1, 2. An be se ka dogoyɔrɔ sɔbɛ sɔrɔ min bi?

I KA miiri k’a filɛ, i be tagamana sira kan sanfɔɲɔba jukɔrɔ. Saan finna tititi. Sanyɛgɛyɛgɛ be bari ka yeelen bɔ, sanpɛrɛnkan be bɔ ani sanjiba b’a daminɛ ka ben. I jigi tigɛlen, i b’i teliya ka dogoyɔrɔ ɲini. O yɔrɔ kelen na, i ɲɛɛ be bugu dɔ la sirada la. A lɔra ka ɲɛ, a tɛ sooro ani a be mɔgɔ lasama. I ninsɔndiyara kosɔbɛ k’o bugu sɔrɔ min be mɔgɔ latanga!

² An ka wagati ɲagaminen lo kosɔbɛ i n’a fɔ sanfɔɲɔ wulitɔ. Duniɲa be tiɲɛna ka taga. Nka dogoyɔrɔ sɔbɛ dɔ be yen min be se k’an tanga makosa ma. O dogoyɔrɔ ye juman ye? A filɛ Bibulu be min fɔ: “Ne kɔni be Masaba [ Jehova, NW ] koo fɔ ko: ‘N dogoyɔrɔ, n dogoyɔrɔ barikaman lo. Ne ka Ala lo, ne jigi be min kan.’ ”—Zaburuw 91:2.

3. An be se ka Jehova kɛ an dogoyɔrɔ ye cogo di?

³ I ka miiri k’a filɛ! Jehova min ye Danbaga ani duniɲa kuru bɛɛ Masaba ye, ale be se ka kɛ dogoyɔrɔ sɔbɛ ye an fɛ. Mɔgɔ wala fɛɛn o fɛɛn be se k’an mako sa, a be se  k’an tanga o ma sabu a ka fanga ɲɔgɔn tɛ yen. Hali n’u ye koo jugu kɛ an na, Jehova be se k’o nɔfɛkow lalaga. An be se ka Jehova kɛ an dogoyɔrɔ ye cogo di? An ka kan k’an jigi la a kan. Ala ka Kuma b’an ladi fana ko: “Aw ka to Ala ka kanuya la.” (Zude 21). Tiɲɛn lo, an ka kan k’o kɛ an kɛtɔ ka jɛnɲɔgɔnya teriman kɛ n’an sankolola Faa ye. O la, an be se ka la a la ko a bena kɛ an dogoyɔrɔ ye. Nka an be se k’o jɛnɲɔgɔnya sigi n’a ye cogo di?

4, 5. Jehova y’a ka kanuya yira an na cogo minw na, i k’o dɔw fɔ.

⁴ Walisa an ka to Ala ka kanuya la, fɔɔ an k’a ɲini k’a lɔn a be o kanuya yira an na cogo min na. Gafe nin ye i dɛmɛ ka kalan minw sɔrɔ Bibulu kɔnɔ, i ka miiri u koo la. An Danbaga Jehova ye sigiyɔrɔ ɲuman di an ma o min ye dugukolo ye. A y’a fa dumuni ni jii caaman na, nafolofɛnw, bɛgɛn cɛɲumanbaw ani yɔrɔ ɲumanw na minw filɛ ka di. Ale lo ye Bibulu Tigi ye. O kɔnɔ, a y’a tɔgɔ n’a jogow yira an na. Ka fara o kan, a ka Kuma b’a ɲɛfɔ ko a y’a yɛrɛ Dencɛ kanulen Yezu ci ka na dugukolo kan ani a sɔnna a ka tɔɔrɔ ani a ka sa an kosɔn (Zan 3:16). An be nafa juman sɔrɔ o nilifɛn na? O be siniɲasigi ɲuman jigiya di an ma.

