Yak Utom Edinam Mbet Adat Fi Esịt
Yak Utom Edinam Mbet Adat Fi Esịt
“Mmọdo ẹka ẹkenam mme owo . . . ẹdi mbet mi.”—MATT. 28:19.
1-3. (a) Esitie ediwak owo didie ke idem ke ini mmọ ẹkpepde mme owo Bible? (b) Mme mbụme ewe ke idibọrọ idahaemi?
“MMEKPEP Bible ye ubon kiet emi ẹtode Pakistan ke ọfiọn̄ iba ye ubak idahaemi. Ufọn idụhe nditetịn̄, nnyịn ididi ufan. Mmọn̄eyet asiaha mi ke enyịn ke ini ntide ke mmọ ẹmọn̄ ẹfiak ẹnyọn̄ọ Pakistan. Idịghe unyọn̄ mmọ kpọt anam mmọn̄eyet asiaha mi ke enyịn, edi idatesịt oro n̄kopde ke ndikekpep mmọ n̄kpọ mban̄a Jehovah etiene asiaha mi mmọn̄eyet.” Eyenete nnyịn an̄wan emi anamde utom ye otu oro ẹsisemde usem Hindi ke United States ekewet emi.
2 Ndi akanam emenyene utọ idatesịt oro eyenete nnyịn emi ekenyenede ke ndikpep owo Bible? Jesus ye mme mbet esie ẹma ẹnen̄ede ẹkop idatesịt ke utom edinam mbet. Ke ini mbet 70 emi Jesus ọkọnọde ukpep ẹkenyọn̄ọde ẹditịn̄ nte ukwọrọikọ ekenemde, Jesus ke idemesie ama “okop idatesịt etieti.” (Luke 10:17-21) Kpasụk ntre, ediwak owo ẹsikop idatesịt ndinam mme mbet. Ke akpanikọ, ke 2007, ifịk ifịk mme asuanetop oro ẹnamde utom emi ye idatesịt ẹma ẹnịm n̄kpọ nte ukpepn̄kpọ Bible miliọn itiokiet ye ubak kpukpru ọfiọn̄ ke ẹbaharede ukem ukem.
3 Nte ededi, ndusụk mme asuanetop isinịmke ukpepn̄kpọ Bible. Mbon eken inịmke ke ndondo emi. Nso mfịna ke nnyịn ikeme ndisobo nte idomode ndinịm ukpepn̄kpọ Bible? Didie ke ikeme ndikan mmọ? Ndien nso utịp ke idibọ ke ini inamde kpukpru se ikemede man inịm ewụhọ Jesus emi: “Ẹka ẹkenam mme owo . . . ẹdi mbet mi”?—Matt. 28:19.
Mme Mfịna Oro Ẹkemede Ndibiat Idatesịt Nnyịn
4, 5. (a) Didie ke mme owo ẹsinam n̄kpọ ẹban̄a eti mbụk ke ndusụk idụt? (b) Nso mfịna ke mme asuanetop ẹsisobo ke ndusụk ebiet?
4 Mme owo ẹsisọsọp ẹbọ mme n̄wed nnyịn ke ndusụk ebiet ẹnyụn̄ ẹdọhọ ikpep mmimọ Bible. Ebe ye n̄wan emi ẹtode Australia, emi ẹkenamde utom ukwọrọikọ esisịt ini ke Zambia ẹkewet ẹte: “Se isikopde iban̄a Zambia edi ata akpanikọ. Ukwọrọikọ enem ke Zambia ebe nde. Ukwọrọikọ efak edi etịp atua! Mme owo ẹsikam ẹdi ẹbịne nnyịn ẹte ikwọrọ ikọ inọ mmimọ. Ndusụk mmọ ẹsibụp m̀mê imenyene magazine.” Ke isua kiet ke ndondo emi, nditọete nnyịn ke Zambia ẹma ẹnịm se iwakde ibe ukpepn̄kpọ Bible 200,000—oro edi, owo kiet ama enịm n̄kpọ nte ukpepn̄kpọ Bible kiet ye ubak, ke ẹbaharede ukem ukem.
