Se Ẹtịn̄de Ẹnọ Mme Ete ye Eka

Eyenọwọn̄ ndikpon n̄kabade akwa owo ekeme nditie nte owo ndisan̄a ke urụk. Enye ekeme ndisio ikpat ndịk ndịk nte n̄kpọ eke ẹdọhọde ke ọmọn̄ ọduọ. Sia mbufo ẹdide ete ye eka, ekeme nditie mbufo ndusụk ini nte ke ikpanaha ẹyak nditọ mbufo ‘ẹsan̄a ke urụk emi.’ Edi mbufo ikemeke ndikpan mmọ, utu ke oro, ẹmekeme nditie nte eto oro mmọ ẹmụmde ẹsan̄a ke urụk emi mbak ẹdiduọ. Edi mbiomo mbufo ndin̄wam nditọ mbufo ẹka iso ẹsan̄a ke urụk emi tutu mmọ ẹkponi ẹkabade ikpọ owo.

Ẹmekeme ndidọhọ ke enem nditetịn̄. Ih, imọfiọk ke emi idịghe ifia ubọk kiet. Ekeme ndidi ekpri eyeneren mbufo emi ekesiyomode ikọ nte inịm imaha-ma aba nditịn̄ ikọ ye mbufo ke emi ama okokpon mi. N̄kpọ nte isua ifan̄ ko ke edem, ekeme ndidi ekpri eyenan̄wan mbufo ekesiyoyom ndisan̄a ye mbufo n̄wọrọ, edi idahaemi edikokop bụt ndisan̄a ye mbufo; iyomke-yom mme owo ẹkụt nte imọ isan̄ade ye ete ye eka imọ!

Kpa ye oro, inaha ẹkere ke mmimọ ikemeke ndise mban̄a mme ukpụhọde emi. Mbufo ẹmenyene ebiet emi ẹkemede ndibọ ifiọk oro ekemede ndinọ mbufo ye eyen mbufo eti ndausụn̄. Bible, kpa Ikọ Abasi edi ebiet oro, ndien enye ekeme ndinam mbufo ẹnyene ọniọn̄.

Ẹtịm Mme Mbụme Oro N̄kparawa Owo Ẹbụpde—Mme Ibọrọ Oro Ẹnyenede Ufọn, Eboho 2, man an̄wam eyen mbufo etịm ekere aban̄a se N̄wed Abasi etịn̄de. Ẹse ‘Se Isịnede’ ke page 4 ye 5 man ẹfiọk nsio nsio ibuotikọ oro ẹnemede ke n̄wed emi. Edi enye ọdọn̄ọ n̄kpọ akan oro. Kere ban̄a mme n̄kpọ emi:

(1) Ẹwet n̄wed emi ke ido nneme. Ke ediwak itie ke n̄wed emi, ẹyebụp eyen mbufo nsio nsio mbụme ẹnyụn̄ ẹnọ enye ifet nditịn̄ ekikere esie. Ke uwụtn̄kpọ, ekebe oro ẹkotde “Se Ndinamde ke Ini Mme Uke Mi Ẹyomde Ntiene Nnam Se Mîfọnke,” emi odude ke page 132 ye 133 ayan̄wam eyen mbufo ekere aban̄a mme mfịna oro enye esisobode onyụn̄ ewet se  enye edinamde. Ke adianade do, kiet kiet ke otu ikpehe usụkkiet oro ẹdude ke n̄wed emi etre ye page oro ẹkotde “Se N̄wetde Nnịm,” emi eyen mbufo ekemede ndiwet se enye ekerede aban̄a se ẹnemede ke ikpehe oro.

(2) N̄wed emi esịn udọn̄ ọnọ eyen esinyene nneme ye ete ye eka esie. Ke uwụtn̄kpọ, page 63 ye 64 ẹnyene ekebe emi ibuotikọ edide “Ntọtọn̄ọ Didie Nneme Oro Aban̄ade Idan̄ ye Papa m̀mê Mama?” N̄ko-n̄ko, ke utịt ibuot kiet kiet, ekebe odu emi ẹkotde “Afo Ekere Didie?” Ke adianade ye edida enye nte ekebe ndụn̄ọde, mme ubon ẹkeme ndineme mme mbụme oro ẹdude ke ekebe emi ọtọkiet. Ibuot kiet kiet ẹnyene n̄ko ikpehe oro ẹkotde “Se Ndinamde,” ndien akpatre n̄kpọ ke ekebe emi, “Se ndibụpde ete ye eka mi mban̄a n̄kpọ emi edi . . .” esịn udọn̄ ọnọ eyen ewet mbụme. Emi ayanam mme uyen ẹsika ẹbịne ete ye eka mmọ ẹkebọ nti item nte mmọ ẹsụk ẹkponde ẹkabade ikpọ owo.

Edi ẹkpeme: Ẹkûdomo ndisise se nditọ mbufo ẹwetde ke n̄wed mmọ sia emi idiyakke mmọ ẹwet nnennen nte etiede mmọ ke idem. Nte ini akade, mmọ ẹkeme ndisian mbufo se mmọ ẹkewetde.

Ẹbọ n̄wed emi, ẹnyụn̄ ẹnen̄ede ẹmehe ye enye. Ke ini ẹkotde, ẹdomo nditi nte ekesitiede mbufo ke idem, mme ndudue oro ẹkesinamde, ye editịmede esịt oro ẹkesikopde nte ẹkesụk ẹkponde ẹkabade ikpọ owo. Ke ini odotde, ẹtịn̄ mme n̄kpọ emi ẹkewọrọde mbufo ẹnọ nditọ mbufo. Oro ayanam mmọ ẹsima nditịn̄ mfịna mmọ nnọ mbufo. Ke ini mmọ ẹtịn̄de ikọ, ẹkpan̄ utọn̄! Edieke etiede nte ukeme oro mbufo ẹsịnde ndineme nneme ye mmọ iwọrọke usụn̄, ẹkûyak idem emem mbufo. Idem ọkpọkọm etie nte nditọ mbufo idaha item mbufo ke n̄kpọ, ẹfiọk ẹte ke nditọwọn̄ ẹsima item ete ye eka mmọ ẹkan eke mme uke mmọ.

Imenem esịt ndinọ mbufo ye nditọ mbufo n̄wed emi ẹdade Bible ẹwet mi, ndien ibọn̄ akam ite enye enen̄ede enyene ufọn ọnọ ubon mbufo.

Mme Andisio