⁵ Ala ye koo wɛrɛ kɛ min be jigiya di an ma fana. A ye gofɛrɛnɛman dɔ sigi sankolo la o min ye Masiya ka Masaya ye. Yanni dɔɔni, o Masaya bena tɔɔrɔw bɛɛ ban ani ka dugukolo yɛlɛma ka kɛ alijɛnɛ ye. I ka miiri o koo la k’a filɛ! O kɔrɔ ko an be se ka ɲɛnamaya kɛ dugukolo kan ɲɛsuma ni hɛɛrɛ la fɔɔ abada (Zaburuw 37:29). Nka yanni o ka kɛ, Ala be ladiliw di an ma walisa an ka ɲɛnamaya ka fisaya kabini sisan yɛrɛ. A fana ye nilifɛn dɔ di an ma o min ye ka se k’a deli an sago la. Nunu ye fɛɛn damaninw ye minw b’a yira ko Jehova be adamadenw bɛɛ kanu. O kanuya ɲɛsinna e tigitigi ma fana.

6. Jehova ye kanuya min yira i la, i be se ka sɔn o la cogo di?

 ⁶ A kɔrɔtalen lo kosɔbɛ i ka miiri ɲiningali min na, o ye nin lo ye: Ne bena sɔn Ala ka kanuya la cogo di? Mɔgɔ caaman bena a fɔ ko: “Ne ka kan ka Jehova kanu fana.” Yala e sɔnna o ma wa? Yezu y’a fɔ ko cikanw bɛɛ la belebeleba ye nin lo ye: “I ka i Matigi Ala [ Jehova, NW ] kanu ni i dusukun bɛɛ ye, ani i ni bɛɛ ni i hakili bɛɛ.” (Matiyo 22:37, ABM ). Siga t’a la, sababu caaman b’i fɛ ka Jehova Ala kanu. Nka, ka Jehova kanu n’i dusukun bɛɛ ni i niin bɛɛ ani i ka miiriya bɛɛ ye, yala a daan ye k’o miiri i kɔnɔ dɔrɔn wa?

7. K’a miiri i kɔnɔ ko i be Ala kanu, yala kanuya sɔbɛ be dan o ma wa? A ɲɛfɔ.

⁷ I ko Bibulu b’a ɲɛfɔ cogo min na, ka Ala kanu o tɛ dan dusukunnako ma. Hali n’a kɔrɔtalen lo ka miiri i kɔnɔ ko i be Jehova kanu, o ye kanuya sɔbɛ daminɛ dɔrɔn lo ye Jehova fan fɛ. Tiɲɛn lo, yiriden kisɛ lo be falen ka kɛ yiri ye min be deen kɛ. Nka, n’i be yiriden fɛ ani mɔgɔ dɔ ye a kisɛ dɔrɔn di i ma, yala o b’i wasa wa? Ayi dɛ! O cogo kelen na, k’a miiri i kɔnɔ ko i be Jehova kanu, o ye o koo daminɛ dɔrɔn lo ye. Bibulu b’a fɔ ko: “Ka Ala kanu, o ye nin de ye, ka a ka ci fɔlenw mara. A ka ci fɔlenw man gɛlɛn.” (1 Zan 5:3, ABM ). Walisa an ka Alakanu ka kɛ kanuya sɔbɛ ye, fɔɔ a ka deen ɲuman kɛ. An ka kan k’o kanuya yira an ka kɛwaliw lo fɛ.—Matiyo 7:16-20.

8, 9. An be se k’a yira cogo di ko an be Ala kanu ani ko an b’a waleɲuman lɔn?

⁸ An b’a yira ko an be Ala kanu n’an b’a ka cikanw n’a ka sariyaw sira tagama. A man gwɛlɛ kojugu k’o kɛ. Jehova m’a ka sariyaw latigɛ walisa k’an tɔɔrɔ, nka u y’u latigɛ k’an dɛmɛ ka ɲɛnamaya kɛ hɛɛrɛ ni ninsɔndiya la ani ka wasa (Ezayi 48:17, 18). An sankolola Faa Jehova ye koo minw  bɛɛ kɛ an ye, an b’a yira ko an b’a waleɲuman lɔn kosɔbɛ an kɛtɔ k’a ka ladiliw sira tagama. A fɔ man di, nka bi duniɲa kɔnɔ, mɔgɔ caaman t’o kɛ. An t’a fɛ ka kɛ waleɲumanlɔnbaliw ye i n’a fɔ Yezu ka wagati la mɔgɔ dɔw. Yezu ye kunatɔ tan dɔw kɛnɛya, nka u la kelen dɔrɔn kɔsegira ka na a fo (Luka 17:12-17). An kɔni b’a fɛ k’ale lo ladegi, an t’a fɛ ka kɛ kunatɔ waleɲumanlɔnbali kɔnɔntɔn ɲɔgɔnw ye.

