1, 2. a) Yezu ye min fɔ Matiyo 24:12 kɔnɔ, o tun ɲɛsinna jɔn lo ma fɔlɔ? b) Kɛwaliw ka kitabu b’a yira cogo di ko saan kɛmɛkulu fɔlɔ la, kerecɛnw tun be mɔgɔw kanu? ( Jaa lajɛ, barokun daminɛ na.)

YEZU ka fɔta la, “diɲɛ laban taamashyɛn” dɔ ye ko “mɔgɔ caman ka kanuya na sumaya.” (Mat. 24:3, 12, ABM ). Saan kɛmɛkulu fɔlɔ la, Yahutuw tun b’a fɔ k’olu lo ye Ala sagokɛlaw ye, nka u y’a to u ka kanuya sumayara Ala koo la.

² O wagati la, kerecɛnw fanba tun cɛsirinin lo ka “kibaru diman fɔ mɔgɔw ye” ani k’a yira k’u be Ala, u kerecɛnɲɔgɔnw ani mɔgɔ wɛrɛw kanu (Kɛw. 2:44-47; 5:42). A fɔ man di, nka saan kɛmɛkulu fɔlɔ la, Yezu ka kalanden dɔw y’a to u ka kanuya sumayara.

3. Mun lo y’a to kerecɛn dɔw ka kanuya sumayara?

³ Saan kɛmɛkulu fɔlɔ la, Yezu suu kununin kɔ, a y’a fɔ Efɛzi kerecɛnw ye ko: “Aw tun be ne kanu cogo min na fɔlɔ la, aw te ne kanu ten tugu.” ( Yir. 2:4). Mun lo y’a to u ka kanuya sumayara? N’a sɔrɔ o kerecɛnw y’a to duniɲa jugu nin ka miiriya ye nɔɔ to u kan (Efɛz. 2:2, 3). Kojuguw tun fanin be Efɛzi dugu la. Bi fana, dugu caaman be ten. Efɛzi dugu tun yiriwanin lo kosɔbɛ ani koo nunu lo tun ye mɔgɔ caaman ɲɛnako fɔlɔ ye: nafolo, ɲɛnagwɛkow ani ka ɲɛnamaya kɛ faamanya la. Sanni u ka Ala n’u mɔgɔɲɔgɔnw kanu, ɲɛnagwɛkow lo tun ka di u ye. Ka fara o kan, u caaman tun be malobaliyakow ni kakalayakow lo kɛ.

4. a) Mɔgɔw ka kanuya be sumayara cogo di bi? b) An ka ɲi ka to ka dɔ fara an ka kanuya barika kan koo saba jumanw na?

⁴ Yezu ye min fɔ ko mɔgɔw ka kanuya bena sumaya, o fana be dafara bi. Bi, mɔgɔw ka kanuya be sumayara Ala koo la. Mɔgɔ miliyɔn caaman y’u kɔɔ di Ala ma ani u jigi b’a la ko adamadenw ka jɛnkuluw lo bena u ka gwɛlɛyaw ɲɛnabɔ. Mɔgɔw ka kanuya be sumayara. Jehova sagokɛlaw fana ka kanuya be se ka sumaya i ko a kɛra Efɛzi kerecɛnw na cogo min na. An ka ɲi ka to ka dɔ fara an ka kanuya barika kan 1) Jehova koo la, 2) Bibulu ka tiɲɛn kalanw koo la ani 3) an balimaw koo la. An k’o lajɛ.

5. Mun na an ka kan ka Ala kanu?

⁵ An ka ɲi ka jɔn lo kanu ka tɛmɛ fɛɛn bɛɛ kan? Yezu y’o jaabili di loon min na a y’a fɔ ko mɔgɔw ka kanuya bena sumaya. A ko: “I ka Matigi i ka Ala kanu n’i dusu bɛɛ ye, an’i kɔnɔ bɛɛ ye, n’i hakili bɛɛ ye. O le ye cii fɔlɔ ye.” (Mat. 22:37, 38). Tiɲɛn na, n’an be Jehova kanu kosɔbɛ, o bena an dɛmɛ k’a ka sariyaw labato, ka muɲu ani ka koo jugu kɔniya (Zaburuw 97:10 kalan). Sutana n’a ka duniɲa b’a ɲinina k’an ka kanuya nagasi Ala koo la.