5 Nte ededi, ke ndusụk ebiet, mme asuanetop isikemeke ndinịm n̄wed ye ukpepn̄kpọ Bible kpukpru ini. Ntak-a? Mme owo isiwakke ndidu ke ufọk ke ini mme asuanetop ẹkade ufọk mmọ, ndien mbon oro ẹsidude ke ufọk inyeneke udọn̄ ke ido ukpono. Ekeme ndidi ubon mmọ ikesikaha ufọkabasi, onyụn̄ ekeme ndidi mmọ ẹkop idiọkesịt ẹban̄a mbubịk oro ẹyọhọde nsunsu ido ukpono. Mme adaiso ido ukpono ẹfiomo ẹnyụn̄ ẹsuan ikọt mmọ nte erọn̄ eke mînyeneke andikpeme. (Matt. 9:36) Do, an̄wan̄a ntak emi mme utọ owo oro mîsimaha nneme a-Bible.
6. Nso mfịna ke ndusụk owo ẹsisobo?
6 Enyene n̄kpọ en̄wen oro esibiatde idatesịt ndusụk mme anam-akpanikọ asuanetop. Okposụkedi emi mmọ ẹkesinen̄erede ẹsịn idem ke utom edinam mbet ke akpa, udọn̄ọ m̀mê usọn̄ ọbọ mmọ odudu idahaemi. Kere n̄ko ban̄a ntaha ekikere oro nnyịn isinyenede, emi ekemede ndinam idem emem nnyịn. Ke uwụtn̄kpọ, ndi emesikere ke udukemeke ndikpep owo Bible? Ekeme nditie fi ke idem nte eketiede Moses ke ini Jehovah ọkọdọn̄de enye utom ọnọ Pharaoh. Moses ọkọdọhọ Abasi ete: “Mbọk Ọbọn̄ mi, ami ndịghe owo udọn-ikọ, akananam, ye idem ini emi afo ọdọhọde ye owo fo.” (Ex. 4:10) N̄kpọ en̄wen oro esinamde idem emem nnyịn edi ndikere ke nnyịn idikwe unen. Imekeme ndikere ke owo oro ibọde ufen ikpep Bible idikabakede idi mbet Christ sia nnyịn mîtịmke ifiọk ndikpep owo n̄kpọ. Emi ekeme ndinam ibe owo oro ikpekpepde n̄kpọ mbak se ikekerede editịbe. Nso ke ikpanam iban̄a se isụk inemede emi?
Tịm Esịt Fo
7. Nso ikanam Jesus ọkwọrọ ikọ?
7 Akpa n̄kpọ oro inyenede ndinam edi nditịm esịt nnyịn. Jesus ọkọdọhọ ete: “Oto ke uyọhọ esịt inua etịn̄ ikọ.” (Luke 6:45) Mbọm akanam Jesus ọkwọrọ ikọ ọnọ mme owo. Ke uwụtn̄kpọ, ke ini enye okokụtde idiọk idaha eke spirit ikọt mmọ, ‘mbọm ama anam enye.’ Ntak edi oro enye ọkọdọhọde mbet esie ete: “Idọk okpon, . . . ẹben̄e Enyene idọk ẹte osio mme anamutom ọnọ ẹdi ke idọk esie.”—Matt. 9:36-38.
8. (a) Nso ke ikpekere iban̄a? (b) Nso ke ikeme ndikpep nto ikọ eyen ukpepn̄kpọ Bible kiet?
