Mme Mbụme Ẹtode Mme Andikot

Apostle Paul ọkọdọhọ ke “ẹyenyan̄a ofụri Israel.” (Rome 11:26) Ndi ikọ esie ọkọwọrọ ke eyenyene ini oro kpukpru mme Jew ẹdikabarede ẹdi Christian?

Baba, idịghe se ikọ Paul ọkọwọrọde edi oro. Idụt Israel, kpa nditọ nditọ Abraham, ikenyịmeke Jesus nte Messiah. Ndien ke mme isua oro ẹketienede, ke Jesus ama akakpa, ama ana in̄wan̄-in̄wan̄ ke kpukpru mme Jew ikemeke ndikabade ndi Christian. Kpa ye oro, Paul eketịn̄ akpanikọ ke “ẹyenyan̄a ofụri Israel.” Didie?

Jesus ọkọdọhọ mme adaiso Ido Ukpono Mme Jew eyo esie ete: “Ẹyebọ mbufo obio ubọn̄ Abasi ẹnyụn̄ ẹyak enye ẹnọ idụt oro on̄wụmde mfri esie.” (Matt. 21:43) Sia ofụri idụt Israel ẹkesịnde Jesus, Jehovah ekenyene ndiwọn̄ọde ntịn̄enyịn esie nnọ obufa idụt, kpa idụt eke spirit. Paul okokot idụt emi “Israel Abasi.”—Gal. 6:16.

Mme itien̄wed en̄wen ke N̄wed Abasi Christian Usem Greek ẹwụt ke mme Christian 144,000 oro ẹyetde aran ke spirit ẹnam “Israel Abasi” emi. (Rome 8:15-17; Edi. 7:4) Ediyarade 5:9, 10 ọsọn̄ọ ke mbon oro mîdịghe mme Jew ẹyesịne ke otu emi, koro enye owụt ke mme Christian oro ẹyetde aran ẹto “kpukpru esien ye usem ye obio ye idụt.” Ẹkemek mbon idụt Israel eke spirit akpan akpan man ẹdi “obio ubọn̄ ye mme oku . . . , ndien mmọ ẹyekara isọn̄ nte ndidem.” Okposụkedi emi Jehovah ekesịnde Israel nte san̄asan̄a idụt, mme owo ẹkeme ndiwọrọ do nditie ke emem ye enye. Mme apostle ye ediwak Christian eken ke akpa isua ikie ẹketo do ẹwọrọ. Edi, ukem nte kpukpru owo eken, ẹkenyene ndida iyịp Jesus Christ ndep utọ mme Jew oro.—1 Tim. 2:5, 6; Heb. 2:9; 1 Pet. 1:17-19.

Se idude edi nte ke ata ediwak ke otu ata mme Jew ke akpa isua ndikataba ifet editiene Jesus n̄kara ikọbiọn̄ọke uduak Abasi ndisu. Tutu amama oro ikpekemeke nditịbe, koro Jehovah ama ada prọfet esie etịn̄ ete: “Kpa ntre ke ikọ mi emi ọwọrọde mi ke inua editie: idifiakke itiene mi ubọk-ubọk, tutu enye anam se mmade, onyụn̄ okụt unen ke utom emi ndọn̄de enye.”—Isa. 55:11.

Oro edi ntre ye uduak Abasi kaban̄a ediyari owo 144,000 ntinya man ẹtiene Eyen esie ẹkara ke heaven. Bible owụt ke Abasi eyeyet n̄kemn̄kem owo 144,000 aran. Ọkpọkọm kiet idiwọrọke!—Edi. 14:1-5.

Ntem, ke ini Paul ekewetde ke “ẹyenyan̄a ofụri Israel,” enye iketịn̄ke iban̄a kpukpru mme Jew ndikabade ndi Christian. Utu ke oro, ikọ esie ọkọwọrọ ke uduak Abasi kaban̄a nditọ Israel eke spirit 144,000 ndikara ye Jesus Christ Eyen Imọ ke heaven, oyosu. Ke edikem ini Abasi, ẹyenyan̄a n̄kemn̄kem ibat “ofụri Israel,” oro edi, “Israel Abasi”—mmọ ẹyenyụn̄ ẹkara nte ndidem ye mme oku ke Obio Ubọn̄ Messiah.—Eph. 2:8.

[Mme ndise ke page 28]

Mbon oro ẹyetde aran ẹto “kpukpru esien ye usem ye obio ye idụt”