6. Ni mɔgɔ tɛ Ala kanu tugun, o nɔfɛkow ye mun lo ye?

⁶ Duniɲa mɔgɔw ka miiriya tilennin tɛ kanuya koo la. Sanni u ka an Danbaga kanu, u b’u yɛrɛ lo kanu (2 Tim. 3:2). Sutana ka duniɲa be mɔgɔw jija koo nunu lo la: “Fɛn minnu bɛɛ bɛ diɲɛ la, farisogo nege, ɲɛ nege, ani diɲɛ ka yɛrɛjiranciya.” (1 Zan 2:16, ABM). Ciden Pol ye a kerecɛnɲɔgɔnw lasɔmi farisogo negew koo la. A y’a fɔ ko: “Ka sɔn farisogo ka koo ma, o laban ye saya ye . . . Adamadenw ka nigɛjuguw sera mɔgɔ minw kɔrɔ, u ye Ala juguw ye.” (Ɔrɔm. 8:6, 7). Tiɲɛn na, mɔgɔ minw be boliboli bololafɛnw nɔfɛ ani k’a ɲini ka kakalayakow kɛ, a laban, olu be tɔɔrɔ ani u jigi be tigɛ.—1 Kor. 6:18; 1 Tim. 6:9, 10.

7. Miiriya jugu jumanw lo be se ka nɔɔ to kerecɛnw kan bi?

⁷ Jamana dɔw la, dɔw lanin tɛ Ala la hali dɔɔni, dɔw ko mɔgɔ tɛ se k’a lɔn ni Ala be yen wala n’a tɛ yen. Dɔ wɛrɛw fana ko fɛɛnw lo yɛlɛma yɛlɛmana ka kɛ u yɛrɛ ma. O miiriyaw kuun ye ka mɔgɔw ka kanuya sumaya ani k’a to mɔgɔw tɛ la Ala la tugun. O y’a to mɔgɔ caaman b’a miiri ko minw man cegu ani minw ma kalan, olu lo be la Ala la. O kosɔn, mɔgɔ caaman be bonya la lɔnnikɛlaw kan ka tɛmɛ an Danbaga kan (Ɔrɔm. 1:25). N’an b’o kalanw lamɛn, o be se k’an ka kanuya sumaya ani k’an mabɔ Jehova la.—Eburuw 3:12.

8. a) Koo jumanw lo be se ka Jehova sagokɛlaw fari faga? b) Zaburuw 136 b’an hakili sigi cogo di?

⁸ N’an fari fagara o be se k’an ka limaniya barika dɔgɔya ani k’a to an ka kanuya be sumaya Ala koo la. K’an to Sutana ka duniɲa juguman nin kɔnɔ, an bɛɛ fari be faga tuma dɔw la (1 Zan 5:19). N’a sɔrɔ an tɔɔrɔnin lo kɔrɔya, bana wala wariko kosɔn. N’a sɔrɔ an dusu kasinin lo sabu an b’a miiri ko nafa foyi t’an na. Koo dɔw be se k’an jigi tigɛ ani an ka fili tɛmɛninw be se k’an hakili ɲagami. An man ɲi k’a to o miiriyaw wala o koow ɲɔgɔn k’a to an k’a miiri ko Jehova banna an na. Nka, vɛrise minw b’an hakili sigi ko Jehova b’an kanu kosɔbɛ, an ka ɲi ka miiri olu lo la. Ɲɛyirali fɛ, Zaburuw 136:23 b’a fɔ ko: “Ale min y’a hakili to an na an sɛgɛn tuma na, a ka ɲumanya te ban abada.” Tiɲɛn na, Jehova bena ɲumanya kɛ a sagokɛlaw ye fɔɔ abada. O kama, an be se ka la a la ko a b’an “ka daalili lamɛn” ani ko a bena u jaabi.—Zab. 116:1; 136:24-26.

