Unen Ndinyene Enyịn̄

KPUKPRU owo ẹnyene unen ndinyene enyịn̄. Ke Tahiti, ẹsikam ẹsio nsekeyen oro ẹtopde ẹduọk enyịn̄, emi owo mîkam idiọn̄ọke m̀mê anie edi ete m̀mê eka. Itieutom usịn owo enyịn̄ ke n̄wed esisio eyen oro ẹketopde ẹduọk enyịn̄ onyụn̄ ọnọ enye enyịn̄ ubon.

Edi, odu owo emi ndusụk owo ẹkerede ke ikpanaha enye enyene enyịn̄, kpa n̄kpọ emi kpukpru owo ẹnyenede unen ndinyene. Edi n̄kpọ n̄kpaidem ndifiọk ke owo emi akam edi “Ete, emi kpukpru ubon ke heaven ye ke isọn̄ ẹkerede enyịn̄ ẹnọ”! (Ephesus 3:14, 15) Kamse, ediwak owo imaha ndikot enyịn̄ Andibot nte ẹwetde ke Bible. Mmọ ẹkam ẹma ndikot enye “Abasi,” “Ọbọn̄,” m̀mê “Nsinsi Ete,” emi ẹdide sụk udorienyịn̄. Edi Abasi ekere didie? Andiwet psalm ọbọrọ mbụme oro ete: “Afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.”—Psalm 83:18.

Mbon Polynesia ẹkesituak ibuot ẹnọ nsio nsio abasi ke ini mme isụn̄utom N̄ka Isụn̄utom London ẹkedide ẹdibehe ke Tahiti ke ntọn̄ọ ntọn̄ọ ọyọhọ isua ikie 19. Mme abasi emi ẹma ẹnyene enyịn̄ mmọ, ndien mme akpan abasi emi ẹkekere Oro ye Taaroa. Man mme owo ẹfiọk ukpụhọde oro odude ke ufọt Abasi a-Bible ye mme abasi eken, mme isụn̄utom emi ikemen̄eke ndikot enyịn̄ Abasi kpukpru ini, nnyụn̄ n̄wọn̄ọde enye n̄wet Iehova ke usem Tahitian.

Mme owo ẹma ẹdinen̄ede ẹfiọk enyịn̄ emi ẹnyụn̄ ẹsida enye ẹneme nneme ẹnyụn̄ ẹsịn enye ke mme leta mmọ. Edidem Pomare II eke Tahiti, emi akakarade ke ntọn̄ọ ntọn̄ọ ọyọhọ isua ikie 19, ama esiwak ndisịn enyịn̄ Abasi ke mme ọkpọkpọ leta esie. Ẹkụt emi ke leta oro enye ekewetde ke Ikọmbakara, oro okụtde mi. Leta emi odu ke Itie Ubon N̄kpọeset Tahiti ye eke Mme Isuo Esie. Leta emi owụt ke mme owo ẹma ẹsima ndikot enyịn̄ Abasi ini oro. Ke adianade do, ọkpọkpọ enyịn̄ Abasi odu ediwak tọsịn itie ke akpa edikabade Bible usem Tahitian, emi ẹkekabarede ẹkụre ke 1835.

[Ndise ke page 32]

Edidem Pomare II

[Ebiet Ẹdade Ndise Ẹto ke page 32]

Edidem ye leta: Collection du Musée de Tahiti et de ses Îles, Punaauia, Tahiti