“Ekpri” Amakabade Edi “Tọsịn”
“Ekpri” Amakabade Edi “Tọsịn”
“Ekpri ayakabade edi tọsịn, esisịt oyonyụn̄ akabade edi ọkpọsọn̄ idụt.”—ISAIAH 60:22.
1, 2. (a) Ntak emi ekịm ofụkde isọn̄ mfịn? (b) Didie ke un̄wana Jehovah aka iso ndiyama nnọ ikọt esie?
“EKỊM oyofụk ererimbot, ọkpọsọn̄ ekịm oyonyụn̄ ofụk mme idụt: edi Jehovah ayasiaha ọnọ fi, ẹyenyụn̄ ẹkụt ubọn̄ esie eke odorode fi.” (Isaiah 60:2) Mme ikọ ẹmi ẹtịm ẹwụt idaha emi odude ke isọn̄ toto ke 1919. Christendom esịn idiọn̄ọ ubọn̄ ubọn̄ edidu Jesus Christ emi edide “un̄wana ererimbot.” (John 8:12; Matthew 24:3) Ke ntak “akwa ifụtesịt” Satan, etubom ke otu “mme andikara ekịm ererimbot,” ọyọhọ isua ikie 20 ekedi ini emi akamade ibak ye nsobo akan ke mbụk owo. (Ediyarade 12:12; Ephesus 6:12) Ekese owo ẹdu ke ekịm eke spirit.
2 Kpa ye oro, un̄wana osụk ayayama mfịn. Jehovah ‘asiaha ọnọ’ mme asan̄autom esie, nsụhọ oro ẹyetde aran, ẹmi ẹdude ke isọn̄ nte mme andida ke ibuot “n̄wan” esie eke heaven. (Isaiah 60:1, NW) Akpan akpan toto nte ẹkesio mmọ ke ntan̄mfep Babylon ke 1919, mmọ ẹmi ẹwụt ubọn̄ Abasi ẹnyụn̄ ‘ẹyak un̄wana mmọ ayama ke iso owo.’ (Matthew 5:16) Ọtọn̄ọde ke 1919 tutu esịm 1931, un̄wana Obio Ubọn̄ ama ọdọdiọn̄ ayama nte mmọ ẹmi ẹkeduọn̄ọde nsụhọ n̄kpọ ubiọn̄ọ ẹdide ekikere Babylon. Mmọ ẹma ẹkọri ke ibat ẹsịm tọsịn ke mme itie duop nte Jehovah okosude un̄wọn̄ọ esie: “Nyanam Israel emi ẹsụkde ẹsop idem: nyenịm mmọ ọtọ kiet nte n̄kpri ufene Bozrah, kpa nte otu ufene ke otu mbiet mmọ, mmọ ẹyenam uyom ẹban̄a owo.” (Micah 2:12) Ke 1931, ẹma ẹkam ẹtetịm ẹkụt ubọn̄ Jehovah ke idem ikọt esie ke ini mmọ ẹkenyịmede enyịn̄ oro Mme Ntiense Jehovah.—Isaiah 43:10, 12.
3. Didie ke akana in̄wan̄în̄wan̄ nte ke un̄wana Jehovah ayayama ọnọ mmọ en̄wen ke ẹsiode mbon oro ẹyetde aran ẹfep?
3 Nte Jehovah edisiaha ọnọ sụk nsụhọ ke otu “ekpri otu erọn̄”? (Luke 12:32) Baba. Nsiondi Enyọn̄-Ukpeme (Ikọmbakara) eke September 1, 1931, ama anyan ubọk owụt otu en̄wen. Ke ndinam Ezekiel 9:1-11 an̄wan̄a ke eti usụn̄, enye ama owụt ete ke owo emi ọkọn̄ọde ekpeme ewetn̄wed oro ẹtịn̄de ẹban̄a ke mme ufan̄ikọ oro ada aban̄a nsụhọ oro ẹyetde aran. Mmanie ke “owo” oro enịm idiọn̄ọ ke ọkpọiso mmọ? “Mme erọn̄ en̄wen,” kpa mme owo ẹmi ẹnyenede idotenyịn edidu uwem ke nsinsi ke paradise isọn̄. (John 10:16; Psalm 37:29) Ke 1935 ẹma ẹfiọk ẹte ke otu “mme erọn̄ en̄wen” emi edi “akwa otu owo . . . eke ẹtode ke kpukpru obio,” oro apostle John okokụtde ke n̄kukụt. (Ediyarade 7:9-14) Ọtọn̄ọde ke 1935 tutu esịm idahaemi, ẹwụk ekese ntịn̄enyịn ke editan̄ akwa otuowo mbok.
