NE ÐEVIWO wɔ nu nyuiwo la, edoa dzidzɔ na amesiwo le wo dzi kpɔm. Ne nyɔnuvi wɔ nane nyuie la, fofoa tsɔa dzidzɔ gblɔnɛ na amewo be: “Vinyenyɔnuvie nye ma.” Alo ne ŋutsuvi wɔ nu nyui aɖe la, fofoa gblɔnɛ dzidzɔtɔe be: “Vinyeŋutsuvie nye ma.”

Yesu wɔa nusi dzea Fofoa ŋu ɣesiaɣi. Le esia ta Fofoa kpɔa ŋudzedze ɖe eŋu. Èɖo ŋku nusi Yesu Fofo wɔ gbeɖeka esime Yesu kple eyomedzela etɔ̃ wonɔ teƒe aɖe dzia?— Nyateƒee, Mawu ƒo nu tso keke dziƒo ke eye wògblɔ na wo be: “Amesia enye vinye, si nyemelɔ̃a nu egbɔ o, si dzea ŋunye.”—Mateo 17:5.

Edzɔa dzi na Yesu ɣesiaɣi be yeawɔ nusiwo dze ye Fofo ŋu. Ènya nusitaea? Esi wòlɔ̃ Fofoa ŋutɔŋutɔ tae. Ne wozi ame aɖe dzi hafi wòle nane wɔm la, nua wɔwɔ sesẽna nɛ. Gake ne enye amea ŋutɔ ƒe lɔlɔ̃nu faa be yeawɔe la, ewɔwɔ nɔa bɔbɔe nɛ. Ènya nusi ame ŋutɔ ƒe lɔlɔ̃nu faa tsɔtsɔ wɔ nui fia?— Efia be wòanye amea ƒe didi ŋutɔŋutɔ be yeawɔ nane.

Hafi Yesu nava anyigba dzi gɔ̃ hã la, elɔ̃ faa be yeawɔ nusianu si Fofoa bia tso esi be wòawɔ. Esi wòlɔ̃ Fofoa Yehowa Mawu tae wòwɔnɛ ɖo. Teƒe nyui ŋutɔ aɖee nɔ Yesu si le dziƒo le Fofoa gbɔ. Gake dɔ vevi aɖe nɔ Mawu si wòdi be Yesu nava wɔ. Hafi Yesu nate ŋu awɔ dɔ sia la, ele be wòadzo le dziƒo. Ele be woadzii ɖe anyigba dzi abe vidzĩ ene. Yesu lɔ̃ faa be yeava wɔ dɔ sia elabena enye Yehowa ƒe didi be wòawɔe.

Hafi woate ŋu adzi Yesu le anyigba dzi la, ele be dada nanɔ esi. Ènya amesi nye dadaa?— Eŋkɔe nye Maria. Yehowa dɔ eƒe dɔla  Gabriel ɖa tso dziƒo be wòava ƒo nu na Maria. Gabriel gblɔ nɛ be ele ŋutsuvi dzi ge. Woayɔ vidzĩa be Yesu. Ke amekae anye vidzĩa fofo?— Mawudɔla la gblɔ be vidzĩa Fofo lanye Yehowa Mawu. Le esia ta woayɔ Yesu be Mawu ƒe Vi.

Aleke nèbu be Maria se le eɖokui me le nya sia ŋu?— Ðe wògblɔ bena, ‘Nyemedi be manye Yesu dada oa’? Ao, Maria lɔ̃ faa be yeawɔ Mawu ƒe lɔlɔ̃nu. Gake aleke woawɔ adzi Mawu ƒe Vi si le dziƒo wòanye vidzĩ le anyigba dzi? Aleke Yesu ƒe dzidzi to vovo na vidzĩ bubuwo katã ƒe dzidzii? Ènyaa?—

Mawu wɔ mía dzila gbãtɔ Adam kple Xawa ale be woate ŋu anɔ anyi ɖekae le mɔ wɔnuku aɖe nu. Le ema megbe la, vidzĩ anɔ tsitsim le dadaa ƒe dɔme. Amewo gblɔna be nukunue wònye! Meka ɖe edzi be wò hã àlɔ̃ ɖe edzi nenema.

Fifia Mawu wɔ nane si gawɔ nuku kura wu. Etsɔ Via ƒe agbe tso dziƒo va de Maria ƒe vidzidɔ me. Mawu mewɔ nusia tɔgbe kpɔ do ŋgɔ o, eye megawɔe kpɔ le ema megbe hã o. Le nukunu sia ta Yesu va ɖo Maria ƒe vidzidɔ me nɔ tsitsim abe alesi vidzĩ bubu ɖesiaɖe tsina le dadaa ƒe vidzidɔ me ene. Le ema megbe la, Maria va zu Yosef srɔ̃.