8 Ke ini iwọrọde an̄wautom, ọkpọfọn inen̄ede ifiọk ke edieke owo mîkpakadaha ini ikpep nnyịn Bible, ke nnyịn ikpenyeneke kpukpru ufọn oro inyenede idahaemi. Kere n̄ko ban̄a mbon oro idisobode ke an̄wautom, ye nte etop oro ikwọrọde edinamde ufọn ọnọ mmọ. Kop se n̄wan kiet ekewetde ọnọ n̄kọk itieutom Mme Ntiense Jehovah ke idụt mmọ: “Esịt enen̄ede enem mi ndinyene Mme Ntiense oro ẹsidide ẹdikpep mi Bible ke ufọk. Mmọfiọk ke mmesinam uwem enen̄ede ọsọn̄ ye mmọ ndusụk ini ke ndibụp ekese mbụme nnyụn̄ nnam mmọ ẹtie ẹbịghi ẹkan nte ẹkekerede. Edi mmọ ẹsinyene ime ẹnyụn̄ ẹben̄e idem ndikpep mi se mmọ ẹfiọkde. Mmenen̄ede n̄kọm Jehovah ye Jesus ke ndikada utọ nti owo emi ndi edem mi.”
9. Jesus ekenen̄ede etịn̄ enyịn ke nso, ndien didie ke nnyịn ikeme ndikpebe enye?
9 Nte ededi, idịghe kpukpru owo ẹkema nditiene Jesus. (Matt. 23:37) Ndusụk owo ẹma ẹtiene Jesus ke esisịt ini, ekem inyịmeke aba se enye ekekpepde, “inyụn̄ isan̄ake aba ye enye.” (John 6:66) Edi Jesus ikayakke oro anam enye ekere ke ukwọrọikọ imọ ikenyeneke ufọn. Okposụkedi emi ekese mbon oro Jesus ọkọkwọrọde ikọ ọnọ mîkakabakede idi mbet esie, enye ama aka iso ke nti utom esie. Enye ama okụt ke in̄wan̄ eke spirit adat se ẹkpen̄ede, onyụn̄ enen̄ede okop inemesịt nditiene mbuana ke ukpen̄e oro. (Kot John 4:35, 36.) Utu ke ndikere kpukpru ini mban̄a in̄wan̄ oro mîmaha ndin̄wụm mfri, ndi nnyịn n̄ko imekeme nditịn̄ enyịn ke mbon oro ẹtiede nte ke ẹkeme ndin̄wụm mfri ke efakutom nnyịn? Yak ise nte ikemede ndinyene utọ edu emi!
Ọtọ N̄kpọn̄ Oyom Mbọ
10, 11. Nso ke ikpanam man ika iso ikop idatesịt ke utom ukwọrọikọ?
10 Efịk ẹdọhọ ke ọtọ n̄kpọn̄ oyom mbọ. Kpasụk ntre, uduak ukwọrọikọ nnyịn ekpedi nditọn̄ọ ukpepn̄kpọ Bible. Nso ndien ke ikpanam edieke isiwọrọde an̄wautom kpukpru ini edi iwakke ndikụt mme owo ke ufọk m̀mê ikemeke aba ndisobo mbon mfiakn̄ka nnyịn ke ufọk? Emi ekeme ndinam idem emem owo. Ndi ekpenyene nditre ukwọrọikọ eke ufọk ke ufọk ke ntak emi? Baba! Ukwọrọikọ eke ufọk ke ufọk edi mfọnn̄kan usụn̄ oro idade ke anyan ini idahaemi isobo ediwak owo ke ufọk.
11 Nte ededi, man aka iso okop idatesịt utom ukwọrọikọ, ana okpụhọde usụn̄ oro esikwọrọde ikọ. Ke uwụtn̄kpọ, ndi akanam omodomo ndikwọrọ ikọ nnọ mme owo ke efak m̀mê ke itieutom mmọ? Ndi emekeme ndinyene nneme ye mme owo ke urụk ukopikọ mîdịghe ọbọ nọmba mbon oro ọkwọrọde ikọ ọnọ man ekeme ndifiak nnyene nneme ye mmọ ke urụk ukopikọ? Edieke enyenede ime onyụn̄ okpụhọrede usụn̄ ukwọrọikọ fo, oyosobo ye ediwak mbon oro ẹdimade ndikop etop Obio Ubọn̄, ndien emi iditreke ndidat fi esịt.