4. Mmanie ẹdi “ndidem” ye “mme idụt” oro ẹtịn̄de ẹban̄a ke Isaiah 60:3?
4 Ẹtịn̄ ẹban̄a utom editan̄ mbok emi ke ntịn̄nnịm ikọ Isaiah ke ini enye ọdọhọde ete: “Mme idụt ẹyesan̄a ke un̄wana fo, ndidem ẹyenyụn̄ ẹsan̄a ke usiere fo.” (Isaiah 60:3) Mmanie ẹdi “ndidem” oro ẹtịn̄de ẹban̄a mi? Nsụhọ ke otu 144,000 ẹmi, ke adianade ye Jesus Christ, ẹdide nsan̄a mme ada udeme nnyene ke Obio Ubọn̄ eke heaven ẹmi ẹnyụn̄ ẹdade usụn̄ ke utom edinọ ikọ ntiense. (Rome 8:17; Ediyarade 12:17; 14:1) Mfịn, “mme idụt,” kpa mbon oro ẹnyenede idotenyịn eke isọn̄ ẹmi ẹdide ẹbịne Jehovah ndibọ ukpep ẹnyụn̄ ẹnọde mmọ en̄wen ikot ndinam ukem oro, ẹnen̄ede ẹwak ẹkan tọsịn ifan̄ ẹmi ẹsụhọde ke otu nsụhọ oro ẹyetde aran.—Isaiah 2:3.
Mme Enyene-Ifịk Asan̄autom Jehovah
5. (a) Nso iwụt ke ifịk ikọt Jehovah isụhọkede? (b) Mme idụt ewe ẹkenyene mme n̄wọrọnda n̄kọri ke 1999? (Se chart ke page 17-20.)
5 Nso ifịk ke Mme Ntiense Jehovah eke eyomfịn ẹkenyene ntem ke ofụri ọyọhọ isua ikie 20! Ndien kpa ye oro mme mfịghe ẹkediọn̄de-diọn̄ ẹdu, ifịk mmọ ikosụhọkede nte isua 2000 akasan̄ade ekpere. Mmọ ẹkesụk ẹdada ewụhọ Jesus ke ata akpan n̄kpọ: “Ẹka ẹkenam kpukpru mme idụt ẹdi mbet.” (Matthew 28:19, 20) Ibat mme enyene-ifịk asuanetop eti mbụk ke akpatre isua utom eke ọyọhọ isua ikie 20 ama esịm obufa n̄wakn̄kan ibat edide 5,912,492. Mmọ ẹma ẹbiat n̄wọrọnda ofụri ibat hour edide 1,144,566,849 nditịn̄ nnọ mmọ en̄wen mban̄a Abasi ye mme uduak esie. Mmọ ẹma ẹnam mfiakn̄ka 420,047,796 ẹnọ mbon oro ẹnyenede udọn̄ ẹnyụn̄ ẹnịm ukpepn̄kpọ Bible mfọn 4,433,884. Nso utịbe utịbe mbụk ifịk ifịk utom ke emi edi ntem!
6. Nso obufa ndutịm ke ẹkenam ẹnọ mme asiakusụn̄, ndien didie ke ẹkenam n̄kpọ ẹban̄a?
6 Ke January isua oko, Otu Ukara ama ọtọt ukpụhọde ke ibat hour oro ẹyomde ẹto mme asiakusụn̄. Ediwak owo ẹma ẹda ifet emi ẹdụk udịm mme asiakusụn̄ ofụri ini m̀mê eke unọ un̄wam. Ke uwụtn̄kpọ, ke akpa ọfiọn̄ inan̄ ke isua 1999, ọfis n̄kọk itieutom Netherlands ama ọbọ mme n̄wed eben̄e utom usiakusụn̄ ofụri ini awak utịm ikanan̄ akan se ọkọbọde ke ukem ikpehe ini oro ke isua emi ekebemde iso. Ghana ọtọt ete: “Toto nte ẹketọn̄ọ nditiene obufa ibat hour emi ẹyomde ẹto mme asiakusụn̄, ibat mme asiakusụn̄ ofụri ini nnyịn etetịm ọdọk.” Ke isua utom 1999, ibat mme asiakusụn̄ ke ofụri ererimbot ama esịm 738,343—kpa utịbe utịbe usụn̄ ‘edisịn esịt nnam nti utom.’—Titus 2:14.