⁹ O la do, an ka kan ka Jehova ka cikan jumanw lo mara? An ye u caaman lajɛ gafe nin kɔnɔ, nka an ka segi u damanin kan. O cikanw sira tagamani bena an dɛmɛ ka to Ala ka kanuya la.

10. A ɲɛfɔ fɛɛn min kama a kɔrɔtalen lo an ka to k’a ɲini ka Jehova Ala lɔn.

¹⁰ Walisa k’i magwɛrɛ Jehova la, a kɔrɔtalen lo kosɔbɛ i k’a ɲini k’a lɔn. An man kan k’o dabila abada. N’a y’a sɔrɔ i tun be nɛnɛba la kɛnɛma suu fɛ ani i be tasuma jara, yala i tun bena a to tasuma barika ka dɔgɔya ani ka  faga wa? Ayi. I tun bena to ka lɔgɔw daa don walisa tasuma ka barika sɔrɔ. N’i m’o kɛ i niin be se ka to a la! I ko lɔgɔ b’a to tasuma be barika sɔrɔ, ‘Ala lɔnniya’ fana b’a to an ka kanuya be barika sɔrɔ Jehova ta fan fɛ.—Talenw 2:1-5, ABM.

11. Yezu ka kalan ye nɔɔ juman to a ka kalandenw kan?

¹¹ Yezu tun b’a fɛ a ka kalandenw ka kanuya barika kana dɔgɔya Jehova ta fan fɛ ani a ka tiɲɛn Kuma nafamanba ta fan fɛ. A lakununi kɔ, kiraya kuma minw sɛbɛra Heburukan Sɛbɛninw kɔnɔ ani u dafara ale kan, a ye u dɔw ɲɛfɔ a ka kalanden fila dɔw ye. O ye mun kɛ u la do? Kɔfɛ, olu yɛrɛ y’a fɔ ko: “A kumana an fɛ sira la ka Kitabuw kɔrɔw yira an na tuma min na, an dusukun ɲagalilenba tun tɛ wa?”—Luka 24:32, ABM.

12, 13. (a) Bi, mɔgɔ caaman ka kanuya be cogo di Ala ta fan fɛ ani Bibulu ta fan fɛ? (b) An be se ka mun lo kɛ walisa an ka kanuya kana sumaya?

¹² Tuma min na i y’a daminɛ ka Bibulu ka kalan tigitigi lɔn, yala i m’a kɔrɔsi ko i dusukun ɲagalila ninsɔndiya, kisɛya ani kanuya kosɔn Ala koo la wa? Siga t’o la. O kɛra mɔgɔ caaman fana na. Ayiwa, min ka gwɛlɛ sisan, o ye k’a to o kanuya kana sumaya ani ka dɔ fara a barika kan. An t’a fɛ ka tugu bi duniɲa ka miiriyaw kɔ. Yezu tun kɔnna k’a fɔ ko: “Mɔgɔ caman ka kanuya na sumaya.” (Matiyo 24:12, ABM ). I be se ka mun lo kɛ walisa i ka kanuya kana sumaya Jehova ta fan fɛ ani Bibulu ka tiɲɛn kalan ta fan fɛ?

¹³ I ka to k’a ɲini ka Jehova Ala ni Yezu Krista lɔn (Zan 17:3). I be min kalan Ala ka Kuma kɔnɔ, i ka miiri o kan kosɔbɛ i kɛtɔ k’i yɛrɛ ɲininga ko: ‘Ne be kalan juman sɔrɔ o la Jehova Ala koo la? O be sababu wɛrɛ juman di ne ma ka Jehova kanu ni n’ dusukun bɛɛ ni n’ hakili bɛɛ ani n’ niin bɛɛ ye?’ (Zaburuw 143:5). N’i be miiri nin cogo la, i ka kanuya bena to ka barika sɔrɔ Jehova ta fan fɛ.

