AME aɖewo gblɔna be nusiwo yewokpɔna kple ŋku ko dzie yewoxɔna sena. Gake masɔ nenema o. Nu gbogbo aɖewo li siwo nye nusiwo li ŋutɔŋutɔ gake míekpɔ wo kple ŋku kpɔ o. Àte ŋu ayɔ wo dometɔ aɖea?—

Ya si míegbɔna ɖe? Ðe míate ŋu aka asi eŋua?— Mlo asi nàɖo ƒuƒu ɖee. Èse nanea?— Èsee, gake ɖe nàte ŋu akpɔ ya la?—

Míeƒo nu va yi tso gbɔgbɔmemewo, amesiwo míate ŋu akpɔ kple ŋku o ŋu. Míesrɔ̃e be wo dometɔ aɖewo nye ame nyuiwo gake bubu aɖewo ya vɔ̃ɖi. Yɔ gbɔgbɔmeme nyui aɖewo siwo míate ŋu akpɔ kple ŋku o ƒe ŋkɔwo.— Ẽ, Yehowa Mawu li, Yesu hã li, eye mawudɔla nyuiwo hã li. Ðe mawudɔla vɔ̃ɖiwo hã lia?— Biblia gblɔ be woli. Gblɔ nusi nèsrɔ̃ tso wo ŋu nam.—

Nusiwo míenya dometɔ ɖekae nye be mawudɔla nyuiwo kple mawudɔla vɔ̃ɖiwo siaa sesẽ boo wu mí. Nufiala Gã la nya nu geɖe tso mawudɔlawo ŋu. Nusitae nye be mawudɔlae eya hã nye hafi wova dzii wònye vidzĩ le anyigba dzi. Eya kple mawudɔla bubuwoe nɔ dziƒo. Edze si wo dometɔ miliɔn geɖeawo katã. Ðe ŋkɔ le mawudɔla siawo katã sia?—

Míesrɔ̃e be Mawu tsɔ ŋkɔ na ɣletiviwo. Eyata míate ŋu aka ɖe edzi be ŋkɔ le mawudɔlawo katã hã si. Eye míenya be wote ŋu ƒoa nu na wo nɔewo elabena Biblia gblɔ na mí be “mawudɔlawo ƒe gbegbɔgblɔ” li. (Korintotɔwo I, 13:1) Nuka ŋue nèbu be mawudɔlawo ƒoa nu tsoe? Ðe woƒoa nu tso mí amesiwo le anyigba dzi ŋua?—

 Míenya be Satana ƒe dɔlawo, siwo nye gbɔgbɔ vɔ̃wo, le agbagba dzem be yewoana míagbe toɖoɖo Yehowa. Eyata woaƒo nu tso alesi woawɔ awɔ esia ŋu. Wodi be míazu abe yewo ene ale be Yehowa magakpɔ ŋudzedze ɖe míawo hã ŋu o. Gake Mawu ƒe dɔla wɔnuteƒewo ya ɖe? Èbu be woawo hã woƒoa nu tso mía ŋua?— Ẽ, woƒoa nu tso mía ŋu. Wodi be yewoakpe ɖe mía ŋu. Na magblɔ alesi Mawu ƒe dɔla aɖewo kpe ɖe amesiwo lɔ̃ Yehowa eye wosubɔnɛ la dometɔ aɖewo ŋu na wò.

Le kpɔɖeŋu me, ŋutsu aɖe nɔ anyi si ŋkɔe nye Daniel, amesi nɔ Babilon. Ame geɖe siwo nɔ afima melɔ̃ Yehowa o. Amewo de se aɖe gɔ̃ hã be woatsɔ ahe to na amesiame si ado gbe ɖa na Yehowa Mawu. Gake Daniel ya gbe be yemadzudzɔ gbedodoɖa na Yehowa o. Ènya nusi dzɔ ɖe Daniel dzia?—

Ẽ, ame vɔ̃ɖi mawo tsɔ Daniel ƒu gbe ɖe dzatawo ƒe do me. Daniel ɖeka enye ma tsi dzata dɔwuitɔwo dome. Ènya nusi dzɔa?—  Daniel gblɔ be: “Nye Mawu dɔ eƒe dɔla ɖa wòde ga nu na dzatawo.” Dzataawo mewɔ nanekee kura o! Mawudɔlawo ate ŋu awɔ nu wɔnukuwo na amesiwo subɔa Yehowa.—Daniel 6:19-23.

Gbeɖeka wode Petro hã gaxɔ me. Àɖo ŋku edzi be Petro nye Nufiala Gã Yesu Kristo ƒe xɔlɔ̃. Esi Petro gblɔ na amewo be Mawu ƒe Vie Yesu nye la, medze wo dometɔ aɖewo ŋu o. Eyata wolé Petro va de gaxɔ me. Asrafowo nɔ Petro ŋu dzɔm be woakpɔ egbɔ be masi adzo o. Ðe ame aɖe li si ate ŋu akpe ɖe eŋua?—

Petro nɔ dzɔla eve dome nɔ alɔ̃ dɔm eye wode kɔsɔkɔsɔ asi nɛ. Gake Biblia gblɔ bena: ‘Kpɔ ɖa! Yehowa ƒe dɔla va, eye kekeli klẽ ɖe  gaxɔa me. Mawudɔla la ka asi Petro ƒe axada me, eye wònyɔe, hegblɔ bena, “Tsi tre kaba!”’