7. Didie ke Jehovah ọdiọn̄ ifịk ifịk utom mme asan̄autom esie?
7 Nte Jehovah ọdiọn̄ ifịk ifịk utom emi? Ih. Enye etịn̄ ebe ke Isaiah ete: “Menede enyịn fo kabade kụk, nyụn̄ se; kpukpru mmọ ẹbono ẹdi ke ọtọ fo: nditọ-iren fo ẹyeto ke anyan ebiet ẹdi, ẹyenyụn̄ ẹbiom nditọ fo iban ke n̄kan̄.” (Isaiah 60:4) “Nditọ-iren” ye “iban” oro ẹyetde aran ẹmi ẹtan̄de ẹbok ke ẹsụk ẹnam n̄kpọ Abasi ifịk ifịk. Ndien idahaemi, ke ẹtan̄ mme erọn̄ en̄wen Jesus ẹbok ke n̄kan̄ “nditọ-iren” ye “iban” Jehovah oro ẹyetde aran ke idụt ye mme isuo inyan̄ibom 234.
“Eti Utom Ekededi”
8. Mme Ntiense Jehovah ẹsịn idem ke nso ‘nti utom’?
8 Mme Christian ẹnyene mbiomo edikwọrọ eti mbụk Obio Ubọn̄ nnyụn̄ n̄n̄wam mbon oro ẹnyenede udọn̄ ẹkabade ẹdi mbet. Edi mmọ “ẹben̄e idem ke kpukpru nde ndinam eti utom ekededi.” (2 Timothy 3:17, sịghisịghi ubọkn̄wed edi eke nnyịn.) Ntem, mmọ ẹse ẹban̄a ubon mmọ ke ima, ẹwụt ntatubọk, ẹsinyụn̄ ẹka ẹkese mbon udọn̄ọ. (1 Timothy 5:8; Mme Hebrew 13:16) Ndien mme anamutom unyịmesịt ẹsibuana ke mme utọ utom nte edibọp mme Ufọkmbono Obio Ubọn̄—utom oro ọnọde ikọ ntiense n̄ko. Ke Togo, ke ẹma ẹkebọp ufọkmbono kiet ẹkụre, mme akamautom ke ufọkabasi ukọkudọn̄ọ eke n̄kann̄kụk ẹma ẹyom ndidiọn̄ọ ntak emi Mme Ntiense Jehovah ẹkekemede ndibọp mme ufọk mmọ ke idemmọ ke adan̄aemi ufọkabasi ekenyenede ndikpe mme owo okụk ẹnam emi! Togo ọtọt ete ke edibọp nti uduot Ufọkmbono Obio Ubọn̄ enyene eti utịp ke mbọhọ tutu ndusụk owo ẹdomo ndibọ m̀mê ndibọbọp ufọk ke n̄kann̄kụk oro ẹdibọpde mme ufọkmbono.
9. Didie ke Mme Ntiense Jehovah ẹsinam n̄kpọ ke ini mme afanikọn̄ ẹtịbede?
9 Ndusụk ini, ẹsiyom orụk eti utom en̄wen. Mme afanikọn̄ ẹma ẹnọmọ ediwak idụt ke isua utom emi ekebede, ndien ediwak ini akpa mbon oro ẹkewọrọde ẹdi ndinọ un̄wam ẹkedi Mme Ntiense Jehovah. Ke uwụtn̄kpọ, Oyobio Mitch ama abiat ekese ikpehe Honduras. Inikiet inikiet, n̄kọk itieutom ama etịm mme kọmiti mbabuat idaha ndise mban̄a mme n̄kpọ un̄wam. Mme Ntiense ke Honduras ye ediwak idụt en̄wen ẹma ẹnọ ọfọn̄, udia, ibọk, ye mme akpan n̄kpọ eken. Mme Kọmiti Ubọpufọk eke Ikpehe ke Ikpehe ẹma ẹda usọ mmọ ẹfiak ẹbọp mme ufọk. Ibịghike, ẹma ẹn̄wam nditọete nnyịn ẹmi ẹkesobode unọmọ afanikọn̄ oro ẹfiak ẹketiene usụn̄ edinam ofụri ini mmọ. Ke Ecuador, Mme Ntiense Jehovah ẹma ẹdin̄wam nditọete mmọ ke ini akwa ukwọ akabiatde ndusụk ufọk. Ke ama akada ese uforo uforo usụn̄ emi mmọ ẹkedade ẹse ẹban̄a idaha oro, akwa owo ukara kiet ọkọdọhọ ete: “N̄kpenyene otu emi, n̄kpanam utịbe n̄kpọ! Mme owo nte mbufo ẹkpenyene ndidu ke ofụri ikpehe ererimbot.” Utọ eti utom oro ada itoro ọsọk Jehovah Abasi onyụn̄ edi uyarade ‘uten̄e Abasi oro ọwọrọde udori ke kpukpru usụn̄.’—1 Timothy 4:8.