9. Mun lo ye Pol dɛmɛ ka dɔ fara a ka kanuya barika kan Ala koo la?

⁹ Jehova tun ye Ciden Pol dɛmɛ cogo min na, Pol tun be miiri koɲuman o la. O lo y’a barika bonya. A y’a sɛbɛ ko: “Matigi ye ne dɛmɛbaga ye, ne tena siran foyi ɲa. Adamaden be se ka mun kɛ ne la?” (Eburuw 13:6). Pol tun lanin b’a la ko Jehova b’a janto ale la. O lo y’a dɛmɛ ka gwɛlɛyaw muɲu. A m’a to o gwɛlɛyaw k’a fari faga. K’a to kaso la, a ye lɛtɛrɛ caaman sɛbɛ k’a balimaw jija (Efɛz. 4:1; Filip. 1:7; Filem. 1). Gwɛlɛyaw bɛɛ n’a ta, Pol tora ka dɔ fara a ka kanuya barika kan Ala koo la. Mun lo y’a dɛmɛ k’o kɛ? Ala min “b’an jigi tugu an ka tɔɔrɔ bɛɛ la,” a tora k’a jigi la ale lo kan (2 Kor. 1:3, 4). An be se ka Pol ladegi cogo di ani ka dɔ fara an ka kanuya barika kan Ala koo la?

10. An be se ka dɔ fara an ka kanuya barika kan Jehova koo la cogo di?

¹⁰ Pol y’a ɲɛfɔ an be se ka min kɛ walisa ka dɔ fara an ka kanuya barika kan Ala koo la. A ye lɛtɛrɛ sɛbɛ a kerecɛnɲɔgɔnw ma ko: “Aw kana Aladali dabila.” O kɔ, a y’a sɛbɛ fana ko: “Aw ye jija ka Ala daali.” (1 Tes. 5:17; Ɔrɔm. 12:12). Delili b’an dɛmɛ k’an magwɛrɛ Jehova la koɲuman (Zab. 86:3). N’an be wagati ta k’an kɔnɔnakow ani an dusukunnakow fɔ an sankolola Faa Jehova ye delili la, an tɛ se n’an m’an magwɛrɛ a la. Ale lo be “daaliliw mɛn” (Zab. 65:3). Ka fara o kan, n’an y’a ye ko Jehova y’an ka delili jaabi, o be dɔ fara an ka kanuya barika kan a koo la. An b’a faamu o sen fɛ ko: “Masaba [ Jehova] b’a daalibagaw gɛrɛfɛ.” (Zab. 145:18). N’an lanin b’a la ko Jehova b’an kanu ani ko a b’a janto an na, o bena an dɛmɛ ka gwɛlɛya sifaw bɛɛ muɲu.

11, 12. An be se ka mun lo kɛ walisa Bibulu ka tiɲɛn kalanw ka diya an ye kosɔbɛ?

¹¹ Komi an ye kerecɛnw ye, tiɲɛn ka di an ye ani an be sɔn a ma. Tiɲɛn be sɔrɔ Ala ka Kuma lo kɔnɔ. Yezu ka delili dɔ la, a y’a fɔ a Faa ye ko: “I ka kuma le ye tiɲɛ ye.” (Zan 17:17). N’an b’a fɛ tiɲɛn kalanw ka diya an ye, fɔɔ an k’a lɔn Bibulu be min fɔ tigitigi (Kɔlɔs. 1:10). Nka, o lɔnniya dama tɛ bɔri kɛ. An ka ɲi ka koo wɛrɛ minw kɛ, Zaburu sɛbɛbaga y’o ɲɛfɔ an ye (Zaburuw 119:97-100 kalan). Tile kɔnɔ, yala an be wagati ta ka miiri koɲuman bibulusen dɔw la wa? N’an be miiri k’a filɛ an be se k’o kalanw sira tagama cogo min na, dɔ bena fara an ka kanuya barika kan Bibulu ka tiɲɛn kalanw koo la.

