄,’ koro enye ọfiọkde mme mmeme nnyịn. (Colossae 1:9, 10) Ndien nte afo akade iso ndikọri nti edu ke ndikpebe ima ima Ete fo, oro eyeberede akwa ifet ọnọ fi. Afo eyedi andinọ un̄wana ke n̄kịmn̄kịm ererimbot emi adianarede ọkpọn̄ Abasi. (Matthew 5:1, 2, 14) Afo ayan̄wam ndinam mbiet ubọn̄ ubọn̄ edu Jehovah atara ke isọn̄. Nso ukpono ke oro edi ntem!

 “Ẹsan̄a Ẹkpere Abasi, Ndien Enye Ayasan̄a Ekpere Mbufo”

21, 22. Nso anana-utịt edinam odu ke iso ọnọ kpukpru mbon oro ẹmade Jehovah?

²¹ In̄wan̄-in̄wan̄ nsịnudọn̄ oro ẹnọde ke James 4:8 idịghe sụk utịtmbuba. Enye edi edinam oro akade-ka iso. Adan̄a nte nnyịn isọn̄ọde ida inam akpanikọ, edinam oro iditreke. Tutu amama nnyịn iditreke nditetịm nsan̄a n̄kpere Jehovah. Idem n̄kpọ, ekese n̄kpọ ẹsụk ẹdedu ndikpep mban̄a enye. Nnyịn ikpenyeneke ndikere ke n̄wed emi ekpep nnyịn kpukpru n̄kpọ oro anade ẹdiọn̄ọ ẹban̄a Jehovah. Kamse, nnyịn itọn̄ọke-tọn̄ọ kan̄a ndineme kpukpru se Bible etịn̄de aban̄a Abasi nnyịn! Ndien, Bible ke idemesie ikam isianke nnyịn kpukpru n̄kpọ iban̄a Jehovah. Apostle John ọkọdọhọ ete ke edieke ẹkpekewetde kpukpru n̄kpọ oro Jesus akanamde ke ini utom ukwọrọikọ esie ke isọn̄, ke “idem ererimbot ikpekemeke ndikọhọ se ẹwetde.” (John 21:25) Edieke ẹtịn̄de ntre ẹban̄a Eyen, nso ndien kaban̄a Ete!

²² Idem ndidu uwem ke nsinsi idinamke nnyịn ikeme ndifiọk  kpukpru n̄kpọ mban̄a Jehovah. (Ecclesiastes 3:11) Kere ndien ban̄a idotenyịn oro odude ke iso ọnọ nnyịn. Ke ima ikodu uwem ke ediwak isua ikie, ediwak tọsịn isua, ediwak miliọn isua, idem ke ediwak biliọn isua, nnyịn iyetịm ifiọk ata ekese iban̄a Jehovah Abasi ikan nte ifiọkde idahaemi. Edi nnyịn iyosụk ifiọk ke ata ekese utịbe utịbe n̄kpọ ẹsụk ẹdodu ndikpep. Nnyịn iyenyene ọkpọsọn̄ udọn̄ ndikpep mme n̄kpọ efen efen, koro ntak oyodu kpukpru ini ọnọ nnyịn ndinyene ukem ekikere andiwet psalm, emi ọkọkwọde ete: “Ọfọn mi ndikpere Abasi.” (Psalm 73:28) Nsinsi uwem ediyọhọ ye nti ye akpakịp edidiọn̄—ndien nditịm nsan̄a n̄kpere Jehovah edidi akakan utịp oro asan̄ade ye enye.

23. Nso ke ẹsịn udọn̄ ẹnọ fi ndinam?

²³ Afo akpakam anam n̄kpọ aban̄a ima Jehovah idahaemi, ebe ke afo ndima enye ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo. (Mark 12:29, 30) Ima fo akpakam edi eke akpanikọ onyụn̄ ọsọn̄ọ ada. Mme ubiere oro afo anamde kpukpru usen, tọn̄ọde ke n̄kpri tutu ẹsịm ikpọ ẹkpekam ẹwụt nte ke afo ke etiene edumbet oro—nte ke afo kpukpru ini eyemek usụn̄ oro adade ekesịm itie ebuana oro etịmde-tịm ọsọn̄ ye Ete fo eke heaven. Ke akande kpukpru, afo akpakam aka iso enen̄ede asan̄a ekpere Jehovah, ndien enye n̄ko akpakam aka iso enen̄ede asan̄a ekpere fi—ke nsinsi nsinsi!

Mme Mbụme Nditie N̄kere

Psalm 25:1-22 Didie ke nnyịn ikeme ndinen̄ede nsan̄a n̄kpere Jehovah, ndien nso ke nnyịn ikeme ndidori enyịn mban̄a nte utịp?

Hosea 6:3 Didie ke ufan̄ikọ emi owụt nte ke ndifiọk Jehovah oyom ukeme onyụn̄ ada mme edidiọn̄ edi?

Matthew 16:21-27 Edieke nnyịn iyomde ndikpebe Jehovah, uwụtn̄kpọ anie ke ana nnyịn itiene, ndien nso edu ke ana nnyịn inyene?

Ediyarade 21:3, 4 Nte afo ekerede aban̄a mme edidiọn̄ ini iso oro Jehovah edinọde, nso ke oro onụk fi ndinam?

[Mme Mbụme Ukpepn̄kpọ]

[Ndise ke page 315]

Mme mbono Christian ẹdi inem inem ifet ndituak ibuot nnọ Jehovah

[Ndise ke page 318]

Afo akpakam enen̄ede asan̄a ekpere Jehovah kpukpru ini