Ke Ini Mme Owo Mînyeneke Udọn̄
12. Nso ke ikpanam edieke ediwak owo ke efakutom nnyịn mînyeneke udọn̄?
12 Nso ke akpanam edieke ediwak owo ke efakutom mbufo mînyeneke udọn̄ ke ido ukpono? Ndi emekeme ndikpụhọde usụn̄ oro esikwọrọde ikọ man edemede udọn̄ mmọ? Apostle Paul ekewet ọnọ mme Christian ke Corinth ete: “Mma n̄kabade ntie nte owo Jew nnọ mme Jew . . . Ye mmọ oro mînyeneke ibet mma n̄kabade ntie nte owo eke mînyeneke ibet, okposụkedi mmennanake ibet Abasi.” Nso ikedi uduak Paul? Paul ke idemesie ọbọrọ ete: “Mma n̄kabade ndi kpukpru n̄kpọ nnọ kpukpru orụk owo, man ke usụn̄ ekededi n̄kpanyan̄a ndusụk mmọ.” (1 Cor. 9:20-22) Ndi nnyịn n̄ko imekeme ndineme mme n̄kpọ oro nnyịn ifiọkde ke ẹyedemede mme owo udọn̄ ke efakutom nnyịn? Ediwak mbon oro mîsikaha ufọkabasi ẹyom nte uwem ubon mmọ ekpenemde. Ekeme n̄ko ndidi mmọ ke ẹkere se idide ufọn uwem. Ndi imekeme ndikwọrọ etop Obio Ubọn̄ ke usụn̄ oro edinemde mmọ ndikop?
13, 14. Nso ke ikpanam man idọdiọn̄ ikop idatesịt ke utom edinam mbet?
13 Ata ediwak mme asuanetop ẹnam n̄kpọ oro enen̄erede ọnọ mmọ idatesịt ke utom edinam mbet, idem ke mme ebiet oro ediwak owo mînyeneke udọn̄. Nso ke mmọ ẹnam? Edi ndikpep esen usem. Ebe ye n̄wan oro ẹbede isua 60 ẹma ẹkụt ke ata ediwak nditọ ufọkn̄wed China ẹdụn̄ọ ke efakutom mmimọ. Ebe ọdọhọ ete: “Emi ama anam ikpep usem Chinese. Okposụkedi emi akanade ibiat ini kpukpru usen ikpep usem emi, nnyịn ima ikop idatesịt ke akpatre, sia emi ama anam ikeme ndinyene ediwak nditọ ukpepn̄kpọ Bible oro ẹtode China.”
14 Idem edieke mûkemeke ndikpep esen usem, afo emekeme ndida ekpri n̄wed nnyịn oro Good News for People of All Nations n̄kwọrọ ikọ ke ini osobode ye owo oro esemde usem en̄wen. Emekeme n̄ko ndibọ n̄wed ke usem owo oro afo osobode n̄kọnọ enye. Edi akpanikọ ke esinen̄ede oyom ini ye ukeme mbemiso owo ekemede ndineme nneme ye mbon oro ẹsemde usem en̄wen, oro usụn̄ uwem mmọ mîdịghe ukem ye eke nnyịn. Edi kûfre se Ikọ Abasi etịn̄de ete: “Owo eke ọtọde ke ntatubọk ọyọdọk uwak uwak n̄ko.”—2 Cor. 9:6.
Edi Utom Ofụri Esop
15, 16. (a) Ntak emi idọhọde ke utom edinam mbet edi utom ofụri esop? (b) Didie ke n̄kani owo ẹn̄wam ke afan̄ emi?