Mmọ ‘Ẹfe Ẹdi Nte Obubịt Enyọn̄’
10. Kpa ye oro mbon ẹmi ẹyetde aran ẹsụhọrede ke ibat, ntak emi ẹtan̄ade enyịn̄ Jehovah ẹkan nte akanam edide?
10 Jehovah idahaemi obụp ete: “Mme anie ẹdi mme mmọ ẹmi ẹfede (ẹdi) nte obubịt enyọn̄, ye nte ibiom ẹka ke mme window mmọ? Koro mme isuo ke ẹbet mi, mme ubom mbakara Tarshish ẹbet ke mbemiso, man ẹda nditọ mi ke anyan idụt ẹdi . . . Nditọ isen owo ẹyebọp ibibene fo, ndidem mmọ ẹyenyụn̄ ẹnam n̄kpọ ẹnọ fi.” (Isaiah 60:8-10) Akpa mbon oro ẹkenamde n̄kpọ ẹban̄a “usiere” Jehovah ẹkedi “nditọ” esie, mme Christian ẹmi ẹyetde aran. Ekem “isen owo” ẹma ẹdi, akwa otuowo, ẹmi ke edinam akpanikọ ẹsan̄ade utom ẹnọ nditọete mmọ oro ẹyetde aran, ẹtienede ndausụn̄ mmọ ke ndikwọrọ eti mbụk. Ntem, okposụkedi ibat nsụhọ osụhọrede, ke ẹtan̄a enyịn̄ Jehovah ke ofụri isọn̄ ẹkan nte akanam edide.
11. (a) Nso isụk ikaka iso ndien ye nso utịp ke 1999? (b) Mme idụt ewe ẹkenyene n̄wọrọnda ibat baptism ke 1999? (Se chart ke page 17-20.)
11 Nte utịp, ediwak miliọn owo ke ẹsan̄a ke ọkwọkudịm “nte ibiom ẹka ke mme window mmọ,” ẹyomde ubọhọ ke esịt esop Christian. Ediwak tọsịn owo ke mme itie ikie ẹsidiana ke isua kiet kiet, ndien usụn̄ ana in̄wan̄ ebet mbon efen efen ndidụk. Isaiah ọdọhọ ete: “Mme usụn̄ fo ẹyena in̄wan̄ kpukpru ini; idinyụn̄ isịnke mmọ ke uwemeyo ye ke okoneyo; man ẹda inyene mme idụt ẹsọk fi.” (Isaiah 60:11) Isua oko owo 323,439 ẹkena baptism ke idiọn̄ọ uyakidem mmọ nnọ Jehovah, ndien enye iberike usụn̄ kan̄a. “Se mme idụt ẹyomde,” mbon akwa otuowo, ke ẹsụk ẹsan̄a ke mmọ ẹbụn̄ọ ẹdụk. (Haggai 2:7) Owo ibiọn̄ọke owo ndomokiet emi oyomde ndikpọn̄ ekịm ndidụk. (John 12:46) Akpakam kpukpru utọ mbon oro idehede iduọk esịtekọm oro mmọ ẹnyenede ẹban̄a un̄wana oro!
