NE MÍEKU la, ɖe Mawu adi be yeafɔ mí ɖe tsitre be míagava nɔ agbea?— Nuteƒewɔla Hiob xɔe se be Mawu di ŋutɔŋutɔ be yeawɔ esia. Eyata esime Hiob bu be yeɖo kudonu vɔ la, egblɔ na Mawu be: “Àyɔm, eye matɔ na wò.” Hiob gblɔ be ele Yehowa Mawu dzrom, alo edi vevie, be wòafɔ ye ɖe tsitre.—Hiob 14:14, 15.

Yesu wɔa nu pɛpɛpɛ abe Fofoa Yehowa Mawu ene. Yesu hã di be yeakpe ɖe mía ŋu. Esi ŋutsu aɖe si ŋu anyidɔ le gblɔ na Yesu be, ‘ne èlɔ̃ ko, àte ŋu ana ŋutinye nakɔ’ la, eɖo eŋu nɛ be: ‘Melɔ̃.’ Eye eda anyidɔa na ŋutsua.—Marko 1:40-42.

Yesu srɔ̃e tso Fofoa gbɔ be wòalɔ̃ ɖeviwo. Ɣeyiɣi didi aɖee nye si va yi la, Yehowa zã esubɔlawo zi eve wofɔ ɖeviwo ɖe tsitre. Eliya ɖe kuku na Yehowa be wòafɔ nyɔnu aɖe si wɔ dɔmenyo na ye Eliya la ƒe viŋutsu ɖe tsitre. Eye Yehowa fɔe hã. Yehowa zã  esubɔla Elisa hã wòfɔ ŋutsuvi aɖe ɖe tsitre.—Fiawo I, 17:17-24; Fiawo II, 4:32-37.

Ðe medo dzidzɔ na wò ŋutɔ be nànya be Yehowa lɔ̃a mí vevie ŋutɔ oa?— Menye míaƒe agbenɔɣi koe wòbua mía ŋu o. Eɖoa ŋku mía dzi ne míeku gɔ̃ hã. Yesu gblɔ be Fofo la bua amesiwo wòlɔ̃ siwo ku la be wole agbe! (Luka 20:38) Biblia gblɔ be ‘eɖanye ku o, eɖanye agbe o, eɖanye nusiwo li fifia alo nusiwo le vava ge o; naneke mate ŋu ama mí atso Mawu ƒe lɔlɔ̃ gbɔ o.’—Romatɔwo 8:38, 39.

Esi Yesu nɔ anyigba dzi la, eɖee fia be Yehowa tsɔ ɖe le eme na ɖeviwo. Àɖo ŋku edzi be Yesu kpɔ vovo ɖe ɖeviwo ŋu ƒo nu na wo tso Mawu ŋu. Gake ènya be Mawu na ŋusẽ Yesu be wòagbɔ agbe ɖeviwo hã tso ku mea?— Na míaƒo nu tso ɣeyiɣi si me Yesu fɔ ŋutsu aɖe si ŋkɔe nye Yairo ƒe vinyɔnuvi si xɔ ƒe 12 ɖe tsitre la ŋu.

Yairo kple srɔ̃a kple woƒe tenuvi wonɔ afisi tsɔ ɖe Galilea-ƒua gbɔ. Gbeɖeka nyɔnuvia dze dɔ vevie ale gbegbe be Yairo kpɔe be ɖevia le kuku ge. Yairo ƒe susu yi Yesu, amesi ƒe nu léa dzi na ame si ŋkɔ wòse be ete ŋu daa dɔ na amewo la dzi. Eyata Yairo dze mɔ be yeayi ava dii. Eva ke ɖe Yesu ŋu le Galilea-ƒua ta wònɔ nu fiam amehawo.

Yairo to amehawo dome yi va dze klo ɖe Yesu ƒe afɔ nu. Egblɔ na Yesu be: ‘Vinyenyɔnuvi dze dɔ vevie. Meɖe kuku àte ŋu ava kpe ɖe eŋu nama? Meɖe kuku va kpe ɖe eŋu.’ Enumake Yesu yi kple Yairo. Ameha gã siwo va Nufiala Gã la gbɔ hã dze wo yome. Gake esi woɖo mɔa ƒe afi aɖe la, amewo tso Yairo ƒe aƒeme va kpee gblɔ nɛ be: ‘Viwònyɔnuvia ku! Nuka fu nègaxa le ɖeɖem na nufiala la?’

Yesu se nya si ameawo gblɔ. Enya alesi gbegbe Yairo lé blanui ɖe eƒe vi ɖekɛ si ku la ta. Eyata Yesu gblɔ nɛ be: ‘Mègavɔ̃ o. Xɔ Mawu  dzi se ko, eye viwòa anɔ dedie.’ Woyi azɔlia dzi vaseɖe esime wova ɖo Yairo ƒe aƒeme. Ƒomea ƒe xɔlɔ̃wo le avi fam. Wolé blanui vevie elabena wo xɔlɔ̃ sue la ku. Gake Yesu gblɔ na wo be: ‘Midzudzɔ avifafa. Ðevia meku o, ke boŋ alɔ̃ dɔm wòle.’

Esi Yesu gblɔ nya sia la, amewo lé nukokoe me, elabena wonya be nyɔnuvia ku. Ke nukatae nèbu be Yesu gblɔ be alɔ̃ dɔmee ɖevia le?— Nukae wòdi be yeafia ameawo?— Edi be woanya be woate ŋu atsɔ ku asɔ kple alɔ̃dɔdɔ ayi eme ʋĩ. Edi be yeafia wo be to Mawu ƒe ŋusẽ me la, yeate ŋu agbɔ agbe ame kukuwo bɔbɔe abe alesi ko míate ŋu anyɔ ame tso alɔ̃ mee ene.