15 Nte ededi, utom edinam mbet idịghe utom owo kiet. Ofụri esop ẹsitiene ẹnam owo kiet kiet akabade edi mbet. Ntak idọhọde ntre? Jesus ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:35) Ke nditịm ntịn̄, ke ini nditọ ukpepn̄kpọ Bible ẹdụkde mme mbono esop, ima oro mmọ ẹsikụtde ke mme mbono esop emi esinen̄ede otụk mmọ. Eyen ukpepn̄kpọ Bible kiet ekewet ete: “Se isinamde mbono esop enen̄ede enem mi edi nte ẹsidarade mi ẹnyụn̄ ẹdade mi nte owo!” Jesus ọkọdọhọ ke ata mbonufọk ẹkeme ndibiọn̄ọ mme anditiene imọ. (Kot Matthew 10:35-37.) Edi enye ama ọn̄wọn̄ọ ọnọ mbet esie ete ke mmọ ẹyenyene ata ediwak “nditọeka iren ye nditọeka iban ye eka ye nditọ” ke esịt esop Abasi.—Mark 10:30.
16 Nditọete nnyịn iren ye iban oro ẹma ẹkedụk idem n̄kani owo ẹsinen̄ede ẹn̄wam nditọ ukpepn̄kpọ Bible emi ẹkọri. Didie? Idem ọkpọkọm ndusụk n̄kani owo ikemeke ndinịm aba ukpepn̄kpọ Bible ke idemmọ, nti ibọrọ oro mmọ ẹsinọde ke mme mbono esop ẹsisọn̄ọ mbuọtidem ofụri owo. Ofụri isua oro mmọ ẹsan̄ade ke “usụn̄ eti ido” ọnọ esop Abasi uku onyụn̄ anam mbon oro ẹnyenede eti esịt ẹdụk esop.—N̄ke 16:31.
Kûyak Idem Enyek Fi
17. Nso ke ikpanam edieke ikerede ke nnyịn ikemeke ndinam mme mbet?
17 Nso ke akpanam edieke ekerede ke imọ idikemeke ndinịm ukpepn̄kpọ Bible? Ti ete ke Jehovah ama an̄wam Moses ke ndinọ enye edisana spirit ye owo utom, oro edi, Aaron eyeneka esie. (Ex. 4:10-17) Jesus ama ọn̄wọn̄ọ ke edisana spirit Abasi ọyọnọ nnyịn ibetedem ke utom edinam mbet. (Utom 1:8) Ke adianade do, Jesus akanam mme ọkwọrọ ikọ ẹsan̄a iba iba. (Luke 10:1) Mmọdo, edieke ọsọn̄de fi ndinịm ukpepn̄kpọ Bible, bọn̄ akam ben̄e edisana spirit Abasi man enyene ọniọn̄, nyụn̄ san̄a ye owo oro edinamde enyene uko, kpa asuanetop emi afo ekemede ndikpep n̄kpọ nto. Mbuọtidem nnyịn etetịm ọsọn̄ ke ini itide ke Jehovah emek ndida mme usụhọde owo, m̀mê se ererimbot ẹbatde nte “mmeme n̄kpọ” nnam akwa utom emi.—1 Cor. 1:26-29.