Ifeheke Ndịk ke Ẹsobode Ubiọn̄ọ
12. Didie ke mbon oro ẹmade ekịm ẹdomo ndinịme un̄wana?
12 Mbon oro ẹmade ekịm ẹsasua un̄wana Jehovah. (John 3:19) Ndusụk owo ẹsikam ẹdomo ndinịme un̄wana oro. Emi idịghe se owo mîdorike enyịn iban̄a. Mbon obio esie ẹma ẹkam ẹsak, ẹbiọn̄ọ, ndien ke akpatre ẹwot Jesus, “ata un̄wana emi anamde enyịn an̄wan̄a kpukpru owo.” (John 1:9) Ke ofụri ọyọhọ isua ikie 20, Mme Ntiense Jehovah n̄ko ẹsobo nsahi, n̄kpọkọbi, ukpan, idem ẹwotde, nte mmọ ke edinam akpanikọ ẹwụtde un̄wana Jehovah. Ke mme isua ndondo emi, mme andibiọn̄ọ ẹsuan nsu ke ndutịm usuanetop ẹban̄a mbon oro ẹwụtde un̄wana Abasi. Ndusụk mmọ ẹyom ndinam mme owo ẹnịm ke akpanikọ ẹte ke Mme Ntiense Jehovah ẹdi n̄kpọndịk ndien ke ẹkpenyene ndibiọn̄ọ mmọ m̀mê ndidori ukpan. Nte mme utọ andibiọn̄ọ oro ẹkụt unen?
13. Nso isụn̄ọ ito edida mbufiọk n̄ka mbịne ndutịm usuanetop n̄kowụt mme akpanikọ ẹban̄ade utom nnyịn?
13 Baba. Ke ebiet emi odotde, Mme Ntiense Jehovah ẹsika ufọkutom usuanetop man ẹkenam se idide akpanikọ ẹn̄wan̄a. Nte utịp, ẹnam ẹdiọn̄ọ enyịn̄ Jehovah ntatara ntatara ke mme n̄wedmbụk n̄kpọntịbe ye mme magazine ye ke ekebe ukopikọ ye ekebe ndise. Emi enyene nti utịp ke utom ukwọrọikọ. Ke uwụtn̄kpọ, ke Denmark, edinam kiet ke TV idụt oro ekenyene ibuot nneme emi “Ntak emi mbuọtidem mbon Denmark osụhọrede.” Ẹma ẹnam ndụn̄ọde ye Mme Ntiense Jehovah ọkọrọ ye mbon en̄wen. Ke oro ebede, eyenan̄wan kiet emi okokụtde edinam oro ama ọdọhọ ete: “Mbon ẹmi ẹkenyenede spirit Abasi ama ana ata in̄wan̄în̄wan̄.” Ẹma ẹtọn̄ọ ukpepn̄kpọ ye enye.
14. Ke ẹsobode edikpu, ibịghike nso ke mme andibiọn̄ọ ẹdidiọn̄ọ?
14 Mme Ntiense Jehovah ẹdiọn̄ọ ẹte ke ediwak owo ke ererimbot emi ẹyebiọn̄ọ mmimọ. (John 17:14) Kpa ye oro, ntịn̄nnịm ikọ Isaiah ọsọn̄ọ mmọ idem: “Nditọ mmọ ẹmi ẹkefịkde fi, ẹyedi ẹdinụhọ ẹnọ fi; kpukpru mmọ ẹmi ẹkesịnde fi ke ndek ẹyenyụn̄ ẹnụhọ ke ikpat ukot fo; ndien mmọ ẹyekot fi, ẹte, ‘Obio Jehovah, Zion Edisana Abasi Israel.’” (Isaiah 60:14) Ke ẹsobode edikpu, ibịghike mme andibiọn̄ọ ẹyediọn̄ọ ẹte ke mmimọ, ke nditịm ntịn̄, ikan̄wana ye Abasi ke idemesie. Anie ekeme ndikan ke utọ ekọn̄ oro?
15. Didie ke Mme Ntiense Jehovah ‘ẹwap mmọn̄ eba mme idụt,’ ndien didie ke ẹkụt emi ke utom unọ ukpep ye eke ukwọrọikọ mmọ?