¹² Zaburu sɛbɛbaga y’a fɔ fana ko: “E ka layidu ka di ne ye, o ka di ka tɛmɛ lii kan.” (Zab. 119:103). Jehova ka ɔriganisasiyɔn be gafe minw dilan, u basiginin be Bibulu lo kan ani u be komi dumuni diiman. N’an be dumuni diiman dɔ kɛra, an b’an ka wagati ta k’a diyabɔ. O cogo kelen na, an ka ɲi ka wagati ta ka Ala ka Kuma sɛgɛsɛgɛ. O la, an bena “kumaɲumanw” diyabɔ tiɲɛn kalanw koo la. An ye min kalan, a tɛna gwɛlɛya an ma k’an hakili to o la ani ka mɔgɔ wɛrɛw dɛmɛ n’o ye.—Waaj. 12:10.

13. Mun lo y’a to Bibulu ka tiɲɛn kalanw diyara Zeremi ye? O ye nɔɔ juman lo to a kan?

¹³ Bibulu ka tiɲɛn kalanw tun ka di Zeremi ye. A filɛ u tun be nɔɔ min to a dusukun kan. A y’a fɔ ko: “Kabini i ka kuma sera ne ma, ne y’a dumu. I ka kuma ye ne dusukun ɲagali k’a sewa, k’a masɔrɔ ne bɛ wele i tɔgɔ la, Matigi, Kɛlɛbolowtigi Ala.” (Zer. 15:16, ABM ). An be se k’a fɔ ko Zeremi tun be Ala ka Kuma dumu ani k’a to a be jigi a kɔnɔ. O kɔrɔ ko, a tun be miiri a kan. O lo y’a to a diyara a ye kosɔbɛ ka kɛ Jehova ka lasigiden ye ani k’a ka Kuma lase mɔgɔw ma. Ni Bibulu ka tiɲɛn kalanw diyara an ye, an bena a faamu ko nɛɛma lo an fɛ ka kɛ Jehova Seerew ye. An bena a faamu fana ko nɛɛma lo ka Masaya kibaro diiman fɔ mɔgɔw ye nin laban loonw na.

14. An be se ka dɔ fara an ka kanuya barika kan, Bibulu ka tiɲɛn kalanw koo la cogo di?

¹⁴ Hali n’an be Bibulu n’an ka gafew kalan, koo wɛrɛ jumanw lo be se k’an dɛmɛ walisa Bibulu ka tiɲɛn kalanw ka diya an ye kosɔbɛ? An ka ɲi ka to ka taga lajɛnw na. Kɔrɔsili Sangaso ye fɛɛrɛ fɔlɔ ye min b’an dɛmɛ ka Bibulu sɛgɛsɛgɛ. Lɔgɔkun o lɔgɔkun, an b’o zurunali kalan kɛ an ka lajɛnw na. N’an b’a fɛ ka nafa sɔrɔ o kalan na bɛrɛbɛrɛ, an ka ɲi ka Kɔrɔsili Sangaso labɛn koɲuman. An be se k’o kɛ cogo di do? An ka bibulusen kelen kelen bɛɛ lajɛ. Bi, mɔgɔ be se ka tɛmɛ jw.org wala JW Library fɛ ka Kɔrɔsili Sangaso telesarse kaan caaman na. Kaan dɔw la yɛrɛ, mɔgɔ be se ka sin ka bibulusenw lajɛ kalan labɛntɔ a ka telefɔni wala tablɛti kan. Nka an mana tɛmɛ fɛɛrɛ o fɛɛrɛ fɛ, n’an be vɛrisew kalan koɲuman ani ka miiri u kan, o be dɔ fara an ka kanuya barika kan, Bibulu ka tiɲɛn kalanw koo la.—Zaburuw 1:2 kalan.

