Owo emi osụhọrede idem isitan̄ke idem inyụn̄ ikereke ke imedi n̄kpọ ikan mbon en̄wen. Sia mîdụhe eke ọfọnde ama, owo ekededi emi osụhọrede idem ekpenyene ndifiọk ke odu n̄kpọ emi imọ mîdiọn̄ọke ndinam.

Moses ikayakke odudu oro ẹkenọde enye okpon enye ibuot. Ẹma ẹnọnọ owo ekpri odudu, ini oro ndien ke ẹsidiọn̄ọ m̀mê enye osụhọde idem m̀mê isụhọkede. Ewet n̄wed kiet emi ekerede Robert G. Ingersoll ọdọhọ ete: “Ediwak owo ẹkeme ndiyọ afanikọn̄. Edi edieke oyomde ndifiọk se owo enen̄erede edi, nọ enye odudu.” Moses ama enịm ata eti uwụtn̄kpọ ke ndisụhọde idem. Didie?

Ẹma ẹnọ Moses akwa odudu ke ini Jehovah ọkọdọhọde enye ada Israel usụn̄. Edi odudu emi ikokponke enye ibuot. Ke uwụtn̄kpọ, se nte enye akanamde n̄kpọ ke ini ẹkebụpde enye n̄kpọ ẹban̄a n̄kpọ-akpa. (Numbers 27:1-11) Emi ekedi ata akwa n̄kpọ sia se ededi emi Moses edibierede idikụreke ke ebe oro, edi eyebe esịm emana ini iso.

Moses akanam didie n̄kpọ? Ndi enye ama ekere ke sia imọ idide adausụn̄, ke imodot ndibiere n̄kpọ emi ke idem imọ? Sia edide Moses ama enen̄ede enyene ifiọk, ọdiọn̄ọ Jehovah, onyụn̄ ọdiọn̄ọ nte ẹsibierede ikọ nditọ Israel, ndi emi ama anam enye ekere ke imekeme ndibiere n̄kpọ emi ke idem imọ?

Owo ntan̄idem akpanam emi; edi Moses ikanamke. Bible ọdọhọ ete: “Moses emen ikọ mmọ aka iso Jehovah.” (Numbers 27:5) Kam kere ban̄a emi! Idem ke Moses ama akada nditọ Israel usụn̄ ke n̄kpọ nte isua 40, enye ikeberike edem ke ifiọk idemesie, edi ekeberi edem ke Jehovah. Emi enen̄ede owụt nte Moses okosụhọrede idem.

Moses ikekereke ke imọ ikpọn̄ ikpakama ukara. Esịt ama enem enye ke ini Jehovah akanamde mbon en̄wen ẹtiene enye ẹnam n̄kpọ nte mme prọfet. (Numbers 11:24-29) Ke ini ete an̄wan esie ọkọdọhọde enye ayak ndusụk utom emi enye ekesinamde ọnọ mbon en̄wen, Moses ama osụhọde idem anam emi. (Exodus 18:13-24) Ke ini idem mîkememke enye kan̄a, enye ama ọdọhọ Jehovah emek owo emi edidade itie imọ mbemiso imọ ikpa. Ke ini Jehovah ekemekde Joshua ndida itie Moses, enye Moses ama enen̄ede an̄wam Joshua onyụn̄ ọdọhọ nditọ Israel ẹkop uyo Joshua tutu ẹkedụk Isọn̄ Un̄wọn̄ọ. (Numbers 27:15-18; Deuteronomy 31:3-6; 34:7) Ke akpanikọ, Moses akada utom oro Abasi ọkọnọde enye ete ada nditọ Israel usụn̄ man mmọ ẹkpono Abasi ke ata akpan utom. Edi enye ikedehedei ida odudu esie emi ikara mme owo.

Ikpanaha iyak odudu oro ẹnọde nnyịn, m̀mê se ikemede ndinam okpon nnyịn ibuot. Ti ete edieke iyomde Jehovah aka iso ada nnyịn anam utom esie, ọwọrọ ana isụhọde idem inamke n̄kpọ m̀mê nso ke ikeme ndinam. (1 Samuel 15:17) Edieke inen̄erede isụhọde idem, iyodomo ndinam item ọniọn̄ emi odude ke Bible mi: “Buọt idem ye Jehovah ke ofụri esịt fo kûnyụn̄ uberi edem ke asian fo.”—Mme N̄ke 3:5, 6.

Moses ekpep nnyịn n̄ko ete ikûda idem ke n̄kpọ ukaha ke ntak emi idide n̄kpọ m̀mê ke ntak odudu emi ẹnọde nnyịn.

Ndi nnyịn ikpepke n̄kpọ ito nsụhọdeidem Moses? Imekpep ekese! Edieke inen̄erede isụhọde idem, iyanam uwem enem mme owo, mmọ ẹyenyụn̄ ẹma nnyịn. Edi se ikande oro edi nte ke Jehovah Abasi ayama nnyịn sia enye ke idemesie osụhọde idem. (Psalm 18:35) “Abasi ọbọbiọn̄ọ mbon ntan̄idem, edi enye ọnọ mbon nsụhọdeidem mfọnido eke owo mîdotke.” (1 Peter 5:5) Emi edi ata akpan ntak emi akpanamde isụhọde idem nte Moses!