14. Delili sababu fɛ, an ka kanuya be se ka barika sɔrɔ cogo di Jehova ta fan fɛ?

¹⁴ Fɛɛrɛ wɛrɛ be se ka dɔ fara i ka kanuya barika kan  Jehova ta fan fɛ: i ka to k’a deli tuma o tuma (1 Tesalonikaw 5:17). Gafe nin kalansen 17nan na, an y’a ye ko delili ye Ala ka nilifɛn nafamanba dɔ ye. Adamandenw ka jɛnɲɔgɔnya be barika sɔrɔ n’u be to ka kumaɲɔgɔnya kɛ u sago la. O cogo kelen na, an ni Jehova ka jɛnɲɔgɔnya be diya ani a be barika sɔrɔ n’an b’a deli tuma o tuma. A kɔrɔtalen lo an ka deliliw kana kɛ kuma gwansanw ye an be segi minw kan tuma o tuma, u tɛ bɔ an dusu la ani an yɛrɛ tɛ miiri u kɔrɔ la. An ka kan ka kuma Jehova fɛ i ko deen be kuma a faa fɛ min koo ka di a ye. Tiɲɛn lo, an b’a fɛ ka kuma ni bonya ye. Nka, an b’a fɛ k’o kɛ ni kɔnɔgwɛ ye, an sago la ani n’an dusukun bɛɛ ye (Zaburuw 62:9). Ka Bibulu sɛgɛsɛgɛ an yɛrɛ ma ani ka delili kɛ ni kɔnɔgwɛ ye, o koow kɔrɔtalen lo kosɔbɛ an ka batoli la. U b’an dɛmɛ ka to Ala ka kanuya la.

15, 16. Mun na a bɛnnen lo ka Masaya waajuli baara jati i ko nɛɛma ani nafoloba?

¹⁵ Ka Bibulu sɛgɛsɛgɛ an yɛrɛ ma ani ka delili kɛ, o ye batoli walew ye an be se ka minw kɛ an kelen n’an kelen. Nka sisan, an k’an ka batoli faan dɔ lajɛ an be min kɛ bɛɛ ɲɛɛ na: k’an ka lannakow ɲɛfɔ mɔgɔw ye. Yala i delila ka Bibulu ka tiɲɛn kalan kofɔ mɔgɔw ye wa? N’i y’o kɛ, o kɛra nɛɛmaba ye i fɛ (Luka 1:74). An ye tiɲɛn kalan min sɔrɔ Jehova Ala koo la, n’an b’o ɲɛfɔ mɔgɔw ye, an be ciiba dɔ lo dafara min kalifara kerecɛn sɔbɛw bɛɛ ma: o ye ka waajuli kɛ Ala ka Masaya kibaro diiman koo la.—Matiyo 24:14; 28:19, 20.

¹⁶ Ciden Pol tun b’a ka waajuli baara jati fɛɛn nafamanba ye. A y’a fɔ ko o ye nafoloba ye (2 Korɛntikaw 4:7). Ka kuma mɔgɔw fɛ Jehova Ala n’a sagonataw koo la, o ye baara fisaman ye i ma deli ka min ɲɔgɔn kɛ sabu i be baara kɛra Kuntigi fisaman lo ye. Ani, o baara sara ɲɔgɔn tɛ yen. I kɛtɔ k’i seen don o baara la, i be mɔgɔ sɔbɛw dɛmɛ u k’u  magwɛrɛ an sankolola Faa la ani u ka ɲɛnamaya banbali sira ta! Baara wɛrɛ si tɛ se ka mɔgɔ wasa o cogo la! Ka fara o kan, n’i be waajuli kɛ Jehova koo la ani a ka Kuma koo la, i ka limaniya n’i ka kanuya be barika sɔrɔ ale ta fan fɛ. Jehova fana tɛ ɲinɛ i ka jijali kɛli kɔ (Eburuw 6:10). N’i b’i  timinandiya o baara la, o bena i dɛmɛ ka to Ala ka kanuya la.—1 Korɛntikaw 15:58.

