SE BIBLE ETỊN̄DE ABAN̄A
Ubụpekpo
Ndi ọdiọk ndidomo ndineme nneme ye mme akpan̄kpa?
“Ẹkûkabade ẹtiene mme obụp ekpo . . . mbak mmọ ẹdisabade mbufo.”—Leviticus 19:31.
SE MME OWO ẸTỊN̄DE
Mbon emi ẹmade owo mmọ emi ama akakpa ẹsiyom ndidiọn̄ọ m̀mê enye ke ọbọ ufen. Ntak edi oro ediwak owo ẹsikade edem obụp ekpo man ẹkefiọk nte n̄kpọ etiede ye owo mmọ emi akakpade. Ndusụk mmọ ẹsikere ke obupekpo eyetịn̄ n̄kpọ oro edinamde esịt ana mmimọ sụn̄.
SE BIBLE ỌDỌHỌDE
Bible idịpke inua ke n̄kpọ emi, enye ọdọhọ ke mme owo ke eset ẹma ẹsibụp ekpo etieti. Edi Ibet emi Jehovah Abasi ọkọnọde nditọ Israel ọkọdọhọ ete: ‘Kûyak ẹkụt owo ekededi ke otu mbufo emi edide obụp ekpo m̀mê owo ekededi emi akade okobụp mme akpan̄kpa n̄kpọ. Koro kpukpru owo eke ẹnamde emi ẹdi mbubiam ke enyịn Jehovah.’ (Deuteronomy 18:10-12) Bible ọdọhọ n̄ko ke owo ekededi emi anamde ndomokiet ke otu emi “ididaha obio ubọn̄ Abasi inyene.” —Galatia 5:19-21.
Ndi mme akpan̄kpa ẹkeme ndin̄wam nnyịn?
‘Mme odu-uwem ẹfiọk ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet.’ —Ecclesiastes 9:5.
SE MME OWO ẸTỊN̄DE
Ẹsidọhọ ke ekpo akpa enyịn, ikpaha utọn̄. Ntak edi oro mme owo ẹsidomode ndineme nneme ye akpan̄kpa man ẹfiọk n̄kpọ, mîdịghe ẹyom se ẹkpenamde man esịt enem mme akpan̄kpa, mmọ ẹnyụn̄ ẹyak mme odu-uwem ẹdu ke emem.
SE BIBLE ỌDỌHỌDE
“Koro mme odu-uwem ẹfiọkde ẹte ke mmimọ iyakpa; edi amaedi mme akpan̄kpa, mmọ ifiọkke baba n̄kpọ kiet, . . . ima mmọ ye usua mmọ ye ufụp mmọ ẹmetak.” (Ecclesiastes 9:5, 6) Ikọ Bible oro ọwọrọ ke owo ama akpa, akpa—ikopke n̄kpọ ndomokiet, ikereke n̄kpọ ndomokiet, ikemeke ndinam n̄kpọ ndomokiet, inyụn̄ ikemeke ndikpono Abasi. Psalm 115:17 ọdọhọ ete: “Mme akpan̄kpa itoroke [Abasi], baba owo kiet eke osụhọrede ke ndobo itoroke enye.”
Ndi se mme obụp ekpo ẹsitịn̄de isitịbeke ndusụk ini?
“Nte ẹkpebụp mme akpan̄kpa n̄kpọ ẹnọ mme odu-uwem?” —Isaiah 8:19.
SE MME OWO ẸTỊN̄DE
Ndusụk owo ẹdọhọ ke mme obụp ekpo ẹsitịn̄ n̄kpọ emi owo en̄wen mîkpọdiọn̄ọke ke mîbọhọke owo emi akpade ye ikọtufọk esie m̀mê mme ufan esie.
SE BIBLE ỌDỌHỌDE
Akpa Samuel ibuot 28 etịn̄ nte Edidem Saul emi ama ọkọkpọn̄ Abasi akakade okobụp ekpo, kpa n̄kpọ emi Abasi ama akakpan. Mma idiọn̄ emi enye akakade ebịne ọkọdọhọ ke itịn̄ ikọ ye Samuel owo Abasi emi ama akakpa! Ndi Samuel eketịn̄ ikọ ye mma oro? Ihih! Mma oro eketịn̄ ikọ ye demon emi akanamde nte idi Samuel.
Demon oro ekedi eyenutom Satan emi edide “ete nsu.” (John 8:44) Ntak emi mme demon ẹsinamde mme owo ẹnịm ke ekpo akpa enyịn ikpaha utọn̄? Mmọ iyomke mme owo ẹnịm se Bible etịn̄de, edi eyom ndinam etie nte ke Abasi osu nsu.—2 Timothy 3:16.
Ndi se itịn̄de emi ọwọrọ ke owo ama akpa, esie okụre? Iwọrọke! Bible ọdọhọ ke mme akpan̄kpa ẹyeset. * (John 11:11-13; Utom 24:15) Enye n̄ko anam nnyịn ifiọk ke mbon nnyịn emi ẹkpade ibọhọ ufen ndomokiet.
^ ikp. eki. 16 Ibuot 7 ke n̄wed Nso ke Bible Enen̄ede Ekpep? edi “Ata Idotenyịn Odude Ọnọ Mbonima Fo Oro Ẹkpade.” Emekeme ndikot ke www.jw.org/efi.
Ekeme Ndidi Ayama Mmọ Emi N̄ko
ẸDEMEDE!
Nso ke Bible Etịn̄ Aban̄a N̄kpọ Mme Demon?
Kpa ye oro ediwak owo mînịmke ke mme demon ẹdu ẹnyụn̄ ẹnyene odudu. Bible ọdọhọ ke mme demon ẹdu. Nso ke Ikọ Abasi etịn̄ aban̄a mme demon? Ndien ntak-a?
