Mme Mbụme Ẹtode Mme Andikot

Ndi mme ikọ Stephen ke Utom 7:59 ẹwụt ke ẹkpenyene ndibọn̄ akam nnọ Jesus?

Utom 7:59 ọdọhọ ete: “Ndien mmọ ẹtọn̄ọ Stephen ke itiat, nte enye esemede okot Ọbọn̄, ete Ọbọn̄ Jesus, bọ [“spirit,” NW] mi.” Mme ikọ oro ẹmedemerede mme mbụme ke esịt ndusụk owo, sia Bible ọdọhọde ke Jehovah edi enye emi “okopde akam.” (Psalm 65:2) Ndi Stephen ekenen̄ede ọbọn̄ akam ọnọ Jesus? Edieke ekedide ntre, ndi emi owụt ke Jesus edi ukem ye Jehovah?

King James Version ọdọhọ ke Stephen “ekeseme okot Abasi.” Do, nte an̄wan̄ade, ediwak owo ẹsịm ukem ubiere oro Matthew Henry ewet n̄wed usiakikọ Bible ekesịmde, emi ọkọdọhọde ete: “Mi Stephen ọbọn̄ akam ọnọ Christ, ndien ana nnyịn inam ntre.” Nte ededi, ekikere oro inenke. Ntak-a?

N̄wed oro, Barnes’ Notes on the New Testament etịn̄ in̄wan̄-in̄wan̄ akpanikọ emi ete: “Ikọ oro Abasi idụhe ke akpasarade edikabade, ntre ikpakanaha enye odu ke edikabade oro. Enye idụhe ke [n̄kani uwetn̄kpọ] m̀mê edikabade eset ndomokiet.” Didie ke ikọ emi “Abasi” akasan̄a edidu ke ufan̄ikọ oro? Eyen ukpepn̄kpọ oro Abiel Abbot Livermore ọkọdọhọ ke emi “owụt nte mme akabade n̄wed ẹkemede ndida odudu idemmọ n̄kabade se mmọ ẹmade.” Mmọdo, ata ediwak edikabade eke eyomfịn ẹsio ikọ emi “Abasi” ẹfep ke ufan̄ikọ oro.

Nte ededi, ediwak edikabade ẹdọhọ ke Stephen “ọkọbọn̄ akam” ọnọ Jesus. Ndien ikọ idakisọn̄ New World Translation owụt ke ikọ emi ‘eseme okot’ ekeme n̄ko ndiwọrọ “ndiseme n̄kot Abasi nyom un̄wam; akam.” Ndi oro iwụtke ke Jesus edi Ata Ọkpọsọn̄ Abasi? Baba. Vine’s Expository Dictionary of Old and New Testament Words ọdọhọ ke idaha enye emi, akpasarade ikọ Greek emi, e·pi·ka·leʹo, ọwọrọ: “Ndiseme n̄kot, ndikot Abasi nyom un̄wam; . . . nditomo ubọk owo oro okopde odudu.” Ikọ emi ke Paul eketịn̄ ke ini enye ọkọdọhọde ete: “Mmotomo ubọk Caesar”! (Utom 25:12) Do, nte odotde, The New English Bible ọdọhọ ke Stephen ‘ekeseme okot’ Jesus.

Nso ikanam Stephen eseme okot Jesus? Nte Utom 7:55, 56 ọdọhọde, “Stephen ye uyọhọ Edisana Spirit owụk enyịn ese enyọn̄, okụt ubọn̄ Abasi, ye Jesus nte adade ke ubọk nnasia Abasi.” Nte ido edide, Stephen akpakanam eben̄e esie ọnọ Jehovah ebe ke enyịn̄ Jesus. Edi sia okokụtde Jesus oro ẹnamde eset ke n̄kukụt, nte an̄wan̄ade Stephen ama enyene ifụre ndiseme nnọ enye nnennen nnennen, ọdọhọde ete: “Ọbọn̄ Jesus, bọ [“spirit,” NW] mi.” Stephen ama ọfiọk ke ẹma ẹnọ Jesus odudu ndinam mme akpan̄kpa ẹset. (John 5:27-29) Ke ntre, enye ekeben̄e Jesus ekpeme spirit, m̀mê odudu uwem imọ, tutu esịm usen emi Enye edinamde imọ iset ikodu uwem unana n̄kpa ke heaven.

Nte ibio ibio ikọ Stephen emi owụt ke ẹkpenyene ndibọn̄ akam nnọ Jesus? N̄wan̄ansa-o. Ntak kiet edi, Stephen ama enen̄ede ọfiọk ke Jesus idịghe ukem ye Jehovah, koro mbụk oro ọdọhọ ke enye ama okụt nte Jesus “adade ke ubọk nnasia Abasi.” N̄ko, mme utọ n̄kpọ emi isiwakke nditịbe. N̄kukụre owo efen oro eketịn̄de ikọ ke ukem usụn̄ oro ye Jesus ekedi apostle John, emi eketịn̄de ikọ nnennen nnennen ye Jesus, ke ini okokụtde Enye ke n̄kukụt.—Ediyarade 22:16, 20.

Okposụkedi mme Christian mfịn ẹbọn̄de kpukpru akam mmọ ẹnọ Jehovah Abasi, mmọ n̄ko ẹnyene ọkpọsọn̄ mbuọtidem nte ke Jesus edi “ediset ye uwem.” (John 11:25) Ntre, ndibuọt idem ke ukeme oro Jesus enyenede ndinam mme anditiene enye ẹset ke n̄kpa ekeme ndin̄wam nnyụn̄ nsọn̄ọ nnyịn idem ke mme ini idomo, kpa nte ọkọsọn̄ọde Stephen.