18. Nso ke ikpanam edieke ikerede ke nnyịn idikemeke ndin̄wam eyen ukpepn̄kpọ Bible akabade edi mbet?
18 Nso n̄ko ke ikpanam edieke ikerede ke nnyịn idikemeke ndin̄wam eyen ukpepn̄kpọ Bible akabade edi mbet? Nte ededi, ana iti ke utom edinam mbet itiehe nte utemudia, emi edide ekpenem, ẹte ke anditem ọfiọk utemudia, mînemke, ẹte ke enye ifiọkke utemudia. Utu ke oro, owo ita ke nsụhọde n̄kaha ẹsinam mbet kiet. Jehovah anam akakan utom ke otu emi, ke ndidụri owo nnọ idemesie. (John 6:44) Nnyịn oro ikpepde mmọ n̄kpọ imesidiana ye nditọete eken ke esop ida usọ unọ ukpep nnyịn in̄wam eyen ukpepn̄kpọ ekededi anam n̄kọri. (Kot 2 Timothy 2:15.) Eyen ukpepn̄kpọ enyene utom n̄ko, oro edi, ndida se enye ekpepde nsịn ke edinam. (Matt. 7:24-27) Imọfiọk ke isinemke owo esịt ndikụt nte eyen ukpepn̄kpọ etrede ndikpep Bible. Nnyịn imodori enyịn ke nditọ ukpepn̄kpọ nnyịn idinamke oro, edi edieke emi etịbede, fiọk ete ke owo kiet kiet “ayanam ibat aban̄a idemesie ọnọ Abasi.”—Rome 14:12.
Nso Ididi Utịp?
19-21. (a) Nso ufọn ke ibọ edieke inịmde ukpepn̄kpọ Bible? (b) Jehovah ese didie kpukpru owo oro ẹsikade ukwọrọikọ?
19 Ndinịm mme ukpepn̄kpọ Bible anam nnyịn isịn idem ibem iso iyom Obio Ubọn̄. Emi esinyụn̄ anam akpanikọ enen̄ede odụk nnyịn esịt. Ntak emi idọhọde ntre? Asiakusụn̄ kiet emi ekerede Barak ọbọrọ mbụme emi ntem: “Ndinịm ukpepn̄kpọ Bible anam fi ke idemfo edi eti eyen ukpepn̄kpọ Bible. Mmesikụt ke oyom nnen̄ede mfiọk ke se nnịmde edi ata akpanikọ man n̄keme ndikpep owo en̄wen edifọn edifọn.”
20 Edieke mûkemeke ndinịm ukpepn̄kpọ Bible ye owo, ndi emekere ke utom fo iwọrọke n̄kpọ ke iso Abasi? Mbọk kûdedei unyene utọ ntaha ekikere oro! Jehovah enen̄ede ama ukeme oro isịnde nditoro enye. Owo ekededi oro esitienede aka ukwọrọikọ edi “nsan̄autom Abasi.” Edi ukpepn̄kpọ Bible esinam owo ọdọdiọn̄ okop idatesịt ke ini ikụtde nte Abasi anamde n̄kpasịp oro ikọtọde ọkọri. (1 Cor. 3:6, 9) Asiakusụn̄ emi ekerede Amy ọdọhọ ete: “Ke ini nditọ ukpepn̄kpọ Bible ẹnamde n̄kọri, emi ayanam fi enen̄ede ọkọm Jehovah ke ndida fi nnọ owo utịbe utịbe enọ—oro edi, ndinam owo ọfiọk Jehovah onyụn̄ enyene idotenyịn nsinsi uwem.”
21 Ndisịn ofụri ukeme ntọn̄ọ ukpepn̄kpọ Bible ayanam nnyịn ika iso isịn idem ke utom Abasi onyụn̄ anam inen̄ede inyene idotenyịn edibọhọ ndụk obufa ererimbot. Jehovah ekeme n̄ko ndin̄wam nnyịn in̄wam mbon oro ẹkopde uyo nnyịn ẹtiene ẹnyene edinyan̄a. (Kot 1 Timothy 4:16.) Nso n̄kpọ idatesịt ke emi ekpedi ntem!
Nte Afo Emeti?
• Nso ikeme ndibiọn̄ọ owo ndinịm ukpepn̄kpọ Bible?
• Nso ke ikpanam edieke ediwak owo ke efakutom nnyịn mînyeneke udọn̄?
• Nso ufọn ke ibọ edieke inịmde ukpepn̄kpọ Bible?
[Mme Mbụme Ukpepn̄kpọ]
[Mme ndise ke page 9]
Ndi emesikpụhọde usụn̄ ukwọrọikọ fo man ekeme ndisobo ye mbon oro ẹnyenede eti esịt?