15 Jehovah aka iso ọn̄wọn̄ọ ete: “Nyenịm fi ke nsinsi ubọn̄ . . . Afo ayawap mmọn̄ eba mme idụt, onyụn̄ awap eba ndidem: ndien ọyọfiọk ete ke ami Jehovah ndi andinyan̄a fi.” (Isaiah 60:15, 16) Ih, Jehovah edi Andinyan̄a ikọt esie. Edieke mmọ ẹbuọtde idem ke enye, mmọ ẹyebịghi ke “nsinsi.” Ndien mmọ ‘ẹyewap mmọn̄ eba mme idụt,’ ẹdade ndusụk n̄kpọ oro ẹdude ẹmenede utuakibuot akpanikọ ke enyọn̄. Ke uwụtn̄kpọ, edida kọmputa ye ifiọk ubotn̄kpọ ẹdade ẹnyene nneme nnam n̄kpọ ọniọn̄ ọniọn̄ anam ẹwara ẹmịn̄ Enyọn̄-Ukpeme ke usem 121 ye Awake! ke usem 62 ke ukem ini. Ẹdiọn̄ san̄asan̄a ndutịm kọmputa man an̄wam ke ndikabade New World Translation nsịn ke mbufa usem, ndien utọ edikabade emi ada ekese idatesịt edi. Ke ini ẹkesiode N̄wed Abasi Christian Usem Greek ke usem Croatian ke 1999, mmọn̄eyet idara ama asiaha ediwak tọsịn owo. Akanieren eyenete kiet ọkọdọhọ ete: “Mmetie mbet Bible emi ke ata anyan ini. Idahaemi mmekeme ndikpa ke emem!” Ẹsuan New World Translation, ke ofụri ofụri m̀mê ubak ubak, ẹbe miliọn 100 ke usem 34.
N̄kokon̄ Idaha Ido Uwem
16, 17. (a) Okposụkedi edide ọkpọsọn̄ n̄kpọ, ntak emi edide akpan n̄kpọ ndimụm n̄kokon̄ idaha Jehovah n̄kama? (b) Ifiọkutom ewe anam an̄wan̄a nte ke n̄kparawa owo ẹkeme ndifep ndidi se ererimbot asabarede?
16 Jesus ọkọdọhọ ete: “Kpukpru owo eke ẹnamde idiọk ẹsasua un̄wana.” (John 3:20) Ke n̄kan̄ eken, mbon oro ẹdude ke un̄wana ẹma n̄kokon̄ idaha Jehovah. Jehovah, ebede ke Isaiah, ọdọhọ ete: “Ikọt fo kpukpru ẹyedi edinen.” (Isaiah 60:21a) Ekeme ndidi n̄kpọ-ata ndimụm ndinen idaha n̄kama ke ererimbot emi oburobụt ido idan̄, usu nsu, idiọkitọn̄, ye ntan̄idem ẹtịmde ẹyọhọ. Ke uwụtn̄kpọ, ke ndusụk idụt, ndutịm uforo ke ọdọdiọn̄ ọkọri, ndien edi mmemmem n̄kpọ ndiwọn̄ọde ntịn̄enyịn n̄kere n̄kpọ n̄kan̄ kiet mbịne uforo. Nte ededi, Paul ọkọtọt ete: “Mmọ eke ẹyomde ndidi mbon inyene ẹduọ ẹsịne ke idomo ye afia ye ediwak ndisịme ye idiọk udọn̄, eke ẹdụride owo ẹsụhọde ke nditaha ye nsobo.” (1 Timothy 6:9) Nso n̄kpọ mmọn̄eyet ke edi ntem ke ini owo enen̄erede ayak idem esịn ke mbubehe tutu enye ayak mme ata akpan n̄kpọ ẹtak, utọ nte ebuana Christian, edisana utom, edumbet ido uwem, ye mme mbiomo ubon!