17. Mun na kerecɛnw ka waajuli baara ye kɔrɔtɔko ye bi?

¹⁷ A kɔrɔtalen lo an k’a to an hakili la ko Masaya waajuli baara ye kɔrɔtɔko ye. Bibulu b’a fɔ ko: “I ka Ala ka kuma fɔ ka i jija a la.” (2 Timote 4:2, ABM ). Bi, mun na kɔrɔtɔko lo ka waajuli kɛ? Ala ka Kuma b’a fɔ an ye ko: “Matigi ka diminya donba surunyara. A surunyara, a bɛ teliya ka na.” (Sofoni 1:14, ABM ). Tiɲɛn na, Jehova bena bi duniɲa nin halaki wagati min na, o wagati be teliyara ka na. An ka kan ka mɔgɔw lasɔmi o koo la. U mako b’a la k’a lɔn ko sisan lo ye wagati ye ka sɔn Jehova ka Masabaya la. Duniɲa laban loon “tɛna to kɔ.”—Abakuki 2:3, NW.

18. Mun na an ka kan ka jɛn ni kerecɛn sɔbɛw ye ka Jehova bato bɛɛ ɲɛɛ na?

¹⁸ Jehova b’a fɛ an ka jɛn ni kerecɛn sɔbɛw ye k’ale bato bɛɛ ɲɛɛ na. O lo kosɔn a ka Kuma b’a fɔ ko: “An ka jija ka ɲɔgɔn dɛmɛ ka kanuya sira taama, ka koɲuman kɛ. An kana ban ka taga an ka ɲɔgɔnlajɛnyɔrɔ la, i n’a fɔ dɔw be to k’a kɛ cogo min na. Nga an ka ɲɔgɔn jaa gwɛlɛya, bari aw yɛrɛ ɲaa b’a la ko Matigi ka loon surunyana ka ban.” (Eburuw 10:24, 25). An mana jɛn n’an kerecɛnɲɔgɔnw ye kafo ka lajɛnw na, an be sababu ɲuman sɔrɔ k’an ka Ala kanulen tando ani k’a bato. An fana be ɲɔgɔn jaa gwɛlɛya ani an be ɲɔgɔn barika bonya Alako ta fan fɛ.

19. An be se ka mun lo kɛ walisa kanuya ka barika sɔrɔ an ni ɲɔgɔnw cɛ kafo kɔnɔ?

¹⁹ N’an be jɛn ni Jehova batobaga wɛrɛw ye, kanuya ni teriya minw be yen an ni ɲɔgɔn cɛ kafo kɔnɔ, u be barika sɔrɔ. Jehova be jogo ɲumanw lo ɲini an na. A kɔrɔtalen lo an fana ka ɲɔgɔn ka jogo ɲumanw lo ɲini. An kana a ɲini an kerecɛnɲɔgɔnw fɛ u ka kɛ mɔgɔ dafanenw ye. An kana ɲinɛ ko bɛɛ ka ɲɛtaga tɛ kelen ye Alako ta fan fɛ ani ko an bɛɛ be fili (Kɔlɔsikaw 3:13). Jehova koo ka di minw ye kosɔbɛ, i k’a ɲini ka teriya sɔbɛ kɛ n’olu ye. O la, i bena a ye  ko i be kɔgɔra Alako ta fan fɛ. Minw ye i balimaw ye Alako ta fan fɛ, i ka Jehova bato n’olu ye. O bena i dɛmɛ ka to Ala ka kanuya la. Minw be Jehova bato kantigiya la ani u be to a ka kanuya la, a be olu sara cogo di?

20, 21. ‘Ɲɛnamaya sɔbɛ’ ye mun ye ani mun na o ye jigiya ɲumanba ye?