15, 16. a) Yezu ye cikan juman lo di an ma Zan 13:34, 35 kɔnɔ? b) Mun na an ka ɲi k’an balimaw fana kanu?

¹⁵ Yezu ka suu laban na dugukolo kan, a y’a fɔ a ka kalandenw ye ko: “Ne be cikura di aw ma ko: aw ka ɲɔgɔn kanu, ne y’aw kanu cogo min na, aw fana ka ɲɔgɔn kanu ten. Mɔgɔ bɛɛ ben’a lɔn o sen fɛ ko aw kɛra ne ka kalandenw ye, ni aw be ɲɔgɔn kanu.”—Zan 13:34, 35.

¹⁶ N’an ko an be Ala kanu, an ka ɲi k’an balimaw kanu fana. An tɛ se ka Jehova kanu n’an t’an balimaw kanu. Ciden Zan y’a sɛbɛ ko mɔgɔ “ɲaa be a mɔgɔɲɔgɔn min na, n’a t’o kanu, a te se ka Ala kanu, a ɲaa te min na.” (1 Zan 4:20). Ka fara o kan, n’an ko an be Ala ani an balimaw kanu, Bibulu ka tiɲɛn kalanw ka ɲi ka diya an ye fana. Mun na do? Sabu Bibulu b’a ɲini an fɛ ko an ka Ala ani an balimaw kanu. Ni Bibulu ka tiɲɛn kalanw ka di an ye, o bena an lasun k’o cikan labato n’an dusukun bɛɛ ye.—1 Piyɛri 1:22; 1 Zan 4:21.

17. Cogo jumanw na an be se k’a yira ko an b’an balimaw kanu?

¹⁷ Vɛrise nin kalan: 1 Tesalonikaw 4:9, 10. Cogo ɲuman jumanw na an be se k’a yira ko an b’an balimaw kanu? N’a sɔrɔ mɔgɔkɔrɔba dɔ b’a fɛ an k’a ta ka taga n’a ye kafo ka lajɛnw na. A be se ka kɛ fana ko firiyamuso dɔ b’a fɛ an k’a dɛmɛ ka fɛɛn dɔw lalaga a ka soo kɔnɔ (Zaki 1:27). Balima minw fari fagara, hakiliɲagami bana be minw na, wala gwɛlɛya wɛrɛw be minw kan, an ka ɲi k’an janto olu la, k’u jija ani k’u dusu saalo (Talenw 12:25; Kɔlɔs. 4:11). An ka kumaw ani an ka kɛwalew fɛ, an ka ɲi k’a yira ko an b’an janto kosɔbɛ “an balima dannabaaw” la. O cogo le la, an b’a yira ko an b’u kanu sɔbɛ la.—Gal. 6:10, ABM.

18. N’an balimaw donna an gasi la, mun lo bena an dɛmɛ, k’o koo ɲɛnabɔ?

¹⁸ Bibulu kɔnna k’a fɔ ko duniɲa juguman nin “laban tuma na,” mɔgɔw bena kɛ wasabaliw ye ani u bena to ka miiri u yɛrɛ dɔrɔn koo la (2 Tim. 3:1, 2). An kerecɛnw ka ɲi k’an jija walisa ka dɔ fara an ka kanuya barika kan Ala, Bibulu ka tiɲɛn kalanw ani an balimaw koo la. Tiɲɛn lo ko tuma dɔw la an balimaw be se ka don an gasi la. Nka, kanuya ka ɲi ka kafodenw bɛɛ lasun k’o koo ɲɔgɔn ɲɛnabɔ cogo ɲuman na. N’an b’o kɛ, o ye koo ɲuman yɛrɛ lo ye! (Efɛz. 4:32; Kɔlɔs. 3:14). O kama, an kana a to an ka kanuya ka sumaya abada! Nka, an ka banba ka dɔ fara an ka kanuya barika kan, Ala, Bibulu ka tiɲɛn kalanw ani an balimaw koo la.