17 Edimụm ndinen idaha n̄kama ekeme ndinen̄ede ndi ọkpọsọn̄ n̄kpọ nnọ mme uyen, ke ini ata ediwak ubọkn̄ka mmọ ẹbuanade ke edida ibọk ke idiọk usụn̄ ye oburobụt ido. Ke Suriname, eyeneren kiet ke ufọkn̄wed emi eyede uyai ama aka ebịne eyenan̄wan isua 14 okoyom ndinyene ebuana idan̄. Eyenan̄wan emi ama esịn, anamde an̄wan̄a nte ke Bible akpan mme utọ n̄kpọ oro ke owo mîdọhọ ndọ. Nditọiban eken ke ufọkn̄wed ẹma ẹsak enye ẹnyụn̄ ẹdomo ndinyịk enye okpụhọ ekikere, ẹdọhọde ẹte ke kpukpru owo ẹsiyom ndinyene ebuana idan̄ ye eyeneren oro. Edi, ekpri n̄kaiferi emi ama ọsọn̄ọ ada. Urua ifan̄ ke ukperedem, ẹma ẹdụn̄ọde ẹfiọk ke akparawa oro enyene HIV (ifọt udọn̄ọ oro owotde editịbe idemowo) ndien enye ama ọdọn̄ọ ata idiọk idiọk. Eyenan̄wan oro ama okop inemesịt nte ke imọ ima inam ewụhọ Jehovah ọdọhọde “ẹtre use.” (Utom 15:28, 29) Mme Ntiense Jehovah ẹnen̄ede ẹkop inemesịt ẹban̄a n̄kpri owo ke otu mmọ ẹmi ẹsọn̄ọde ẹda ẹnam se inende. Mbuọtidem mmọ, ye eke ete ye eka mmọ, ‘ada ubọn̄’—ye ukpono—ọsọk enyịn̄ Jehovah Abasi.—Isaiah 60:21b.
Jehovah Ọnọ N̄kọri
18. (a) Nso akwa n̄kpọ ke Jehovah anam ọnọ ikọt esie? (b) Nso uyarade idu nte ke n̄kọri ayaka iso ndidu, ndien nso ubọn̄ ubọn̄ idotenyịn ina ibet mbon oro ẹsọn̄ọde ẹdu ke un̄wana oro?
18 Ih, Jehovah ọnọ ikọt esie un̄wana, ọdiọn̄ mmọ, ada mmọ usụn̄, onyụn̄ ọsọn̄ọ mmọ idem. Ke ọyọhọ isua ikie 20, mmọ ẹma ẹkụt edisu ikọ Isaiah ẹmi: “Ekpri ayakabade edi tọsịn, esisịt oyonyụn̄ akabade edi ọkpọsọn̄ idụt: ami Jehovah nyanam enye awara ke ekem ini esie.” (Isaiah 60:22) Ọtọn̄ọde ye esisịt ibat oro ẹkedude ko ke edem ke 1919, “ekpri” amakabade awak akan “tọsịn.” Ndien utọ n̄kọri oro isịmke utịt kan̄a! Isua oko owo 14,088,751 ẹkedụk usọrọ Editi n̄kpa Jesus. Ediwak ke otu mmọ ẹmi ikedịghe ifịk ifịk Mme Ntiense. Nnyịn imokop inemesịt nte ke mmọ ẹma ẹdụk akpan usọrọ oro, ndien nnyịn imọnọ mmọ ikot ite ẹka iso ẹsan̄a ẹkpere un̄wana oro. Jehovah osụk asasiaha ọnọ ikọt esie. Usụn̄ ẹsan̄ade ẹdụk esop esie osụk anana in̄wan̄. Yak kpukpru owo, ndien, ẹbiere ndisọn̄ọ ndu ke un̄wana Jehovah. Nso edidiọn̄ ke oro ada ọsọk nnyịn ntem idahaemi! Ndien nso idatesịt ke oro edida edi ntem ke ini iso ke ini kpukpru edibotn̄kpọ ẹditorode Jehovah ẹnyụn̄ ẹdara ke uyama ubọn̄ esie!—Ediyarade 5:13, 14.
Nte Afo Emekeme Ndinam An̄wan̄a?
• Mmanie ẹwụt ubọn̄ Jehovah ke ukperedem ini ẹmi?
• Nso iwụt ke ifịk ikọt Jehovah isụhọkede?
• Nso idi ndusụk nti utom oro Mme Ntiense Jehovah ẹsịnde idem?
• Kpa ye oro isobode ikan̄îkan̄ ubiọn̄ọ, nnyịn inyene mbuọtidem ke nso?
[Mme Mbụme Ukpepn̄kpọ]
[Chart ke page 17-20]
IBATUTOM ISUA UTOM 1999 EKE MME NTIENSE JEHOVAH KE OFỤRI ERERIMBOT
(Se magazine)
[Mme ndise ke page 15]
Mme owo ke ẹsụk ẹbobụn̄ọ ẹdụk esop Jehovah
[Ndise ke page 16]
Nnyịn imenem esịt nte ke Jehovah ayak usụn̄ ana ata in̄wan̄ ọnọ mbon ẹmi ẹmade un̄wana