²⁰ Jehova be a sagokɛla kantigimanw sara ni ɲɛnamaya ye. Nka, ɲɛnamaya sifa juman lo? Ayiwa, yala e ka bi ɲɛnamaya ye ɲɛnamaya sɔbɛ ye wa? An caaman bena a fɔ ko ɔnhɔn kɛ! Tiɲɛn lo, an be nɛnɛkiri, an be dumuni kɛ ani an be jii min. O kama, an be se k’a fɔ ko an be niin na. Ani, k’an to an ka ɲɛnamaya tan ni fila la, n’a sɔrɔ an yɛrɛ b’a fɔ ko: “Sisan kɔni, an be ɲɛnamaya diya bɔra a ɲɛɛ ma!” Nka, Bibulu b’a yira ko adamaden si tɛ ɲɛnamaya sɔbɛ kɛra ka kɛɲɛ ni ɲɛnamaya kɔrɔ tigitigi ye.

²¹ Ala ka Kuma b’an jija ko an ka “ɲɛnamaya sɛbɛ sɔrɔ.” (1 Timote 6:19, ABM ). O kumaw b’a yira ko ‘ɲɛnamaya sɔbɛ’ ye fɛɛn ye an jigi b’a la ka min sɔrɔ sini. Ni an nana kɛ mɔgɔ dafanenw ye, an bena kɛ ɲɛnamaya la a ɲɛɛ ma sabu an bena ɲɛnamaya kɛ i ko Ala tun b’a fɛ cogo min na a daminɛ na. Ni an nana ɲɛnamaya kɛ alijɛnɛ kɔnɔ dugukolo kan kɛnɛya dafanen na ani ɲɛsuma ni hɛɛrɛ la, o tuma na kɔni, a bena kɛ ‘ɲɛnamaya sɔbɛ’ ye, o kɔrɔ, ɲɛnamaya banbali (1 Timote 6:12). Nin ye jigiya ɲuman ye dɛ, tiɲɛn tɛ?

22. I be se ka ‘ɲɛnamaya sɔbɛ sɔrɔ’ cogo di?

²² An be se ka “ɲɛnamaya sɛbɛ sɔrɔ” cogo di? O kuma kelen sen fɛ, ciden Pol ye kerecɛnw jija u ka “ko ɲuman kɛ” ani “u ka nafolotigiya ka kɛ kɛwale ɲumanw kɛli ye.” (1 Timote 6:18, ABM ). O b’a yira ka gwɛ ko an ye tiɲɛn kalan min sɔrɔ Bibulu kɔnɔ, a kɔrɔtalen lo kosɔbɛ an k’o sira tagama. Nka, yala Pol tun b’a fɛ k’a fɔ ko an ka kɛwali ɲumanw lo b’a to an ka kan ni ‘ɲɛnamaya sɔbɛ’ ye wa? Ayi,  sabu an be ni jigiya ɲuman min ye, o be bɔ “Ala ka nɛɛma” dɔrɔn lo la (Ɔrɔmukaw 5:15). Minw be baara kɛ Jehova ye kantigiya la, a ka di a ye k’u sara. A b’a fɛ k’i ye ‘ɲɛnamaya sɔbɛ’ la. Minw be to Ala ka kanuya la, olu jigi b’a la k’o ɲɛnamaya ɲɔgɔn kɛ hɛɛrɛ ni ɲɛsuma na fɔɔ abada.

23. Mun na a kɔrɔtalen lo ka to Ala ka kanuya la?

²³ A ka ɲi an kelen-kelen k’an yɛrɛ ɲininga ko: ‘Yala ne be Ala bato i ko a y’a fɔ cogo min na Bibulu kɔnɔ wa?’ Loon o loon, n’an b’an yɛrɛ sɛgɛsɛgɛ ka filɛ ko an b’o lo kɛ, o la, an be sira ɲuman kan. An be se ka la a la ko Jehova ye an dogoyɔrɔ ye. A bena a sagokɛla kantigimanw tanga bi duniɲa ɲagaminen ka laban wagati kuru bɛɛ la. A bena u ladon duniɲa kura nɔɔrɔman kɔnɔ min wagati ka surun sisan. A bena kɛ ɲagaliba ye an fɛ ka kɛ o wagati la dɛ! A bena kɛ ninsɔndiyaba ye an fɛ k’a ye ko an ye sira ɲuman sugandi laban wagati nin na. N’i y’o sira ɲuman sugandi bi, i bena ‘ɲɛnamaya sɔbɛ’ diya bɔ fɔɔ abada i ko Jehova Ala tun b’a fɛ a kɛ cogo min na!