Mme Mbụme Ẹtode Mme Andikot

Nso ikada itie ke ini n̄kpọntịbe oro ẹwetde ke Exodus 4:24-26, ndien uwem anie okodu ke itiendịk?

Moses ye Zipporah n̄wan esie, ye Gershom ye Eliezer nditọiren esie ẹkesan̄a ke usụn̄ ndika Egypt ke ini n̄kpọntịbe oro etienede mi akadade itie: “Edikem ke usụn̄ ke ebiet idan̄ ke okoneyo, Jehovah osobo ye enye, onyụn̄ oyom enye ndiwot. Ndien Zipporah ada ikwa itiat, esịbe eyen esie edụt efep, ada enịm enye ke ikpat, ete, Afo edi owo-ndọ iyịp mi. Ndien enye asana enye ayak: ndien enye (n̄wan) ọdọhọ, ete, Owo-ndọ iyịp, kaban̄a mbobi.” (Exodus 4:20, 24-26) Okposụkedi ubak udịmikọ emi mîtịmke in̄wan̄a, owo mînyụn̄ ikemeke nditịm mfiọk se enye ọwọrọde, N̄wed Abasi esịn un̄wana ke mme ufan̄ikọ emi.

Mbụk emi itịn̄ke in̄wan̄-in̄wan̄ m̀mê uwem anie okodu ke itiendịk. Nte ededi, owụt eti ibuot nnyịn ndibiere nte ke ikedịghe uwem Moses, koro Abasi ndikosụk ndọn̄ enye akada nditọ Israel ọwọrọ ke Egypt ekedi oro. (Exodus 3:10) Iwụtke ifiọk ndikere ke angel Abasi ekpekedịghe Moses uwem ke usụn̄ oro enye akakade ndinam utom oro. Ke ntre eyedi ekedi uwem kiet ke otu nditọiren esie. Ibet oro ẹkenọde Abraham ke mbemiso ẹban̄a edina mbobi ọkọdọhọ ete: “Ama edi owo edụt emi mîsịbeke enye edụt ifep, yak ẹsịbe ukpọn̄ oro ẹfep ke orụk esie; enye abiat ediomi mi.” (Genesis 17:14) Eyedi Moses ama efre ndinịm eyeneren esie mbobi, ke ntre angel Jehovah ama oyom ndiwot eyen oro.

Zipporah ekesịbe edụt eyeneren esie ada enịm ke ikpat anie ke ndidomo ndinen̄ede ndudue oro ẹkenamde? Angel Jehovah ama enyene odudu ndikpowot eyen oro owo mîkenịmke mbobi do. Do, nte owụtde ifiọk, eyedi Zipporah akada edụt oro enịm ke ikpat angel nte uyarade ndiwụt ke imọ ima inam se ediomi oro okoyomde.

Ikọ Zipporah oro “afo edi owo-ndọ iyịp mi” edi esen esen ikọ. Nso ke oro owụt aban̄a enye? Ke ndinam se ediomi mbobi oro okoyomde, Zipporah okowụt unyịme esie ndidu ke itie ebuana ediomi ye Jehovah. Ibet ediomi oro ẹkenamde ke ukperedem ye nditọ Israel ama owụt ete ke n̄kpọ oro aban̄ade itie ebuana ediomi, ẹkeme ndida Jehovah nte ebe ndien ẹda andidụk ediomi oro nte n̄wanndọ. (Jeremiah 31:32) Ntem, ke ndikot Jehovah (ebe ke angel oro akadade ke ibuot esie) “owo-ndọ iyịp,” etie nte Zipporah okowụt unyịme esie ndisụk idem nnọ ediomi oro. Eketie nte n̄kpọ eke enye ekenyịmede itie n̄wanndọ ke ediomi mbobi emi Jehovah Abasi eketiede nte ebendọ. Ke idaha ekededi, ke ntak ubiere esie ndisụk ibuot nnam se Abasi okoyomde, uwem eyeneren esie ikodụhe aba ke itiendịk.