Azɔ Yesu na amesiame do go le aƒea me, negbe eƒe apostolo Petro, Yakobo, kple Yohanes kpakple nyɔnuvia fofo kple dadaa koe susɔ. Emegbe eyi afisi ɖevia nɔ. Elé nyɔnuvia ƒe alɔnu eye wògblɔ be: ‘Ðetugbi, tsi tre!’ Eye enumake nyɔnuvia tsi tre eye wòle azɔli zɔm! Fofoa kple dadaa kpɔ dzidzɔ wu gbɔgblɔ.—Marko 5:21-24, 35-43; Luka 8:40-42, 49-56.

Azɔ bu nya sia ŋu kpɔ. Esi Yesu te ŋu fɔ nyɔnuvi ma ɖe tsitre ɖe, ɖe wòagate ŋu afɔ ame bubuwo hã ɖe tsitrea?— Èsusu be afɔ  amewo ɖe tsitre nyateƒea?— Ẽ, afɔ wo ɖe tsitre. Yesu ŋutɔ gblɔ be: ‘Gaƒoƒo gbɔna, le esi me amesiwo katã le ŋkuɖodziyɔdowo me la, woase nye gbe, eye woado go.’—Yohanes 5:28, 29.

Èsusu be Yesu di ŋutɔŋutɔ be yeafɔ amewo ɖe tsitrea?— Kpɔɖeŋu bubu aɖe le Biblia me si kpe ɖe mía ŋu míekpɔ ŋuɖoɖo na biabia ma. Nusi dzɔ gbeɖeka le Nain gbɔto ɖe alesi Yesu sena le eɖokui me na amesiwo le woƒe lɔlɔ̃tɔ siwo ku ƒe nu xam la fia.

Ameha aɖe do tso Nain yina ɖe ameɖibɔ me eye nyɔnu si ƒe viŋutsu ku la hã le wo dome. Nyɔnua srɔ̃ ku ɣeaɖeɣi do ŋgɔ eye fifia eƒe tenuvi la hãe nye ma ku. Nyɔnua lé blanui ale gbegbe! Naintɔ geɖe dze nyɔnua yome esi wotsɔ via kukua nɔ go domee le dua me. Nyɔnua le avi fam blobloblo eye naneke meli ameawo ate ŋu awɔ atsɔ afa akɔ nɛ o.

Gbemagbe Yesu kple eƒe nusrɔ̃lawo hã le mɔ dzi yina Nain. Esi wogogo dua ƒe agbo nu la, wodo go amehawo le mɔ dzi woyina nyɔnua ƒe viŋutsuvia ɖiƒe. Esi Yesu kpɔ nyɔnua wòle avi fam la, eƒe dɔme trɔ ɖe eŋu eye eƒe nu wɔ nublanui nɛ. Alesi nyɔnua lé blanui vevie la wɔ dɔ ɖe Yesu ƒe dzi dzi ale gbegbe. Edi be yeakpe ɖe nyɔnua ŋu.

Eyata egblɔ na nyɔnua kple gbe si me tufafa kple kakaɖedzi le be: ‘Mègafa avi o!’ Alesi wòƒo nui kple alesi wòwɔ nui la na be amesiame tɔ nɔ ekpɔm. Esi Yesu te ɖe ame kukua ŋu la, amesiame anɔ biabiam be nuka wɔ ge wògbɔna hã. Yesu gblɔ kple gbe si me ŋusẽ le be: “Ðekakpui, mele egblɔm na wò bena: Tsi tre!” Enumake ɖevia fɔ bɔbɔ nɔ anyi! Eye ele nu ƒom.—Luka 7:11-17.

Bu alesi vidadaa ase le eɖokui me ŋu kpɔ! Aleke nàse le ɖokuiwò me ne wofɔ wò ame vevi aɖe si ku ɖe tsitre?— Ðe esia mefia be Yesu lɔ̃ amewo ŋutɔŋutɔ eye wòdi be yeakpe ɖe wo ŋu oa?—  Bu alesi wòanye dzidzɔe be míado dzaa na amesiwo ku siwo wogafɔ ɖe tsitre le Mawu ƒe xexe yeyea me la ŋu kpɔ ko!—Petro II, 3:13; Nyaɖeɖefia 21:3, 4.

Ɣemaɣi la, amesiwo woafɔ ɖe tsitre la dometɔ aɖewo anye amesiwo míedze sii, siwo dome ɖeviwo hã anɔ. Míakpɔe adze sii be woawo tututue abe alesi Yairo kpɔ vianyɔnu dze sii esi Yesu fɔe ɖe tsitre ene. Ameawo dometɔ aɖewo anye amesiwo ku ƒe alafa alo akpe geɖe gɔ̃ hã va yi. Gake Mawu maŋlɔ wo be le esi wònye ɣeyiɣi didi aɖee nye sia si wonɔ agbe va yi ta o.

Ðe medo dzidzɔ na mí ŋutɔ be míakpɔe be Yehowa Mawu kple Via, Yesu, wolɔ̃ mí vevie alea gbegbe oa?— Wodi be míanɔ agbe, menye ƒe ʋɛ aɖewo ko o, ke boŋ be míanɔe tegbee!