Esi ɣeyiɣia de be woadzi Yesu la, Maria kple Yosef ɖi tsa yi du si nye Betlexem me. Gake amewo sɔ gbɔ ɖe dua me fũ. Xɔ aɖeke kura  meganɔ anyi Maria kple Yosef nanɔ eme o, eyata eva hiã be woatsi teƒe si lãwo nɔna. Afimae Maria dzi vi le, eye wotsɔ Yesu mlɔ lãwo ƒe nuɖunu me, abe alesi nèle ekpɔm le afisia ene. Lãwo ƒe nuɖunu enye nusi me wokɔa nuɖuɖu ɖo na nyiwo kple lã bubuwo be woaɖu.

Nu dodzidzɔnamewo dzɔ le zã si me wodzi Yesu. Mawudɔla aɖe do ɖe alẽkplɔlawo dzi le teƒe aɖe si tsɔ ɖe Betlexem gbɔ. Egblɔ na wo be ame vevi aɖee Yesu nye. Mawudɔla la gblɔ be: ‘Kpɔ ɖa! Mele nyanyui gblɔm na mi, esi lanye dzidzɔ na dukɔwo. Egbea wodzi ame aɖe si ana amewo nakpɔ xɔxɔ.’—Luka 2:10, 11.

Mawudɔla la gblɔ na alẽkplɔlawo be woakpɔ Yesu le Betlexem wotsɔe mlɔ lãwo ƒe nuɖunu me. Eye enumake mawudɔla bubu siwo le dziƒo la va wɔ ɖeka kple mawudɔla gbãtɔ eye wokafu  Mawu. Mawudɔlawo dzi ha be: ‘Ŋutikɔkɔe woana Mawu eye ŋutifafa ava na anyigbadzitɔ siwo si lɔlɔ̃nu nyui le.’—Luka 2:12-14.

Esi mawudɔlawo trɔ dzo la, alẽkplɔlawo yi Betlexem va kpɔ Yesu. Wova gblɔ nyanyui siwo katã wose la na Yosef kple Maria. Àte ŋu akpɔ alesi Maria akpɔ dzidzɔe be yelɔ̃ faa be yeanye Yesu dada la ɖa le susu mea?

Emegbe Yosef kple Maria wotsɔ Yesu yi du si woyɔna be Nazaret me. Afimae Yesu nɔ tsi. Esi wòtsi la, edze eƒe nufiafiadɔ gã la gɔme. Dɔ siae nye dɔ siwo Yehowa Mawu di be ye Via nava wɔ le anyigba dzi la ƒe akpa aɖe. Yesu lɔ̃ be yeawɔ dɔ sia elabena elɔ̃ Fofoa si le dziƒo vevie ŋutɔ.

 Hafi Yesu nadze eƒe dɔa gɔme abe Nufiala Gã ene la, Yohanes Amenyrɔɖetsimela nyrɔe ɖe Yordan-tɔsisia me. Enumake nu wɔnuku aɖe dzɔ! Esi Yesu nɔ dodom tso tsia me la, Yehowa ƒo nu tso dziƒo, gblɔ bena: ‘Amesia enye vinye, si gbɔ nyemelɔ̃a nu lena o, si dzea ŋunye.’ (Mateo 3:17) Ðe medzɔa dzi na wò ne dziwòlawo gblɔ na wò be yewolɔ̃ wò oa?— Míate ŋu aka ɖe edzi be edo dzidzɔ na Yesu hã nenema.

Yesu wɔa nusi le dzɔdzɔe ɣesiaɣi. Mewɔa alakpanu gblɔna be yenye ame aɖe si eyama menye ŋutɔŋutɔ o. Megblɔ na amewo be yee nye Mawu o. Mawudɔla Gabriel gblɔ na Maria be woayɔ Yesu be Mawu ƒe Vi. Yesu ŋutɔ gblɔ be Mawu ƒe Vie yenye. Eye megblɔ na amewo be yenya nu wu ye Fofo o. Egblɔ be: ‘Fofo la lolo wum.’—Yohanes 14:28.

Le dziƒo gɔ̃ hã ne Yesu Fofo de dɔ asi nɛ be wòawɔ la, Yesu wɔnɛ pɛpɛpɛ. Megblɔna be yeawɔe gake wòagbe ewɔwɔ o. Elɔ̃ Fofoa. Eyata eɖoa to nusi Fofoa gblɔ nɛ. Eye esime Yesu va anyigba dzi hã, nusi Fofoa si le dziƒo dɔe ɖa be wòava wɔ ye wòwɔna. Metsɔ ɣeyiɣia wɔ nu bubuwoe o. Eyata mewɔ nuku o be Yehowa kpɔ ŋudzedze ɖe Via ŋu ŋutɔ!

Ðe míawo hã míadi be Yehowa nakpɔ ŋudzedze ɖe mía ŋu oa?— Ekema ele be míaɖee afia be míeɖoa to Mawu nyateƒe, abe Yesu ene. Mawu toa Biblia dzi ƒoa nu na mí. Manye nusi sɔ be míawɔ alakpanu be míeɖoa to Mawu evɔ míaxɔ nusiwo tsi tre ɖe Biblia ŋu dzi ase alo anɔ wo wɔm o, alo ɖe míawɔea?— Eye ɖo ŋku edzi be ne míelɔ̃ Yehowa ŋutɔŋutɔ la, ke anye dzidzɔ na mí be míawɔ nusi dzea eŋu.