Enumake kɔsɔkɔsɔawo ge le Petro ƒe asiwo ŋu! Eye mawudɔla la gblɔ nɛ bena: ‘Dzra ɖo, do wò atokotawo, eye nàdze yonyeme.’ Dzɔlawo mete ŋu xe mɔ ɖe wo o elabena mawudɔlae nɔ kpekpem ɖe Petro ŋu. Azɔ wova ɖo ʋɔtru gã si wotsɔ gakpo wɔe la nu, eye nu wɔnuku aɖe dzɔ. Ʋɔtrua ŋutɔ ʋu le eɖokui si! Mawudɔla la na Petro kpɔ ɖeɖe bene wòate ŋu ayi edzi aɖe gbeƒã.—Dɔwɔwɔwo 12:3-11.

Ðe mawudɔlawo ate ŋu akpe ɖe míawo hã ŋu egbea?— Ẽ, woate ŋui. Ðe wòfia be womaɖe mɔ nuvevi aɖeke nawɔ mí gbeɖe oa?— Ao, mawudɔlawo mexɔna na mí tso nuveviwɔame si me ne míewɔ bometsinuwo o. Gake ne míewɔ bometsinu o gɔ̃ hã, nuvevi ate ŋu awɔ mí. Womegblɔ na mawudɔlawo be woaxe mɔ ɖe nusiawo nu be woagadzɔ ɖe mía dzi o. Ke boŋ dɔ tɔxɛ aɖee Mawu de wo si be woawɔ.

Biblia la ƒo nu tso mawudɔla aɖe si le gbɔgblɔm na amewo le afisiafi be woade ta agu na Mawu ŋu. (Nyaɖeɖefia 14:6, 7) Aleke mawudɔla la le nusia wɔmee? Ðe wòdoa ɣli tso dziƒo be amesiame nate ŋu ase eƒe gbea?— Ao, ke boŋ Yesu yomedzela siwo le anyigba dzi ye le nu ƒom na amewo tso Mawu ŋu, eye mawudɔlawo le mɔ fiam wo le woƒe dɔa wɔwɔ me. Mawudɔlawo kpɔa egbɔ be mɔnukpɔkpɔ ʋuna na amesiwo di le nyateƒe me be yewoanya nu tso Mawu ŋu la be woase eŋu nya. Míawo hã míate ŋu akpɔ gome le gbeƒãɖeɖedɔ sia me, eye mawudɔlawo akpe ɖe mía ŋu.

Gake nenye be amesiwo melɔ̃a Mawu ƒe nya o la he fukpekpe va mía dzi ɖe? Ne wotsɔ mí va de gaxɔ me ɖe? Ðe mawudɔlawo aɖe mía?— Woate ŋui. Gake menye emae nye nusi wowɔna ɣesiaɣi o.

Gbeɖeka Yesu yomedzela si nye Paulo nɔ gaxɔ me. Wokplɔe wònɔ mɔ zɔm le tɔdziʋu me esime ahomya sesẽ aɖe nɔ ƒoƒom. Gake mawudɔlawo meɖee tso eme enumake o. Nusitae nye be ame bubuwo li  siwo wòhiã be woase nu tso Mawu ŋu. Mawudɔla aɖe gblɔ nɛ be: ‘Paulo, mègavɔ̃ o. Ele be nàtsi tre ɖe Kaisaro ŋkume.’ Ẽ, ele be woakplɔ Paulo ayi xexeame dziɖula Kaisaro ŋkume ale be Paulo nate ŋu aɖe gbeƒã nɛ. Afisiafi si Paulo nɔ la, mawudɔlawo nya, eye wokpe ɖe eŋu. Woakpe ɖe míawo hã ŋu ne míesubɔa Mawu le nyateƒe me.—Dɔwɔwɔwo 27:23-25.

Dɔ gã bubu aɖe li si mawudɔlawo awɔ, eye woawɔ esia kpuie. Mawu ƒe ɣeyiɣi si me wòatsrɔ̃ ame vɔ̃ɖiwo la tu aƒe ŋutɔ. Woatsrɔ̃ amesiwo katã medea ta agu na Mawu vavã la o. Amesiwo gblɔna be yewomexɔ mawudɔlawo dzi se o le esi yewomate ŋu akpɔ wo o ta la akpɔe ɣemaɣi be yewowɔ vodada ŋutɔ.—Tesalonikatɔwo II, 1:6-8.

Nukae esia afia na míawo ya?— Ne míele Mawu ƒe dɔlawo ƒe akpa dzi la, ekema woakpe ɖe mía ŋu. Gake ɖe míele woƒe akpa dzi nyateƒea?— Ne míesubɔa Yehowa la, ke míele woƒe akpa dzi. Eye ne míesubɔa Yehowa la, ekema míanɔ egblɔm na ame bubuwo be woawo hã nava subɔe.